O Le Olioli i le Perisitua

Saunia e Peresitene Dieter F. Uchtdorf

Fesoasoani Lua i le Au Peresitene Sili


Ia tatou opomauina ma malamalama i le ofoofogia ma le faamanuiaga o le perisitua. Ia tatou talia ma fiafia i tiutetauave ua talosagaina i tatou e faataunuu.

O Le Olioli i le Lele

E tele tausaga talu ai sa matou filifili ai ma nisi uso a kapeteni vaalele e faataunuu se miti faatamaiti o le toe faafouina lea o se vaalele tuai. Sa matou faatauina faatasi se vaalele tuai o le Piper Cub 1938 ma amata loa galuega o le toe faafoiina i ona uluai foliga sa i ai. O le galuega faatino o se galuega sa matou fiafia e fai. Sa i ai se uiga faapitoa mo au ona sa ou aoao e lele i se vaalele faapea a o o’u talavou.

O lenei vaalele na muamua fauina i le mavae ai o le 35 tausaga talu ona faia e le auuso Wright la la’ua malaga lauiloa muamua lava. O le mafaufau ai i lena mea ou te lagona ai lo’u matua tele.

E lei i ai i le afi se masini eletise e ola ai; a o e faaolaina le afi mai le nofoa e nofo ai le ave vaalele, e ao ona i ai se isi tagata i le eleele e taofimauina le peapea ma faataavili i lona malosi atoa seia oo ina ola le afi lava ia. O taimi taitasi e faaola ai le afi o se taimi lea o le fiafia ma le lototoa.

I le taimi lava na lele ai i luga i le ea, sa manino mai ai o le Piper Cub e le o se vaalele saoasaoa. O le mea moni, a malosi le agi mai o se savili, sa foliga mai e pei matou te le o ō. Ou te manatua lo ma felelei faatasi ai ma lo’u atalii talavou i luga ae o autobahn i Siamani ma sa mautinoa lava, o taavale na i lalo ifo sa saoasaoa atu ia i maua!

Ae, oka sou fiafia i lenei vaalele laitiiti! O le ala atoatoa lea sa lagonaina ai le ofoofogia ma le matagofie o le lele. E mafai ona e faalogoina, lagonaina, sosogiina, tofoina, ma vaaia le uiga atoa o le lele. Sa faailoa mai e le auuso Wright i le ala lenei: “E [leai se mea] e tutusa ma lena mea lea e fiafia i ai pailate a o felelei atu i le ea i apaau lapopoa papae.”1

I se faatusatusaga, i le amataga o lenei tausaga sa ou maua ai se avanoa e lele ai i se vaalele tau matautia o le F-18 faatasi ai ma le Blue Angels ua lauiloa i le lalolagi, le vaega felelei faataitai a le Neivi a le Iunaite Setete. Sa pei na lele atu i luga a’e ma ō faatasi ma le manatuaina o mea o le tuanai ona ua atoa lelei le 50 tausaga talu ai, toeitiiti lava o le aso tonu lea, sa faamaea ai au aoaoga o se pailate o vaalele tau.

Ioe, o le aafiaga i le malaga F-18, sa matua ese lava mai le aafiaga i le Piper Cub. Sa faaali mai ai ia te au se matagofie malosi atu o le lele. Sa pei o le faaaogaina o tulafono faasaienitisi o loo i ai o le felelei o vaalele i se ala e sili atu ona atoatoa. Peitai, a o felelei faatasi ai ma le Blue Angels sa faamanatu vave mai ai foi ia te au e faapea o le avea ma se pailate o se vaalele tau e na o alii talavou e faia. E toe sii mai le saunoaga a le auuso Wright, “E sili atu nai lo se isi lava mea, o le lagona [o le felelei] o se tasi o filemu atoatoa, e milo faatasi ma se fiafiaga lea e matuai fālōina uaua uma.”2 Ma le isi, o le felelei faatasi ma le Blue Angels na fautua mai ai se isi ala e matua ese lava o le i ai o “agelu” e siomia oe ma sapasapai oe i luga.

Afai e ao ona e fesili mai ia te au pe o fea o nei aafiaga e lua o le felelei e sili ona ou fiafia i ai, ou te le mautinoa pe mafai ona ou tau atua ia te oe. E tau ina ou faapea atu, i nisi ala manino, sa matua faigata uma. Ae i isi ala, sa tali tutusa lava.

I le Piper Cub faapea ma le F-18, sa ou lagona ai le fiafia, matagofie, ma le olioli i le lele. I vaalele uma e lua sa mafai ona ou malamalama ai i le uiga o le tala a le tusi solo e faapea “[alu ese mai] i sootaga matamataita o le Lalolagi ma [siva] i lagi i luga o apaau e lanu siliva pe a ata.”3

E Tutusa le Perisitua i Soo Se Mea

Ia, atonu tou te fesili, o le a le sootaga a nei aafiaga e lua matua eseese lava o le felelei ma le tatou sauniga i le asō po o le perisitua ua faamanuiaina i tatou e umia po o auaunaga faaleperisitua tatou te matua fiafia uma i ai?

Uso e, pe le moni ea o o tatou aafiaga taitoatasi o auaunaga i le perisitua atonu e fai sina eseese uma? E mafai ona tatou faapea, o nisi o outou o loo felelei i ni vaalele F-18, a o isi o loo felelei i ni Piper Cubs. O nisi o outou o loo nonofo i uarota ma siteki lea o loo i ai tofiga uma, mai lava i le fesoasoani o le taitai vaega o faitaulaga sili i le failautusi a le korama o tiakono, ua faatumuina e se uso toaga o loo umiaina le perisitua. Ua ia te outou le avanoa e auai ai i se faalapotopotoga a se uarota o loo lava ai tagata o loo galulue i tofiga.

O isi o outou o loo nonofo i ni eria o le lalolagi o loo i ai na o ni nai tagata o le Ekalesia ma ē o umiaina le perisitua. Atonu e te lagonaina le tuuatoatasi ma le mamafatu i avega o mea uma e manaomia ona fai. Mo oe atonu e tele lou aofia ai o oe lava ia ina ia mafai ona faaola le afi o auaunaga faaleperisitua. O nisi taimi atonu e foliga mai e le o agai lava i luma lau paranesi po o lau uarota.

Peitai, po o a lava ou tiutetauave po o ni tulaga e ono i ai, ua tatou iloa uma lava o loo i ai pea se olioli faapitoa e sau mai auaunaga tuuto faaleperisitua.

Ou te fiafia lava e lele, pe sa ou lele i se Piper Cub, se F-18, po o se isi lava vaalele. A o ou i ai i totonu o le Piper Cub, ou te lei faitio e uiga i le le saoasaoa; a o ou i ai i totonu o le F-18 ou te lei faitio foi i le taavilivili o faatinoga a le vaalele ma le leai o se faamoemoe lea sa ou lagona ai le le toafimalie ona ua ou matua.

Ioe, o loo i ai pea se mea le atoatoa i soo se tulaga lava. Ioe, e faigofie lava ona maua ni mea e faitio ai.

Ae uso e, o i tatou o e umiaina le Perisitua Paia, e tusa ma le faatulagaga a le Alo o le Atua! Sa tofu i tatou uma ma ni lima na faaee i o tatou ulu, ma tatou maua ai le perisitua a le Atua. Ua tuuina mai ia i tatou le pule ma le tiutetauave e galue ai i Lona suafa o ni Ana auauna i le lalolagi. Pe o se uarota tele po o se paranesi laitiiti, ua valaauina i tatou ia auauna atu, faamanuia, ma galulue i mea uma mo le lelei o tagata uma atoa ai ma mea uma ua tuuina mai i la tatou tausiga. Pe o i ai se isi mea e sili atu ona faafiafiaina?

Ia tatou malamalama, talisapaia, ma lagonaina le olioli i auaunaga i le perisitua.

O Le Olioli i le Perisitua

O lou fiafia e lele o loo uunaia ai le taitaiga o lou olaga atoa. Ae e pei o le faafouina ma le faafiafiaina o ou aafiaga o se pailate, e faapena foi ou aafiaga o se tagata o lenei Ekalesia ua matua faalolotoina, sili atu ona faafiafiaina, ma sili atu ona taua. A o faatofuina au lava ia i auaunaga faale-Ekalesia, ua ou lagonaina le mana silisili ese o le Atua faapea ai foi ma Lona alofa mutimutivale agamalu.

I le avea ai ma se pailate, ua ou oo atu ai i lagi. I le avea ai ma se tagata o le Ekalesia, ua ou lagona ai le alofa ma le tausiga a le lagi.

Mai lea taimi i lea taimi, ou te misia lava le nofo ai i le nofoa ave vaalele. Ae o le auauna ai faatasi ma uso ma tuafafine i le Ekalesia ua faigofie ai ona faatumuina lea vaega. O le mafai ona lagonaina le filemu ma le olioli musuia lea e tupu mai i se vaega itiiti i lenei pogai ma le galuega, lea ou te le manao lava e misia mo soo se mea lava i le lalolagi.

O le asō ua tatou potopoto ai o se tino tele o le perisitua. O lo tatou olioli ma le avanoa paia lea e auauna atu ai i le Alii ma o tatou uso a tagata, ia tuuto atu le mea sili tatou te mafaia i le galuega tautupu o le siitiaina o isi ma le fausiaina o le malo o le Atua.

Ua tatou iloa ma malamalama o le perisitua o le mana ma le pule e faavavau a le Atua. E mafai ona tatou taulotoina faigofie lona faauigaga. Peitai, pe o tatou malamalama moni lava i le taua o le mea o loo tatou tautatala ai? Sei ou toe fai atu: o le perisitua o le mana ma le pule e faavavau a le Atua.

Mafaufau i ai. E auala mai i le perisitua, na foafoaina ai e le Atua ma puleaina ai lagi ma le lalolagi.

E auala mai i lenei mana, Na te togiola ai ma faaeaina Ana fanau, ina ia aumaia le “tino ola pea ma le ola faavavau o le tagata.”4

O le perisitua e pei ona faamalamalamaina ai e le Perofeta o Iosefa Samita, o le “auala lea na amata ai ona faaali mai e le Silisili ese Lona mamalu i le … foafoaga o lenei lalolagi, ma o le auala lava lea o loo faaauau ai pea ona Ia faaali mai o Ia lava i le fanauga a tagata i le taimi nei, ma o le auala foi lava lea o le a Ia faailoa mai ai Ona faamoemoega i le iuga o aso.”5

Ua tuuina mai e lo tatou Tama i le Lagi e ona le mana uma le pule o le perisitua ia i tatou—o tagata faaletino o e, i se faauigaga, e sese ma lē atoatoa. Ua Ia tuuina mai ia i tatou le pule e galulue ai i Lona suafa mo le faaolataga o Ana fanau. E ala mai i lenei mana ua faatagaina ai i tatou e talai atu le talalelei, tuuina atu sauniga o le faaolataga, fesoasoani e fausia le malo o le Atua i le lalolagi, ma faamanuia ma auauna atu i o tatou aiga ma uso a tagata.

Ua Avanoa mo Tagata Uma

O le mana paia lenei o loo tatou umiaina.

O le perisitua, po o soo se tiutetauave o i ai, e le mafai ona faatauina pe faatonuina. O le faaaogaina o le mana o le perisitua e le mafai ona faatosinaina, faatauanauina, pe fai faamalosi i se tofiga, tamaoaiga, po o se aafiaga. O se mana faaleagaga lea e faagaoioi i tulafono faalelagi. E pogai mai i le Tama Faalelagi sili o i tatou uma. O lona mana e le mafai ona pulea ma faatonutonuina tau lava o mataupu faavae o le amiotonu,6 ae le o le faafiaamiotonu.

O Keriso o le puna lea o le pule ma le mana uma o le perisitua moni i le lalolagi.7 O Lana galuega lea, lea ua faamanuiaina ai i tatou e fesoasoani i ai. “Ma e leai se tasi e mafai ona fesoasoani i lenei galuega vagana ai ua lotomaualalo o ia ma tumu i le alofa, ua i ai le faatuatua, faamoemoe, ma le alofa mama, ua faautauta i mea uma, i soo se mea e tuu atu i lana tausiga.”8

Tatou te le galulue mo so tatou lava taui, ae nai lo lena, tatou te saili atu e auauna ma siitia isi i luga. Tatou te le fai faamalosia le taitaiga ae e auala i le “faatauanau, … tali-tiga, … agamaualalo ma le agamalu, ma le alofa faamaoni.”9

O loo avanoa le perisitua a le Atua Silisili ese i alii agavaa po o fea lava le mea o i ai—po o ai lava o latou tuaa, e tusa lava po o le a le faatauvaa o o latou tulaga, i vaega lata mai ma mamao foi o le lalolagi. O loo avanoa e aunoa ma se totogi po o soo se tau faalelalolagi. Ina ia toe faaupuina le saunoaga a le perofeta anamua o Isaia, tagata uma ua galala e mafai ona o mai i le vai, ma e le manaomia ai se tupe ina ia o mai ma aai ai!10

Ma ona o le Togiola e faavavau ma le faigata ona malamalama i ai a lo tatou Faaola, o Iesu Keriso, ua mafai ai e le perisitua a le Atua ona avanoa atu e tusa lava pe o faia ni mea sese pe sa e le agavaa i se taimi ua tea. E auala mai i le faaleleia faaleagaga ma le faagasologa o le faamamaina o le salamo, e mafai ai ona e “tulai ma susulu atu”!11 Ona o le alofa le faatuaoia ma le faamagalo a lo tatou Faaola ma Togiola, e mafai ai ona sii i luga ou mata, ma mama ai ma agavaa, ma tuputupu ae ai o ni atalii amiotonu ma malualii o le Atua—o i latou e umiaina ma le agavaa le perisitua aupito sili ona paia a le Atua Silisili ese.

O Le Ofoofogia ma Faamanuiaga o le Perisitua

Ou te lagonaina se faanoanoa patino mo i latou o e e le malamalama ma talisapaia le ofoofogia ma faamanuiaga o le perisitua. Ua pei lava i latou o pasese i luga o se vaalele e faaaluina o latou taimi e faitio ai i le laitiiti o se pepa pinati a o latou felelei atu i le ea, e maualuga atu i ao—o se mea semanu e ono foai ai e tupu anamua mea uma latou te umiaina ina ia faataitai tasi ai lava!

Uso e, ua faamanuiaina lava i tatou ina ia avea o ni tagata e umiaina ma le lotomaualalo lenei pule ma le mana maoae o le perisitua. Ia tau ina ia tatou tepa i luga o tatou mata ma vaai, iloa, ma taliaina lenei avanoa ona o lona uiga moni lava.

E auala mai i auaunaga amiotonu, alofa, ma le tuuto faaleperisitua, o le a mafai ai ona tatou lagonaina le uiga moni o le faaaliga: “O le a Ou muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga.”12

Ia tatou opomauina ma malamalama i le ofoofogia ma le faamanuiaga o le perisitua. Ia tatou talia ma fiafia i tiutetauave ua talosagaina i tatou e faataunuu—i o tatou aiga ma i o tatou iunite faale-Ekalesia, po o le a lava le tele po o le laitiiti. Ia tatou faateleina pea lo tatou amiotonu, tuuto, faapea ma auaunaga faaleperisitua. Ia tatou maua le olioli i le auauna atu i le perisitua!

E mafai ona tatou faia sili lenei mea e ala i le faaaogaina o mataupu faavae o le malamalama, usiusitai, ma le faatuatua.

O lona uiga, muamua, e manaomia ona tatou iloa ma faaaogaina i o tatou lava olaga ia aoaoga faavae o le perisitua o loo maua i afioga faaalia a le Atua. E taua le malamalama i feagaiga ma poloaiga ia o loo faagaoioia ai le perisitua.13

O le isi, ia tatou atamamai ma ola ai ma le mamalu i lenei malamalama ua maua i taimi uma. Pe a tatou usiusitai i tulafono a le Atua, puleaina o tatou mafaufau ma tino, ma faaogatasi a tatou faatinoga ma mamanu o le amiotonu o loo aoaoina e perofeta, o le a tatou lagonaina le olioli o auaunaga faaleperisitua.

Ma le mea mulimuli, ia faalolotoina lo tatou faatuatua i lo tatou Alii, o Iesu Keriso. Ia tatou ave i o tatou luga Lona suafa ma tautino atu i aso taitasi e toe savavali i le ala o le avea ai ma soo. Ia faaatoatoaina e a tatou galuega lo tatou faatuatua.14 E ala atu i le avea ai ma soo e mafai ai ona faaatoatoaina i tatou i lea laasaga ma lea laasaga e ala i le auauna atu i le aiga, uso a tagata, ma le Atua.

Pe a tatou auauna atu i le perisitua ma o tatou loto atoa, agaga, mafaufau, ma le malosi atoa, o le a tatou mauaina se folafolaga o le malamalama musuia, filemu, ma meaalofa faaleagaga. Pe a tatou faamamaluina le perisitua paia, o le a faamamaluina foi i tatou e le Atua, ma o le a tatou “tutu ma le le pona i [Ona] luma i le aso gataaga.”15

Tau ina ia tatou maua pea ni mata e vaai ai ma ni loto e lagona ai le ofoofogia ma le olioli o le perisitua a lo tatou Atua silisili ese, o lau tatalo lea, i le suafa o Iesu Keriso, amene.

Show References

  1.  

    1. Wilbur Wright, i le James Tobin, To Conquer the Air: The Wright Brothers and the Great Race for Flight (2003), 238.

  2.  

    2. Wright brothers, i le Tobin, To Conquer the Air, 397.

  3.  

    3. John Gillespie Magee Jr., “High Flight,” i le Diane Ravitch, ed., The American Reader: Words That Moved a Nation (1990), 486.

  4.  

    4.  Mose 1:39.

  5.  

    5.  Aoaoga a Peresitene o le Ekalesia: Iosefa Samita (2007), 108–9.

  6.  

    6. Tagai Mataupu Faavae ma Feagaiga 121:36.

  7.  

    7. Tagai Eperu 5:4–10; Mataupu Faavae ma Feagaiga 107:3.

  8.  

    8.  Mataupu Faavae ma Feagaiga 12:8.

  9.  

    9.  Mataupu Faavae ma Feagaiga 121:41.

  10.  

    10. Tagai Isaia 55:1.

  11.  

    11.  Mataupu Faavae ma Feagaiga 115:5.

  12.  

    12.  Mataupu Faavae ma Feagaiga 84:88.

  13.  

    13. Tagai Mataupu Faavae ma Feagaiga 84:33–44; 121:34–46.

  14.  

    14. Tagai Iakopo 2:22.

  15.  

    15.  Mataupu Faavae ma Feagaiga 4:2.