Ia Mehn Perehreo?

Sang President Henry B. Eyring

Sounsawas Keieu nan Presidensi Keieu


Mehn perehre me dene kin koledihsang kitail sawas sang powe sohte kin perehla Koht ahpw ekin ekei ahnsou pere kitailla. Koht sohte kin rirla, ahpw kitail me kin rirla ekei ahnsou.

Ni ansou e mih nan lokolok laud nan Kalapwuhs en Liberty, Soukohp Joseph Smith werkihla: “Maing Koht, ia komwi? Oh ia wasa komw ketin rukiruklaie?”1 Me tohto rehtail, ni ansouhn pein atail lokolok, kin medewe me Koht kin ket wasa doh sang kitail. Ahpw wasahn rukiruk me likamwete kin perehla Koht ni mehlel kaidehn, ahpw ekeipak e kin perekitailala. Koht sohte kin ketin rukila, apw ekeipak kitail kin ruk, ni atail perehkihla nsenatail tohto me katohrehkitailasang Koht oh kahrehda atail pahn wiahki me Ih me kin ket wasa doh, wasa kitail sohte kak kohla ie. Pein nsenatail akan, oh kaidehn pepehm en “Kupwuromwi en Pweida,”2 pahn kauwehda mehn pere me karukila Koht. Koht sohte kin ketin kahng mahsanihong oh dehdehkin kitail, ahpw ekeipak kitail kahng rongorong de kanengamahiong Kupwure oh Sapwellime ansou pwung.

Atail pepehm en katohrohr sang Koht pahn tikitikala ni ansou kitail rasengala kisin seri. Met sohte kin mengei nan sampah ieu wasa me madamadau en aramas teikan pahn kak kaweidih pein nsenatail akan. Ahpw e pahn sewese kitail en dedehki dahme mehlel: Koht kin ketiket wasa karanih kitail oh eh ketin dehdehkin kitail oh sohte pahn rukisang Sapwellime seri pwoson kan.

Serepein men nein nei me sounpahr siluh kasalehda duwen manamanpen aktikitik oh mwakelekel pwe kitail en ehuong Koht. E iang ah peneinei kilang tehnpas sarawi en Brigham City Utah, mwohn ah kasarawialahr. Nan ehu pere en nan tehnpaso kaselelo, e kilikilangseli, oh idek, “Ino, ia Sises?” Ah nohno apw kawehwehiong me eh sohte pahn kilang Sises nan Tehnpaso, pwe e pahn pehmte Ih nan ah mongiong. Eliza eri medewehda pasapeng en ah nohno oh mwomwen itariki ohnda, “Oh Sises samwalahr, kohlang sewese emen aramas.”

Sohte mehn pere ieu me perehla wehwehpen Eliza de perehla dahme e ese me mehlel. Koht ketin karanihong ih, oh e pil pehm me pein ih karanihong Koht. E wehwehki me tehnpaso iei tehnpas en Kauno apw e pil wehwehki me Sises Krais iasadahro sapwellimaniki paliwar oh e pahn kak ketiket wasa ehute.3 Ma E sohte ketiket nan sapwellime tehnpas, serio wehwehki me E udahn pahn ket wasa ieu tohrohr. Oh pwehki dahme e wehwehki duwen Kauno, serio ese me E pahn kin ketiket wasa ieu me E pahn ketin wie me mwahu ong sapwellimen Sahmo serikan. E sansal me serio kasikasik ah pahn kilang Sises kaidehn pwehn wie mehn kopwuriamwei laud ehu me E ketin ieias, apw ihte pwe e kin poakohng Ih.

Ngehn Sarawi kamarainihong mongiong en seri wet, soangen kansenamwahu me koaros rehtail kin inangih oh anahne. Sises Krais ketin ieias, e mwahngi kitail, kin sinsile kitail, oh kin apwalih kitail. Nan ansou kan en medek, sangat, de pingiping, kitail sohte anahne kilang Sises Krais pwe kitail en kak wehwehki me E ketin dehdehki ireatail akan oh me sapwellime pwukoa iei en kin kapaiakitailda.

I ese sang pein ahi mour me irairo me lelohng Eliza pahn kak pweida rehtail, mehndahte atail sohla seri. Ni ahi tepin wie ahi doadoahk en sampah, I wie doadoahk laud pwehn alehda wahu ile en professor nan Stanford University. I wiahki me ahi doadoahk inenen mwahu mehn sawaspen ngehi oh ahi peneinei. Se koukousan wasa me karanih en ahi pwoud ah peneinei ni wasa nsenamwahu mehlel. Rehn mehn sampah, udahn I pweidahr . Ahpw pilipil ieu kohda sang Mwomwohdiso pwe ien mweselsang California, kolahng Ricks College nan Rexburg Idaho. Ahi madamadau en dahme keieu mwahu ong ahi mouren doadoahk likamwete mehn pere ieu me katohreiehla sang Semei me ketin mwahngih laud sang pein ngehi dahme keieu mwahu en wiawiongie. Apw I pil paiamwahu pwe I wehwehkier me ansou koaros mwowe me I pweidahr nan ahi mour eh kohsang kisakis sang rehn Koht. Eri, duwehte kisin seri men, I kelipwikidi oh kapakap pwehn peki dahme I pahn wia. I apw rongada kisin ngihl tehtik nan ahi madamadau me mahsanih, “Iei mwo pein ahi sukuhl.” Sohte mehn pere ieu me karukiehlasang Koht. Ni pwoson oh karakarahk, I pwilikihdi nsenei, menseirenlahiong Kupwure oh pehmada sapwellime limpoak oh uhwen E ketin karanihongie.

Sounpahr kei I mihmi Ricks College, ansou I nantiheng en rapahki kupwuren Koht oh en kapwaiada, e seweseie en dehr mweidohng mehn pere ieu en pereiehla de perehla mwomwen Koht E ketin seweseweseie nan ahi mour. Ni ahi kin nantiheng wia sapwellime doadoahk I kin pehmada ahi karakaranihong Ih oh dehdehki me E ketin mwahngih nsenei oh kin ketin kupwuriki ahi peren. Ahpw duwehte ansou en Stanford, kasongosong en mour pa pwarada mwohi. Pil ehu pilipil en wie doadoahk en sampah mwahu kohieng ie ni kaimwesekalahn kalimauhn sounpahr en ahi wie president en Rick’s College. I medemedewe duwen doadoahko oh kapakapki oh pil ididekada mwohn Presidenci Keieu. Ar pasapeng me kadek oh ekis kamenkouruhr, apw kaidehn peneu inen. President Spencer W. Kimball rongorong ahi kawehwehda duwen doadoahko me pisnes lapala ieu men kihong ie oh apw nda, “Eri Hal, likamwete doadoahko pahn mwahuong uhk. Oh ma se pahn anahne iuk, se ese wasa se pahn diaruhkada ie.” Ni mehlel irail pahn ese wasa I pahn mie ie, ahpw mwein nsenei en pweida nin duwen pweidahn mour, pahn kahrehda mehn pere ieu me pahn karukiehlasang Koht oh mwein e pahn nohn apwal ong ie en kin rongorong oh idawehn sapwellime kaweid.

Ahi pwoud, ni eh pehmada met, ale kamarain me se sohte pahn mweselsang Ricks College. I sapeng “Me epil mwahu ohng ie.” Ahpw ni loaloakong eh peki Ien ale pein ahi marain. I apw pil pwurehng kapakapki. Oh I apw alehda kaweid, mwomwen ngihlen nan ahi madamadau me mahsanih, “I pahn mweidohng ken mihmihte Ricks College ekis ansou.” Ma soh mwein pein ahi repenpen pweidahn mour pahn kakete perehlahr dahme I dehdehki me mehlel oh wie mehn dipwekelekel en alehda kaudiahl.

Rahnte silisek mwurin ahi ale kapai en sohte wie doadoahko oh mihmihte nan Ricks College, Teton Dam me mih kerendo ohla, kahrehda lapake laud. Koht ketin mwangih me lapake pahn wiawi oh aramas ipwiki samwa pahn anahne sawas. E ketin mweidong ie en rapahki kaweid oh rapahki sapwellime mweimwei en mihmite Ricks College. Ih te me ketin mwahngi kahrepe koaros me ahi doadoahk eh pahn kak mwamwahuete nan collegeo oh pil nan kanihmw Rexburg. Eri ngehi mie pwehn I kin pekipeki Sahmo pak tohto ni kapakap pwehn kamarainihkin ie dahme E kupwuriki I en wia pwehn souwese irail akan me arail mour oh dipwisou ohla. I pein doadoahk rehn aramas teikan en kamwakele pwelmatak oh pihl sang nan imwarail. Pein nsenei en kapwaida Kupwure kahrehda eh ketin sairih mehlel ahi mour.

Ansouo iei karasaras ieu duwen mehn pere ieu kitail pahn kak kauwada, mehn perepen atail wehwehki Kupwuren Koht oh en pehmada sapwellime limpoak ong kitail, kitail sohte kak wiahki me atail ansou mwahusang sapwellimen Kauno ansou. I lemehiong me ahnsou me I wie sousouwas Rexburg itarher oh konehngehr ien mwesemwesel la. Ekeipak atail ngidingid en wiewia ni ansou kitail mwahuki pahn kak perehla atail dehdepen Kupwuren Sahmo ong kitail.

Nan Kalapwuhs en Liberty, Soukohp Joseph peki Kauno en kaloke irail akan me kaloke tohnmwohmwohdiso kan nan Missouri. Ah kapakap iei en menlau kapwurehla ni mwadang. Apw Kauno ketin pasapengki me mwurin sounpahr kei4 E pahn ketin dupukiong imwintihti ko en Mwomwohdiso. Nan iretikitik 24 oh 25 en irelaud 121 en Doctrine and Covenants, E mahsanih:

Me E ketin dehdehkiher oh mahsaniher ar wiewia kan, oh kadeikparail pahn wiawiong irail koaros ni ansou me konehng.

Pwe mie ansou idihadahr ong aramas koaros, pwe irail en kadeingkihla ar wiewia kan.5

Kitail kin kesehla mehn pereo ni ansou kitail kapakapki oh pehmada, “Kupwuromwi en pweida” oh “sapwellime ansou en pweida” Sapwellime ansou pahn itarohng kitail pwe kitail wehwehki me E ketin kupwurikihte dahme keieu mwahu ong kitail.

Emen pwoud en nei pwutak kin pepehm erein sounpahr tohto me Koht ketin kihda mehn pere powe. Ih emen nohno me nainehki seri silimen oh mwahuki me tohtosang. Ni ah liseian ohla pak riau ah kapakap en pekipek apw wie mehn lokolok. Mwurin sounpahr kei oh e saik neitik, e karanihong ah pahn mwehlkihda. Ansou nah me tikitiko kohlahng sukuhl, ah ihmw tehno likamwete wie mehn kepit reh en ah men pil ehu apwali seri—pil duwehte ansou kempoakepah kan ar liseianda ni ar sohte men wie, e pil wie mehn kepit reh. E wiahki me ih emen lih poadidi oh lelepek duwehte Mery me mahsanih, “Iet sapwellimen Kauno lidu ngehi.”6 Ahpw mendahte ah kin koasoakoasoaia lokaia kan nan ah mongiong, eh sohte rong mehkot mehn pasapengpe.

Ni eh men kaparanda liho, ah pwoud luke ih en iang seiloaklahng California. Ni ohlo e ieiang mihting en doadoahk, liho kohla alialu ni oaroahr kaselelo. Ni likamwete ah mongiong pahn mpwuspeseng, eh kapakap ni ngihl laud. Apw ehd en ah wie, e sohte pekihda seri emen ahpw kapai sarawi ehu. “Sahm Nanleng” e pekipeki, “I pahn kihong komwi ahi ansou unsek; menlau kasalehiong ie dahme I pahn wiahki.” E nda me eh pahn pwungki wahda ah peneinei wasa sohte lipilipil re pahn kohla ie. Kapakapo kahrehda pepehm meleilei me eh sohte kasik. E sohte udahn kapwaiada mehkoaros eh mwahuki, apw e kameleileidihla ah mongiong, me sohte wiawi erein sounpahr tohto.

Kapakapo keisang mehn pereo oh apw ritingada wehnihmwtik en nanleng. Mwohn wihk riau e diarada me e liseian. Seri pwelelo sounpahr ehute ansou ira ale malipilip en iang misin. Ni eh inoukihdahr eh pahn kohla oh wia mehkot sohte lipilipil wasa sohte lipilipil, eh pwilikihdi ah masapwehk oh wah nah seriko wasa doh. Ni ar wie ar misin e pil naitikih pil emen seri – rahn ehu me misineri ko keseula.

En lohdi pahn kupwuren nanleng, duwehte nohno wet, iei me katapan en keisang mehn pere kan me kitail pein kihda pohtail ekeipak. Ahpw e sohte pahn kahrehda pasapeng en atail kapakap kan en kin mwadang wiawi.

Likamwete mongiong en Eipraam me mwakelekel mwohn Sara liseianki Isak oh mwohn ar lelohng sapwen inou. Apw, nin duwen kupwuren nanleng, mie mehkan me anahne wiawi mahs. Mwo kan iei en kakeirada pwoson en Eipraam oh Sara oh pil en padahkiong irail mehlel poatoapoat akan me re kin padahkihong mehteikan ni ar seiseiloakseli ong sapwen inou. Likamwete ansou en atail awiawi Kauno pahn kak werei; ekei pahn erein mourwet pwon. Ahpw atail awiawi kin wie mehn kapaipatail. Sohte anahnepen atail pahn awiawi eh pahn wie mehkot kasangat, seukanengamah de pahtou.

Mehndahte sapwellime ansou sohte pahn kin pahrekiong pein atail, kitail kak ese me Kauno kin ketin kapwaiada sapwellime inoukan. Ma emen rehmwail ansouwet wiahki me Kauno apwal en sairih, I kadehdehiong uhk me rahno pahn kohdo me kitail koaros pahn pein kilangki masatail silangih. Duwehte ansou wet sohte mehkot me kin perehla ah kin ketin dedehkin kitail, sohte mehkot pahn kak perehla atail kilang Ih. Kitail koaros pahn uh mwowe, emenemen. Duwehte nein nei serepeino, kitail men kilang Sises Krais ansouwet, apw atail tuhpene Reh ni mwoalen kopwung pahn inenen peren ma kitail pahn wie mahs mehkan me kahrehda E pahn mwangih ihs kitail rasengete atail wehwehki ihs Ih. Ni atail kin papah Ih, kitail pahn ekis duwehla Ih, oh kitail pahn pehmada atail karakaranihong Ih lelohng rahn kokohdo me sohte mehkot pahn kak perehsang kitail, atail dehdehkin Ih.

Atail kekeidlahn karanih Koht pahn wiewiawi ansou koaros. Kauno ketin padahki: “Semeio kupwuramwahwih kumwail; kumwail keido! Kumwail keido oh towehda wehio me onopadahng kumwailehr sang nin tepin kawa,”7 Oh E pil ketin kawehwehda ia mwomwe:

“Pwe ni ei men mwengedahro, kumwail kamwengeieier; ni ei men nimpildahro, kumwail kanampileieier; a ni ei men keiru menkumwail ahpw kasamwoielong nan imwamwail kan:

“Ni eh sohte ei likou, kumwail ahpw kalikawihiehda; ni ei soumwahu, kumwail ahpw pwarodo apwalih ie; I sensel nan imweteng, kumwail ahpw pas rehi.”

“Me pwung ko ahpw pahn sapeng, patohwan, ‘Maing, iahd me se patohwan omwi men konotada, se ahpw patohwando konotomwi, de omwi men konotpilda, se ahpw patohwando konotomwi pihl?

“Iahd me se patohwan komwi mehn keiru men, se ahpw kasamwohkomwihlong nan imwat akan? De kilisou, se ahpw kalikawihkomwihda?

“Iahd me se patohwan omwi luhmwuhmw, de sensel nan imweteng, se ahpw pwarodohng komwi?

“Nanmwarikio ahpw pahn ketin sapeng irail, mahsanih, ‘Kumwail en ese pwe soahng koaros me kumwail wiahiong emen riei me tikitik pwukat, ngehi me kumwail wiahiong!’”8

Ni atail kin wiahiong sapwellime serikan dahme E kupwuriki, Kauno ketin wiahki me iei mehn kadek ehu ong pein Ih, oh kitail pahn pehmada atail karanihong Ih ni atail kin pepehm sapwellime limpoak oh kupwuramwahu rehtail. Oh ehu rahn kitail pahn duwehla Ih oh pahn kasikasik ni peren Rahnen Kadeiko.

Mehn pere me likamwete kin karukihuhkala sang Koht mwein kin kohsang omw masak aramas, oh kaidehn ineng en papah mehteikan. Ihte kupwuren Kauno iei en kin sewese aramas. Duwehte ngehi, mwein me tohto kumwail masapwehk en tuhwong emen me ke pein kalokeier, de mwein emen me kalokeiuk. Apw I pein dehdehkier mwomwen Kauno eh ketin kamwuterekala mongiong en aramas, iangahki pein ahi. I eri panawih uhk en kohla tuhwong emen pwehki Kauno, mendahte omw masapwehk, pwehn kihong omw limpoak oh mahk. I inoukihong uhk me ni omw wie met, ke pahn pehmada limpoak en Kauno ong aramaso oh pil sapwellime limpoak ong pein uhk, oh e pahn kohsang wasa sohte doh. Ong kowe, mwein kapwaipen peneu wet pahn wiawi nan omw peneinei, de mwein omw kousapw, de mwein nan omw wehi.

Ahpw ma ke pahn wiliandi Kauno pwehn kapaiada mehteikan, E pahn ketin dehdehki oh ketikihda ketingpe. Ma ke pahn kin wie met ni uhwe werei, ke pahn pehmada omw wiliakapwala – sang ni Tomwpen Sises Krais. Ke pahn pehm omw kerekereniong Ih, ahpw ke pil pahn pehmada omw ekis duweduwehla Ih. Eri ni ansou ke pahn pein kilang Ih, duwehte me pahn pweiong kitail koaros, omw pepehm pahn duwehte Moroni, me mahsanih: “Oh met I ndaihong kumwail koaros, kaselel. Me keren, I pahn koamoaledi nan paradais en Koht lao lel ni ansou me ngeni oh paliwerei pahn pwurepene, oh I pahn pwarodo ni ei pahn pwerido nan wehwe pwehn tuhwong kumwail mwohn mwoalen kopwung kaperen en Sihowa lapalap, me Sounkopwung Soutuk en me momour oh me melahr akan. Amen.”9

Ma kitail pahn doadoahk ni pwoson, karakarak, oh inangih kapwaiada kupwuren Koht, I kadehdehda me mwoalen kopwung en Sihowa lapalap pahn inenen kaperen. Kitail pahn dehdehki Sahmatail kempoake oh sapwellime Iehros duwehte Ara kin ketin dehdehkin kitail rahnwet – ni sansal mehlel oh limpoak unsek. Ni mware sarawi Sises Krais, ahmen.