!Yufala I No Muv!

Tedei long naet, mi stanap long wan tabu ples ia long pulpit ia wetem ol profet, ol sia, mo ol reveleta, mo ol gel blong king we i God. Mi glad tumas. Hem i wan gud taem blong stap long wol ia mo stap olsem wan yang woman. Yufala i ol gel we Papa long Heven i jusum. Mi hop se yufala i filim huia yufala mo yufala i filim hamas yufala i impoten long Papa long Heven. Hem i lavem wanwan long yufala mo mi tu.

Antap long tebol blong mi long ofis, mi gat wan brons kaving kopi blong wan yang woman we nem blong hem i Kristina. Fas kaving blong fes blong Kristina i stap long wan wof long Kopenagen, Denmak, mo oli stanemap hem blong hem i lukluk i go long solwota, i lukluk long Saeon. Desisen blong hem, blong joenem Jos mo livim hom blong hem i no bin wan isi wan, mo yufala i save luk se ol win oli stap blong agensem hem. Hem i stap stanap strong, i mekem wan had samting we hem i save se i raet. Laen blong hem i putum kaving blong hem long wof ia blong tingbaot Kristina, from desisen blong hem we i bin gat impoten risal we i no save finis long ol jeneresen.

Long mi, kaving blong Kristina ia i ripresentem wanwan long yufala. Olsem Kristina, yu stap rere blong mekem ol impoten desisen mo mekem ol joes evri dei; sam oli had, mo bae oli lidim fiuja blong yu, be tu, fiuja blong ol jeneresen. Yu tu, yu stap fesem ol strong win blong agens, hadtaem, fos blong fren, mo rabis tingting blong wol. Be yet, yu stap stanap mo no stap muv mo stap laef long gospel fesem ol strong win blong sosaeti blong yumi. Olsem Kristina, Tabu Spirit i lidim yu. Yu stap mekem ol stret desisen. Yu wan tru woman, yu yu laen blong king.

Mi no save tingbaot wan moa impoten kaonsel we i kam long Papa long Heven bitim toktok blong Hem blong askem wanwan long yufala blong stanap long ol tabu ples mo no muv.¹ Hem i stap talem: “Stanap strong. Stap gohed.² Stanap from trutok mo stret mo gud fasin.³ Stanap olsem wan witnes.⁴ Stap olsem wan flag long wol. Stanap long ol tabu ples. Mekem se mesej blong mi long wanwan long yufala i wan simpolwan—“Yufala i no muv.”

Faswan, yufala i no muv aot long jusum raet. Long ol las dei ia, i no gat wan desisen we i smol. Ol joes we yufala i stap mekem naoia, oli impoten tumas. Fridom blong fasin blong jusum samting, paoa blong jusum samting, i wan long ol presen we i bigwan bitim ol narafala presen we God i givim long ol pikinini blong Hem. Hem i pat blong plan blong hapines we yu mo mi i bin jusum mo difendem long laef blong bifo. Laef folem wan wei we, yufala i save lisin mo harem Tabu Spirit, o bae Hem i helpem yufala blong mekem ol stret desisen. Yes, bae Hem i talem long yufala “evri samting we yufala i mas mekem.”⁵

Sam wik i pas, mi bin gobak long olfala hae skul blong fas taem afta plante yia. Mi stap visitim wan stek konfrens we oli stap holem long skul ia. Taem mi wokbaot insaed long hae skul ia, plante plante memori i kambak long maen blong mi. Mi tingbaot stret olsem wanem mi filim taem mi stap go long hae skul ia olsem wan yang woman—i no sef, mi no trastem miwan, no gat tingting, mo mi wantem tumas blong pat blong wan grup. Mi go long bigfala rum. Plante memori i kam long maen blong mi. Mi save gud evri samting we i stap long rum ia. Wan samting nomo i jenis—mi.

Long dei ia, mi gat janis blong stanap long stej olsem we mi bin mekem taem mi skul yet olsem wan studen. Mi luk sam klas fren blong mi blong bifo oli stap—!sam mi bin deit wetem olgeta! Be tetaem ia, mi no stap lidim asembli, mi gat spesel janis ia—insaed long skul rum blong mi—blong “stanap olsem wan witnes”⁶ mo talemaot testemoni blong mi long saed blong Sevya blong yumi Jisas Kraes.

Ol yang woman. Mekemsua se rilesensip blong yufala wetem ol narawan, bae i mekem se 40 yia afta tedei, bae yu no sem. I no gat wan fos blong fren, wan grup, fasin blong stap popula we i naf blong yu daonem yu. Paoa blong yu long ol yang man bae i helpem olgeta blong oli stap klin inaf from prishud paoa blong olgeta, from tempol kavenan mo go long wan misin. ?Mo hu i save? Ating long 40 yia taem bae yu wokbaot wetem wan long olgeta, long skul miting rum blong yufala, mo talem tangkyu blong oli stap klin inaf blong mekem prishud diuti blong olgeta blong save finisim misin wetem ona. ?Hu i save? Ating bae yu kasem wan leta blong waef blong wan long olgeta we i talem tangkyu long yu from paoa we yu bin gat long hasban blong olgeta mo fiuja famle long taem we yufala i bin skul. Ol joes blong yufala oli impoten. Ol joes blong yufala i no mekem samting long yufala nomo, be ol narawan tu. Oli stap blong taem we i no save finis. !Yufala i no muv!.

Sekenwan, yufala i no muv long tingting mo komitmen blong gohed blong gat klin fasin mo stap klin gud long saed blong seks. Holemtaet klin fasin. Klin fasin blong yu i wan bigfala stamba blong paoa. Taem yu bin kam long wol, oli bin givim wan bigfala presen we i bodi blong yu. Bodi blong yu i wan tul blong maen blong yu mo wan tabu presen we yu mas yusum blong praktisim fridom blong joes. Presen ia, God i karemaot long Setan. Mekem se hem i putum evri atak blong hem long bodi blong yu. Hem i wantem yu blong no laekem, no yusum gud, mo abiusum bodi blong yu. Fasin blong no dresap gud, ponografi, rabis fasin long saed blong seks, ol tatu mo ol hol long bodi, drag mo evri kaenkaen adiksen, oli ol hadwok blong tekemaot bigfala presen ia—bodi blong yu— mo mekem i no had tumas blong yu yusum fridom blong joes blong yu. Pol i askem: “?Yufala i save finis we yufala i olsem haos blong God mo we Spirit blong God i stap finis long yufala.?”⁷

Bodi blong yu i wan tempol. ?From wanem? From hem i gat paoa blong givim wan haos long spirit blong yu we i no save finis, be tu, from ol spirit blong ol narawan we bae oli kam long wol ia olsem pat blong famle blong yu we i no save finis. Elda Dalin H. Oks i tijim: “Paoa blong krietem laef long wol ia i wan paoa we i olsem hemia blong God.”⁸ Wok blong yu i wan wok we i olsem hemia blong God. God i gat tabu tras long yu! !Yufala i stap rere blong stap ol fiuja mama blong ol jeneresen we bae oli kam. Kipim yufala i klin gud mo klin inaf mo lukaot gud long wanem we i moa impoten bitim evri samting—klin fasin mo jastiti blong yufala.⁹ Waes kaonsel blong Papa long Heven long wanwan long yufala, ol gel blong Hem we Hem i jusum yufala, i blong yufala i wokbaot long ol rod blong klin fasin.¹⁰

Klin fasin i wan gol ki i go long tempol. Mekem se nambatri, yufala i no stop blong stap klin inaf blong mekem mo kipim ol tabu kavenan. Kavenan ia we yu mekem long baptaes bae i jenem yu long rod blong klin fasin mo hapines taem yu stap mekem i kam niu bakegen, kavenan ia evri wik taem yu tekem sakramen. Taem yu stap kipim kavenan blong baptaes, bae yu luk defren, dresap defren, mo mekem samting defren long olgeta man blong wol ia. Taem yu kipim kavenan ia i mekem se Tabu Spirit i lidim yu. Stanap long ol tabu ples, mo no go kolosap long ol ples, ol miusik, media, o grup we i save mekem yu lusum Tabu Spirit.¹¹ Mo taem yu kipim kavenan blong yu, bae yu stap klin inaf mo rere blong go insaed long ol tabu tempol blong Lod.

Laswan, no muv mo talemaot we yufala i akseptem Atonmen blong Sevya. Atonmen i blong yu mo blong mi. Hem i wan paoa we i pemaot man. Sapos yu no filim klin inaf blong stanap long ol tabu ples, yufala i no tekem hevi trabol ia i go moa. Long laef long wol, yumi evriwan i mekem ol mistek. Yufala i mas save se Sevya i lavem yufala plante mekem se Hem i mekem i posibol blong yu jenis mo yu sakem sin sapos yu mekem wan mistek. Setan i no wantem yu tingting se yu save jenis.¹² Bae hem i traem winim tingting blong yu se yu lus evriwan. Hemia giaman toktok. Yu save gobak. Yu save sakem sin. Yu save stap klin gud mo tabu from Atonmen blong Sevya we i no gat en.

Nao bae mi endem toktok blong mi wetem wan bigfala lav stori. Yu save askem “?Wanem nao wan lav stori i kam mekem blong yumi stanap long ol tabu ples?” Hem i stret stamba tingting ia nao blong stanap long ol tabu ples. Hemia stori blong wan yang woman, nem blong hem Rebeka.¹³

Taem stori ia i go, Ebraham i askem wokman blong hem blong faenem wan yang woman we i klin inaf blong stap olsem waef blong boe blong hem, Aesak. Woman ia, i mas hem we i kwalifae from wan mared long kavenan—i gat klin fasin, mo i klin gud, mo i klin inaf. Mekem se hem i sendem wokman blong hem long wan longlongfala wokbaot i go long wan ples, nem blong hem Haran. From wanem hem i mas go ia, i klia—ol tabu man oli nidim ol tabu woman blong stanap long saed blong olgeta. Taem wokman i kam kolosap long taon blong Haran, hem i stop long wan wel blong givim wota long kamel blong hem mo hem i prea blong spirit i lidim hem i go long stret yang woman mo bae hem i luksave hem taem bae woman ia i givim wota long hem mo ol 10 kamel blong hem. O yes, mi ron long kamel finis mo mi save hemia—!ol kamel oli dring fulap wota!

Long Jenesis, yumi ridim se Rebeka i bin go long wel, mo i kasem wota, be hem i hariap—i hariap,¹⁴ o i kwik kwik blong finisim wok ia. Afta wokman ia i putum ol breslet mo jiulri long Rebeka mo askem sapos i gat rum long haos blong papa blong hem blong hem i stap long hem. !Mi save stret se ol jiulri ia oli bin help! Skripja i talem, “Mo yang gel ia i ron, i talem long olgeta man we oli stap long haos blong mama blong hem long saed blong olgeta samting ia.”¹⁵ !Rebeka i mas ron kwik ia!

Wokman i talem long famle blong Rebeka stamba tingting biaen long longfala wokbaot blong hem mo Rebeka i bin agri blong kam waef blong Aesak. Wokman i wantem aot long nekis dei wetem Rebeka, be famle blong hem i askem blong gel i stap ten moa dei. Afta, oli askem Rebeka se hem i wantem mekem wanem, mo ansa blong hem i “Bae mi go.” ¹⁶ ?Hemia i semmak long ansa blong taosen we oli bin ansa “Bae mi go, bae mi mekem”¹⁷ taem profet Tomas S. Monson i anaonsem janis blong ol yang man mo ol yang woman blong go long misin long wan yangfala yia?

Nao lesen mo en blong lav stori ia. Rebeka i bin rere mo klin inaf blong mekem mo kipim ol tabu kavenan mo kam wan kavenan waef blong Aesak. Hem i no nid blong wet o mekem hem i rere. Bifo hem i aot long famle blong hem, hem i kasem wan blesing mo ol toktok ia oli tantanem mi, from se promes blong hem i we bae hem i kam “Mama blong “plante we plante we i bitim milian.”¹⁸ Be pat we i moa gud long lav stori ia i taem Rebeka i luk Aesak blong fas taem mo Aesak i luk hem blong fas taem. Oli no tokbaot long Baebol, be mi ting se tufala i lavlavem tufala! From se klin fasin i lavem klin fasin; mo laet i folem laet.¹⁹ Taem Aesak i go aot blong mitim grup we i kambak, Rebeka “i jamdaon long kamel blong hem ²⁰; mo skripja i talem : “mo Aesak i lavem hem.”²¹ !Ples ia nao mi pulum win!

Long tugeta, Rebeka mo Kristina, blong stanap long ol tabu ples i no bin isi. Blong no muv i no bin isi. Ol win oli blo strong, wota blong wel i bin hevi, mo blong aot long haos mo livim laef biaen i no bin isi. Be tufala i mekem ol stret joes. Tufala i gat Tabu Spirit i lidim tufala. Tufala i gat klin fasin, mo tufala i mekem tufala i rere blong mekem mo kipim ol tabu kavenan. Sevya i bin kamaot long laen blong Rebeka. ?Yufala i ting se hem i save se hemia bae i hapen? !No! ?Joes blong yufala i impoten naoia? !Yes!

Ol yang woman. Fulap jeneresen oli stap dipen long joes we yufala i stap mekem; olsem wanem yufala i stap klin, mo gat laef we i klin inaf. Yufala i no muvmuv. Yufala i gat wan bigfala fiuja long fored blong yufala. !Hemia taem blong yufala! !Mi mi biliv tru se wan yang woman we i gat klin fasin, we Spirit i lidim hem, i save jenisim wol!

!Mi testifae se Sevya i stap laef! Bae Hem i stap wetem yufala. Bae Hem i givim paoa long yufala. Mo long ol hadtaem, ol enjel blong Hem bambae oli stap raonabaot long yufala blong leftemap yufala.²² Long nem blong Jisas Kraes, amen.