2010–2019
Wan Tru mo Strong Fandesen
Epril 2013


Wan Tru mo Strong Fandesen

Bae yumi akseptem invitesen blong Sevya blong kam long Hem. Bae yumi bildimap laef blong yumi long wan sef mo strong fandesen.

Long 17 Oktoba 1989, taem mi stap draev blong go hom afta long wok, mi stap kam kolosap long laet blong rod hemia long kros rod blong Maket mo Bil Strit long Fransisko, Kalifonia. Long taem ia mi bin filim se trak i stap muvmuv mo mi ting se: “!Ating wil blong mi i flat!” Be taem trak i stap gohed nomo blong muvmuv, mi luk wan bas kolosap long mi mo ting se: “!bas ia i jes bangem mi!” be afta trak i gohed blong seksek moa was, mo mi stap tingting nao se: “!ol fofala wil blong mi i flat wantaem ia!” Be i no bin hemia o bas—!hem i bin wan strong etkwek! Taem mi stop long red laet; i gat ol smol hip long ples blong wokbaot, olsem ol wef oli stap brok long Maket Rod. Long fored blong mi i gat wan longfala ofis bilding we i swing long saed i go narasaed, mo ol brikis i stap folfoldaon long wan olfala bilding long lef saed blong mi taem we etkwek ia i stap seksek.

Etkwek ia, Loma Prita, i bin kasem San Fransisko Bei Eria long fo pas faef long aftenun ia long dei ia mo livim biaen 12,000 pipol we i nomo gat haos.

Etkwek ia i bin mekem wan bigfala damej long San Fransisko Bei Eria, speseli nao ol graon long San Fransisko mo Oklan. Long San Fransisko, Distrik blong Marina “oli bin bildim long wan graon we oli bin mekem aot long sanbij, doti mo roten samting we oli miksim mo sam nara samting we i gat insaed plante wota blong graon. Sam long ol graon ia we oli fulumap ples ia wetem, i rol i go long San Fransisko Bei afta wan etkwek long 1906 we i bin kasem San Fransisko.”1

Long 1915, oli bildim bakegen ol bilding apatmen long graon ia. Long 1989 etkwek, graon we i gat wota, mo ol roten samting we i stap we oli no bin miksim gud oli kam wota evriwan mekem se ol bilding oli folfoldaon. Hemia from nomo ol bilding oli no bin bildim long wan tru mo strong fandesen.

Etkwek ia, Loma Prita, i bin spolem plante laef, mo laef blong mi tu. Taem mi stap tingting hevi long wanem we i hapen long dei ia, i konfemem long hat mo maen blong mi se blong save stanap strong long ol strong win, ol etkwek mo ol disasta blong laef, yumi mas bildim wan tru mo strong fandesen.

Profet blong ol man blong Nifae, Hileman, i bin talem klia, we i no gat mistek, from wanem i impoten blong bildimap laef blong yumi long wan tru mo strong fandesen, we i fandesen blong Jisas Kraes: “Mo nao, ol boe blong mi, tingbaot, tingbaot se hem i long ston blong Ridima blong yumi we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala we i wan sua fandesen, wan fandesen long hem we sapos ol man i bildimap olgeta long hem oli no save foldaon.” (Hileman 5:12).

Long taem blong ol tempol blong yumi tedei, oli lukluk gud long disaen, man we i bildim, mo olsem wanem oli yusum ol tul blong bilding. Oli testem gud ol graon mo stadi blong graon long ples we bae oli bildim tempol long hem. Ol stadi blong win, ren mo jenis blong weta blong wan eria from taem oli bildim finisim tempol, bae i save stanap strong, i no agensem ol strong win mo situesen blong weta long wan eria, be tempol oli mekem i stanap strong tu agensem eni etkwek, saeklon, bigfala wota, mo ol nara disasta we i save hapen. Long plante tempol, ol strong simen mo pos oli planem i go dip daon long graon blong stap olsem angka blong fandesen blong tempol.

Olsem olgeta we oli disaen mo bildim taem blong yumi, Papa blong yumi long Heven mo Pikinini blong Hem we tufala i lavem yumi, i bin rere long ol plan, ol tul mo ol nara risos blong yumi yusum blong save bildim mo stretem laef blong yumi blong stap strong mo no seksek. Plan ia i plan blong fasin blong sevem man, bigfala plan blong stap glad. Plan ia i soem yumi wan klia pikja mo save abaot stat mo en mo ol impoten step, wetem ol odinens, we oli impoten blong wanwan pikinini blong Papa blong save gobak stap wetem Hem blong oltaem.

Fet, fasin blong sakem sin, presen we i Tabu Spirit, mo blong stanap strong kasem en, oli pat blong “plan” blong laef blong yumi. Oli help blong mekem bilding i luk stret wetem impoten prinsipol we bae i olsem angka long ol laef blong yumi wetem Atonmen blong Kraes. Ol sep mo frem ia oli sapotem blong stretem laef blong wan man. Afta, olsem tempol plan i gat ol spesel instraksen we i talem moa abaot olsem wanem blong mekem mo putum gud ol impoten pat ia, prea, ridim ol skripja, tekem sakramen, mo kasem ol impoten odinens blong prishud, oli kam “ol spesel instraksen” we bae i help blong putum tugeta mo fasem tugeta strakja blong laef.

Blong skelem gud ol samting taem yumi yusum ol spesel instraksen ia, i impoten. Eksampol, long taem blong mekem strong simen, oli mas putum stret namba blong sanbij, karier, simen, mo wota, blong mekem i kam strong gud. Sapos oli no putum stret inaf long ol defren kaen samting ia, bae i mekem simen we oli tanem ia i no strong, mo i no save wok, o gat ful paoa blong hem.

Long sem fasin, sapos yumi no givim wan stret skel long laef blong yumi blong gat evri dei prea blong yumiwan, mo kakae long ol skripja, kam strong moa evri wik blong tekem sakramen, mo oltaem tekpat long ol prishud odinens olsem ol tempol odinens, yumi tu, yumi save kam slak long laef blong yumi long saed blong spirit we i nid blong stap strong.

Pol, long wan leta i go long ol pipol blong Efesas, i bin talem long wei ia wetem respek wetem nid ia blong skelem mo putum tugeta fasin mo sol blong yumi we i stap kam antap: “Long evri bilding we oli bildim stret tugeta i gro i kam wan tabu tempol blong Lod” (Efesas 2:21).

Prea i wan long ol besik mo impoten fandesen brikis blong fet mo fasin blong yumi. Tru long prea, yumi save soem tangkyu blong yumi, lav mo ful tingting long God. Tru long prea yumi save putum tingting blong yumi i kam folem tingting blong Hem, mo Hem i save mekem yumi kam strong moa blong mekem laef blong yumi folem ol tijing blong Hem. Prea hem i rod we yumi folem blong filim paoa blong Hem long laef blong yumi, we i revelesen.

Alma i bin tijim: “Askem advaes long Lod long evri wok blong yu, mo bae hem i lidim yu blong gud; yes, taem we yu stap ledaon long naet ledaon long Lod, blong mekem se hem i save lukaot gud long yu long slip blong yu; mo taem we yu girap long moning letem hat blong yu i fulap long ol tangkyu long God; mo sapos yu mekem ol samting ia, bae God i leftemap yu long las dei” (Alma 37:37).

Fasin blong yumi serem ol tingting, filing, mo tingting blong hat blong yumi wetem God tru long wan prea we i tru mo i kam long hat, i mas kam, long wanwan long yumi, olsem wan samting we i impoten mo i nomol, semmak olsem we i impoten mo nomol blong pulum win mo kakae.

Blong luklukgud long ol skripja evri dei bae i mekem fet mo fasin blong yumi i kam strong. Semmak olsem we yumi nidim kaekae blong fidim bodi blong mit mo bun blong yumi, spirit mo sol blong yumi bae i fulap mo kam strong moa taem yumi kakae long ol toktok blong Kraes olsem we i stap long ol raeting blong ol profet. Nifae i tijim se: “kakae gud long ol toktok blong Kraes; from luk, ol toktok blong Kraes bae i talem long yufala evri samting we yufala i mas mekem.” (2 Nifae 32:3).

Blong ridim ol skripja, i gud; blong ridim nomo i no inaf blong kasem mining blong ol tijing blong Sevya. Luklukgud, tingting hevi, mo yusum ol toktok blong Kraes olsem we oli tijim insaed skripja bae i givim waes tingting mo save we i moa long save blong yumi long wol ia. Hemia bae i mekem komitmen blong yumi i kam strong moa, mo i givim laef long saed blong spirit blong mekem bes blong yumi long evri situesen.

Wan long impoten step we yumi save tekem blong mekem laef blong yumi i kam strong moa mo stap strong long fandesen blong Sevya i blong stap klin inaf blong tekem sakramen evri wik. Sakramen odinens i givim long evri Jos memba, janis ia blong tingting hevi long laef blong hem fastaem, blong luksave ol aksen we oli nidim blong sakem sin from, mo afta tekem bred mo wota olsem wan tabu saen blong tingbaot bodi mo blad blong Jisas Kraes, wan witnes blong Atonmen blong Hem. Taem yu mekem olsem wetem wan tru hat, mo gat tingting daon, yumi stap mekem wan niu kavenan we i no save finis, oli klin mo tabu, mo kasem promes se bae yumi gat Spirit blong Hem i stap wetem yumi oltaem. Spirit i olsem long mi wan masket, wan wei we bae i no mekem samting i tabu nomo, be i mekem yumi tingbaot evri samting mo testifae bakegen mo bakegen abaot Jisas Kraes. Taem yumi klin inaf mo tekem sakramen i joenem yumi kam strong moa wetem fandesen ston ia, we i Jisas Kraes.

Long taem blong seves blong Hem, Sevya i bin tij wetem lav mo mekem i klia ol doktrin, prinsipol, mo ol impoten aksen we bae i sevem laef blong yumi mo mekem ol fasin blong yumi i kam strong moa. Long en blong Toktok blong Hem Antap long Hil, Hem i talem se:

“Taswe nao, eni man we i harem ol toktok ia blong mi mo i mekem olgeta, bae mi skelem hem olsem wan waes man we i bin bildim haos blong hem antap long wan ston—

“Mo ren i bin foldaon, mo ol wota i bin ron bigwan, mo ol win i bin blu, mo i bin kilim haos ia; mo i no bin foldaon, from i bin stanap antap long wan ston.

“Mo evriwan we i harem ol toktok ia blong mi mo i no mekem olgeta bae mi skelem olsem wan man we i krangke we i bin bildim haos blong hem antap long sanbij—

“Mo ol ren i bin foldaon, mo ol wota i bin ron bigwan, mo ol win i blu, mo i bin kilim haos ia; mo hem i bin foldaon, mo foldaon blong hem i bin bigwan” (3 Nifae 14:24–27; luk tu long Matiu 7:24–27).

Ol brata mo sista, i no gat wan long yumi bae i bildim ol hom, ples blong wok, o ol tabu haos blong wosip blong yumi long sanbij, mo roten samting, o sapos i nogat stret plan mo tul. Bae yumi akseptem invitesen blong Sevya blong go long Hem. Bae yumi bildimap laef blong yumi long wan sef mo strong fandesen.

Mi testifae wetem tingting i stap daon se taem yumi angkarem laef blong yumi long Jisas Kraes mo Atonmen blong Hem mo folem gud plan blong Hem blong yumi stap glad, we i tekem blong prea evri dei, stadi skripja evri dei, mo tekem sakramen evri wik; bae yumi kam strong moa, bae yumi luk we yumiwan i stap gro mo gat wan jenis long laef blong longtaem; bae yumi rere gud blong stanap wetem paoa agensem ol strong win mo ol disasta blong laef. Bae yumi eksperiensem glad mo hapines we Hem i promesem, mo gat tras se laef blong yumi, yumi bildimap antap long wan tru mo strong fandesen—wan fandesen we bae i neva foldaon. Long tabu nem blong Jisas Kraes, amen.

Not

  1. Luk long “1989 Loma Prieta Earthquake,” wikipedia.org/wiki/1989_Loma_Prieta_earthquake.