E Le Faagaloina Lava Oe e le Alii

A o matou feiloai atu i uso i le salafa o le lalolagi, ua matou maofa lava i le malolosi o a outou molimau. E toatele naua outou o ni augatupulaga muamua po o le lua o tagata o le Ekalesia. Ua matou vaai i le toatele o uso e ta’i fia valaauga e galulue ai, e feoai i mea mamao ina ia auai i le lotu, ma faia osigataulaga ia osia ma tausia feagaiga paia i le malumalu. Matou te faamamaluina outou. O outou o paionia a le Alii i ona po nei!

E lei leva atu ona ma feiloai ma lo’u toalua o Mel, i se taiala volenitia e igoa ia Mollie Lenthal a o ma asiasi i se falemataaga i Ausetalia. Na ma iloa ai o Mollie o se tamaitai lelei ua 70 ona tausaga, ma e leai sana fanau ma e lei faaipoipo foi. E na o ia le tama a ona matua, ma ua tele tausaga talu ona maliliu ona matua. O tagata aupito felata’i o lona aiga, o ona tausoga e toalua e nonofo i se isi konetineta. Na faafuasei ona lofituina au i le Agaga o molimau mai ia te au, e toetoe lava o saunoa mai le Tama Faalelagi: “E le o tuulafoaiina Mollie! O Mollie o lo’u afafine! O au o lona Tama! O ia o se afafine taua tele i lo’u aiga, ma e le o tuulafoaiina lava!” o ia!”

O se tasi o tala ou te fiafia lava i ai mai le soifuaga o le Faaola o le tala ia Lasalo. Ua ta’u mai i le tusi paia e faapea “ua alofa lava Iesu ia Mareta, … o lona uso o [Maria], ma [lo la tuagane] o Lasalo.”¹ Na auina atu le tala ia Iesu ua ma’i tele Lasalo, ae e lei sau loa lava Iesu; Sa toe nofo o ia mo ni aso se lua, ma sa ta’ua e faapea “o lenei ma’i e … mo le viiga o le Atua, ina ia viia ai o le Atalii o le Atua.”²

Ina ua faalogo Mareta ua sau Iesu, ona ia “alu ane lea ma faafetaiai ia te ia,”³ ma ta’u atu ia te Ia le mea ua tupu. Ua “aso fa [Lasalo] i le tuugamau.”⁴ Na toe tamoe Mareta i le fale ma ta’u atu ia Maria ua maliu mai le Alii.⁵ Ma le faanoanoa tele, sa tamoe atu Maria ia Iesu, ma faapau i Ona vae, ma tagi ai.⁶

Ua ta’u mai ia i tatou e faapea “ina ua silasila atu Iesu ia [Maria] o tagi …, ona tiga tele ai lea o lona finagalo, ma ua ātu lava o ia,” ma fesili pe o fea ua latou tuuina ai o ia.

“Ua latou fai mai ia te ia, le Alii e, maliu mai ia e te silasila ia te ia.”⁷

Ona tatou faitau ai lea i nisi o upu e aupito sili ona faamomoiloto, ma agaalofa i tusitusiga paia: “Ua tagi Iesu.”⁸

Na tusia ai e le Aposetolo o James E. Talemage: “O le vaaiga i tamaitai e toalua ua matua lofituina i le faanoanoa, … na afua ai ona faanoanoa Iesu [faatasi ma i latou], o lea na tiga ai Lona agaga ma ua matua ātu lava.”⁹ O lenei aafiaga ua molimauina ai le agaalofa, faavauvau, ma le alofa o lo tatou Faaola, ma e manatu mai lo tatou Tama Faalelagi ia i tatou taitoatasi i taimi uma tatou te mafatia ai i mafatiaga, agasala, puapuaga, ma tiga o le olaga.

Uso pele, e silafia lelei i tatou e lo tatou Tama Faalelagi ma lo tatou Faaola o Iesu Keriso ma e alolofa ia i tatou. La te silafia pe a tatou tiga pe mafatia i soo se itu. La te le faapea, “E le afaina o lena e te tiga i le taimi nei, aua e le umi foi ona toe lelei lea o mea uma. O le a e malolo, pe o le a maua se galuega a lou toalua, pe o le a toe foi mai lau tama la e faasevasevaloa.” La te lagonaina le loloto o o tatou mafatiaga, ma e mafai foi ona tatou lagonaina lo La’ua alolofa ma le tigaalofa i o tatou mafatiaga.

Na molimau mai Alema:

“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.

“Ma o le a ia ave i ona luga … o latou vaivaiga, ina ia mafai ona faatumuina lona loto i le alofa mutimutivale, … ina ia mafai ona ia silafia … le ala e fesoasoani ai i ona tagata, e tusa ma o latou vaivaiga.”¹⁰

A tatou taumanatunatu pe silafia i tatou e lo tatou Faaola ma lo tatou Tama i le Lagi pe o le a foi le tele La te silafia ai i tatou taitoatasi, e mafai ona tatou manatuaina upu a le Faaola ia Oliva Kaotui:

“Afai e te manao i se isi molimau, liliu ane lou mafaufau i le po lea na e tagi mai ai ia te au i lou loto, ina ia mafai ona e iloa e uiga i le moni o nei mea.”¹¹

Muamua atu na ta’u atu ai e le Faaola ia te ia, “E leai lava se tasi ua na o le Atua ua ia silafia ou mafaufauga ma faamoemoega o lou loto.”¹²

Na faamanatu atu e le Faaola ia Oliva sa Ia silafia auiliiliga uma o lena tatalo faatauanau—ma manatuaina—le taimi tonu, le po tonu lava.

I le tele o tausaga talu ai sa matua ma’i ai lo’u toalua i se ma’i uiga ese. A o gasolo vaiaso ma ua tigaina tele lo’u toalua, o le tele foi lena o lo’u talitonu o le a maliu o ia. Ou te lei ta’uina lava i se tasi o’u atuatuvalega. E toatele lo matou aiga laiti, ma se faaipoipoga pele ma le faavavau, ma o le mafaufau pe a maliu lo’u toalua ae ou tausia na o a’u la’u fanau na faatumulia ai au i le tuulafoaiina, ātu, ma le ita. Ou te maasiasi e fai atu sa ou faamaamulu ese mai lo’u Tama Faalelagi. Na tele aso na ou le toe tatalo ai; sa ou le toe faia ni fuafuaga; sa ou tagi. Na iu ina tonu ia te au e le mafai ona ou faia na o a’u lenei mea.

Mo le uluai taimi mo le tele o aso, sa ou tootuli ai ma sasaa atu lo’u loto i lo’u Tama i le Lagi, ma aioi atu mo se faamagaloga i lo’u fulitua atu ia te Ia, ma ta’u atu ia te Ia o’u lagona o’oo’o uma, ma i’u ina ou tagi leotele atu afai o le mea moni lea e finagalo o Ia ou te faia, o le a ou faia lava. Sa ou iloaina e tatau lava ona i ai Sana fuafuaga mo o matou ola.

A o ou tootuli pea ma sasaa atu lo’u loto, sa oo mai i o’u luga se lagona aupito matagofie, sili ona toafimalie, ma le alofa. Sa faapei o se palanikete o le alofa ua ufitia ai au. Sa toetoe ina a mafai ona ou lagonaina le Tama Faalelagi o fetalai mai, “Na pau lava lena o le mea sa ou fia iloa.” Sa ou taumafai ia ou le toe fulitua lava ia te Ia. Na faasolosolo malie i se tulaga ofoofogia ona toe malosi mai lo’u toalua seia oo ina manuia atoatoa.

I ni tausaga mulimuli ane, sa ma tootutuli ai ma lo’u toalua i autafa o la ma tama teine e 17 tausaga le matua ma aioi atu mo lona ola. O le taimi la lenei, o le tali o le leai, ae o lena lagona o le alofa ma le filemu lea na folafola mai e lo tatou Faaola na matua mamana lava, ma sa ma iloaina e ui ina toe valaauina o ia e le Tama Faalelagi e toe foi atu, o le a lelei pea mea uma. Na ma iloaina le uiga o le lafo o a tatou avega i le Alii, iloa e alofa o Ia ia i tatou, ma lagonaina le tigaalofa mo i tatou i o tatou faanoanoaga ma tiga.

O se tasi o taimi aupito matagofie o le tamā-i le- atalii i le Tusi a Mamona o le molimau a Alema le Itiiti i lona atalii o Helamana. Na faamatala e Alema le “lagā o ia i le atuatuvale” na ia lagonaina a o ia mafaufau i lona oo atu i luma o le Atua e faamasinoina i ana agasala e tele. Ina ua mavae le lagonaina o le mamafa o ana agasala uma mo aso e tolu ma po e tolu, sa ia salamo ma aioi atu i le Faaola ina ia alofa mutimutivale mai ia te ia. Sa ia faamatalaina ia Helamana o le “silisili ona logolelei ma suamalie” o le olioli o le “le toe manatuaina” o ona tiga.” Nai lo lagona “lagā o le atuatuvale” i le mafaufau atu i le tu ai i luma o le nofoalii o le Atua, sa vaai Alema i se faaaliga o le “Atua o loo afio i luga o lona nofoalii” ma tautino atu, “Sa moomoo lo’u agaga i le fia i ai iina.”¹³

Pe le o o tatou lagona ea na, o’u uso pele, pe a tatou salamo ma mafaufau i le alofa, le alofa mutimutivale, ma le lotofaafetai tatou te lagonaina mo lo tatou Tama Faalelagi ma lo tatou Faaola—o tatou foi “ua moomoo e fia i ai iina,” ina ia toe opoina ai e o La’ua aao alofa?

Pei lava ona molimau mai le Alii ia te au Na te lei faagaloina lava Lona afafine pele o Mollie Lenthal,e faapena foi ona ou molimau atu Na te le faagaloina lava oe! Po o le a lava lau agasala po o ou vaivaiga po o tiga o i ai, po o tauiviga po o tofotofoga o loo e feagai ai, Na te silafia ma malamalama i na lava taimi. E alofa o Ia ia te oe! Ma o le a Ia tauaveina oe i na taimi, pei lava ona sa Ia faia ia Maria ma Mareta. Ua uma ona Ia totogiina le tau ina ia Ona silafia ai le ala e fesoasoani atu ai ia te oe. Lafo au avega ia te Ia. Ta’u atu i lou Tama Faalelagi ou lagona. Ta’u atu ia te Ia ou tiga ma mafatiaga, ona tuu atu lea ia te Ia. Suesue i tusitusiga paia i aso taitasi. O iina o le a e maua ai le mapusaga ma le fesoasoani.

Na fesili lo tatou Faaola:

“Aua pe mafai ea ona galo i se fafine lana tama o susu, ina ia le alofa o ia i le tama a lona manava? Ioe, atonu e galo ia te i latou; ae o le a le galo ia te a’u oe. …

“… Ua ou togitogia oe i luga o alofilima o ‘u lima.”¹⁴

“Sa ou poloaiina ia aua nei i ai se tasi o outou e alu ese atu; ae sa ou poloai atu ia outou o mai ia te au, ina ia outou tagotago ma vaai; ia faapea lava ona outou fai i le lalolagi.”¹⁵

O la tatou matafaioi lea. E tatau ona tatou lagonaina ma vaai i ai mo i tatou lava ma fesoasoani ai i fanau uma a le Tama Faalelagi ina ia latou lagonaina ma vaai ma iloa na tauaveina e lo tatou Faaola i Ona lava luga e le gata i a tatou agasala uma, ae e faapena foi i o tatou tiga ma o tatou mafatiaga ina ia mafai ai ona Ia silafia mea tatou te lagonaina ma le ala e faamafanafanaina ai i tatou. Ou te molimau atu ia te Ia i le suafa o Iesu Keriso, amene.