E Sega ni Guilecavi Iko na Turaga

Ena neimami a sotavi kemuni na marama e vuravura taucoko, keimami kurabuitaka na kena qaqaco vinaka tu na nomuni ivakadinadina. E vuqa vei kemuni ko ni isevu se ikarua tiko ni itabatamata lewe ni Lotu. Keimami raica e vuqa na marama era sa veiqaravi tiko ena veikacivi eso, era gole vakabalavu yani e sala mera laki lotu, ka ra solibula mera vakayacora ka maroroya tiko na veiyalayalati tabu ni valetabu. Keimami dokai kemuni. Sa ikemuni na ivuvu ni Turaga ni gauna oqo!

Dua na gauna sa oti keirau a sotava kei Mel na watiqu, e dua na volodia ni veivakasarasarataki ena neirau gole ki na vale ni iyau makawa mai Ositerelia, na yacana o Mollie Lenthal. Keirau a qai kila ni o Mollie, e dua na marama taleitaki ka sa 70, e sega tu ni vakaluveni ka sega ni bau vakawati. E sega na tacina, ka rau sa takali na nona itubutubu ena vuqa na yabaki sa oti. Na wekana voleka duadua e rua eratou veitatacini kaya mai na dua tale na matanitu. Vakasauri ga, sa vakarurugi au na Yalotabu ka vakadeitaka vei au, me vaka sa vosa sara tiko ga mai na Tamada Vakalomalagi: “E sega ni tiko taudua o Mollie! E luvequ yalewa o Mollie! Oi au na Tamana! O koya e luvequ yalewa bibi sara ena noqu matavuvale ka sega vakadua!” ni bau tiko taudua o koya!”

E dua vei ira na noqu italanoa talei mai na bula ni iVakabula o ya na italanoa kei Lasarusa. E tukuna vei keda na ivolanikalou ni “Sa daulomani Marica ko Jisu, … kei tacina [o Meri], kei [na ganedrau] o Lasarua.”¹ A tukuni yani vei Jisu ni sa tauvimate bibi sara tiko o Lasarusa, ia a sega ni lako ena gauna o ya o Jisu; a tiko tale e kea me rua na siga, me yaco “ena mate oqo me vakarokorokotaki kina na Kalou, ena vakarokorokotaki talega kina na luve ni Kalou.”²

Ni sa rogoca o Marica ni sa lako tiko mai o Jisu, sa “laki tavaki koya,”³ ka tukuna vua na veika sa yaco. O Lasarusa sa “koto bogi va … ena ibulubulu.”⁴ E cici lesu ena tagi o Marica, ki nodratou me laki tukuna vei Meri ni sa yaco mai na Turaga.⁵ Ena bibi ni rarawa nei Meri, a cici yani vei Jisu, ka cuva sobu e yavana, ka tagi.⁶

E tukuni vei keda ni “sa qai raica ko Jisu na nona tagi [o Meri], sa vutugu ko koya ena yalona, a sa rarawa na lomana,” ka taroga na vanua era sa vakatikori koya kina.

“Era sa kaya vua, Turaga, ni lako mai mo ni raica.”⁷

Eda qai wilika kina eso vei ira na qaqa ni vosa ni yalololoma, kei na loloma ena ivolanikalou: “Sa tagi ko Jisu.”⁸

E vola kina o iApositolo James E. Talmage: “Na kedrau ituvaki na marama luvuci bibi tu ena rarawa … a vakavuna me rarawa [vata kei ira] o Jisu, sa yaco kina me vutugu na yalona ka rarawa vakalevu na lomana.”⁹ Na veika sa yaco oqo e vakadinadinataka na yalololoma, veinanumi, kei na loloma ni noda iVakabula, kei na Tamada Vakalomalagi kivei keda yadudua ena veigauna kece eda loma bibi kina ena rarawa, ivalavala ca, veika dredre, kei na rarawa ni bula oqo.

Kemuni na taciqu lomani, e kilai keda ka lomani keda na Tamada Vakalomalagi kei na noda iVakabula, o Jisu Karisito. E rau kila na gauna eda rarawa se sotava kina na veika dredre cava ga. Rau sega ni kaya, “E sega na leqa ke o rarawa tiko baleta ni na vinaka ga na veika kece. Ko na vakabulai, se ena kune cakacaka ga o watimu, se ena lesu mai o luvemu sa lako sese tu.” E rau vakila vakavinaka na titobu ni noda rarawa, ka da rawa ni vakila na Nodrau loloma kei na yalololoma ena gauna ni noda rarawa.

E vakadinadinataka o Alama:

“Ena vosota na ka rarawa, na veivakararawataki kei na veivakatovolei kecega; a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra ivalavala ca na nona tamata.

“Ena soli Koya me mate … me kila kina na nodra malumalumu, na nona tamata, ka vakabulai ira ena nona yalololoma.”¹⁰

Ni da vakasamataka kevaka sa kilai keda tiko na noda iVakabula kei na Tamada mai Lomalagi se na Nodrau kilai keda vakavinaka sara vakayadua, e dodonu ga meda nanuma na vosa ni iVakabula vei Oliver Cowdery:

“Kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica vei au mo kila na dina ni veika oqo.”¹¹

A kaya taumada vua na iVakabula “Ni sa kila na Kalou na nanuma kei na inaki ni lomamu.”¹²

A tokaruataka tale na iVakabula vei Oliver ni sa kila vakavinaka tu o koya na veika matailalai ni vakamamasu o ya—ka nanuma tiko na kena gauna donu, na kena bogi dina.

Ena vuqa na yabaki sa oti a tauvi watiqu e dua na mate duatani. Ena kena sa toso tiko na macawa ka sa bibi tikoga o koya, au sa vakadeitaka tikoga ni sa na leqa o koya. Au a sega ni tukuna vua e dua na ka au sa rerevaka tiko. E matavuvale levu ka gone na neirau matavuvale ka keirau veilomani vakaveiwatini tawamudu, kei na vakanananu ni na takali na watiqu kei na noqu na susugi iratou duadua na luvequ au sa mai luvuci kina ena galili, veilecayaki, ka vakakina na cudru. Au madua meu tukuna niu a gole tani mai vua na Tamaqu Vakalomalagi. Au sa sega tu ni masu ena vica na siga; au sa sega ni tuva-ka tale; au sa tagi. Au sa qai mani raica niu na sega ni cakava rawa duadua na ka oqo.

Ena imatai ni gauna ni mai oti e vica vata na siga, au a tekiduru ka sovaraka na yaloqu vua na Tamaqu Vakalomalagi, ka vakamamasu meu vosoti niu a gole tani mai Vua, ka talaucaka Vua na nanuma ni lomaqu taucoko, ka kaya sara niu na vakayacora kevaka sa ikoya oqo na veika e vinakata dina o Koya meu cakava, au na cakava. Au kila ni sa dodonu me tiko Vua e dua na ituvatuva baleta na noda bula.

Niu tomana tiko na noqu tekiduru meu talaucaka na lomaqu, sa uabaleti au mai e dua na yalo e vinaka sara, ka veivakacegui dina, ka taleitaki. Sa vaka e solegi au e dua na itutuvi ni loloma. Sa vaka meu vakila sara ga ni sa vosa mai na Tamada Vakalomalagi, “Oqori sara ga na veika au gadreva meu kila.” Au sa vakadeitaka meu kakua tale vakadua ni gole tani mai Vua. E vakamalua ka veivakurabuitaki, na nona sa vinaka cake mai o watiqu me yacova ni sa bula sara mai na mate.

Ena vica na yabaki e tarava keirau a tekiduru vakaveiwatini e yasai luvei keirau goneyalewa yabaki 17 ka kerea me vakabulai. Ena gauna oqo sa sega ni vakadonui mai, ia a vakilai na kaukauwa ni loloma kei na veivakacegui vata ga a yalataka tu na iVakabula, ka keirau kila ni dina ga sa kacivi koya lesu na Tamada Vakalomalagi, ena vinaka na veika kecega. Keirau sa mai kila oqo na ibalebale ni noda biuta na noda lomaocaoca kecega vua na Turaga, meda kila ni lomani keda o Koya, ka dau yalololoma ni da tagi ka rarawa.”

E dua vei ira na gauna kamica ni veimaliwai vakaveitamani ena iVola i Momani o ya na ivakadinadina nei Alama lailai vei luvena tagane o Ilamani. E vakamacalataka o Alama ni na vakila na “ka rerevaki tawa vakamacalataki rawa” ni raitayaloyalotaka na gauna me tu kina e mata ni Kalou me lewai ena vuku ni nona ivalavala ca e vuqa. Ni sa vakila na bibi ni nona ivalavala ca ena tolu na siga kei na bogi, a veivutuni ka vakamamasu vua na iVakabula me lomani koya. A vakamacalataka vei Ilamani na “talei kei na kamica” ni nona “sega tale vakadua” ni nanuma na nona rarawa. Me isosomi ni nona nanuma ni “ka rerevaki tawa vakamacalataki rawa” me tu e mata ni Kalou, a raica o Alama e dua na raivotu ni sa “dabe tiko na Kalou ena nona itikotiko vakaturaga” ka kaya, “Au sa diva sara meu a bau tiko talega kina.”¹³

Sa ikoya beka o ya na ka meda vakila, kemuni na taciqu lomani, ni da veivutunitaka ka raitayaloyalotaka na loloma, na loloma veivueti, kei na noda vakavinavinaka vua na Tamada Vakalomalagi kei na noda iVakabula—meda sa “diva sara meda bau tiko,” talega kina meda mokoti tale mai na Ligadrau dauloloma?

Me vaka ga sa vakadinadinataka vei au na Turaga ni sega ni guilecava na Luvena yalewa talei o Mollie Lenthal, Au vakadinadinataka ni o Koya ena sega vakadua ni guilecavi kemuni! Se cava ga na ivalavala ca se malumalumu se rarawa e tu vei kemuni, se cava ga na veivakatovolei se dredre ko ni bula curuma tiko, e vakila ka kila vakavinaka tu na veigauna vakaoqori. E lomani kemuni o Koya! Ka na vukei kemuni ena gauna vakaoqori, me vaka ga a vakayacora vei Meri kei Marica. Sa mai sotava na nomuni bula dredre me kila na sala me vukei kemuni kina. Ni biuta Vua na nomuni lomaocaoca. Tukuna vei Tamamu Vakalomalagi na lomamu. Tukuna Vua na rarawa kei na mosi ka biuta yani Vua. Vulica na ivolanikalou ena veisiga. Ko na kunea talega kina na vakacegu kei na veivuke.

E taroga kina na iVakabula:

“E dua li na yalewa me na guilecava na luvena sa sucu, me kakua ni lomana na luve ni ketena? Io e na sa guilecava beka, ia koi au kau na sega ni guilecavi iko. …

“… Raica kau sa ceuti iko ena qeteqete ni ligaqu.”¹⁴

“… Niu a sega ni vakatala tani e dua vei kemudou, raica au a sureti kemudou ga mo dou mai raici au ka tarai au, ia mo dou kitaka vakakina vei ira na kai vuravura.”¹⁵

O ya na noda ilesilesi. E dodonu meda vakila ka raica vakataki keda ka vukei ira yani na luvena taucoko na Tamada Vakalomalagi mera vakila ka raica ka kila ni noda iVakabula sa mai taura Vua sega ni noda ivalavala ca walega ia na noda rarawa talega kei na vakararawataki kei na veika dredre me rawa ni kila kina o Koya na veika eda vakila kei na sala me vakacegui keda kina. Au sa vakadinadinataki Koya ena yaca i Jisu Karisito, emeni.