O Lē Tuuina Atu le Tausiga

Ou te faafetai i le faatasi ai ma outou i le po nei. O tamaitai o le Ekalesia a Iesu Keriso o loo agai i luma i le avea ai ma sosaiete o tuafafine lea sa faamatalaina e le tina o le Perofeta o Iosefa Samita, o Lusi Maki Samita, i upu nei: “E tatau ona tatou faatauaina le tasi ma le isi, leoleo i le tasi ma le isi, faamafanafana i le tasi ma le isi ma ia aoaoina, ina ia mafai ai ona tatou nonofo uma i lalo faatasi i le lagi.”¹

E tolu vaega o loo i ai i lena faamatalaga ofoofogia o agavaa e feoeoeai ai i se tulaga o le fiafia faatasi ma le Atua. O le tasi o le fetausiai o le tasi ma le isi. O le isi o le aoao atu lea o le tasi ma le isi ma ia aoaoina. Ma le lona tolu o le nonofo faatasi i lalo ma le Atua.

O lo’u faamoemoega i le po nei o le fesoasoani atu lea ia te oe ia e lagonaina le viia ma le talisapaia e le Atua o mea ua uma ona e faia e fesoasoani ai i le tasi ma le isi ia ausia lena sini silisili. Ma le lona lua, o le faamatala atu lea o nisi o mea o le a oo mai i la outou auaunaga tuufaatasi.

E pei o tuafafine o se taimi anamua, ua outou tali atu foi i le valaau a le Alii ia o atu e fai ma toomaga o isi. I le 1856, sa talosagaina ai e le perofeta o Polika Iaga le Au Paia ina ia o atu e fesoasoani i paionia o taavaletosolima sa pagatia i atumauga kiona. Sa ia fai atu i lena taimi o puapuaga i tagata o le au paia i le konafesi aoao: “O lo outou faatuatua, tapuaiga, ma tautinoga o talitonuga faalelotu, o le a le mafai lava ona faaolaina ai se tasi o o outou agaga i le malo selesitila o lo tatou Atua, sei vagana ua outou faatinoina na mataupu faavae e pei ona ou aoaoina atu ai nei outou. O atu ia ma aumai na tagata i laufanua valevalenoa, ma taulimaina ma le totoa mea na ua tatou ta’ua o mea faaletino, … a leai, o le a leai lava se aoga o lo outou faatuatua.”²

Sa tali mai le faitau selau o tamaitai i Iuta. E ui i lo latou matitiva ae sa latou faatumuina taavaletoso i mea uma sa mafai ona latou faaagaga ma mea uma na mafai ona latou aoina mai i isi e faamafanafana ai i latou na mafatia. Sa tusia e se tasi o na tuafafine lototoa e faapea, “E mafai ona ou faapea atu, ou te lei lagonaina lava se faamalieina sili atu ma le fiafia i soo se galuega sa faatinoina i lo’u olaga, e pei o sea lotogatasi o lagona sa i ai.”³

Ina ua maea le laveaiga ma liusuavaia foi le kiona, sa tusia e lena lava tuafafine le fesili o lona loto faamaoni: “O le a le isi mea e sosoo ai mo i latou e naunau e galulue e fai?”⁴

I o tatou aso, o vaega o tuafafine lotototoa i le salafa o le lalolagi ua liliu atu lo latou faatuatua i faatinoga i le faitau selau o nofoaga. Ma latou te fesili i o latou loto ma tatalo i le fesili lava lea e tasi e uiga i le lumanai o o latou olaga auauna.

O outou taitoatasi o loo i ai se nofoaga tulaga ese i lau malaga i le ola e faavavau. O nisi ua tele ni tausaga o aafiaga, ma isi o loo fou i le avea ai o i latou ma soo i le olaga nei. E tulaga ese tagata taitoatasi i lona talafaasolopito patino ma ona luitau. Ae o outou uma o tuafafine ma afafine faapelepele o lo tatou Tama Faalelagi, lē o silafia ma leoleo ia te outou taitoatasi.

O le mea o loo lelei ona outou faia faatasi ma le ofoofogia o le faatauaina, leoleo, ma faamafanafana atu i le tasi ma le isi. Sa ou molimauina lena vavega tafatolu i le tasi masina talu ai i la outou auaunaga mo se tuafafine. I le avea ai o au ma ona tamā, ou te faafetai atu ia te outou ma ou te tuuina atu foi la’u faafetai i le Atua sa taialaina se faiaoga asiasi se toatasi.

O lo ma afafine o Elizabeth, e nofo i se isi setete ma le taimi e ese mai ia i tatou, sa i ai i le fale faatasi ma lana tama teine e tolu tausaga. O le isi ana tama faatoa tasi lona vaiaso i le aoga amata. Ua ono masina le maitaga o Elizabeth, ma sa tulimatai atu i le fanau mai o lana tama lona tolu, lea sa fai mai fomai o le isi foi teine. O lona toalua o Joshua, sa faigaluega.

Ina ua ia iloa ua alu le palapala [tulou] ma ua malosi tele, sa ia valaau atu i lona toalua i le telefoni. Sa ta’u mai e valaau le taavale a le falemai ma o le a la feiloai ai i le falemai, lea e 20 minute mai lona fale. A o lei viliina le telefoni, sa ia faalogoina se tuitui mai i le faitotoa i luma.

I le faitotoa, sa faateia o ia i le vaai atu i lana soa faiaoga asiasi o le Aualofa. E leai se la asiasiga i lena taeao. Sa lagonaina lava e lana soa e tatau ona ia sau e asi ia Elizabeth.

Sa fesoasoani o ia e taitai atu o ia i le taavale. Sa la taunuu i le falemai i ni nai minute a o lei taunuu atu Joshua mai lana galuega. Sa filifili fomai i totonu o le 20 minute ina ia fai le taotoga e faasaoina ai Elizabeth ma lana pepe. O lea sa fanau mai ai se teine itiiti lava i le lalolagi, ma tagi leotele, 15 vaiaso ua vave mai ai nai lo le taimi faatulagaina. E tasi le pauna lona mamafa, sefulutasi aunese (765g). Ae sa ola o ia, faapena foi ma Elizabeth.

Sa faataunuuina se vaega o upu a Lusi Maki Samita i lena aso. O se uso faamaoni o le Aualofa, sa uunaia e le Agaga Paia, sa leoleo, faatauaina, ma faamafanafana i lona uso i le malo o le Atua. O ia faatasi ma le faitau sefulu afe o isi sa tuuina atu ia auaunaga musuia i le gasologa o tupulaga e le gata e faafetaia e i latou na latou fesoasoani i ai ma e pele ia i latou ae o le faafetai foi a le Atua.

E te manatuaina Ana upu o le talisapaia ia i latou e mauaina sina faamamaluga mo lo latou agalelei: “Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o ou uso nei, o au lea na outou faia i ai.”⁵

Ae o le vavega o le tasi uso o le Aualofa sa taunuu atu e fesoasoani i le taimi tonu lea, ua faateleina e ala i le mana o le sosaiete tuufaatasi a tuafafine. E na o se vaega lenei o le savali sa auina atu e le epikopo a Elizabeth ia Elizabeth ma Joshua i le falemai i ni nai itula ina ua mavae le fanau mai o le pepe:

Sa faaauau le saunoaga a le epikopo e uiga ia te ia lava faapea foi le uarota: “Sa matou o mai foi i le falemai ma nonofo faatasi ma tamaiti i le potu taalo pe a le mananao ia tina e tuua i latou i se isi nofoaga.”

Ona fai mai lea: “Ioe, o le a matou le faatinoa lava le matou fuafuaga e aunoa ma se faamaopoopoga ma se faatagaga mai ia te oe. E na ona fia faailoa atu lava ia te oe ina ia e le popole i mea e mafai [ma o le a] matou faia.”

O le mea sa latou faia mo lo’u afafine na mafai ai ona ia maua se taimi taua ma lana pepe itiiti lava ina ua ia sapaia o ia, mo le taimi muamua.

Ona faaiuina lea e le epikopo lana savali ia Joshua ma Elizabeth i le savali lea e auina atu e tuafafine e uiga i lo latou tuuto i le lalolagi atoa e auauna atu i isi mo le Matai: “Taofimau le faatuatua.”

Faatasi ai ma o outou eseesega uma i tulaga faaletagata lava ia ma aafiaga ua tuanai, e mafai ona ou ta’u atu ia te outou se mea o loo i ai i lo outou lumanai. A o outou taofimau i le faatuatua, o le a outou maua outou lava o loo valaauliaina e le Alii i le tele o taimi e auauna atu i se tasi o puapuagatia i taimi o le a foliga mai e le talafeagai. Atonu o le a foliga mai e avea o se mea le fiafia ma atonu o se galuega faigata. Pe a oo mai le valaau, atonu o le a foliga mai e le o manaomia oe pe faapea foi e faigofie e se tasi ona tuuina atu le fesoasoani.

Manatua pe a tuu mai e le Alii ia tatou fetaiai ma se tasi o puapuagatia, tatou te faamamaluina le Samaria agalelei mo le mea na ia le faia e tusa ma le mea na ia faia. Sa ia le laaloa i le isi itu e ui o le tagata malaga na fasia i luga o le ala o se tagata ese ma atonu o se fili. Sa ia faia le mea na ia mafaia mo le tagata na fasia ona ia faatulaga lea o se fuafuaga patino mo isi e faia ai nisi mea sili atu. Sa ia faia lena mea ona sa ia malamalama e faapea o le fesoasoani atu e mafai ai ona manaomia nisi mea sili atu nai lo mea e mafai ona faia e se tagata se toatasi.

O lesona i lena tala e mafai ona taialaina ai oe i soo se mea o loo faapolopolo e lou lumanai mo oe. O na lesona lava e tasi o loo i ai i ou lava aafiaga a o e tamaitiiti po o aafiaga lata mai nei.

E le itiiti ifo ma le faatasi, pe atonu foi e faatele, sa faateia ai oe i taimi e te fetaiai ai ma se tasi o loo manaomia ona tausiaina. Atonu o se matua, se matua matua, se uso, po o se tamaitiiti ua taia i se faamai po o ni tulaga le atoatoa o le malosi. O ou lagona o le agaalofa e sili atu i ou manaoga faaletagata. O lea e amata ai ona e fesoasoani atu.

E pei o le tagata malaga i le tala faatusipaia o le Samaria agalelei, e foliga mai o le fesoasoani na manaomia sa liua i se tausiga mo se taimi umi atu nai lo le mea e mafai ona e tuuina atu na o oe. Sa manaomia ona tuu atu e le Samaria le tagata malaga i le tausiga a le pule o le faletalimalo. O le fuafuaga a le Alii mo le auauna atu i isi o manaomia le fesoasoani e faia faavaega.

E valaaulia e le aunoa e epikopo ma peresitene o Aualofa ia tagata o le aiga e fesoasoani i le tasi ma le isi pe a i ai se manaoga faaleuelefea. E tele ni mafuaaga mo lena mataupu faavae. Mafuaaga muamua lava o le tuuina atu lea i le tele o tagata o faamanuiaga o le alofa faateleina lea e sau mai le auauna atu o le tasi i le isi.

Ua e matauina ma lagonaina lena faamanuiaga. Soo se taimi lava e te tausia ai se tasi e tusa lava po o sina taimi puupuu ua e lagonaina lava le alofa mo le tagata sa e auauna i ai. Pe a faaumiumi tele atu taimi e tuu atu ai le tausiga manaomia, o le a faateleina foi lagona o le alofa.

Talu ai o tatou o tagata, o lena faateleina o le alofa e mafai ona faalavelaveina e lagona o le le fiafia ma le lelava. O le isi mafuaaga lena ua tuu mai ai e le Alii ia i tatou le fesoasoaniga a isi i la tatou auaunaga ia i latou o manaomia le fesoasoani. O le mafuaaga lena ua faatuina ai e le Alii ia sosaiete e fetausia’i ai tagata.

I ni nai vaiaso talu ai sa ou i ai i se sauniga faamanatuga a o tulai ane se tamaitai talavou ina ia lagolagoina o le taitai faamaopoopo fesoasoani o faiaoga asiasi, o se tofiga ou te lei iloa e i ai. Sa ou manatunatu pe o ia iloaina le faamamaluina o ia e le Alii. Ona o se tamaitiiti lē lavā, o lea sa ia tuua ai le sauniga a o lei mafai ona ou ta’u atu ia te ia le tele o le alofa ma le talisapaia e le Alii o lana fesoasoani e faamaopoopo ia taumafaiga a Ona soo.

O le tausia o i latou e manaomia le fesoasoani e manaomia ai se au, se sosaiete alolofa ma lotogatasi. O le mea lena o loo fausia e le Alii ia te outou. E alofa o Ia mo soo se vaega o loo outou faia.

O se tasi faamaoniga o Lana faafetai e faapea e faatagaina e le Atua oe e lagonaina le alofa faateleina mo i latou e te auauna i ai. O le mafuaaga lena e te tagi ai i le maliu o se tasi sa e auauna i ai mo se taimi umi. O le le toe maua o se avanoa e tausi ai i latou e mafai ona pei lava e te lagonaina se lagona mafatia tele atu nai lo le tuueseeseina le tumau. Na ou faalogo i se tamaitai—ua leva ona ou masani ai—talu ai nei, i le vaiaso na maliu ai lana tane, o molimau i le agaga faafetai mo le avanoa sa ia auauna ai ia te ia e oo i le iuga o lona soifua. Sa lei vaaia ni loimata, ae sa vaaia lana ataata fiafia.

E ui e matua tauia lava se auaunaga faaumiumi ma le alofa i tagata, ae e te aoaoina e faapea o loo i ai faatapulaa faaletino, faalelagona, ma faaletupe i mea e mafai ai. O le tagata e lava le umi e tuu atu ai se tausiga e mafai ona avea ma se tasi e manaomia le tausiga.

Sa tuuina mai e le Alii, le Matai Sili e Tausia tagata puapuagatia, le apoapoaiga musuia i tagata vaivai e tausia isi i upu nei na tuuina atu e le Tupu o Peniamina ma o loo tusia i le Tusi a Mamona: “Mo le taofia pea o le faamagaloina o a outou agasala … ou te manao ia outou faasoa atu a outou mea i e matitiva, ia taitasi le tagata ma faia e tusa ma mea ua ia te ia, e pei o le fafagaina o e ua fia aai, faaoofuina o e ua le lavalava, asiasi atu i e mamai ma auauna atu mo lo latou mapusaga, faaleagaga ma faaletino, e tusa ma o latou manaoga.”⁶

Ae ina ua ia faaauau ai le lapatai mai i nisi o outou e ono le mafai ona tali atu i le faamaoniga o loo faaauau pea ona agai mamao atu ma umi atu i a outou auaunaga: “Ma ia vaai ia faia nei mea uma i le poto ma le faatulagaga lelei; ona e le tatau i se tagata ona momoe e televave atu nai lo le malosi ua ia te ia. O lenei foi, e tatau ia te ia ona filiga, ina ia mafai ona manumalo o ia i le taui; o lea, e tatau ona faia mea uma i le faatulagaga tatau ai.”⁷

E mafai ona faigata ona faaaoga lena fautuaga pe a foliga mai o tau filifili pe faapefea ona faapaleniina se manao e fai mea uma e te mafaia e fesoasoani ai i isi ma le poto e taulimaina ai ou lava manaoga ina ia faatumauina ai lou mana e auauna atu ai. Atonu ua e vaaia isi o tauivi ma ia filifiliga faigata. O le tasi faataitaiga o le filifiliga e tausi se tagata ua pulapula lagoto le soifua i le fale po o se nofoaga mo tagata matutua i le taimi ua e matua vaivai ai foi.

O mea ua e iloa e uiga i le ata o le faaolataga e mafai ona avea ma ou taiala i ia filifiliga faavaivailoto. O le isi mafuaaga lena sa saunoa ai ma le atamai ia Lusi Maki Samita e faapea o tuafafine e ao ona “aoaoina.”

E fesoasoani le i ai o se talitonuga maumaututu o le faamoemoega o le Alii mo fanau uma a le Atua i taimi faigata o le olaga faaletino. Sa Ia aoaoina le ute o le ata o le faaolataga i le Perofeta o Iosefa i le ala lenei a o ia tauivi ina ia malamalama i ona tofotofoga sa foliga mai e le muta: “Ma ona oo lea, afai e te talitalia lelei, o le a faaeaina oe e le Atua i lugā.”⁸

Ona avea lea o le tatou filifiliga sili e fesoasoani atu ai i se tasi i taimi o tofotofoga faigata ma lenei, “O le a le ala e tatau ona ou mulimuli ai o le a sili ona fesoasoani ai i le tagata ou te alofa i ai ia ‘talitalia lelei ai’? O le faamoemoega e mo tatou ina ia latou lagona tele ai e mafai ona latou faatinoina le faatuatua ia Keriso, faatumauina se faamoemoe ola o le ola e faavavau, ma faatino le alofa mama, le alofa le pona o Keriso, e oo i le iuga o lona soifua.

Ua ou vaai i tuafafine i le malo o loo tuu atu lena taulai i le Faaola ma Lona faamoemoega. Mafaufau i taimi sa e alu ai i totonu o le potu sa fono ai le Aualofa po o le Peraimeri po o Tamaitai Talavou.

O se ata o le Faaola po o Ana upu atonu ua le manino mai, ae e te iloa sa lagonaina se molimau o le moni ma le taua o Lana Togiola i lena itula e faapei ona i ai i lenei afiafi. Atonu e lei i ai se ata o se malumalu paia po o upu “E Mafai Ona Faavavau Aiga,” ae e mafai ona e vaaia le faamoemoe i o latou laufofoga fiafia.

Ma ua outou vaai i ai, e pei foi o au, i se faiaoga asiasi atamai o loo fausiaina le talitonuga i se uso o loo tauivi ona o lana auaunaga i se isi tagata, tusa lava pe ua le aoga, ae e manaomiaina pea lava ma e taua. E saili e peresitene maoae o Aualofa ni auala e tuu atu ai ia i latou e manaomiaina le tausiga, le fesoasoani e ala i le tausiga a isi. Latou te fatuina ni avanoa mo uso e onosaia lelei ai tofotofoga a o latou tausia le tasi ma le isi i le alofa le pona o Keriso. E mafai ona aofia ai le faatauanau atu ma le agamalu i le tagata ua vaivai o loo tuuina atu se tausiga ina ia malolo ma taliaina le fesoasoani a isi.

E mafai ona faia e tuafafine lena mea e ala i le faatelegese ona faamasino atu ia i latou o loo feagai ma tofotofoga. O le tele o tagata o loo tauaveina ni avega mamafa e amata ona masalosalo ia i latou lava ma lo latou lava taua. Tatou te faamamaina a latou avega pe a tatou onosai i o latou vaivaiga ma patipatia soo se lelei e mafai ona tatou vaaia ia i latou. O loo faia e le Alii lena mea. Ma e mafai ona tatou mulimuli i Lana faataitaiga—o Ia le silisili lana faafailelega i lo tagata uma.

Tatou te talanoa soo lava i le li’o o tuafafine i le Ekalesia a Iesu Keriso. O le a tatou aoao ia iloa e i ai pea le Faaola i taimi uma i le li’o pe a tatou valaauliaina o Ia.

O le a faateleina pea lo tatou vaaia o afafine o le Atua e valaauliaina tuafafine i totonu i le li’o faatasi ma i latou. Pe a o mai tuafafine i se fonotaga ma tau vaavaai mo se nofoa, o le a latou faalogoina ni upu mālū o tautalagia, “Faamolemole sau ta nonofo i i.”

O le a tatou faalogoina na upu i lena aso o lumanai na muai vaaia e Lusi Maki Samita lea o le a “nonofo faatasi ai i lalo tuafafine i le lagi.” Tatou te le saunia mo lena aso i sina taimi itiiti. O le a oo mai i aso ma tausaga o le tausiaina o le tasi ma le isi ma le aveina ifo o upu o le ola e faavavau i le taele o o tatou loto.

O la’u tatalo ia toatele i tatou o le a faatasi i le lumanai mamalu o loo i o tatou luma atu. Ou te molimau atu ia te outou o lo outou faamoemoe mo na aso o le a faamaoniaina. Ua mafai lena mea ona o Iesu Keriso e ala i Lana Togiola e le gata mo outou taitoatasi. E faafofoga ma tali mai le Tama Faalelagi i au tatalo o le faatuatua mo le taitaiga ma mo le fesoasoani e onosai ai i lau auaunaga mo Ia.

Ua auina atu le Agaga Paia ia te oe ma i latou o loo e tausia. O le a faamalosia oe ma musuia oe ia iloa tuaoi ma le tele o lou gafatia e auauna atu ai. O le a faamafanafanaina oe e le Agaga pe a e tuufesili, “Sa lava ea mea na ou faia?”

Ou te molimau atu o le a faatasi le Alii ma oe ma o le a saunia lou ala, ma Ia faailogaina mo oe i lau auaunaga ia i latou e alofa i ai o Ia i o latou manaoga ma tofotofoga. I le suafa paia o Iesu Keriso, amene.