Ewe Akkewin Annuk mi Napanap

Ese wor eu mwichen aramas non uroun fenufan ua tongei nap seni ekkewe engon me emon Aposel mi manau mwirin manon, manasefanin, me feitan ewe Chon Amanaun ewe fenufan. Ai nuku fan ekkoch sia menuki usun ar nipwakingau me ifa me watten ar anongonong won Jises. Non an kapas usur, I a kan apasa, “A fansoun nangatam ua fen nonnom remi meinisin, [nge en Philip,] kesamo sinei ei…?”¹

Nge, me rer, ese nuf an fansoun rer. Sia ekieki pwe an Jises angang won ei fenufan a tori ukukun 3(unungat) ier. Ese kon nangatam an epwe tongeni kökköri eu mwichen Engon me Ruemon Aposel seni eu mwichen aramas minefo mempa, anisir ne nikitano ar angangen tipis, aitir amwararen ewe kapas allimen Jises Kraist, iwe pwan feino senir nge repwe sopweino ewe angang tori ra pwan mano. A fakkun weires ena sokkun angang ngeni elter minafö.

Napenon ar na ra chok akanamon. Fan chommong Jises a erenir pwe esapw nomono rer non pekin aion, nge rese tongeni weiweiti ena sokkun ekkiek. Mark a makkei:

“A asukuna noun kewe chon kaeo: Ewe Noun Aramas epwe afangema ngeni aramas pwe repwe nnieno. Nge murin unugat ran, epwe manau sefan.

“Nge rese mo weweiti ei afanafan, iwe ra nuokus ar repwe kapas eis ngeni.”²

Iwe, mwirin ekis fansoun ne kaeo me fansoun mochomoch ne ammonata, eu mettoch mi sokongau a fis, tiper esapw tongeni fis. Ar Samol me Masta, ar Chon Aninis me King a irapenges. An angang non pekin aion a wes. Ewer mi pung pwe ra kuna I nupwen a manausefan nge ra osukosuk ren. Ese wor emon neich mi tongeni weiweiti met ra aani memef me usun ar osukosuk an ekkei mwan nupwen ra ekieki, “Met ei sipwe ne föri?” Non ar achocho ne kuna penuen ena kapas eis, ra nengeni Peter, ewe Aposel mi tekia.

Iei upwe tungor ami achocho ne weweiti ai kei kapas usun ei fansoun nge rese makk non pukfel ai kei kapas. Iwe, Peter a apasa ngeni ekkewe aposel: Pwi kana, ra fakkun apwapwa ekkei ungat ier. Me nom ese wor emon neich a ekieki an epwe kuna ekkewe manaman sia fen kuna me angang mi pin sia pwapwaiti. Sia fos ren, iotek ren, me angang ren Neun ewe Kot. Sia fetan ren I me kechiw ren I, me non ewe pwinnin a mä, ese wor emon a kechiw nap seni ei. Nge ena, a wes. I a awesano An angang me a manaueta seni an peias. A fen senani pwisin I pwan tori kich. Iwe nge oua apasa, “Met ei sipwe ne fori?” Use sinei met upwe era nukun chok pwe oupwe niwiniti manauemi, non pwapwa. Ngang upwe föri met ua sinei—“Upwe ne feino attaw.” Me ina epwe onubon nein ekkkewe engon Aposel ra pwan tipeu ngeni o ra apasa, “am aupwe fituk.”³

Nge, nengeni, ese fisioch ar attaw. Non ewe pwinnin ra attaw, rese niap, ese wor emon iik. Nupwen a sereni winingach, ra poputa ne niwin ngeni ewe fenu non ar netipengau ikewe ie ra kuna emon mwan o a kökkörir, “atekkenan[semirit], mi wor niapemi?” Non ar netipengau ekkei Aposel-niwin-sefan-ngeni chon attaw ra penueni ren kapas chon attaw rese sani, “Ese mo wor emon,” ra apasa, me a kapach ar itengau ren an a kökkörir “semirit.”⁴

“Oupwe oturatiw noumina chew peniemwanin ena wa o oupwe niapeni ekkoch iik,”⁵ anon ewe mwan—me ren ekkei kapas, achechem a torir. Unungat ier ra no ekkei chok mwan ra attaw won ei chok sat. Non na fansoun ra “angang weires unusen pwiin o am ouse mo niapeni emon,”⁶ a makk non pukfel. Nge emon chon Galilee a nomw neppi a erenir pwe repwe oturatiw neur chew, me ra “niapeni chommong iik,”⁷ ewer choun niaper a kumwei neur chew, niaper a aura ruefoch war o choun a efisi an epwe kokotiw.

Iwe a pwan fis sefan. Ekkei “semirit” iter me ren ewe mwan, ra oturatiw neur chew, nge “rese chuwen tongeni pweata ewe chew, pun ra niapeni chommong iik.”⁸John a apasa, “Ina I ewe Samol!”⁹ Me Peter ewe ese kupach a mwetetiw non ewe sat.

Mwirin ar chufengen non pwapwa ren ewe Jises mi manaueta, Peter a fos ngeni ewe Chon Amanau me ar kapas a siwini Peter me unusen fenufan feinfeino. Me rei iei eu fansoun a wesen siwini angangen Aposel me konien siwini Peter, a apechekuna ei mwan ngeni eu manau a uren angang mi amwarar me emwen mi pin. Non ar ra nengeni war mota mi kukkun, neur chew mi kum, me eu chukutan 153(ipuku nime me unumun) iik, Jises a apasa ngeni neun Aposel tekia, “Peter, en mi tongei ei nap seni ekkei?” Peter a apasa, “Ewer, Samol, en mi sinei pwe ngang mi tongeok.”¹⁰

Ewe Chon Amanau a penuweni ekkana kapas, nge a chok sopweino ne nengeni mesen Neun chon kuno me a eis sefani, “Peter, en mi tongei ei?” Ewe chon attaw mi nap a osukosuk ren an a pwan eniwini ei kapas eis, nge a penuweni, “Ewer, Samol, en mi sinei pwe ngang mi tongeok.”¹¹

Ewe Chon Amanau a fos ekis, nge a pwan eniwini ewe chok kapas eis iei unungatin fansoun, “Peter, en mi tongei ei?” Iwe iei Peter ese kinamwe. Meni a chechemi non netipan ewe fansoun fitu chok ran ra no nupwen mi wor aramas ra kapas eis ngeni ii won pwan eu kapas eis fan unungat me a penuweni ar kapas eis—apw. Ika meni a poputa ne ekieki ika a wesen weiweiti an ewe Masta Sense kapas eis. Ika meni a wesen nengeni netipan, wesen kutta pungun an kapas a apasa mwittir. Met chok mefian, Peter a apasa seffani, “Samon… en mi sinei pwe ngang mi tongeok.”¹²

Ngeni ekkei kapas Jises a apasa, (iei upwe chok uanong mefiei nge ese makk non pukfel) meni a apasa, “Iwe Peter, pwata ka nom ikei ie? Met, kese sinei me iwe pwan iei pwe ika ua mochen niapeni iik, ua tongeni niapeni iik? Ua mochen chon kuno—me ua mochen ir feinfeino. Mi namwot epwe wor emon epwe amongeni nei kewe siip me amanau nei kewe appanen siip. Mi namwot epwe wor emon epwe afanafana ai kapas allim me tumunu ai nuku. Ua mochen emon a tongei ei, emon a wesen tongei ei, me tongei met Samach won Nang a ewisa ngeni kich. Iwe, iei oruan fansoun amo ita pwan saigonon, Peter, ua tungor ngonuk om kopwe nikitano ekkei mettoch, me asukuna me pwarata, angang me fangeno, tong me ennetin angang, tori ewe ran nupwen repwe för ngonuk met ra fen pwan för ngeni ei.”

Iwe a pwan fos ngeni ekkewe Aposel, meni a apasa, “Met ami oua tiparoch usun chok ekkewe sou-annuk me Pharisee, usun chok Herod me Pilate? Met, ami ekkiek pwe ewe irapenges me ekkewe chufön me ewe peias a awesano ewe angang me oua tongeni niwiniti manauemi me nomw? Semirit, met manauei me ai tong ese nuf ngeni kemi?”

Pwi me fefinei kana achengicheng, use sinei epwe ifa usun ach kapung non eweRanin Kapung, nge upwe wesen mairu ika Kot ese eiseni kich ewe chok kapas eis Kraist a eiseni Peter: “En mi tongei ei?” Ai nuku epwe mochen sinei ika non ach futuk, apwangapwang, me nipwakingaun weiweiti mettoch auchea, sia weiweiti eu annuk, ewe akkawen annuk mi napanap—“Kopwe tongei ewe Samol om Kot ren unusen nenukom, ren unusen ngunum o ren unusen om ekiek.”¹³ Me are sia tufichin apasa, “Ewer, Samol, en mi sinei pwe ngang mi tongeok.” iwe meni epwe achema ngeni kich pwe eu kinikinin tong, ach sipwe nukuchar.

“Ika ami mi tongei ei, iwe oupwe anneasosichi ai kewe annuk,” ¹⁴ anon Jises. Iwe mi wor chon unukuch ach sipwe efeiochu, semirit ach sipwe tumunu, osupwang ach sipwe apechekuna, me ennet ach sipwe tutumunu. Mi wor ach mwan ach sipwe apungu, kapas ennet ach sipwe apasa, me mettoch mi murrino ach sipwe föri. Iwe non kapas moch, mi wor eu manauen tong me angang ach sipwe manaueni me fang ngeni ewe Samol. Sise tongeni fangeta me niwiniti manauach me nomw. Mwirin sia sinei ewe Neun Kot mi manau, mettoch meinisin epwe sokono. Ewe irapengesin, achasefanin, me manauetan Jises a poputani ewe manauen Kraist, nge esapw soponon.Iei ewe ennet, ewe pung, a atufichi fitemon chon attaw seni Galilea ar repwe niwiniti Aposel ese wor “synagogue are ketinas”¹⁵ ar repwe nikiti ekkewe chew aruan fansoun me feino ne siwini oroun ewe fenufan sia masaoueni iei.

Ua pwarata seni ennetin netipei, me seni pechekunun nguni, ngeni aramas meinisin mi rong munguni pwe ekkewe kiien aposel mi niwinto won fenufan, me ra nomw non Ewe Mwichefenin Jises Kraist ren Aramas mi Pin non Fansoun Soponon. Ngeni ir ekkewe rese mwo fiti kich non ei angangen Kraist, sia kan apasa, “Ouse mochen oupwe fiti.” Ngeni ir ekkewe ra fen nomw rech nge iei ra niwiniti manauer me nom, ra chok pwomweni angangen soulang nge rese wesewesen achocho, ua apasa, ua nuokusiti epwe wor chomong om pwin mi nangatam o esapw wor niapum. Ewe kökkö era sipwe nukuchar, tongei Kot, me aninis ne apechekuna ewe Mun Kot. Ua pwan fos ngeni ekkewe misineri mi weseno ar angang, ekkewe ra fen Uta non ewe nenien papetais me ekieta peur me apasa: “seni ewe pechekun me mumuta.” ¹⁶ Ena mumuta a siwini ena aramas feinfeino, me ita epwe pwan siwinuk. Ngeni serafön ewe mwichefel mi ammonata ren angangen misineri ika ar repwe appupunu, sia apasa: Tongei Kot me nuku o ousap animengau kemi ren tipisin ei fenufan. Mi wor eu angang mi amwarar oupwe föri,usun chok Preseten Thomas  S. Monson a apasa naneu. Sememi won Nang a mochen ami achocho me tong non fansoun meinisin non manauemi.

Ngeni aramas meinisin mi rong neuwei, neuwen Kraist a kökkötiw non fansoun me fansoun me a eisini emon me emon kich, “En mi tongei ei?” Fan iten kich meinisin, ua penueni ren pechukun non nguni, “Ewer, Samol, am mi tongeok.” Me pokiten sia fen tonong non an angang,¹⁷ sisap nesokur tori fansoun ewe angang a wes me an Kot tong me chon unukuch ra nemeni fenufan. Non iten Jises Kraist, amen.