Yadrava Matua Tiko na Noda iTavi

Ni oti na noqu kacivi meu lewe ni mataveiliutaki raraba ni iSoqosoqo ni Veivukei, au vakila niu sa gadreva meu kila vakalevu cake na veika baleti ira na marama era a veiqaravi taumada e liu vei au. Au a taleitaka vakalevu na veika a vakavulica o Sisita Zina D. Young, na imatai ni daunivakasala ena ikarua ni mataveiliutaki raraba ni iSoqosoqo ni Veivukei. A kaya kina, “Kemuni na marama, meda sa yadrava sara tikoga na noda itavi.”¹ Au vakasamataka vakatitobu na vosa yadrava kei na itavi kau a vacakulea tale na ivolanikalou.

Ena Veiyalayalati Vou, a vakavulici ira na Yalododonu o Paula ena nona siga:

“Ia oqo ni da kila na gauna, ni sa gauna oqo mo dou yadra kina mai na moce: ni sa qai voleka na noda bula. …

“Sa vakarau oti na bogi, a sa voleka na siga: … ka meda vakaiyaragi tu ena rarama.” ²

Ena iVola i Momani, a vakavulici ira na nona tamata o Alama ena nodra itavi tabu o ira era sa curuma yani e dua na veiyalayalati kei na Kalou:

“Ia, me vaka dou sa gadreva mo dou curu ki na loma ni bai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;

“Io, ni sa lomamudou mo dou tagi vata kei ira sa tagi, ka vakacegui ira sa rarawa, ka vakadinadinataka na Kalou ena veigauna kecega, ena veika kecega kei na veivanua kecega. …

“Raica au sa kaya vei kemudou, kevaka sa vaka oqori na ka sa lomamudou, na cava me tarova na nomudou papitaiso ena yaca ni Turaga, io me ivakadinadina ni nomudou sa veiyalayalati kaya mo dou qaravi koya ka muria na nona vunau, me sovaraka mai kina vei kemudou na nona Yalo Tabu?

“Ia ni ra sa rogoca na vosa oqo, era sa vakasausau ena marau, ka ra kailavaka: Io oqori sara ga na ka sa lomai keimami tiko.”³

Na itukutuku oqo nei Sisita Young kei na ivolanikalou oqo a vakavuna meu raica vakabibi na “itavi” sa dodonu meda yadrava tiko ena noda siga oqo.

Ni da sa papitaiso, eda sa curuma yani e dua na veiyalayalati. E vakavulica kina o Elder Robert D. Hales, “Ni gauna eda vakayacora ka maroroya kina na veiyalayalati, eda sa lako tani mai vuravura ka curuma yani na matanitu ni Kalou.”⁴

Eda sa veisautaki. E duatani na keda irairai kei na noda itovo. Na veika eda rogoca ka wilika ka cavuta sa duatani sara, ka duatani na noda isulusulu baleta ni da sa yaco meda luvena yalewa na Kalou ka vauci Vua ena veiyalayalati.

Ni da sa vakadeitaki, eda sa ciqoma na isolisoli ni Yalo Tabu, ka soli na dodonu meda vakauqeti tiko ena veigauna mai vua e dua na lewe ni Lewetolu Vakalou me dusimaki keda, me vakacegui keda, ka me taqomaki keda. E vakaroti keda ena noda rawa ni temaki meda lako tani mai na noda veiyalayalati ka lesu ki vuravura. E vakavulica o Peresitedi Boyd K. Packer ni sega ni dua vei keda “ena laki vakayacora mada e dua na cala bibi ka me se sega mada ni vakaroti mai na veivakauqeti ni Yalo Tabu.”⁵

Na kena ciqomi na isolisoli oqo ka me tiko vata ga kei keda na Yalotabu, e dodonu meda bula kilikili kaya ka vakadikeva tiko vakaikeda na ituvaki ni yaloda. Eda sa yalo malumalumu tiko beka? Sa tiko beka vei keda na yalomalua, na yalo e rawa ni vakavulici, na yalo vinaka? Se sa tekivu me toso tiko me kaukauwa na yaloda ni da sa vakatara meda rogoca vakasivia na rorogo kei vuravura me vagolei keda tani mai na veivakauqeti vinaka sa dau yaco deivaki mai vua na Yalotabu?

Ena gauna eda a papitaiso kina, a veisau na yaloda ka vakayadrati yani vua na Kalou. Ena noda ilakolako ni bula oqo, e gadrevi meda dau vakatarogi keda tiko vakai keda, “Kevaka [au] sa kaya [niu] sa veivutuni, … a cava [au] sa nanuma e na gauna oqo?”⁶ Ia, ke sega, me kua vakacava?

E vuqa na Yalododonu ena gauna e liu “sa uqeti li kina na [yalodra] [me ra] veivutuni.”⁷ A vakayadrati ira mera ciqoma na nodra veivakalougatataki ni valetabu era a vakaukauwataki kina ena nodra itavi. Era a gole yani na Yalododonu taumada mai Nauvoo “ki na valetabu ena siga taucoko ka yacova yani na bogi levu”⁸ mera ciqoma na cakacaka vakalotu ka vakayacora na veiyalayalati ni bera ni ra tomana yani na nodra ilakolako ki na mua-i-ra.

A kaya vakaoqo o Sarah Rich, e dua na marama ni iSoqosoqo ni Veivukei e Nauvoo: “E vuqa na veivakalougatataki keimami sa ciqoma ena vale ni Turaga, ka sa vakavuna na neimami reki kei na vakacegu ena maliwa ni neimami rarawa ka rawa kina ni keimami vakabauta na Kalou, ka kila ni na tuberi keimami ko Koya, ka tokoni keimami ena ilakolako tawakilai sa tu e matai keimami.”⁹

Ena kena sa mai veisau na yalo ena vakabauta na iVakabula, era sa vakararavi ga ena kaukauwa ni Nona Veisorovaki. Era sa mai vakayadrati mera cakacaka. Era sa kila vakatitobu sara e yalodra ni tiko dina e dua—o ya na iVakabula—ni kila vakavinaka tu na nodra bula dredre yadudua baleta ni sa mai vakararawataki kina o Koya ena vukudra ena Were o Kecisemani kei na kauveilatai. E vakila na nodra rere, na nodra lomalomarua, nodra mosi, kei na nodra galili voli. A vakararawataki ena nodra rarawa, nodra vakacacani, nodra via kana, nodra oca, kei na nodra mate. Ena vuku ga ni sa mai vakararawataki o Koya ena veika kece oqo, ena qai kaya o Koya vei ira, “Dou lako mai vei au, koi kemudou vakaaduaga sa oca ka colata na icolacola bibi, ia kau na vakacegui kemudou.”¹⁰

Era sa qai lako mai. Era sa vakararavi ka muria kina na parofita. Era sa kila tu ni na balavu sara na ilakolako, ka dredre na nodra itavi. Era sa kila tu ni na gadrevi kina na solibula, ia ni ra sa tokoni tu ena nodra vakabauta ka ququmi tiko ena nodra veiyalayalati, era sa vakavakarau tu kina vakayalo.

Ni bera ni ra biuti Nauvoo era a vola e dua na ilawalawa ni Yalododonu e dua na itukutuku ena olo ni soqoni ni valetabu era sa vakasaurarataki mera na biuta. E volai vakaoqo, “Sa raica na Turaga na neimami solibula: muri keimami mai.”¹¹

E dua na gauna sa oti au a lako talega ena dua na taubale ni painia vata kei ira na cauravou kei na goneyalewa ni neimami tabanalevu. Ena veimataka au dau tarogi au, “Meu solibula beka ki na cava? Meu na vakataki ira vakacava?”

Ena ikarua ni siga ni taubale sa laki walu na maile (13 na kilomita) na neimami dreta tiko na neimami qiqi ka keimami sa yacova yani e dua na vanua ena ilakolako oqo e vakatokai “nodra idre na yalewa.” Era sa tawase na tagane kei na yalewa, ka ra sa vakau yani e liu ki delana na tagane. Ni keimami sa tekivu dreta yani na neimami qiqi, au raici ira yani na neimami veitacini matabete, gone kei na qase, era sa tu e yasa ruarua ni sala, era luvata na nodra isala mera vakarokorokotaki ira na yalewa.

Taumada a rawarawa toka na sala, ia vakalailai ga sa vavaku mai na nuku, ka sa tekivu me babasobu na delana. Niu sa cuvaki sobu ga ka bili ena noqu kaukauwa taucoko au a vakila e dua na idre ena noqu qiqi kau rai yani ka raici Lexi, e dua vei ira na neimami goneyalewa e noqu neiba. A dreta yani i cake o koya na nona qiqi, ka raica ni keitou gadreva na veivuke, a cici lesu mai. Ni keitou sa yaco yani i cake, sa dua na ka na noqu vinakata meu cici lesu meu laki vukei ira era muri au tiko mai, ia au sa cegulevu sara tikoga ka sa tavatukituki vakaukauwa sara tiko na utoqu ka sa voqa vakaukauwa sara mai vei au na vosa mate ni uto ena vica vata na gauna! Au rai yani ena vakavinavinaka ni ra sa mai biuta na goneyalewa na nodra qiqi ka cici yani mera laki veivuke.

Ni keimami sa yaco kece yani i cake, keimami a taura eso na gauna me keimami vola na neimami nanuma ena neimami ivola-ni-veisiga. Au a vola: “Au a sega ni vakarautaka vakavinaka mai na yagoqu ka sega kina vei au na kaukauwa meu vukei ira era muri au tiko mai. Ena sega tale beka ni gadrevi meu na dreta e dua na qiqi, ia au na sega tale vakadua ni vakawaleni ira vakayalo na taciqu, sega vakadua!”

O ya e dua na gauna tabu au a vakayadrati kina vakayalo ki na noqu itavi ki na noqu matavuvale kei ira na tamata. Ena neimami ilakolako taucoko oqo au a vakasamataka sara tiko na veika au sa vulica rawa.

Au vakasamataki ira e liu na taciqu, o ira era a dre kei ira era tomana tiko e daidai mera dreta taudua tiko na nodra qiqi. E voleka ni 20 na pasede na yalewa ena ilawalawa ni qiqi taumada o ya era a tiko duadua ena so na gauna. Oqo o ira na marama era a sega tu ni vakamau, era sa sere, se sa yada. E vuqa era marama tina duadua.¹² Era duavata taucoko ena dre—o ira na luvena yalewa ni veiyalayalati, gone kei na qase, ena duidui ni ituvaki ni bula, ena sala vata ga, ena inakinaki vata ga.

O ira era cici yani mera laki vukei ira na tacidra era vakaleqai au vakasamataki ira kina era dau totolo sara na nodra raica rawa, e dua e gagadre, ka cakava sara.

Au nanuma kina na vosa ni Turaga: “Niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalotabu ena tiko e yalomudou, era na vakavolivoliti kemudou na noqu agilosi ka laveti kemudou cake.”¹³

Era tucake tu e yasa ruarua ni sala o ira na tagane yalodina, talairawarawa, ka maroroya tu na veiyalayalati. Na nodra kaukauwa ni matabete—na kaukauwa ni Kalou e vakayagataki mera vakalougatataki kina o ira na Luvena taucoko—laveti cake, vakaukauwataki, ka tokoni keda. Era sa veivakananumi ni da sega vakadua ni tiko duadua. Sa rawa me tiko ga kei keda na nona kaukauwa ni da maroroya na noda veiyalayalati.

Au vakasamataki ira na tagane era a tawase mai na nodra matavuvale, ka biuti ira tu mera dreta duadua tu na nodra qiqi. E vuqa na tagane era a mate ena ilakolako oqo. Eso na luvedra tagane era wawa tiko mai mera kaulotu ga ena nodra vanua. Eso era sa biu vanua oti mera laki vakarautaka na nodra yaco mai na nodra matavuvale ena Buca o Salt Lake. Eso na tagane era yali ena nodra digidigi ga, ni ra sa digitaka mera kakua ni maroroya na nodra veiyalayalati.

Me vakataki ira era sa gole yani e liu, e vuqa era bula tu ena ituvaki ni bula e sega tu ni vinaka. Eda sa tomana tiko meda vakavulica ka sasagataka na ka uasivi baleta ni da kila tiko ni tomani tiko na sasaga oqo eda na tubu cake kina ena salatu ka vakarautaki keda ki na veimadigi meda ciqoma na veivakalougatataki yalataki taucoko ni da “waraki Jiova.”¹⁴

Sa yaco oti vei keda yadua ka na yaco tikoga mai na veika dredre ena noda bula. Na bula oqo sa gauna ni vakatovolei, ka na yaco tikoga mai na madigi meda vakayagataka kina na noda galala ni digidigi mai na veika eda na vulica mai na veika dredre ena dau yaco ga mai.

Ni da sa luvena yalewa na Kalou, eda tomana tikoga na salatu ena vakabauta baleta ni da sa kila, me vaka e vakavulica o Peresitedi Thomas S. Monson, “Na veicakacaka vakalotu eda ciqoma ena valetabu ena vakatara vei keda meda lesu tale vei Tamada Vakalomalagi ena dua na siga ena dua na isema vakamatavuvale e tawamudu ka da vakalougatataki ena kaukauwa mai lomalagi e veiganiti vinaka kei na solibula kei na veisasaga yadua.”¹⁵

E se sega ni rauta me da lako tiko ga; e dodonu meda yadrava tiko na noda itavi ka tomana tiko ena vakabauta ni da vakatikora vei keda na kaukauwa veivakacegui, veivakaukauwataki, veivagumatuataki, kei na kaukauwa veivakabulai ni Veisorovaki.

Kemuni na taciqu, au lomani kemuni. E vuqa vei kemuni au sega ni kila na yacamuni, ia au kila o cei o iko! Eda sa luvena yalewa veiyalayalati ni Nona matanitu, ka da sa vakaedaumeni ena kaukauwa ni noda veiyalayalati, ka da sa vakavakarau tu meda cakava na noda itavi.

Na iSoqosoqo ni Veivukei e vakarautaki ira na marama mera vakalougatataki ena bula tawamudu ena vakayadrati keda tiko vakayalo meda tubu cake ena vakabauta kei na noda ivalavala dodonu yadudua. Meda tekivu mada ga vei keda. Meda tekivu ena vanua eda sa tiko kina oqo. Meda sa tekivu nikua. Ni da sa yadra tiko vakayalo, eda na gumatua cake meda vakaukauwataka na matavuvale kei na itikotiko ka vukei ira na tamata.

Oqo e cakacaka ni veivakabulai, ka yaco rawa oqo ena kaukauwa veivaqaqacotaki ka veivagumatuataki ni Veisorovaki. Meda yadra ka kilai yaloda. Vakayadrati ki na noda itavi. Eda sa luvena yalewa na Tamada Vakalomalagi, sa dau lomani keda. Au sa vakadinadinataka oqo ena yaca i Jisu Karisito, emeni.