2010–2019
Koasoamw ong Tiepene
October 2012


Koasoamw ong Tiepene

Kitail en rong mwahu padahk kan …, pwe kitail en kak pehm Ngehn en Kauno oh esehla me E ketin kupwuriki ong kitail.

Ni duwen me I kak kilang, sehr koaros dirhlahr nan Conference Center wet—ahpw mie meh kei ni keieu mwurio. Kitail kak ekis mwahusang met. Pil mwein mie ekei me pwand pwehki nohn traffic laud lidere irail.

Rahn kaselel ieu rahnwet—rahn en kapokon lap wet. Kitail rongehr sang pwihn en koul kaselel koul lingan kan. Ansou koaros me I kin rong sang pwihn en koulo de pil rong ngihl en kesengo de piano I kin tamanda ahi nohno, me nda, “I kin pereniki soahng koaros me wiawihonguhk, oh soahng doadoahk koaros me ke wia, ihte me I nsensuwedki me ke sohte wiahte keseng en piano.” Kalahngan, Nohno. Ih mwo ih keieu en ahi koluhlahn mwo.

E mwahu douluhl, riei pwutak oh serepein kan, en kasamwoh kumwail ong Kapokon Lap en Elep en Pahr Nempe 182 en Mwomwohdiso en Sises Krais en Souleng en Imwin Rahn Akan.

Mwurin atail pokon pene sounpwong weneu samwalahro, tehnpas sarawi siluh kasarawialahr, oh tehnpas sarawi ehu pwurehng kasarawialahr. Nan Mei I ahniki ansou mwahu en kasarawihala tehnpas sarawi kaselel ehu nan Kansas City Missouri oh en iang kilang kasaladahn tiahk me pahteng kasarawio. I pahn doula koasoaia kasaladao ni menseng en lakapw.

Nan Suhn, President Dieter F. Uchtdorf kasarawihala tehnpas sarawi ehu nan Manaus, Brazil me aramas kaskasik ansou werei, oh ni tepin Septempe, President Henry B. Eyring pwurehng kasarawihala tehnpas sarawi ehu me ahpwten wiawihda kapw nan Buenos Aires, Argentina, iei me I ahnikihier ansou mwahu en kasarawi sounpar 27 samwalahro. Wihk riau te samwalahro, President Boyd K. Packer kasarawihala tehnpas sarawi kaselel ehu en Brigham City, wasa me ohlo ipwidi oh keirida.

Ni ahi kawehwe mahso, sohte ehu ihmw me Mwomwohdiso kin wiahda me kesempwal sang tehnpas sarawi, oh kitail peren douluhl en ahniki tehnpas sarawi 139 me kin doadoahk wasa tohto nan sampah, oh pil 27 me pakairdahr de wiewiawi met. Se kapingki tehnpas sarawi pwukat oh kapai kan me re kin wahdo nan atail mour.

Ni menseng wet, I pereniki pakairki tehnpas sarawi kapw riau, me sang nan sounpwong oh pahr kokohdo kan pahn kohkohdo ni wasa riau pwukat: Tucson, Arizona, oh Arquipa, Peru. Oaritik me pid duwen tehnpas sarawi pwukat pahn sansalda ni ansou me kisin likou mweimwei kan pahn alahldier.

Riei ohl oko oh lih oko, met I men uhd koasoaoia duwen pil ehu koasoandi—iei, doadoahk en misineri.

Ansou werei Presidensi Keieu oh Pwihn en Wahnpoaroan Ehk-Riemen mweideng mwahnakap kan sang nan wehi kei en tepdahr papah ni arail lellehr sounpar 18 ni arail wahrong, koahiek, kesepwilehr sang nan high school, oh kasalehdahr arail ineng mehlel in papah. Koasoandi wet kin wiawihte nan wehi kan me koasoansoandiher oh pil kihengehr mwahnakapw kid kei en papah ni wahu nan doadoahk en misineri, oh pil kapwaiada pwukoah kan nan pelien sounpei oh ansou mwahu kan en arail sukuhl.

E dehdehier me doadoahk en misineri sounpar 18 pwukat pweida mwahu. Arail president en misin kan repwohtki me irail peik, loaloapwoat, koahiek, oh kin wia papah me pahrekiong misineri laud teiko me wia papah nan misinohte. Arail loaloapwoat, peik, oh koahiek kahrehiong aht ineng en mweideng pilipilohte ong mwahnakapkoarosen iang mwadang tepda papah en misineri sohte lipilipil wehio me re kohsang ie.

I pereniki pakairki me mweimweidahr ansou wet ong mwahnakap koaros me wahrong oh koahiek, me kesepwilehr sang high school de soahngen sukuhl me pahrekieng, sohte lipilipil wasa me re kin mih ie, en ahniki pilipil en tepehr papah en misineri ni ahr sounpar 18, solahr sounpar 19. I sohte koasoaia me mwahnakap koaros pahn—de anahne—tepdahr papah ni sounpar tikitk wet, ahpw sang ni koasoandi en emen emen, oh pil sang ni kaweid en kaun en priesthood kan, pilipil wet mweimweidahr.

Ni aht wie kapakapkier sounpar ma mwahnakapw kan kakehr tepda arail papah en misineri, se pil medmedewe duwen sounpar me peinakapw kan kak tepda papah. Rahnwet I pil pereniki pakairki me peinakapw wahrong oh koahiengkan, me ahniki ineng en papah kak pilipilda ong doadoahk en misineri ni ahr sounpar 19, solahr 21.

Se katamankihong kumwail me doadoahk en misineri iei pwukoah en priesthood—oh se kangoange mwahnakapw koaros me warohng oh me roson mwahu oh moange mwahu en kapwaiada malipilip en papah. Peinakapw tohto kin wie papah, ahpw anahnepen ahr pahn papah sohte pahrekihong mwahnakap kan. Ahpw se men peinakapw en Mwomwohdiso wet en ese me arail doadoahk en misineri doadoahk kesempwal, oh se pil kalahnganki arail doadoahk en papah.

Aht anahn ong ale misineri pwopwoud me mah kan wie doudoudohte. Ni amwail pahn kak wia, ni amwail pahn kak koammoaldihsang doadoahk, oh ni amwail roson oh kehlail mweideng, I kangoange kumwail en koasoanehdi pein kumwail pwe kumwail en kak wiahla misineri kan me kin kalohk rahn koaros. Ohl oh lih pwopwoud pahn ahniki popohl laud ni arail papah pene ong Sapwellimen Sahmatail serihkan.

Ansou wet riei pwutak oh serepein kan, I koapwoaroapwoarki me kitail pahn rong mwahu padahk kan me pahn kohda nan rahn riau wet, pwe kitail en kak pehm Ngehn en Kauno oh ale mehn kapehese me E kupwuriki ong kitail. I kapakapki me irair wet pahn pweida, ni mwaren Sises Krais, ahmen.