Veimataka Totoka

Ena yakavi ni siga Lotulevu mai Jerusalemi, era a soqoni vata yani o Jisu kei ira na Nona tisaipeli ki na dua na taba vale e cake me ratou rokova na Kana Vata ni Lako Sivia. E ratou sega ni kila na tagane e ratou mai soqoni vata oqo kei Koya ni dua na siga ena vakatokai na vakayakavi oqo me iOtioti ni Kana Vata. Kevaka beka me ratou a kila kei na kena ibalebale, e ratou na rairai tagi kina.

Ia, na nodratou iVakavuvuli, sa kila vakavinaka tu ni veika rarawa e Kecisemani kei Kolikoca sa na vakarau tekivu sara ga. Sa roro dina mai na gauna butobuto duadua ena itukutuku ni veigauna kei vuravura; ia, a kaya vei iratou o Jisu, “Dou na kunea e vuravura na rarawa: ia mo dou vakacegu; au sa vakamalumalumutaki vuravura” (Joni 16:33).

Eda sa bula donuya tiko oqo e dua na gauna voravora kei na veilecayaki, oqo na gauna a parofisaitaka na Turaga vei Inoke ni na vakatakilakilataki ena “siga ni ivalavala ca kei na veisausaumi” (Mosese 7:60). Era na rairai wawa tu mai liu na ka rarawa kei na veigauna dredre, ia eda sa cakacaka ga ki na veivakauqeti vinaka kei na reki, ni da sa bula donuya tiko oqo na iotioti ni itabagauna, sa vakalesuamai kina na Kalou na Nona Lotu kei na matanitu ki vuravura me vakarautaki ki na lesu mai ni Luvena.

Ena dua na gauna a vakamacalataki iratou kina na makubuna o Peresitedi Boyd K. Packer kei na vuravura sa toso cake tikoga kina na veivakaleqai e ratou sa bula tiko kina. A kaya: “Era na raica e levu na veika ena yaco ena gauna ni nodra bula. E vuqa na veika oqo ena bolea na nodra qaqa ka vakarabailevutaka na nodra vakabauta. Ia kevaka era na vakasaqara na veivuke ena masu kei na veidusimaki, ena soli vei ira na kaukauwa mera valuta na veika ca.”

Ka kuria tale o koya: “Na veika dodonu yaga e dodonu me taurivaka na tamata sa mai buturaka sobu ka sega ni kauwaitaka. Io, veitalia, au sega ni rerevaka na veisiga ni mataka” (“Kakua ni Rere,” Liaona, Me 2004, 77, 78).

Kemuni na taciqu kei na ganequ, e sega ni dodonu meda rerevaka na veisiga ni mataka, se malumalumu mai na vakanuinui kei na yalo vakacegu, baleta ni sa tiko vata kei keda na Kalou. E dua vei ira na isevu ni vosa volai ni vakasala i Jisu a solia o Koya vei iratou na Nona tisaipeli kacivi vou mai Kalili o ya na vosa veivunauci e rua, “Kakua-ni rere” (Luke 5:10). A cavuta tiko vakavuqa na ivakasala oqo o Koya ena gauna ni Nona cakacaka vakalotu. Kivei ira na Nona Yalododonu ena noda gauna oqo, sa kaya oqo na iVakabula, “Ia mo dou kakua ni rere se yalolailai, raica koi au na Turaga, au sa tiko vata kei kemudou ka vakaukauwataki kemudou” (V&V 68:6).

Na Turaga ena tiko vata kei na Nona Lotu kei ira na kena tamata ka taqomaki ira me yacova na Nona lako mai. Ena yaco na tiko vakacegu e Saioni kei na kena iteki, ni sa kaya o Koya: “Ia mera vakasoqoni vata yani ki na vanua ko Saioni, kei na kena veisiteki, io me nodra idrodro, ka nodra ivakaruru mai na cava, me ra taqomaki kina ni sa sovaraki mai ki vuravura na cudru waqawaqa” (V&V 115:6).

Na Lotu sa itikotiko kaukauwa ni nodra taqomaki na kena lewenilotu. E dina ga ni na yaco e vuravura na gauna eso ni veivakacudrui kaukauwa, era na kune vakacegu ga o ira na Yalododonu Edaidai yalodina ena kena veiiteki e Saioni. Sa lewa kina na Turaga na vatu a sega ni ta ena liga mai na ulunivanua ena qiqi yani ka vakasinaita na vuravura taucoko (raica na Taniela 2:31–45; V&V 65:2). Sa sega kina ni dua na kaukauwa vakatamata me tarova rawa na kena ilakolako ni sa mai vua na Kalou na cakacaka oqo, ka sa kena uluvatu ivakadei o Jisu Karisito.

A raica kina o parofita Nifai ena nona raivotu ni na yaco na vakatikori ena gauna mai muri na kaukauwa ni Lami ni Kalou “vei ira talega na nona tamata ni veiyalayalati na Turaga” ka ra na “vakaiyaragi ena yalododonu kei na lagilagi ni nona kaukauwa na Kalou” (1 Nifai 14:14).

Oi keda yadudua, kei na noda matavuvale, eda sa rawa ni vakaiyaragitaki ena kaukauwa ni Kalou me itataqomaki kevaka meda na dina tikoga ki na Lotu i Jisu Karisito ni Yalododonu Edaidai ka vakatara na Yalotabu me dau dusimaki keda. Ena yaco mai na veivakatovolei, ka da na sega ni kila vakavinaka na veika kece e dau yaco vei keda se vakavolivoliti keda. Ia kevaka meda na yalomalua, ka vakabauta tu ga na Turaga, ni na solia vei keda o Koya na kaukauwa kei na veidusimaki ena gauna ni veibolebole yadudua eda sotava. Kevaka sa noda gagadre ga meda vakalomavinakataki Koya, eda na vakalougatataki ena dua na vakacegu titobu ni yalo.

Ena itekitekivu ni gauna ni Veivakalesuimai, era sotava na lewe ni Lotu na veivakatovolei dredre sara. Oqo na ka e kaya o Peresitedi Brigham Young baleta na gauna o ya: “Ni ra vakavolivoliti keimami tu na dauvakacaca, ka tu voleka sara na mate kei na leqa e vuqa, au vakabauta niu dau yalomarau [ka] tu ga me vaka au sotava tiko oqo. E na rairai tu beka e liu na veika dredre eso sa laurai rawa yani, ia au sa dau sotava mai ena Kosipeli oqo na veika eso au sa kila deivaki tu ni na yaga vakalevu sara ki na dina” (Nodra iVakavuvuli na Peresitedi ni Lotu: Brigham Young [1997], 391).

O Paul na noqu itokani daukaulotu, e dua e dau vakabulabulataka na veivakauqeti vinaka. Ni se qai tamanigone cauravou tiko, a tauvi koya na waqaqa. E dina ga ni yaco veitaravi mai na veika rarawa, a tomana tikoga na nona qaravi ira na tamata ena reki kei na vosa veivakamarautaki. E dua na gauna a lako mai ki na noqu valenivolavola ka dabe tiko ena nona wilijea ka kaya sara, “Na bula e tekivu ena wilijea vakaidini!” Au na daunanumi koya tikoga, ni vo toka e vica na yabaki me mate kina, ni a taura cake tu na cina ni Olympic ni vodoka tiko yani na nona wilijea ka ra kailavaki koya tiko mai e drau na tamata. Me vaka ga na yameyame caudre tudei o ya, a sega vakadua ni bau toro sobu vakalailai na vakabauta nei Paul ena gauna ni cava ni bula.

Niu se gonevuli tiko ena Brigham Young University, au a vakaitikotiko ena dua na vale vata kei na vica na cauravou. O noqu itokani ni rumu, o Bruce, e dua au bau kila ni dau tukuna tu ga na veika vinaka me yaco. Keitou a sega mada ga ni rogoca vua me cavuta e dua na ka vakatani vua e dua na tamata se dua na ka, ka dredre sara me keitou sega ni vakayaloqaqataki ni tiko o koya. Na nona veivakacegui e drodro mai na nona dau nuitaka tu ga na iVakabula kei na Nona kosipeli.

Ena dua na siga batabata cagicagi, e dua tale na noqu itokani, o Tom, a taubale takoso tiko yani ki na itikotiko ena univesiti. E se qai 7:00 na kaloko ena mataka lailai, ka se lala tu ka buto na itikotiko ena univesiti. Sa lutu bi sara tiko na uca cevata, kei na cagi batabata. “Sa qai dua na draki ca levu,” a kaya lo o Tom. A taubale vakalailai tale yani ki liu, ena buto kei na uca cevata, sa rogoca sara ni dua e lagasere tiko.

E dina sara, ena loma ni tau ni uca cevata sa basika mai kina o neitou itokani dauvakanuinui vinaka, o Bruce. A laveta ruarua tu na ligana i cake, ka lagata tiko e dua na sere mai na sereivakatagi ni Broadway na Oklahoma: “Io, sa qai dua na mataka totoka! Io, sa qai dua na siga totoka! Sa marau na yaloqu, sa yaco vei au na vinaka kecega.” (raica na Richard Rodgers and Oscar Hammerstein II, “Oh, What a Beautiful Mornin’” [1943]).

Mai na ka sa yaco oqo, na domo makare ena dua na cava buto sa laki yaco me noqu ivakatakilakila ni veika sa baleta na vakabauta kei na vakanuinui. E na gauna mada ga ni butobuto mai ko vuravura, sa rawa vei keda na Yalododonu Edaidai meda lagasere ena reki, ni da sa kila tu ni sa tiko na kaukauwa kei lomalagi ena Lotu ni Kalou kei ira na kena tamata. Eda rawa ni rekitaka ni da sa kila ni sa tu mai liu na veimataka totoka—na sigavou ni mileniumi, ni na tadu mai na Luve ni Kalou ena Tokalau ka mai veiliutaki tale e vuravura.

Au nanuma talega kina e rua na mataka totoka ena itukutuku kei vuravura. Ena vula itubutubu ni 1820, ena dua na mataka totoka ka vinaka sara mai Palmyra, New York, a gole yani e dua na cauravou na yacana o Josefa Simici ki na dua na veikau ka laki tekiduru me masu. Na isau ni masu o ya, rau a rairai mai kina na Tamana kei na Luvena, me vakatikori mai kina na itabagauna ni taucoko ni gauna kei na Vakalesuimai ni Lotu i Jisu Karisito ki vuravura.

Io e dua tale na mataka totoka a cadra mai volekata na 2,000 na yabaki sa oti ena taudaku ni koro vakabai, o Jerusalemi. E sega ni vakabekataki na kena cila ramase mai na matanisiga ena mataka ni Siga ni Mate o ya. E ratou a vakusakusa mai eso na marama me ratou mai sikova e dua na ibulubulu ena were, ka nuitaka tiko me ratou mai lumuta na yagoi koya na nodratou Turaga a mate ena kauveilatai. A sotavi iratou kina e rua na agilosi ka kaya: “E na cava dou sa mai vakasaqarai koya sa bula e na kedra maliwa na mate? Sa sega eke ko koya, sa tu cake tale” (Luke 24:5–6).

Sa mai qaqa o Jisu Karisito vei ivalavala ca kei na mate, kau sa vakadinadinataka oqo. Kau sa vakadinadinataka na ituvatuva ni nona loloma veivueti na Tamada Tawamudu kei na Nona loloma tawayalani. Ni da lamata mai ena veimataka yadua, meda sa qai rai ki lomalagi ena vakabauta ka kaya, “Io, sa qai dua dina na mataka totoka,” Sa noqu masu ena yaca i Jisu Karisito, emeni.