2010–2019
Popohl en Priesthood
October 2012


Popohl en Priesthood

Kitail alehda ni mehlel oh wehwehki kapwuriamwei oh pwuhng en priesthood. Kitail alehda oh poakohng pwukoa kan me kitail poahngok en kapwaiada.

Popohl en Wie Pipihr

Sounpar tohto samwalahro ngehi oh ekei iengei kapdin koasoanehdi me se pahn kapwaiada aht ouraman en kamwahuiala sompihr mering ieu. Se pwainpene sompihr mering pwoat me kahdaniki 1938 Piper Cub oh tepida doadoahk en kamwahuiala duwehla ni tapio. Doadoahko iei doadoahk en limpoak. E kesempwal tohrohr ong ie pwehki I esehla katanga sompihr nan ehu me duwehte mwo ni ei wia mwahnakapw.

Sompihr wet tepin wiawihda sounpar te 35 mwurin ohl perien Wright ko ara tepin dak sompihr me ndando. Medemedewehte met kahrehda ei pehm me I mahlahr mehlel.

Misihno sohte mehn kamaur me lioal; ni omw pahn pwoamwih misihno sang nan perehn pilot, emen tohrohr nan pwehlo pahn parok puropurao oh kin apihdi kehlail lao misihno pein tang. Ehuehu ansou me misihno kin mourda e kin wia ansou kaperen oh ansoun kommwad.

Ni sompihro eh pahn mihier nan wehwe, e kin sansal me Piper Cub-o kaidehn sompihr me marahra. Ni mehlelo, ni ansou me miehda kisinieng kehlail ni mesen sompihro, likamw se sohte wie mwokmwokid. I taman ngehi oh nei mwahnakapwo, Guido, aht kin pihr pohnangin ahl lap Autobahn, nan Sehmen oh mehlel te, sidohsa ko pahnangit kin marahrahsang kiht!

Ahpw, o, ia uwen ahi kin poakohng kisin sompihro! Iei wiepe keieu mwahu en kehn kapwuriamwei oh lingan en pipihr. Ke kak rong, pehm, ned, neme, oh kilang uhdahn duwen pipihr. Ohl perien Wright ko nda me e duwe met: “[Sohte] me pahrekohng dahme pilot kan kin pereniki ni ansou me re wie kapkapaikda nan wehwe pohn pehn pihr lap pwetepwet kan.”1

Me weksang met, pahr wet I ahniki ansou mwahu en pihr nan F-18 fighter jet kaselel iang Blue Angels me ndand, nein United States Navy pwihn en kasansal. E duwehte pihr siksang oh peian me I tamataman pwe sounpar 50 samwalahro, kerenieng ni rahn ohte, I kanekehla ahi kasukuhl en wia fighter pilot nan air force.

Irair en pihr nan F-18, ni mehlel, uhdahn weksang nan Piper Cub-o. E kasalehieng ie wiepe ahpwete lingan en pihr. E duwehte doadoahngki kosonned me pid pipihr ni wiepe me ahpwete unsek. Aphw, iang Blue Angels ko pil mwadangete katamankinie me wia fighter pilot nan jet konehngete mwahnakapw. Pwehn pwurehng kihda ahn ohl perien Wright ko lokaia, “Pohnangin mehkoaros pepehm [en pipihr] iei ehu en meleilei unsek, iangahki peren me kadauala selin pepehm koaros.”2 Patehng met, iang Blue Angels ko pipihr kihda karasaras tohrohr douluhl en eh mie tohnleng me kapiluhk en utunguhkada.

Ma kumwail peidek rehi mehnia nanpwungen irair en pipihr riau pwukat me I pereniki, I sehse ma I kak nda. Ni wiepe sansal kei, ni keieu tikitik, re uhdahn wekpeseng. Ahpw ni wiepe teikan, re inenen duwepenehte.

Nan koaros Piper Cub-o oh F-18-o, I kehn peren, lingan, oh popohl en wie pipihr. Nan koaros I kak wehwehki duwen me sounnting ngihso ntingihdi en “kirislahsang sahl lemei kan en Sampah oh [kahlek] nan lahng kan pohn pehn pihr kan me wiahlahr silper sang ni kokouruhr.”3

Priesthood Duwepenehte Wasa Koaros

Met, ke pahn mwein peidek, dahme irair riau pwukat en pipihr me uhdahn wekpeseng dokehki atail mihting rahn wet de doke priesthood me kitail paieki kolokol de doke papah en priesthood me kitial koaros poakohng mehlel?

Riei ohl oko, e sou mehlel me pein atail irair kan en papah nan priesthood mwein pahn koaros wekpeseng? Ni kamwomwada, ekei kumwail kin pipihr nan jet F-18, ah mehteikan kin pipihrki Piper Cub. Ekei kumwail kin kousoan nan ward oh stake me koaros pwukoa kan, sangete sounsawas ong kaun en pwihn en high priest kan lel secretary en pwihn en dihken kan, kin mie priesthood pwahtiet loale. Amwail ansou mwahu en towehda ward ehu me dir mehn mih nan pwukoa kan.

Ekei kumwail kin kousoan nan wasa kan nan sampah me mehtedepe towe kan en Mwomwohdiso oh irail me kol priesthood. Kumwail mwein pahn pehm me kumwail kelehpw oh toutoulahr pahn mehkoaros me anahne wiawi. Mwein kumwail pahn anahne pein doadoahk laud pwehn kamaurada misihn en papah en priesthood. Ekei pak e pahn mwein mwomwen me amwail prans de ward sohte douluhl wie mwekmwekid.

Ahpw, sohte katepe dah amwail pwukoa de irair me kumwail mih loale, kumwail oh ngehi ese me ansou koaros mie popohl tohrohr me kin kohdo sang papah loaloapwoat en priesthood.

I uhdahn kin pereniki pipihr, menda ma nan Piper Cub, nan F-18, de sohte lipilipil sompihr tohrohr. Ni ei mih nan Piper Cub-o, I sohte kaulimiki eh tangapwand; ah nan F-18-o I sohte kin lokaia tohtohki kehkla sang piripirseli nan wehwe eh kasalehda ni lemei mehlelpen ei mahlahr.

Ehng, kin mie ansou koaros, mehkot me sohte unsek nan irair sohte lipilipil. Ehng, e kin mengei en diar soahng kan en kaulimiki.

Ahpw riei ohl oko, kitail iei soun kol Priesthood Sarawi, me poahsoankihda Pwihn Inou en Sapwellimen Koht! Emenemen kitail alehdier kepwilipwildien peh kan pohn moangatail, oh kitail alehdi priesthood en Koht. Kitail alehdier mweimwei oh pwukoa en mwekid ni Mware ni duwen Sapwellime sounpapah pohn sampah. Menda me nan ward laud de nan prans tikitik, kitail malipilip en papah, en kapaiada, oh en mwekid nan mehkoaros ong mwahu en koaros oh mehkoaros me kitail pwukoahki. E kak mie mehkot me kaperensang met?

Kitail en wehwehki, kalahnganiki, oh pehm popohl en papah nan priesthood.

Popohl en Priesthood

Ahi kin poakohng pipihr mie lipwe ong ahi mour unsek. Ahpw mendahte irair kan me I ahniki ni duwen pilot ahr kakehlail oh kaperen, irair kan me I lelohng ni duwen towe en Mwomwohdiso wet ahpwete loalsang, ahpwete kaperensang, oh ahpwete katapansang. Ni ei nsenohki papah nan Mwomwohdiso, I pehm Sapwellimen Koht manaman kouwahlap iangahki Sapwellime kalahngan.

Ni ei wia pilot, I sairehr lahng kan. Ni ei wia towe en Mwomwohdiso, I pehmehr limpoak oh nsenoh sang nanleng.

Ekei pak, I kin mentenohn pwurehng mwomwohd nan deuwen pilot nan sompihr. Ahpw ei wie papah limwahn riei ohl oh lih akan nan Mwomwohdiso weliandi met ni mengei. En kak pehm meleilei oh popohl kaselel me keirda sang ni wia kiseh tikitik en pwukoa oh doadoahk lap wet, I sohte pahn men katiasang pwehki sohte lipilipil liki nan sampah.

Rahn wet kitail pokonpenehier ni duwen pwihn lap ehu en priesthood. E wia atail popohl oh ansou mwahu sarawi en papah Kauno oh iengetail aramas, en kihda me keieu mwahu loalatail ong doadoahk kaselel wet en sewesehda mehteikan oh kauwada wehin Koht.

Kitail ese oh wehwehki me priesthood iei manaman oh mweimwei soutuk en Koht. Kitail kak ndahla ni mengei wehwehn met sang wadilik. Ahpw, kitail kin wehwehki ni mehlel kesempwalpen dahme kitail kin ndinda? I en kapwurehieng:priesthood iei manaman oh mweimwei soutuk en Koht.

Medewe duwe. Sang rehn priesthoodo, Koht kapikada oh kin ketin kakaun lahng kan oh sampah.

Sang manaman wet, E kin ketin doarehla oh kalapalapiala Sapwellime serihkan, elehieng pweidahn mour poatoapoat oh mour soutuk en aramas.4

Priesthoodo, ni duwen me Joseph Smith kawehwe, iei “ahl me Wasalapalahpie tepida kapwarehda Sapwellime kilohri ni … kepikipikdahn sampah, oh sang ni me e kin doulahte wie kapwkapwarehda Pein Ih ong serihkan en aramas leledo rahn wet, oh sang ni me E pahn kasalehda Sapwellime doadoahk kan ni sansal lel imwin ansou.”5

Samatail Nanleng me kol manaman koaros likihkinkitail mweimwei en priesthood—kitail aramas me, uhdahn kin sohte mwahu mehlel oh sohte unsek. E kin ketikihieng kitail mweimwei en doadoahk ni Mware ong komourpen Sapwellime serihkan. Sang manaman lap wet kitail alehdi mweimwei en kalohk rongamwahuo, apwaliala tiahk sarawi kan en komour, sawas kauwada wehin Koht pohn sampah, oh kapaiada oh papah atail peneinei kan oh iengetail mehteikan.

Kohda ong Koaros

Met iei priesthood sarawi me kitail kolokol.

Priesthoodo, oh sohte lipilipil pwukoa loale, sohte kak pweipweida de pein alahldi. Doadoahkpen manamanpe sohte kak kemwekid, kaweid, de itoit sang ni mwahr de pwukoa, sang ni mwohni, de sang ni kehlail. E wia manaman ehu en pali ngehn me kin doadoahk pahn kosonned en nanleng. E kin tepisang Sahm Nanleng lapalap en kitail koaros. Manamanpe kak en kaweid oh doadoahk ihte sang ni tepin padahk kan en mour pwung,6 kaidehn pein ahn emen ah leme me e pwung.

Mweimwei oh manaman mehlel en priesthood pohn sampah kin kohsang rehn Krais.7 Iei Sapwellime doadoahk, sang ni me kitail kin ahniki ansou mwahu en sawas. E ketin mahsanih me sohte me kak sawas nan doadoahk wet ihte ma e pahn karakarahk oh diren limpoak, ahniki pwoson, koapwoaroapwoar, oh limpoak mehlel, kin kaunda pein ih nan mehkoaros, sohte lipilipil dahme e pahn kepwukoahki ni likilik.”8

Kitail sohte kak mwekidki pein kapaipatail, ahpw kitail kin rapahki en papah oh en sewese mehteikan. Kitail sohte kin kaunda ni kehlail ahpw ni kangoang, kanengamah, meleilei oh opampap, oh ni limpoak mehlel.”9

Priesthood en Koht Wasalapalahpie kin kohda ong ohl me warohng sohte lipilipil wasa me re mihie—sohte lipilipil arail keinek, sohte lipilipil uwen karakarahk en irair me re mih loale, nan wasa koaros nan sampah. E mie ni sohte pweipwei. Pwehn kihda ni kamwot mahsen en soukohp en kawao Aiseia, koaros me men nimpil kak kohdo ni pihl ko, oh sohte mwohni anahn pwehn kohdo oh mwenge!10

Oh pwehki Tomw poatoapoat oh kapwuriamwei en atail Sounkomour, Sises Krais, priesthood en Koht kak en kohda mendahte ma komw pwupwudi de sohte warohng mahs. Sang ni koluhla me kin kamwahu oh kamwakel ni pali ngehn, kumwail kak “uhda oh marain wei”!11 Pwehki limpoak mahk, soh imwi en atail Sounkomour oh Soundoar, kumwail kak kilengkihda mesamwail kan, kamwakelda oh warohngala, oh keirda wiahla Sapwellimen Koht ohl akan me mour pwung oh me lapalap—me warohng kol priesthood me keieu sarawi en Koht Wasalapalahpie.

Kapwuriamwei oh Pwuhng en Priesthood

I pehm nsensuwed ieu pwehki irail akan me sohte wehwehki oh kalahnganiki kapwuriamwei oh pwuhng en priesthood. Irail duwehte pahsinse nan sompihr me kin doadoahngki arail ansou akahkupwungki uwen tikitik en ehd en peanut kan ni arail wie pipihr nan wehwe, pohnangin depwek kan—mehkot me nanmwarki kan en kawao pahn men kihla mehkoaros me re ahniki pwehn songete pak ehu!

Riei ohl oko, kitail kapaikihda en wia me alehda ni karakarahk mweimwei oh manaman en priesthood lap wet. Kitail kilengkihda mesatail kan, kasawiada, oh alehda ansou mwahu wet ni duwen dahme e uhdahn wia.

Sang ni papah en priesthood, ni mour pwung, limpoak, oh loaloapwoat, kitail pahn kak en lelohng wehwe mehlel en kaudiahlo me Kauno mahsanihong irail me kol priesthood me E pahn ketin tieng mwohn mesarail kan, me E pahn ketin mihmi ni arail palimaun oh palimeing, oh Sapwellime Ngehn pahn mih nan mohngiongirail, oh Sapwellime tohnleng kapil irail, pwehn utungirailda.12

Kitail alehda ni mehlel oh wehwehki kapwuriamwei oh pwuhng en priesthood. Kitail alehda oh poakohng pwukoa kan me kitail poahngok en kapwaiada—pwukoa kan nan imwatail kan oh nan atail unit kan en Mwomwohdiso, sohte lipilipil uwen laud de tikitik me re wia. Kitail en kalaudla ansou koaros ni mour pwung, loaloapwoat, oh papah en priesthood. Kitail en diarada popohl en papah nan priesthood!

Kitail kak wia met ni keieu mwahu sang ni doadoahngki tepin padahk kan en eripit, peik, oh pwoson.

Met wehwehki, keieu, kitail anahne ese oh loalehdi padahk en priesthood me dierek nan mahsen kasansalda en Koht. E kesempwal kitail en wehwehki inou kan oh kosonned akan me priesthood kin doadoahksang.13

Mwuri, kitail en kin eripit oh mwekidki met me kitail esehlahr ansou koaros oh ni waun. Ni atail peikiong kosonned akan en Koht, kaiahn pwehn kaunda atail madamadau oh paliwaratail, oh kainenehieng atail mwekid kan ong mwohmw kan en mour pwung me padahk sang soukohp akan, kitail pahn kehn popohl en papah en priesthood.

Oh ni keimwsek, kitail en kaloaliala atail pwoson Kauno, Sises Krais. Kitail en alehda ong pein kitail Mware oh inouki ehuehu rahn en pwurehng alu nan ahl en wia tohnpadahk. Atail doadoahk kan en wiahda atail pwoson en unsek.14 Sang wia tohnpadahk kitail en ekisekis unsekla sang ni papah atail peneinei, iengetail aramas teikan, oh Koht.

Ni ansou me kitail kin papah nan priesthood ni mohngiong, ngoang, madamadau, oh kehl koaros, kitail ahniki inou en eripit, meleilei, oh kisakis kan en pali ngehn me kaselel. Ni atail kin wauniki priesthood sarawi, Koht pahn kawahuih kitail, oh kitail pahn uh ni sohte dipatail Pahn Kupwure ni imwin rahno.15

I kapakapki me kitail en ansou koaros ahniki mahs en kilang oh mohngiong en kehn kapwuriamwei oh popohl en priesthood en atail Koht lapalap oh kehlail ni mwaren Sises Krais, ahmen.