2010–2019
A Mesisiich el Dodai
April 2013


A Mesisiich el Dodai

Me mede nguu Osobel me bo el losebeled. Eme medebekdecherur a klengar kid er a ungil e mesisiich el dodai.

Sera October 17,1989, el omerolek el lomekall el moremei, eak mla stob er tia el stoplight ra intersection er a Market me a Beale Steets ra chelsel a San Francisco, California. Ngar tia el telkib el taem eak mlo omelchesiu er tia el mlai el mengitengtik ma kumelchesuar el kmo, “Ng locha mla flat a taia er a mlik.” Mal bocha el luut el mengitengtik tia el mlai eak milsa bas el kmal di kmeed er ngak mak kulumdasu, “Tia el bas a locha tilchelak!” E solaie e tial mlai a liluut el kmal mo mengitengtik, mak melchesuar, “Ak locha mla flat ika el kloua el taia er a mlik!” Engdi ng dimlak el taia er a mlik ma lechub eng tial bus—eng mle ta er a kmal mle mesisiich el desiu! Mi sera kstob er tia el redl light, eng mlar ngii a kora iull ra daob er tia el chesuart el rael el mo metengel ra Market Street. Ea ngar medak a ta ra kmal kemanget el blai el mengitengtik el mong e mei, eaika el telkib er tial blai a mocha merberebet er tia el mechut el blai el mocha ra kitur er ngak el telkib ea tia el beluu a liluut el melmesim.

A desiu el Loma Prieta el lulemuchel ra San Francisco Bay Area ra eim el klok ra klebesei mete kmeed el teruich me a eru el telael el chad a miltemall a blirir.

Tial desiu a tilmall a kmal mle betok ra San Francisco Bay Area, er a kmal mle klou el telmall el chutem ra San Francisco ma Oakland. Chelsel a San Francisco, er sel Marina District a blal lomkedechor e meruul er ngii el lobengkel a chelchol, dechudech, besbas ma lemuut el bebil ra klalou el klou a basent ra ralm er ngii. Ea bebil ra komi a ml era San Francisco Bay ra uriel ra rak ra 1906 el desiu el mlorngii ra San Francisco.”1

E sera bedul a 1915, ea blai a mlo mekedechor er tial chutem. E sel desiu ra 1989, ea ralm me a dechudech, komi, chelchol a ulebult el mo kora kedidai el chutem, el luchul ea ika el meklou el blai a miltemall. Aika el meklou el blai a dimlak el mesisiich a dodai er ngii.

Tia el Loma Prieta el desiu a tilmall a kmal mle betok el klalou ma klengar ra rechad, luldimukl er ngak. Sel bo kulebedebek er sel sils el mera uldesuek eia renguk a mlo chelelakl el kmo a teletael el mo sebeched el outekangel el otekur aika el desiu, me a ringel er a klechad, eng kired el lomkedechor er a kmal lungil e mesisiich el dodai.

A Nephite el mle prohet Helaman a mileskid a kmal mle ungil el mesisiich el suobel el kmal klou a belkul el mera klengar kid el kirel a mesisiich el dodai, el direk el dodai lokiu a Jesus Kristo: “Ng dilu el kmo ng kired el mekedecherur a dodai rkid ra bedul a Osobel, el ngii a Kristo, el Ngelekel a Rubak, me a lemei a diablong lomeskid a ses el yolt eng mo diak a klisichel el tomellid ele kede mla mekedechor ra bedul. Tia el bad el ngii a mesisiich el dodai, el sekum a chad a mekedechor ngii eng diak el rebet” (Helaman 5:12).

Ngara omerelel a beches el templo, eng kmal ngar ngii a ukedelad el uldasu el mo meruul, meleketek, me a klalou el lousbech el lomekedchor. Ng okiu a skeng er a chutem me a geology el mengai er tia el basio el mo omkedechor er a templo er ngii. A omesuub er a yolt, chull, me a teletelel a blekerdelel a eanged el mor tia el basio te direk el lomdasu me tia el templo a sebechel el mesisiich el dechor a lebo er ngii a mesisiich el yolt me a teletelel a eanged el mertia el basio, eng di tia el templo a ruul el dechor el mesisiich el kirel a rua mesisiich el desiu, ses el yolt, ieleb, me a bebir er a teletelel a eanged el mor ngii. A bek el templo, a sement ma lechub eng deel el mesisiich el dechor lolengeseu el mo tmuu el mora iou ra chutem el ual lokul me a lechub eng ngoreked er a dodai.

Diuai tirka el meruul me a omkedechor er chelcha el temed, ea kmal betik ra rengud el Chedam er kid er a Babeludes me a Ngelkel a mla rulii a telbiil, dongu, me a bebil er a uldasu el bo dousbech meng sebeched el rulii a okesiul er a klengar rekid el kmal mo mesisiich el diak el mesim. Tia el telbiil a telbiil er a diak a ulebengelel klengar, a kot el klou el telbiil er a diak a ulebengelel klengar. Tia el telbiil a kmal lungil el lochotii a ungil el siasing el mera uldesued e ra ucheled el me ra ulebongel, me a ungil bakes el dokiu ngii, lobengkel a chedaol ebangkelio, el ngii a kmal klou a ultutelel el mor er a rengelkel a Demad ra Babeluades el mo sebeched el lemuut el mo obengkel el kiei el mo cherechar.

Klaumerang, chouchel reng, techolbechelid, sengk ra Chedaol Reng, me a outekangel el mora ulebongel a tara “cherengelel a telbiil” el mera klengar er kid. Te tmak el lolngeseu er kid el lomkedechor aike el ngii a meklou a ultutelel el mera klengar er kid el more Tngakireng er a Kristo. A ika el kata me a okesiu e ngosukid el mechebechid er a klengar kid. E kuk, ng di uaika el telbiil er a templo ngar ra ungil teletael el ngii a meskid el kmo ng uangera el teletael a omousbech el meruul el uldimukel er a ureor, nglunguuch, omengiuel a chedaol llechukl, e melai er a chedaol belsoel, e direk el melai er a klengeltengat er a chederdelir a priesthood a dirrek el “ngar ra ungil teltael” el ngosukid el motmak e mesisiich er a klengar kid.

A delbedebel a ungil teletelel a ureor a kmal klou a ulutelel. Di uaia, sel doruul er a sement, sesel chelchol, baras, sement, me a ralm el dousbech el sebeched el lnguu sel lungil klisichel. Alsekum eng mlo er ngii a ngelsengesel eng rulii tial cement el mo mechitechut el diak el lungil rulii sel klou a ultutelel el teletael.

Osisiu el teletael, alsekum eng diak de ruul aike el ngii a meklou a ultutelel el mera klengar kid er a bekel nglunguched er a chedaol llechukel, bekel sandei el dolisiich er a omelai el chedaol blauang, me a ungil chelchad ra priesthood er a chedaol urerel el di uai a chedaol urerel a templo, kid a dirrek el meral mo mechitechut er a rolel a chedaol klisiched.

Paulus, er a tengami er ngii el mo re Efesus, eng dilu el kmo ngar tia el teletael eng kired el mo melbodeb e meruul ra ungil teleteled el kirel a delbenged: “Ngkel ngii a mo ungil mekdecherur a okesiul a tmak el mukeroel el mo chedaol el templo ra Rubak” (Ephesians 2:21).

A nglunguuch a kot er a kmal klou a ultutelel el dodai er a okedercherul a ungil losisechakl ra klaumerang me a blekerdeled. A belkul a nglunguuch eng sebeched el mereng a saul, beltikel reng, me a lemeltel a Dios. Ngokiu a nglunguuch eng sebeched el mesa a klengar er kid e sel luut el mei eng meskid a klisiich el me er a klengar er kid el lokiu a osisecheklel a Dios. Nglunguuch a rael el sebeched el lokiu ngii el mo metik a ungil Osisecheklel el mera klengar er kid, me a direk el ocholt.

Alma ulisechakl el kmo ng kired el blechoel lomdasu er Ngii ra aikel doruul e Ngii a omekrael er kid el mora ungil. Sel klebesei mebo de bechiuaiu, e dolengit er Ngii me lomes rkid. E sel de bekiis ra tutau, eng kired loureng a sulel a Dios. Me a doruul aikang ekede mo mekiis er sel ngii a saingo el sils. (mesaAlma 37:37).

Sel de kauidoid a uldesued, maikel ngara rengud, me a rengud el mo er a Rubak el Dios lokiu a ngariou el reng er a nglunguuch eng kmal kirel el klou a belkul el merkid el diosisiu sel douteliil me a lechub e ke de omengur.

Sel deblechoel el menguiu er a chedaol llechukl er a bek el sils eng smisichii a klaumerang er kid me a blekerdeled. Ng kmal di uaia bedenged sel dousbech a kall el melisiich er a bedenged, eia reng me a delbenged a mo beches e mesisiich sel domengur el menga aika el tekingel a Kristo elngii a luches el luluches a reprophet. Nephi a ulisisechakl, “Bo medings ra tekingel a Kristo; le tekingel a Kristo molecholt er kemiu a ikel kiriu el meruul” (2 Nephi 32:3).

Ele sel monguiu a chedaol llechukl eng ngungil, omenguiu a osischeklid e rulid el kmal mo mui a klaumerang er kid er a osischeklel a Osobel. Osiik, omdasu, me a oltaut ika el tekingel a Kristo el blal losisecheklau e ra chedaol llechukl a sebechel el losischeklau el mo medengei e meklemesau er a kuk di uldesuem er a klechad er kau. Tia mo smisichii a iaksok er kau el meskau a ungil el reng el mo melemolm el meruul el mor sel tkul rbab el sebechem.

A tara kmal klou a ultutelel el bakes el sebeched el nguu meng tara melisiich er a klengar kid e melmolem el mesisiich el uchetemed er a Osobel a kirded el mo klikiied el melai er a edaol el blauang er a bek el sandei. Aika el osischeklel er a sakrament a sebechel mer kid a rechad er a Ikelesia sel denguu a techall el mo melebedebek er a klengar er a tang me a tang er medad, er a aike el tekoi el kired el meruul eng ding dimlak deruul e ke de ousbech el mo ouchel a rengud, e solae lmuut el mo melai er a chedaol blauang me a chedaol ralm el melebedebek er a bedengel me a resechel a Jesus Kristo, el ngii a olchotel a Tngakireng. Alsekum eng meruul lokiu a bekokeuii el reng me a delemedemek el reng, eke domekbeches aike el diak a ulebengelel iaksok er kid,el ngii a beches e klikiid, e mo sebeched el ngmai a ike el iaksok er ngii el lokiu a ungil reng el mo bengked er a bekel sils. Tia el lungil reng a uaia leboes, el kmal lungil el ruull el sebechel miskid a klengeltengat eng ding direk el miskid aike el tekoi el mera uldesued e meskid a klemerang el diblechoel lokiu a Jesus Kristo. A klikiid el melai er a sakrament a smisichau er a delongelem el mo bedum er a uchetemem, el ngii a Jesus Kristo.

Sera lengar tial beluulechad el mesiou a Osobel eng ulsischeklid er a beltik el reng me a beches el tekingel, osischeklel, maike el ngii a meklou a ultutelel el ngii a mo ngouikid er a klengar er kid e smisiich a blekerdeled. A bocha lulebongel er a Sermon er a kedidai el ked, Eng dilul kmo:

“Madang, ngkel mo remenges aika el kulekoi e mo oltirakel, a bok soak ngii el di uai a dmolech a uldesuel chad, el [ngii] a mekdecherur a blil ra bebul a bad—

“Ma lemei a chull, ma ieleb a mei, ma ses el yolt, el mer tia el blai; eng diak el mukel, e lengii el ulekedechor ra bebul a bad.

“Ma ngidiltang el remenges aika el tekingek e oltirakel el diak el uaia kebelung el chad, el [ngii] a mekdecherur a blil ra chelchol—

“Ma chull a lemei, ma ieleb, ma ses el yolt el mei, dokouii tial blai; eng mongkangk e kmal mle klou el ruebet” (3 Nephi 14:24–27; see also Matthew 7:24–27).

Rodam me a rodos, ng diak el sebeched el dikid el mekdecherur a blid, basio er a urered, me a lechub eng chedaol blil a nglunguuch er a chelechol, komi, el diak a ungil uldasu me a klekedall. Me mede nguu Osobel me bol losebeled. Eme medebekdecherur a klengar kid er a ungil e mesisiich el dodai.

Ak kuba ngariou el reng el louchais a klaumerang el sel denguu a klengar kid el mo chemau a Jesus Kristo me a Tngakireng er ngii e kerkikl el loltirakl aike el telbilel el mor a diak a ulebengelel klengar, ludimukel er ngii a nglunguuch, omenguiu el edaol llechukl, me a melai ra sakrament er a bek el sandei, e kid a mo mesisiich, e mo melchesaur a mesisiich el klechad er kid me a meral bult, e mo ungil el keldmokel e mo mesisiich el sebeched el lotekur a ringel me a sesel yolt er a klengar er kid, e ke de mo melchesuar er a yaksok ra deuelreng me a ungilreng, engii a mo klou a rengud el kmo a klengar er kid a mla mokdechor er a mesisiich el dodaiel—el dodai el ngii a diak el rebet me a lechub eng metemall. El ngara ngklel a Jesus Kristo, amen.

Uleklatk

  1. Mesa “1989 Loma Prieta Earthquake,“ wikipedia.org/wiki/1989_Loma_Prieta_earthquake.