2010–2019
Deurreng er a Priesthood
October 2012


Deurreng er a Priesthood

Mei e dorkedii e bo dodengelii a klebekelel ma techall er a priesthood. Mei e de kengei e bol soad a ikel ngerachel el bla de mongit el mo mengedmokl.

Deurreng Sel Desebek

Betok el rak er a memong ea rebebil er a romekall a skoki me a ngak a tilbir el mo meleketk ra mechut el skoki, el di mla moktek er kemam er a ki mkekerei el chad. Aki mlo dmak e mecherar a mechut el 1938 Piper Cub el skoki e ulureor lomtechei er ngii. Tial ureor a kmal mle somam. Ng mal er ngii a ileakl el belkul er ngak le ak milsuub el mo suebek el ngara kmeed losisiu el skoki er a kngeask el buik.

Tial skoki a mle kot el meruul er a okedei ma eim el rak ruriul er a rodam el Wright er a relii sel merael chisel el mle ketengir el suebek. Sel kumdaus er ngii eng rulak el kmal udelang.

A mesil a dimlak a dengki el lorael er ngii; sel ki morelii a mesil er tial le ngarngii omekall a skoki, ea tara chad a mlara chutem el mengiterebis er a brobera meng mo sebechel a mesil el di ngii el merael. Sel tal bo lorael a mesil ng mle taem ra klemerriar ma blekeu.

Ngara melidiull, ea ki mlo medengei el kmo tial Piper Club a dimlak el bekerurt el skoki. Ng kmal merang, sel ngar ngii a ses el eolt el meloko el bedul a medal, eng di ngii ma lak kim mongitengetik. Ak lotkii a taem er a kngarangii ngak ma ngelekek el sechal, er a Guido, el suebek er a melidiul a Autobahn er a Germany eng uaisei, el sidosia er eou a bai bekerurt er kemam!

Eng di, ng uoi, kmal mle soak tial skoki! Ng kmal mle ungil el techall bo kudengelii ongasireng sel desebek ra melidiul. Ng sebechem el rongesii, turengur, chormii, e mesang el kmo ngua ngera sel desebek ra melidiul. A rodam ra Wright a dillii tiakid el tekoi: “Ng [diak a ngerang] el mo uaia deurreng ra romekall a skoki sel sebek ra melidiul el ngara meklou el becheleleu el losebekel.”1

A kuk tang, sera uchelel chelecha el rak eng mla er ngii a techelek el mo suebek el ngara meang el skoki el F-18 er a merael chisel Blue Angels, el kloklel a Navy er a Beluu er a Merikel. Ng mle uaia ksilebek er a osisiu el teletael leng mla mo okeim el rak er a memong, er a bok merek er a, skuul er a omesubel a bekall er a skoki.

Tial teletael er a ksebek el ngara F-18, a uaisei, el kmal mle ngodech er sera kngaa Piper Cub. Ng milskak a lmuut el mesiiich el klebekelel a desebek. Ng uaia ksal mlo ungil loltirakl aikel llach ma teletelel a bekall er a skoki. Eng di, sera ksebek el ngara Blue Angeles a dirrek el milkletkak el kmo a bekall er a skoki a di ungil mora remekekerei el chad. Ma klmuut el dulii a tekingir a rodam er a Wright, “Ngelmuut el ngaruchei er a rokui el tekoi ea [bekall er a skoki] a meskid a budech, lobengkel a mui el klemeriar reng.”2 Osisiu, e sera ksebek el ngara Blue Angeles a milskak a ngodech el uldasu el diak el uai sel “reanghel” a me mesebechakl er kau.

Omko ko moker ngak el kmo ngera er a ikal eru el omerael a soak, eng diak el sebechek louchais er kemiu. Le ngii el eru el mlengodech, kmal mle kakerous, aikaikid a sebechek el kmung. Eng di, dirrek el uaia ble losisiu er a kuk tara teletael.

Ngii el eru el Piper Cub ma F-18, a blo kumelchesiu er a klemeriar, klebekelel, ma deureng er a bekall. Ngii el erung eak mlo medengelii a tekingel a poet el “mo [cheroid] er a mekngit er a Beluuelchad e [mngara] dereuakl lobengkel a klebekelel.”3

Osisiu el Priesthood er a Ngii Dil Ker

Chelecha, kom locha oker, aikal el eru el kmal kakerous el teletael er a bekall er a skoki ngera ng rulii er tial mitelenged malechub a priesthood el dobang malechub a omesiou ra priesthood el kid a kmal soad?

Rodam, ng diak lemerang el ikal teletael er a omesiou er a priesthood a dirrek el kmal kora kakerous? A domes er ngii ea rebebil er kemiu a suebek el ngara F-18, ea rebebil a suebek el ngara Piper Cubs. A rebebil er kemiu a ngara ward ma stakes el deruchall, el ngara olngeseu el mora ngarbab el priest el mora deacons ma secretary, a mui er a remesisiich loba priesthood el chad. Ng techelliu el oureor er a chelsel aikel ward er kemiu el mui er a rechad.

A rebebil er kemiu a kiei er a basio el mekesai a roba priesthood el chedal a Ikelesia. Kom locha mo omelchesiu loberaod el kirel aikel ngii a kedmekill. Ng locha mo kiriu el mui el oureor el melisiich omesiou ra priesthood. Ea lebebil er a taem e kom locha omelchesiu el kmo a branch malechub a ward el mngarngii a diak lorael bedul ker.

Eng di, ng diak el iior er a teletael el mseluk er a chelsel, le kau me ngak a di diul medengei el kmo ngarngii a deureng el mei er a chelsel a blakelreng lomesiou er a priesthood.

Ng kmal dimla soak el suebek, a ble le Piper Cub, ma le F-18, malechub a ngii dil skoki. Sera kumekall er a Piper Cub, eng dimlak kuumondai el kirel a rretel tial skoki; me sera kngara F-18 meng dimlak kungiremrum el kirel a mengiterbis er a berobera er a skoki el uaia ble lolchotel a kmo ak udelang.

Oi, ng blechoel di ngarngii a chelitechut er a rokui el tekoi. Oi, ng beot a dosiik a uchul a mondai.

Eng di rodam, kid oba Chedaol Priesthood, loltirakl er a Teletelel a Ngelekel a Dios! A dersta er kid a mla meked a chim er a bdelud, e kede mla nguu a priesthood er a Dios. Kede mla nguu a kengei ma ngerachel el mo meruul el ngara Ngklel e mo Mesiungel el ngara beluulechad. Ma de ngara meklou el ward malechub a mekekerei el branch, e kid a mla mokedong el mo mesiou, omekngeltengat, e meruul a rokui el tekoi el kirel a klungiaol el mora rokui ma rokui el tekoi a ultuil er a ungil ulekerreuid. Ngarngii a ngodech el klungiolel a reng?

Bo dodengei, doureng a saul, e dolchesuar a deureng lokiu omesiou er a priesthood.

Deureng er a Priesthood

Sel klemeriar reng er ngak el suebek a milskak a beches el moktek er a klengar ngak. Eng di diak el iior er a klemeriar ma klugiolel sel kmesebesek el ngara skoki, ele a teletael er a klengar ngak el chedal a Ikelesia a kmal dmolech, lmuut el klou el deureng, e kmal chachisois. Sel kudelbak er a omesiou er a Ikelesia, eak mla melchesuar a mesisiich el klisichel a Dios ma dirrek el chubechub er Ngii.

Ma bekellek er a skoki eak mla remutech a eabed. Eng di a klechad er ngak er a Ikelesia, eak mla melchesuar a babeluades.

Ngarngii a taem, eng uaia kuureng el dengchokl er sel kingelel omekall a skoki. Eng di omesiou lobengterir a rodam ma rodos er ngak er a Ikelesia a kmal di uaia lbtechir. Sel kumelchesiu er a budech ma deureng el mukeroul er a chelsel a kekerei el telengtengil tial klou el ureor, eng diak el soak el mo cheroid er ngii el kirel a ngii dil ngerang er tial beluulechad.

Chelechal sils e kede kldibel el obdois loba priesthood. Ng chedaol techelled el mesiou er a Rubak ma rebebil er kid, el mo oterekokl aikel duch er kid el kirel a mo olngeseu er a rebebil e megederoder er a rengedel a Dios.

Kede medengei el kmo a priesthood a diak a ulebengelel klisich ma ngerachel er a Dios. Ng kmeed el sebeched el dulii tial belkul leng ngara uldesued. Eng di, kede medengelii a belkul a tekinged? Msall ek luut: a priesthood a diak a ulebengelel klisiich ma ngerachel er a Dios.

Ka momdasu er ngii. Ngokiu a priesthood ea Dios a milebii e mengedererer a beluulechad.

Ngokiu tial klisiich, e Ngii olsobel e mengebkall er a Rengelekel, el uchul a diak el luut el kodall ma diak a ulebengelel klengar el mora chad.”4

A priesthood, el uaikel lullekoi a Profet Joseph Smith, a “rael el Dios a ulemuchel el ochotii a Klebkellel er kid … e milebii a beluulechad, e dirrek lokiu Ngii eng melemolem el olecholt er Ngii el mora rengelekel a chad el mel muut er chelechal taem, e dirrek lokiu Ngii eng mocholt a moktek er Ngii el mora ulebongel.”5

A mui er a klisiich el Demad er a Babeluades a mla nguu a ngerachel ra priesthood el meskemiu— kemiu el chad, el diak mcherrungel, e merberebet er a klengit. Ngii a mla meskid a ngerachel el meruul a ureor el ngra Ngklel el kirel osebelir a Rengelekel. Ngokiu tiaikid el ngarbab el klisiich e kid a mla nguu a kengei el mo omerk er a ebangkelio, mengedmokl a chedaol ruoll kirel a mo suobel, e olgeseu el mengederoder ra rengedel a Dios ra beluulechad, e omekngeltengat e mesiou a telungalek er kid ma rebebil er a rechad.

Mo ra Rokui

Tia chedaol priesthood el dobang.

A priesthood, malechub a ngerachel el obengkel, a diak el sebechel mochar malechub el morimel. A usbechellel a klisichel a diak el sebechel mengodech, morrimel, malechub el ultuil er a deruchall, iilteet, malechub a mekgit el blekeradel. Ng cheledaol klisiich el lultuil er a llach er a babeluades. Ng omuchel er a ngarbab el Chedam er a Babeluades er a rokui. A klisichel a kmal di mengai e mukrael lultuil er a osisehakl er a llemalt,6ng diak el chelbirukel.

A Kisto a uchul a meral klisichel ma ngerachel er a priesthood er a beluulechad.7 Tiang a Urerel, el kid a olngeseu era chelsel. Ngii a mla kmu el kmo ng diak a chad el mo olngeseu er tial ureor alsekum eng diak el ngariou a rengul el mui ra beltikelreng, klaumerang, urungulel, ma bliochel el beltikelreng, el tabesul a rokui el tekoi, el diak el iior ra ureor el bo loruul er ngii.”8

Ng diak doruul el kirel a mo klungioled, kede bai osiik el mo mesebechakl er a rebebil. Ng diak dolab orrimel ng bai okiu omengesuseu, kllouelreng, blekokeuii ma ngariou el reng, ma diak lengemed el beltikelreng.”9

A priesthood er a Ngarbab el Dios a ngarngii el mora reklikiid el sechal er a ngii dil ker—el diak el iior er a kmo te chad er ker, diak el iior er a teletael el seluk er a chelsel, a le keed ma lecheroid. Ng ngarngii el diak el iior er a udoud malechub el klalo er a beluulechad. A dongedeb er a tekingel a uodel el profet el Isaia eng kmo, a rokuiel meched a rengrir a sebechir el mei e melim, e mengang el diak lomechar lolab a udoud!10

Meng sel diak a ulebengelel e diak a smodii el Tngakireng er a Osobel, el Jesus Kristo, ea priesthood er a Dios a sebechem el mo obang luldimukl alsekum ke mla ruebet malechub eng dimlak mklikiid ruchei. Ngokiu sel chedaol el mengikiid el teletael er a ouchel el reng, eng sebechem el mekiis e mo llomes”!11Leng sel diak a telkelel, klausubes er a beltikelreng er a Osobel e Olsobel, eng sebechem el mekiis, e mo beches e klikiid, e mo melemalt e chetengakl el ngelekel a Dios—el klikiid loba sel kot el chedaol el priesthood er a Ngarbab el Dios.

Ongasireng me a Techall er a Priesthood

Ng mekngit a renguk el kirir tirkel diak el lorkedii e loureng a saul el kirel a klebekelel a techall loba priesthood. Te uai tirkel ngara omerael er a skoki el chemoit a temir el mengiremrum el kirel a meklungel a kall sel lorael er bab er a melidiul, el mor bab er a eabed—el ngii a tara tekoi el reking er a recheuodel a sebechir loterau a rokui mekreos el kloklir e ta el bo er ngii lomerael!

Rodam, kid a ngeltengat el oba tial ngerachel ma klisiich er a priesthood. Mei e de bok a medad e domes, e domtab, e de kengei er tial techall er sel kmal ngii a kirel.

Ngokiu a llemalt, beltikelreng, ma blakelreng el omesiou er a priesthood, e kid a sebeched el mo medengelii a meral belkul ocholt el Rubak a dilu er a roba priesthood el kmo Ngii a mo okiu mederir, e Ngii a mo ngara kadikm ma katur tir, ea Reng er Ngii a mo ngara chelsel a rengud, ea reanghel er Ngii a mo iliuekl er kid, el mo mesebechakl er kid.”12

Mei a bo dobang e dodengelii a klebekelel ma techall loba priesthood. Mei e de kengei el betik a rengud er a ngercheled el kired el meruul—ngercheled er a chelsel a rekeblid ma Ikelesia, el diak el iior er a kmo ng klou malechub eng kekerei. Mei e dolemolem el melisiich er a llemalt, blakelreng, ma omesiou er a priesthood. Mei a bo de betik er a deureng sel dosiou loba priesthood!

Tia sebeched el kmal mo ungil kudmeklii lokiu otirekled er a llomes, blekongesenges, ma klaumerang.

Tia belkul a kmo, a kot, eng kired el mo medengei e osiseb er a klechad er kid a osisechakl er a priesthood el de betik er a chelsel a mla mocholt el tekingel a Dios. Ng klou a belkul mei er kid el bo dodengei a telbiil ma llach el ngii a ulsirs a urerel a priesthood.13

Ongerung, mei e bo de mellomes e doltirakl aika el klemedengei e dongull. Sel dolngesenges a llechul a Dios, e domtebechel a uldesued ma bedenged, e domeklemalt omerelled loltirakl a llemalt el mla mosisechakl er a reprofet, e seikid e kid a mo melchesuar a deureng er a omesiou er a priesthood.

Ea ulebongel, mei e dolisiich er a klaumerang er kid er a Rubak, el Jesus Kristo. Mei e bo doba Ngklel e doterkeklid er a bek el sils el kuk mo beches el chad el ngar sel rael er a roltirakl. A urered bol cherrengelii a klaumerang er kid.14 Ngokiu otirekled e kede merael mo cherrungel lokiu a dersta el bakes er a bek el taem el mesiou a telungalek er kid, rebebil er a rechad, ma Dios.

Sel dosiou el ngara priesthood loba rengud el rokir, klisiched, uldesued, ma bedenged, e kede nguu a yaksok er a ulekrael llomes, budech, ma chedaol sengk. Me sel dongull er a chedaol priesthood, ea Dios a mo mengull er kid, e kede mo dechor el klikiid er Medal er a ta er a klebesei.”15

Meng nglunguchek me bol ngarngii a medad lomes ma rengud el omelchesiu er a deureng er a priesthood er a ngarbab el Dios er kid el ngara ngklel a Jesus Kristo, amen.