O Le Olioli i le Faaolaina o E Ua Maliliu

Saunia e Elder Richard G. Scott

O Le Korama a Aposetolo e Toasefululua


“O le a toto e ia i loto o fanau folafolaga na faia i tama, ma o le a liliu atu loto o fanau i o latou tama.”

Sa faaali mai e le Alii i le Perofeta o Iosefa Samita ia aoaoga faavae musuia e faatatau i le sauniga paia o le papatisoga. Sa oo mai le malamalama ina ua aoaoina ekalesia Kerisiano o le oti e le masuia, faavavau, ma e iloa ai le taunuuga o le agaga. Sa latou aoaoina o le papatisoina e tauia i le olioli e le gata, ae o isi e feagai ma faasalaga e faavavau, e aunoa ma le faamoemoe o le togiolaina.

O le faaaliga a le Alii e faapea, e ala mai i le pule e tatau ai o le perisitua, e mafai ai ona faia papatisoga e sui ai mo e ua maliliu e faasaoina ai le amiotonu o Lana fetalaiga: “Afai e le fanau se tasi i le vai ma le Agaga, e le mafai ona sao o ia i le malo o le Atua.”1 O papatisoga e fai ai ma sui [mo e ua maliliu] e mafai ona tuuina atu ma le alofa mutimutivale lenei sauniga taua mo tagata agavaa uma ua maliliu o e e le’i mauaina i le olaga nei.

O lenei aoaoga faavae mamalu o le isi lea molimau o le natura maoae o le Togiola a Iesu Keriso. Ua Ia aumaia ai le faaolataga i tagata uma ua salamo. O Lana Togiola ua faatoilaloina ai le oti, ma ua Ia faatagaina le tagata agavaa ua maliu e maua uma ia sauniga o le faaolataga e ala atu i se tagata e fai ma sui.

I se tusi, sa tusia i le silia ma le 150 tausaga ua mavae, sa ta’ua ai e Iosefa Samita: “Ua maua e le Au Paia le avanoa e papatisoina ai mo o … latou aiga ua maliliu … o e ua mauaina le Talalelei i le agaga, e ala … ia i latou o e ua tofiaina e talai atu ia i latou.”2 Mulimuli ane sa ia faaopoopo mai, “O na Au Paia o e e teenaina le avea ai ma sui o o latou aiga ua maliliu, latou te faia i le lamatiaina o lo latou lava faaolataga.”3

Sa tuuina mai e le perofeta o Elia ia ki o galuega sui ia Iosefa Samita i le Malumalu o Katelani4 e faataunuu ai le folafolaga a le Alii e faapea “o le a toto e ia i loto o fanau folafolaga na faia i tama, ma o le a liliu atu loto o fanau i o latou tama.”5

E ala mai i ni isi faaaliga ia Iosefa Samita ma perofeta na sosoo mai ai, ua faapea ona oo mai ai se malamalamaaga i le ma le faataunuuga o galuega o le malumalu ma le taumafaiga o talafaasolopito o aiga lea na te lagolagoina. O perofeta uma talu mai Iosefa Samita ua faamamafaina le manaomia tele o le faataunuuina o sauniga uma mo i tatou lava ma o tatou tuaa ua maliliu.

O galuega o le malumalu ma talafaasolopito o aiga o le galuega e tasi e vaevaeina i ni vaega se lua. E soo faatasi e pei o sauniga o le papatisoga ma le meaalofa o le Agaga Paia. O nisi o le au paia atonu e le mafai ona latou faia uma ia galuega ona o tulaga i le soifua maloloina po o le taumamao foi ma malumalu.

Sa aoao mai Peresitene Howard W. Hunter:

“E ao ona tatou faataunuuina galuega o sauniga perisitua i le malumalu e alagatatau mo lo tatou lava faaeaga; ona tatau lea ona tatou faia galuega mo i latou o e e le’i maua le avanoa e talia ai le talalelei i le olaga nei. O le faia o galuega mo isi e mafai ona ausia i ni laasaga se lua: muamua, e ala i le sailia o talafaasolopito o aiga e iloa ai o tatou tuaa; ma lona lua, o le faia lea o sauniga o le malumalu e tuu atu ai ia i latou ia lava avanoa e maua e tagata o soifua pea.

“Ae e toatele tagata o le Ekalesia e faatapulaa le mafai ona o atu i malumalu. Latou te faia le mea sili latou te mafaia. Latou te faia le sailiga o talafaasolopito o aiga ae fai e isi galuega o sauniga o le malumalu. Ae peitai, e i ai ni isi o le au paia o e auai i le faiga o galuega faalemalumalu ae latou te le faia le sailiga o talafaasolopito o aiga o o latou lava laina faaleaiga. E ui o loo latou faia se auaunaga paia i le fesoasoani i isi, latou te le maua se faamanuiaga e ala i lo latou le sailia o o latou lava aiga ua maliliu e pei ona aumai ai le taitaiga faalelagi e perofeta o aso e gata ai. …

“Ua ou iloaina o i latou o e auai i le sailiga o talafaasolopito faaleaiga ona faatino lea o sauniga faalemalumalu mo i latou ua latou maua igoa, o le a latou iloa le olioli faaopoopo o le mauaina o afa uma e lua o le faamanuiaga.”6

E finagalo le Tama oi le Lagi ia maua uma e i tatou taitoatasi ia vaega uma e lua o faamanuiaga o lenei galuega taua e fai ai ma sui [o e ua maliliu]. Ua Ia taitaiina isi e faasino mai ia i tatou le ala e agavaa ai. O oe ma a’u lava e pa’ū i ai le mauaina o na faamanuiaga.

Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona [e] maua ai faamanuiaga sili atu. Ua folafola mai e le Au Peresitene Sili e faapea, “O lo tatou tiutetauave tupito o le sailia lea ma faailoa o o tatou lava tuaa.”7

Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai.

I le Misiona a Rusia Rostov sa valaaulia ai le autalavou ina ia faavasega [e talavou taitoatasi] ni igoa se 2,000 ona saunia lea ia le itiiti ifo ma le tasi se igoa mai o latou lava aiga mo sauniga o le malumalu. O i latou na ausia lenei sini sa valaaulia e o atu i se malaga umi i le Malumalu fou o Kyiv Iukureini. Sa faasoa mai e se tasi o alii talavou lona aafiaga: “Sa tele o’u taimi sa faaaluina i taaloga komepiuta. Ina ua amata ona ou faavasegaina igoa, sa le toe i ai so’u taimi e taalo ai i taaloga. O le taimi muamua sa ou mafaufau ai, ‘Oi auoi! E mafai faapefea lena mea!’ Ina ua uma le galuega faatino lenei, sa iu ina ou le toe fiafia e taalo. … O galuega o gafa o se mea e mafai ona tatou faia iinei i le lalolagi, ma o le a tumau ai i le lagi.”

E toatele ni Au Paia faamaoni ua latou faia galuega o le sailia o o latou laina faaleaiga ma ua faaaogaina le polokalama o le FamilySearch e fai ai sauniga mo tagata o o latou lava aiga e fai ai i latou ma e sui ai. O le faamoemoega o le faasaosaoina o igoa ia mafai ai e tagata taitasi ona faataunuu sauniga mo tuaa ma e e tupuga mai i se laina e ese mai, e tuuina atu ai ia te oe se taimi talafeagai e fai ai. O le taimi nei e 12 miliona igoa ma e faitau miliona sauniga mo na igoa o loo faatalitali. O lenei mea ua faatusaina i se faitauga aofai e sili atu nai lo le faitau aofai tuufaatasi o Nouei ma Tenimaka. E tele ni igoa ua faasaosaoina mo le tele o tausaga. O tuaa ua maua e le masalomia lava le naunau ma le fiafia ina ua faamaonia o latou igoa mo le faia o sauniga. Peitai, atonu e le o fiafia tele i latou pe afai e faaauau pea ona latou faatalitali mo le faataunuuina o o latou sauniga.

Matou te uunaia outou o e ua tele ni igoa o loo faasaosaoina ina ia faasoa atu na igoa ina ia mafai ona fesoasoani atu tagata o lou aiga lautele po o le uarota ma le siteki i le faataunuuina o lena galuega. E mafai ona faia lenei mea e ala i le tufatufaina o kata o le malumalu i tagata o le uarota ma le siteki o loo naunau e fesoasoani pe faaaoga foi le polokalama komepiuta o le FamilySearch e auina sa’o atu ai igoa i le malumalu. O le vaega mulimuli o se mea lea ua fia tausaga o fai e Cindy Blevins o Casper, Wyoming.

Sa papatiso Sister Blevins a o talavou ma ua na o ia lava le tagata o lona aiga ua auai i le Ekalesia. Ua ia faamaeaina se vaega tele o galuega o gafa. Ae ua tele naua ia igoa mo ia ma lona aiga patino mo le faia o sauniga. Ona o lenei mea, ua auina atu ai e Sister Blevins ia igoa i le malumalu, lea, sa ia ta’ua, e masani ona faamaeaina i ni nai vaiaso, e masani lava [ona faia] i se tasi o malumalu e lua lea e latalata atu i lona aiga. Fai mai o ia, e fiafia i le mafaufau atu atonu o nisi o ana uo ma tuaoi i lana lava uarota ma le siteki o i latou ia o loo fesoasoani e faataunuu le galuega mo ona tuaa. Na te talisapaia lo latou faia o lena mea.

Sa fiafia tele lo’u toalua faapelepele o Jeanene, e fai le sailiga o talafaasolopito o aiga. A o laiti le ma fanau, na te fesuiaia ai le taimi e nofo ai i tamaiti ni ana uo ina ia mafai ona ia maua ni nai itula i nai vaiaso e galue ai i le sailiga o o matou laina faaleaiga. Ina ua tuua e le ma tamaitiiti uii le fale, sa ia tusia i lana api talaaga patino: “Na faatoa uma nei lava ona ou faia se faaiuga ma ua ou fia tu i luga e alaga e faatatau i ai. Ua avea le potumoe tuai o Mike ma potu ou te galue ai i mea tau gafa. Ua saunia lelei e faatulaga ai faamaumauga ma galue ai i totonu. O le a taulai atu nei lo’u olaga i sailiga taua o le aiga ma le auina atu o igoa i le malumalu. Ua matuai ou fiafia lava ma naunau e fai loa.”8

Fai mai le isi tusiga i le api talaaga: “O le … vavega mo a’u sa tupu i le ofisa o Mel Olsen mo Talafaasolopito o Aiga, o lē sa tuuina mai ia te au se kopi na lolomi mai o le faasologa o le gafa na maua o o’u augatama, sa aumai mai le faafouga o faamaumauga faakomepiuta o le Faila o Augatama na auina atu i le sosaiete o mea tau gafa. O le tele lava sa aumai mai faamaumauga o le polokalama o tupulaga e fa a le Ekalesia lea sa ta’ua ai mo le tele o tausaga ua mavae. Sa lofituina lava a’u i le mafaufau i le galuega tele sa i o’u luma atu o le aoina mai o faamaumauga o le sailiga o o’u augatama mai faalapotopotoga a le aiga ina ia tuu uma i le komepiuta mo le tufatufaga faakomepiuta muamua ma le tele o Faila o Augatama. Ae o lele ua faatulagaina lelei ma matagofie ma lolomi i le leisa ma taatia ai i luga o le kesi i o’u luma. Sa matuai o’u fiafia lava ma lofituina, o lea sa na ona ou saofai ai lava iina ma le maofa ona amata ai lea ona ou tagi, sa matuai ou fiafia lava. … Mo se tagata o lē ua tolusefulu tausaga o sailia ma le naunautai ma le totoa, o le tuuina i le komepiuta o nei faamaumauga uma o se matuai fiafiaga sili lava. Ma a ou mafaufau i le faitau selau afe o tagata o e o le taimi nei pe o le a le toe umi foi ona tuuina lea i le komepiuta o ni lisi uumi o tisiketi o tusigaigoa ma sailiga patino … Ua matuai o’u fiafia ai lava. O le galuega moni lava a le Alii, ma o loo Ia taitaia.”9

Ua lava fua o lenei galuega musuia ua ou tofo i ai e iloa ai o ki na toefuataiina mai e Elia ia Iosefa Samita e mafai ai e o tatou loto ona fusia ma fesootai ai i tatou taitoatasi ia i latou o o tatou tuaa o e o loo faatalitali mai mo la tatou fesoasoani. E ala atu i a tatou taumafaiga i malumalu paia iinei i le lalolagi e faaaoga ai le pule ua faasafua mai e le Faaola, ua maua ai e o tatou tuaa sauniga faaola e mafai ai ona latou olioli i le fiafia e faavavau.

I aso ua mavae, i le faaosofia ai i se tautinoga loloto o le paia o le galuega, na feagai ai ma le totoa tagata taitoatasi ma se luitau lea na foliga mai sa taumafai toatasi lava e selesele saito uma i Nebraska. O le taimi nei, ua toatele tagata malolosi ua aufaatasi i le faiga o le galuega. A tatou auai faatasi e mafai ma o le a tatou ausia ai le galuega faatulagaina.

Ou te molimau atu ua pai atu le Agaga o Elia i loto o le toatele o le fanau a le Tama i le lalolagi atoa, ua mafua ai ona faatelevaveina le galuega mo e ua maliliu i se saoasaoa tulaga ese.

Ae faapefea oe? Pe ua e tatalo mo galuega a ou lava augatama? Ia faataatiaese na mea o lou olaga e le taua tele. Ia filifili nei e fai se mea o le a i ai ni taunuuga e faavavau. Atonu na musuia oe e sue ou augatama ae ua e faapea e le o oe o se tagata sue gafa. O e iloaina e le faapea seiloga o oe o se tagata sue gafa? E amata uma lava i le alofa ma se naunautai faamaoni e fesoasoani ia i latou ua i ai i lena itu o le veli o e ua le mafai ona fesoasoani ia i latou lava. Tilotilo solo. O le a i ai se tasi i lo outou eria e mafai ona fesoasoani atu ia manuia au taumafaiga.

O le galuega lenei o se galuega faaleagaga, o se taumafaiga tele o le galulue faatasi o itu uma e lua o le veli lea e tuuina atu ai le fesoasoani i itu uma e lua. Soo se mea lava o e i ai i le lalolagi, o le tatalo, faatuatua, naunautai, maelega, ma se ositaulaga, e mafai ai ona e faia se saofaga mamana. Ia amata nei. Ou te folafola atu ia te oe o le a fesoasoani atu le Alii ia e maua se auala. Ma o le a e lagona ai le fiafia tele. I le suafa o Iesu Keriso, amene.

Mostrar las referencias

  1.  

    1.  Ioane 3:5.

  2.  

    2.  History of the Church, 4:231.

  3.  

    3.  Aoaoga a Peresitene o le Ekalesia: Iosefa Samita (2007), 471–72.

  4.  

    4. Tagai Mataupu Faavae ma Feagaiga 110:13–16 .

  5.  

    5.  Mataupu Faavae ma Feagaiga 2:2; faaopoopo le faamamafa.

  6.  

    6. Howard W. Hunter, “O Tagata Naunau i le Malumalu,” Liahona, Me 1995, 5–6.

  7.  

    7. Tusi a le Au Peresitene Sili, Fep. 29, 2012; faaopoopo le faamamafa.

  8.  

    8. Jeanene Watkins Scott, personal journal, Apr. 1988.

  9.  

    9. Jeanene Watkins Scott, personal journal, Sept. 23, 1989.