Bu’uw E Chig?

Rok President Henry B. Eyring

Bin Somm’on e Counselor ulane Bin Somm’on e Presidency


Henry B. Eyring
E roog be rogon ninge tha’ab e ayuw ko tharmiy darma upgnuy Got machane boech ngiyal’ be upnguydad. Got darma mithmith, machane boech ngiyal’ ba mithmithdad.

Ufithik e to’orngin e gafgow rok ulane Liberty Jail, fare Profet Joseph Smith ke tolul: “O Got, kam bu’uw? Ma bu’uw e ba chig upnguy e tafen e mith rom?” 1 Gadadma, nap’an e ngiyal’ ko gafgow rodad, ra thamiyed ke palog Got ngodad. Fare chig ni ya’an ba kirebnog e ayuw ko tharimiy dani mith Got machane boech ngiyal’ ba upnguydaed. Darma mith Got, machane gadadma mith, kad upnguydad ko e chig e laniyaen’dad nra fekdad ko Got nge fi’leg ya’an Ke palog ma dabiyog ningad noned ngak. E tin ni ba’adagdad nib kireb, gathi e thamiy ko “Ngan rin' e tin nib m'agaen'um ngay”2 be pinning e thamiy ko chig nima tha’abngodad ngak Got. Got rayog ninge guydad me non ngodad, machane sna dadmotoyilgaed ngak fa da sobutaen’dad nga Laniyaen’ nge ngiyal’ Rok.

E thamtahm rodad ko e kii’ ngak Got ra waer nap’an ngad manged woed bitir u Poewchen. Dani mom ulane fayleng ney nap’an e laniyaen’ ko reb e gidii’ be pinning e thiliyeg ko laniyaen’dad. Machane fare thamiy ra ayuwegdad ningad nanged e riyul’ ney: Got ma paer chuchugur rodad ma nanged marunga’dad dani mith ngak e bitir nib mich Rok.

E bitir ko bitir rog ni bay delip e duw rog ke pinning e sasun ko e gelngin e fel’ yangren nge sobutaen’ ra fekdad ngak Got. Ke yaen ko tabinaew rok nga puf na’un ko e Brigham City Temple ulane Utah. Ulane reb e singil ko re na’un nem nib fel’ usun, ke sap ko oewchen me fith, “Nina’ bu’uw Yesus? E chitangin ke weliy’ ni dabiyog ninge guy Yesus ulane temple, machane rayog ninge thamiy e ayuw Rok ulane gum’racha’en. Eliza ke lemnog riy’ e tin ke fulweg e chitangin me ke fas me yog “Oh, Yesus be ayuweg reb e bee’” ke lemnog.

Dariy’ ban’en ke bling oewchen Eliza ni nge nang fan ma guy e tin riyul’. Got mari paer rok, me irba thamiy ke chuchugur Ngak. Ke nang e temple i’ir e na’un rok Somoel nge irmanang Yesus Kristus ni ke fas ko yam’ mag gel fel’ngin bay e dowef rok ma kemus ra paer u ta’ab e fen u ta’ab ngiyal’.3Fa’anra Debki paer ulane na’un Rok, irma nang irba paer u reb e tafen. Nge ko tin ni irmanang marunga’gen e Tathapeg, irmanang ni Irra yaen nga reb binaew me rin’ e tin nib fel’ ko bitir ko Chitangin Rok. Gumanang irba thapeg ninge guy Yesus, gathi ko e ma’angang nra tay riyul’ Ngak machane bachan irba’adag Nga dakaen.

Fare Kan ni thothup ra dag ngak e laniyaen’ nib bitir ngak e gum’racha’en e gol nib t’uf rodad. Yesus Kristus be fas, irmanangdad, matangiydad, ma chathowliydad. Nap’an e ngiyal’ ko mith, paer ta’ab e bee’, fa balyangaen’, dabi t’uf ningad guyed Yesus Kristus ni nge yog e lowaen’ ngodad ni I’ira nang fan e gubdad nge a muruwel Rok ninge taw’ath.

Gumanang ko e yafas rog ni e birok Eliza ra manged birodad tomuren kad ilalgad. U somm’on e muruwel rog, kug muruwel nib gel ningu mang e professor u Stanford University. Kug lemnog kug fi’leg e yafas nib fel’ ni fanag ma fan e tabinaew rog. Kug pired u to’oben labthir e le’engig ulane fel’ wa’athmaed. U rogon e fayleng, kug gay ba gel e fla’ab. Machane ke pinninged fare Galasia e rogon ningu pag California ngu waen nga Ricks College u Rexburg, Idaho. E tin kko yafas rog ni guba’adag ningu rin’ ko muruwel rog ke toey e chig ni ke kii’eg ko e Chitamang nib t’uf ni ke nanged fan ni fel’ ko Gag e tin ni bay yib ngog. Machane ke taw’athnigeg ningu nang ni urngin e fla’ab kug fek ulane e muruwel rog fa ulangin e tabinaew ko re ngiyal’ nem arragon pin’nem e taw’ath ku Got. Ere, woed e bitir, Kug ragbug nga but ko meybil ningu fith mang gu rin’. Rayog ningu rung’aged e lam nib achigchig u laniyaen’ug ni yoeg, “Aray e skul rog.” Dariy’ e chig ni ke kii’eg ko Got. Udakaen e mich nge sobutaen’, kug sobut’aenug nga Laniyaen’ mug thamiy e t’ufeg Rok.

Fapi duw rog u Ricks College, nap’an kug gay rogon ningu nang e laniyaen’ Got nge rin’, kar tal’eged e chig ni nge upgnuyeg fa kirebnog e rogon Got ulane yafas rog. Nap’an kug gay rogon ningu rin’ e muruwel Rok, Kug thamiy Irba paer u to’obeg mug thamiy nib fel’ ni Irmanang e tirog ma matangiy e faflaen’ rog. Machane woed ni ke buch ko Stanford, e wo’en ko fayleng ke yib bayay ngog. Reb e wo’en i’ir e milwol ko muruwel, ni ke pii’eg u tomur lal’ i duw nap’an kug suwey ni president ko Ricks College. Kug lemnog marung’agen e milwol nem mug meybil marung’agen mug non ngak e Bin Somm’on e Presidency. Kar fulweged ufithik e gol nge faflaen’ machane dabkar pinningeg u reb e rogon. President Spencer W. Kimball ke motoyil ngog marung’agen fare milwol ni kug athapeg ko e corporation nib ga’ me yoeg: “Ere, Hal, arame muruwel marib fel’! Nge fa’anra gadadra t’ufnigem, gadadranang kam bu’uw.” Yaedranang e tafen rog, machane e adag rog ko e fla’ab ko muruwel ke pinning e chig nra pii’ dibhay ngog ningu piry’eg Got nge mang gel ningu motoyil ngug fol e motochiyel Rok.

Le’engig, ma nang fare’nem, ke thamiy nib gel ni dadpagew e Ricks Colege. Kug fulweg, “Arame nib fel’ ngu rin.” Machane ke ning chilen ngog, u gonop, thingar ningu piry’eg e yi’yi’ ni fanag. Ere kug meybil bayay. Biney e ngiyal’ kug athapeg e ayuw, u rogon e lam u laniyaen’nug ke yoeg, “Gube pii’ rogon ngom ningam paer u Ricks College boechi ngiyal’.” Adag rog ko muruwel ke kireb nog oewchen ko tin riyul’ me dibchay ngog ningu athapeg e yi’yi’.

E pul tomuren ke taw’athnigeg Ningu nang e me’leg ningu tay ko remuruwel nem mug paer ko Ricks College, re Teton Dam ni ke pil u to’obeg. Got irmanang fare Dam ra pil nge bo’or e gidii’ ra t’uf e ayuw. Ke bing e wo’en ngog ningu piry’eg e gonop Nge pii’ mataw’ag ningu paer u Ricks College. Irmanang gubin e fan ni e ayuw rog nib t’uf ko fare college nge ulane Rexburg. Aram fan Kug paer arame ningu fith Got ni Chitamangdad nu Tharmiy bo’ori yay u meybil e tin ni Irba’adag ningu rrin’ nifan ayuweg e gidii’ ni kar nag e tabinaew nge yafas ke kirebnog. Kug muruwel bo’or e awa ko e gidii’ ningu fi’leg e but nge rran ko tabinaew. Adag rog ningu nang nge mugu’ul e Laniyaen’ ke pii’eg e rogon ningu ga’nag e ya’el rog.

Fare’nem ni weliy’ reb e rogon ningad fi’leg e dibchay ningad nanged e laniyaen’ Got fa thamiy e t’ufeg rok ngodad: rayog ningad cham ko e ngiyal’ nap’an bay e rodad ngiyal’ rok Somoel. Kug lemnog kug pii’ fel’ e ngiyal’ ko e pigpig rog u Rexburg nge guba’adag ningu papaynigeg mug waen. Boech ngiyal’ e laniyaen’dad ko mugu’ul e ngiyal’ rodad ra thang e Laniyaen’ ni fandad.

Ulane Libery Jail, fare Profet Joseph ke fith en Somoel ninge gechignog e gidii’ kar pii’ e gafgow ngak fapi chongin e Galasia u Missouri. Arragon e meybil rok ra pinning e fulweg nib papay. Machane Somoel ke fulweg nap’an boech e duw bi bay yib,4 Irra gechig fapi to’ogor ko fare Galasia. Ulangin bin 24 nge 25 e yang ko e bin 121 guruy ko e Doctrine and Covenants, Ke yoeg ni:

Musapgaed, oewcheg ma guy mug nang e gubin e mururwel roraed, Mug fil’eg e pufthin nib papay nap’an e ngiyal’ riy’, ni fanraed;

Bachan bay e ngiyal’ kan me’leg ko urngin e mo’on, nra yaen ko muruwel rok.5

Gadadbe fek e chig nap’an ngad thamiyed mag meybilgaed, “Laniyaen’num ra rrin’” nge “U ngiyal’ rom.” Nigyal’ Rok nib fel’ nifandad bachan gadadmanang Irba’adag e tin nib thabi fel’ ni fandad.

Reb e le’engin e fakag nib mo’on ke gay rogon ko bo’or e duw me thamiy God ni ke toey e chig ngadakean. Ir e chitangin ni fel’ yangren ko delip e bitir me irba’dag reb e bitir. Tomuren ke nag la’agruw e dien, e meybil ko ning ke mang e gafgow. Tomuren boech e duw ko dariy’ e bitir, keb lumel ngak ninge mang puwaen’. Nap’an e bin chigchig e bitir rok ni ke yaen nga skul, dariy’ reb bitir u na’un rok ni ya’an ke moning ngak—nge e dien ni kan fi’leg e fagar rok. Ke thamiy woed Mary, ni ke yoed, “I gag e tapigpig rok Somoel.”6 Machane ke yoeg pin’nem u gum’racha’en, dabiyog ninge rung’ag e fulweg.

Ninge pug nga lang e laniyaen’, e figirngin ke pinning ir ninge un e milekag ko muruwel rok nga California. Nap’an figirngin ke un e mo’olung, ke yaen nga but ko dapil’ay, nib ma’angang. Ra fini kirebnog e gum’racha’ ko gafgow, ke meybil ko lungun. Ko fare bin somm’on yay, ke fith gathi ko reb e bitir machane ko e muruwel nu tharmiy. “Got ni Chitamag nu Tharmiy,” ke tolul, “Bay gu pii’ ngom gubin e ngiyal’ rog; wenig nigam dag ngog urrogon ningu ngongoliy riy’.” Ke yog e rayog rok ninge fek e tabinaew rok nga demturug e nam nib t’uf roraed. Fare meybil nem ke pinning e gapas dabki nang. Dabki sug e laniyaen’ ko e nang fan, machane ko bin somm’on yay ulane bo’or e duw, ke gapasnog gumiracha’.

Fare meybil ke fek e chig me bin e windaw ko tharmiy. Tomuren la’agruw e week ke fil ni ke dien reb e bitir. Fare bitir nib be’ech ke mang ta’areb e duw nap’an ke yib e milwol ko mission nga fakag nib mo’on nge pinn rok. Bachan ke micheg nra yaen nge rrin’ demturug e ban’en, ke pag e rus me fek e bitir rok nga reb e nem thap e dai. Ulane mission field ke gargelen reb e bitir—nap’an e rran ko missionary transfer.

Sobutaen’ nga laniyaen’ ko tharmiy, woed ke rin’ fare nina nib fel’ yangren, i’ir t’uf ninge fek e chig ko ya’el kug fi’leged udakaen e lolegdaed. Machane dabki fi’leg nib riyul’ ningad athapeged e fulweg ko meybil rodaed.

Gum’racha’en Abraham ke fel’ rogon bo’or e duw ou’mon Sarah ke dien ko Isaac nge ou’mon ke taw ulane fare nam ni kan micheg. Bay reb e fan thingar ninge mugu’ul tharmiy u somm’on. Fapi fan ney gathi kemus gelnog e mich rok Abraham nge Sarah machane ke yaen ninge fil ngorow e tin nib riyul’ ko manemus ni yowra fil nga reb e gidii’ nap’an e milekage, nib palog ulane e nam kan taermedliy nifanrow. En Somoel ba soen ko nuw nap’an; boech ngiyal’ ko gubin e yafas. Machane ke fi’leg e soen ninge taw’athnog. Dabi t’uf ninge mang e ngiyal’ ko kirebaen’ fa gafgow fa puwaen’.

Arragon e ngiyal’ Rok i’ir thil ko ngiyal’ rodaed, rayog ningad nanged nib polo’ e Somoel ra mugu’ul fapi mich Rok. Ko e gidii’ ufithikmed i gimedbe thamiy be gel ningam non Ngak, Gube micheg ni bay yib e rran nap’an gadadra guy Ir poewchen nga poewchen. Woed e chiney dariy’ reb e ba’nen ke ling ngo foen Oewchen ngodaed, dariy’ reb ba’nen ra ling ngo foen owechdaed Ngak. Gadara sakiy u Poewchen, u dowdaed. Woed e bitir ko bitir rog, gadad ba’adag ningad guyed Yesus Kristus chiney, machane e rran ningad mada’nog Ngak u tafen e pufthin ra gay be gel faflaen’ fa’anra ngad rin’ed u somm’on e tin nra fi’legdad woed Ir. Nap’an ngad pigpignoged Ngak, ngad manged woed Ir, mag thamiyed u To’oben nap’an bay fare rran nap’an dariy’ ban’en ra mithnog e oewchdad.

Aray e milekag ngak Got ra yaen ko nuw nap’an. “Mired ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunumiy e fayleng riy’” 7 en Tathapeg ke fil. Nge Irra fil ngodad urrogon:

“Gum’ ko bilig mi gimed pi’ e ganag, ma gum’ ko belel mi gimed pi’ e garbod ngog: gu be’ nda mu nanged owcheg mi gimed fekeg nga tabinaw romed:

Dariy e mad ni nggon’: gu m’ar mi gimed talily nigeg, ma gu bay u kalbus mi gimed yib mu guyed gag.

“Ma pi’in yad bmat’aw e bay ra fulweged ngak ni lungurad, Somol, wu’in e gguyed gur ni ka mum’ ko bilig ma gamad pi’ ganam? ara ka mum’ ko belel, ma gamad pi’ ban’en ngom ngam garbod ngay?

“Ma wu’in e gguyef gur nda gu nanged owchem ma gamad piningem nga tabinaw romad? Ara dariy e mad ni nga mon’ ma gamad pi’ e mad ngom?

“Ma wu’in e gguyed gur ni kam m’ar ara ga bay u kalbus, ma gamad yib gguyed gur?

Ma bayi fulweg fare Pilung ni ga’ar, Ngari gog ngomed, Yu ngiyal’ ni um rin’ed pin’ey ni fan ngak bagayad e pi cha’ney nth’abi sobut’ u fithik e picha’ ni pi walageg ney e kam rin’ed ngog” 8

Nap’an ngad rin’ e tin Irba’adag ko urngin e bitir ko Chitamang Rok, fare Somoel be lemnog i’ir e gol Ngak, mag thamiyed chuchugur Ngak nap’an ngad thamiyed e t’ufeg Rok nge ba’adag Rok. Bay yib e ngiyal’ nap’an ngad manged woed Ir mag lemnoged marunga’gen e Rran ko Pufthin ko faflaen’.

E chig ni ya’an ninge mithem ngak Got sna e rus ko mo’on me gathi e adag ningam pigpig reb e gidii’. E laniyaen’ ko en Tathapeg ninge ayuweg e gidii’, Bo’or e gidii’ ufithikmed, woed kam rin’, kam thamiyed e rus nap’an ngam maroed nga bee’ kam tugthin ngak fa ke to’ogor ngomed. Machane kug guy e Somoel ke munguy e gum’racha’ bayay nge bayay, nge gum’racha’eg. Nge chiney gube ning chilen ngomed nigam man nga bee’ ni fan Somoel, dariy’ fan e rus rom, ngam pii’ e t’ufeg nge n’agfan. Gube micheg ngomed nap’an ngam rin’ pin’ney, ram thamiyed e t’ufeg rok en Tathapeg ko cha’nem nge e t’ufeg Rok ngom, nge gathi yib ngadaken palog tafen. Ni fanan, aray e chilen ulane tabinaew rom, fa yoror rom, fa nam rom.

Machane fa’an mu fi’legem ko Somoel ni nge taw’athnog reb e gidii’, Ira nang ma taw’athnigem riy’. Fa’anra ngam rin’ urngin e ngiyal’, ngam thamiy e thiliyeg ulane laniyaen’num udakaen e Bayul rok Yesus Kristus. Gathi kemus ningam thamiyed chuchugur Ngak, machane ram thamiy bo’or nge bo’or ningam manged woed Ir. Me yib i buch, nap’an ngam guy Ir, woed gadadra rrin’, ngam mang woed Moroni nap’an ke yoeg: “Ere chiney e gube fingichiymed ni gimed gubin. Dab ki n'uw nap'an ma ku guwaen nga paraedis rok' Got, nge yaeni mada' ko ngiyal' ni ke gak e ya'el rog nge dagur rog bayay nga ta'abang, nge ngiyal' ni kan fekeg iyib u fithik' e nifeng, ni nggu mada' nagmed u mit tagil' e pufthin rok' fa'anem i Jehovah ni gaa', ni fare Tapufthin ni Manechubog ko pi'in nib fos nge pi'in nib yam'. Amen.”9

Fa’anra ngad pigpig niged ko e mich, sobut’aen’, mag marnoged ningad mugu’uliy laniyaen’ Got, gube pii’ m’ag ni e tafen e pufthin rok gel bugwaen i Jehovah ra ayuwegdad. Ngad guyed e Chitamangdad nge Fak Rok ni yowba’adagdaed woed Yaedma guydad chiney—ko machalboeg nge t’ufeg nib machalboeg. Udakaen e fithingan nib thothup i Yesus Kristus, amen.