Sel Kot el Ngarbab el Llach

Ng locha diak a imo el chelechad el ngara reksi el mekngit a renguk er tir el ua tirke el teruich me a tang el mle medechel el Apostol ruriul er a kodellel a Osobel er a beluulechad. A kumdasu e kede blechoel lobes el kmo te kmal dirk metitur e mui el ultuil er a Jesus er a ikel lousbech. Ng mellekoi el mo er tir, “Ngak el meketeketa lobengkemiu, e dirrek el dirkak bo modengelkak… ?”¹

A, denguu er tir, e Ngii a dirkak lobengterir el meketeket. A edei el rak a dimlak el kemanget el taem lomekedong er a Chelechad er a Teruich me a Terung el Apostol er a chelsir a remekesai el beches el dirk ulebult, e choroid a cheleuid el mlara recheuodel, osisecheklii ongasireng el ebangkelio er a Jesus Kristo, e mechititerir meng di tir el melemolem er tial ureor dilmerko sera le mad el dirrek. Ng ua loberaod sel domes er ngii e ra re dirk mlo mechedaol el elder.

A tokuni sel teletael el di mlo tir el tang. A Jesus a mle blechoel el melasem el melekoi er tir el kmo Ngii a modiaklobengterir, eng di tir a dimlak malechub eng diak el sebechir el mo medengelii tial meringel el uldasu. A Markus a milluches:

“Ng ulisechakl er a rulbengkel, el kmo, A Ngelekel a chad a mo mengai el mora chimorir a re chad, el mo mekodir; ea uriul er a le mad, eng mo mekiis er a ongedei el sils.

“Eng di dimlak lomtab er a belkul tial tekoi, e mle medakt el oker er ngii.”²

A uriul, er a kedeb el taem el losuub e kmal mle kedeb el taem longedmokl, e a diak el mudasu a dilubech, tial diak loumera er ngii a mlo meral tekoi. A Rubak e Mastang, el Counselor e King a milkerus. A osisecheklel er a beluulechad a merkong, e tial kekerei el Ikelesia el Ngii a kildmeklii a mlotuub e remiid el mo dibus. A re Apostol er Ngii a mle sioning er Ngii er a le bekiis, e dirrek el mle rrau a rengrir er ngii. Ng locha kmal mlo mechas a rengir, “Ke de mekera er chelechang?” Me te mlo melai er a nger er a Petrus, el ngarbab a deruchelel el Apostol.

Me chelecha kulengit me bo kuuchais er tial dimlak el mengai er a chedaol llechukl losengek er tial tekoi. Me tial mla meruul tekoi, ea Petrus a dilu er tirkal ledak: “Rodam, ng kmal mle ungil edei el rak. Ng dimlak a ta er kid el mle sebechel mes a uaikang el di mle chelsel a mekesai el buil e betok longasireng a debiles me a kle chedaol el duleldeu er ngii. Kede dilak el mengedecheduch, meluluuch, e oureor lobengkel a Ngelekel a Dios. Kede mla chadecheduch e lmangel lobengkel, sel kesus ruriul er a dilubech el mekngit, eng dimlak a ta er kid el lilangel el uai ngak. Engdi tia mla mo merek. Ng mla rokui a urellel e mla mekiis er a debull. Ng mla kudmeklii a mo suobel er Ngii me kid. Me ko ker, “Kede mekera er chelechang? Ng diak kudengei a lmuut el ngera el bok du er kemiu er a bai mluut el mora ikel mle klengar er kemiu, e mou tkeu. Ngak a soak el mo meruul er sel ngii ak meduch er ngii ‘Ak mora chei.’” Ea retelolem er a rteruich el medechel el Apostol a millekoi, “Aki dirrek el merael lobengkem.” A Johanes, el mla er sei, a meluches, “Te milrael el mo ruchei, e di mle mereched el ngmasech er a bilas.”³

Eng di, meral mekngit, ele omenged a dimlak lungil. Sel kot el sils er tir er a lengara daob, eng di mlak a chelderir—kal imol ngikel. Me a le metekakl a llomes, e te luueta el bedul a kederang e milsa el cheroid a teletelel a chad el uleker el mo er tir, “Rengalek, ngar ngii a cheldemiu?” Te oumekikngit el reng tirkal Apostol-el-liluut el mo-chad-er-omenged a ulenger el diak a ta el chad er omenged el soal longer er ngii, “Ng dimlak a cheldemam,” te dilung, ea lmuut el kmal tilemelterir te mlo kedong el “rengalek.”⁴

“Bideklii a uked er a bita er a bilas, e ko mo metik,”⁵ ngikal chad a millekoi el mor tir—me a ikaikid el beot el tekoi, e te kol mocha sebecherir el dongchii. Edei el rrak er a uchei e tirkaikid losisiu el chad a mla er a chei er tiaikid el daob. Seikid el taem e tir el dirrek a “mla er a chei el ta el kesus, e [dimlak a chelderir],”⁶a chedaol llechukl a kmo. Eng di a chad er a Galilee a mla er a kederang e millekoi el mor tir mel bidokl a ukedir, me te miluked “a kmal betok el ngikel,”⁷el mle betok me a ukedir a milloched, a le biluked a milkekii a teblo el bilas el kmal mlo mui meng mlo soal ruchorch.

Ng lueta el dubechang. Tirka el “rengalek” e meral okedongall el uaisei, e mocha choitii a ukedir e “dikea el sebechir el nguu el merbab er a ildisel a ngikel.”⁸A Johanes a dilu dodengei: “Ng Rubak.”⁹E uleong er a bkul a bilas, el dikea loserchii a rengul el Petrus a rirdekekl.

A uriul er a loldeu a rengrir el mocha dmak lobengkel a mla mekiis el Jesus, ea Petrus me a Osobel a mlo kadecheduch el mlo ngodechii me a beluulechad el mo cherchar tokuni a Petrus, er a klou el ngerchelel el kirel omesiungel. Ng ulemes er a mechetong el bilsengir, cheliseksikt el uked, me a betok el ngikel el dart me a okeim me a kldei, ea Jesus a millekoi el mo er ngikal ngarbab el Apostol er Ngii, “Petrus, a beltkil a rengum el mei er ngak ng ngarbab er a ikal rokui?” A Petrus a dilu, “Oi, e Rubak; kau a medengei el kmo ng betik a renguk er kau.”¹⁰

A Osobel a ulenger, engdi ng millemolem lomes er a medal ngika loltirakl er Ngii e liluut el melekoi, “Petrus, ng betik a rengum er ngak?” Ng mlo telkib el rrau a rengul er a lluut loker er tial ker, me ngikal chad er a omenged a ulenger el mocha erul taem, “Oi, e Rubak; kau a medengei el kmo ng betik a renguk er kau.”¹¹

A Osobel a milsa kedeb el nger, eng di ng mle ngellomel e lmuut loker el mocha ongedei el taem, “Petrus, ke betik a rengum er ngak?” Me chelecha ea Petrus a locha metitrong. Altang ngara chelsel a rengul sel taem er a mla mo merek el mekesai el klebesei er a loker er ngii a tara bedengel a ker el edei el taem meng ulenger el dirrek el kmal mle mesisiich a nger er ngii—eng di mle mekngit. Malechub eng locha melcheded el kmo kele lak lodengelii a belkul a keril a Sensei el Mastang. Malechub e ngulemes er a rengul, el mo chotii a klemerang er tial nger el bilsang, el kora di mle beot el tuobed. Ngii di el ngera lulemelchesiu, a Petrus a liluut el mong meng ongedei el taem el lolekoi, “Rubak, … kau a medengei el kmo ng betik a renguk er kau.”¹²

A Jesus a ulenger (chelecha eak lemuut losiseb a olechotel dimlak ngai er a chedaol llechukl) e locha millekoi el uai tiang, “E Petrus, me ngera meke ngartiang? Ngera meke dengara osisiu el kederang, lolab osisiu el uked, e mesaod a osisiu el tekoi? Ng dimlak el bleketakl er sel taem me a chelechal taem alsekum eng soak a ngikel, eng sebechek el di ngak el ngmai? A kuusbech er a roltirakl—e ousbech er tir el mor medad. A kuusbech er a chad el mo omeka chermek el sib e olsobel a ngelekel a sib. A kuusbech er a chad el mo olisechakl a osisecheklek e mesebechakl er a klaumera er ngak. A kuusbech er a chad el betik a rengul er ngak, meral betik a rengul er ngak, e betik a rengul er a ikel Demad er a Babeluades a mla mekedongid el mo meruul. Tia mo meng ongeru e locha ulebongel, Petrus, a kulengit mem cheridau er a ikal rokui, bo molisechakl e molecholt er a klaumerang, mosiou, mtenget a rokui, moubeltik el reng e meral loureor, el mo er sel sils el tir a mo remuul lekor kau a ua ikel riruul el merngak.”

E ulebult, el bedul a rokui el Apostol, eng mle sebechel melekoi el kmo, “Kemiu kom dirrek lomdsasu el ua remeluches me a re Pharisee? E diua Herod me a Pilate? Kom mle, uai tir, lomdasu el kmo tial ureor a mad alsekum ko mekotkak? Kom mle, uaitir, el ulemdasu el tial kerus me a deel me a debull e mlo ulebengelel a rokui e a rokui el chad a sebecherir el lmuut el mora ikel ngii di el luruul ruchei? Rengalek, a klengar er ngak me a beltkil a renguk ng dimlak el rutech a rengmiu el dmolech er a ikei?”

Rodam me a rodos, a bebil er a taem eak rongesterir a rechad el mla lmuches er a blechebechel a ker el Dios a moker er a Kerrekeriil el Sils. Ak mechas a renguk, e diak kudengei el kmo ng mekera chad e momedenge ua ikang, eng di ak mo bleketakl er chelechal tutau e mouchais el kmo a kmal mechas a renguk er sel sils alsekum e sel taem, e Ngii a diak loker aikel Kristo uleker er a Petrus: “Ke betik a rengum er ngak?” A kumdasu eng soal mo medengelii alsekum a chelsel a klengar er kid, el ngesonges, me a klemedengei er kid a diua ngalek, e ng mle sebeched el medengeliia chimongel sel kot el ngarbab el llach”—“Bol betik a rengum er a Rubak el Dios loba rengum el rokir, kau el tal chad, me a uldesuem.”¹³Seikid el taem eng locha sebeched el mekekokid el kmo, “Oi, e Rubak, kau a medengei el kmo ng betik a renguk er kau,” seikid e kede locha mo medengei, alsekum eng dimlak desa ruchei, el kmo sel tkul rebab el teletelel a beltik el reng a blechoel el oltirakl loba blak el reng.

“A le betik a rengum er ngak, e moltirakl a llechuk,”¹⁴Ng millekoi a Jesus. Meng ngarngii a rengara bita er kid el bo domekngeltengat, rengalek el bo domekerreu, olngeseu er a remechebuul, e mesebechakl a klemerang. Muklemalt a chelbirukel, olecholt a klemerang, e meruul a ungil. A di kedeb, a klengar er kid el blak a rengud loltirakl a mochotii a beltkil a rengud el mor ngkel Ngarbab. Ng diak el sebeched el choitii maka deluut er a uchelel. A uriul er a de bocha er a ngar el Ngelekel a ngar el Dios, ng diak a lmuut el sebechel mo uai ngii er a uchelel. A Kerus, Tngakireng, me a Okiis er a Kodall er a Jesus a delengchelel a uchelel a klengar el Kristiano, ng diak el ulebengelel. Tiaikid el klemernag, tiaikid el meral teletael, el mlo uchul er a rechad er a omenged er a Galilee a ulebult el dimlak a chimo el ikelesia malechub a mekemad”¹⁵el mechei aikel uked e merola el mo sumecheklii a mo reksi er a beluulechad el kid a kiei er a chelsel.

A kuuchais el kmal ngar chelsel a rengud, loba klisichel a renguk el rokir, me tirkel rokui el rongesak el kmo aikel kiis er a reapostol a mla moluut el mei er a beluulechad, el debetik er a chelsel a Ikelesia er a Jesus Kristo er a Uriul-klebesei el Santo. Me tirke el dirkak el bel teloi er kemam er tial ngarbab el moktek er a Kristo, a ki melekloi el kmo, “Ki olengit me mei.” E kuk tirkel mla ta el lobengkemam e mla mo ruriul, el sorir el melilt e melai a ikel sorir lungil er aikal betok el ngara Olutel a Evangkelio, ea ki kmo, kom chelbangel er a kemangel e bechachau el uked. A okedong a kmo mluut el mei, e bol blak a rengum, oubeltik el reng er a Dios, e ngara rengud el modersii a chimad. Uldimukl er tia lokedong a mor tirkel rokui el mla misionari el elder el mla tal dilechor er a chelsel a blil a techolb chelid e uldersii a chimal el kmo, Ak mla modurch er a Jesus Kristo.”¹⁶Tial ngerachel a kirel mlo ngodechii ngkal ulebult el mor medad e dirrek el mle kirel ngodechau. Kuk mora rengeasek er a Ikelesia el mora mision me a chebechiil er a templo, ea ki kmo: “Bo meral loubeltik el reng el mora Dios e molemolem el klikiid er chelechal telcheroll. Ng kmal klou lureor obo moruul er ngii, lultuil er sel tekingel a President Thomas S. Monson el ledillii er chelii. A Demam er a Babeluades e mengerchir er a meral blak el reng er kau loltirakl er a bek el dauch er a klengar er kau.”

Mo er tirke el sebechir el rongesak, a ngor er a Kristo a merma el mengeschosm loker er a derta er kid, “Ke betik a rengum er ngak?” Mo er kid el rokui, a kunger el loba klisichek el rokir, “Oi, Rubak, a ki betik a rengmam er kau.” E ngma “chimad el locha er a dongu,”¹⁷e diak deluut lomes el mo rulled dilmerko ureor bol merek e a beltik el reng er a Dios me a rengar bita er kid bolongedereder er a beluulechad. Ngara ngklel a Jesus Kristo, amen.