2010–2019
Klebokel Tutau
April 2013


Klebokel Tutau

Ng diak demedakt er a ngar medad, me a lechub e bo el mechitechut er a ikel doureng me a kllou el reng er kid, ele a Dios a obengked.

Se el mle ongeua lureor er a klebesei er a Jerusalem, e a Jesus me a rulbengkel a mlo er a ngar bab el delmerab el mlo ngara omengull er a Baskua. A resechal el ulebengkel a dimlak el lodengei el kmo tia el belsoil a ta er a klebesei eng mo okedongall el kmo Uriul Belsoil. A blelodengelii tiang me a belkuu, e te mlo lmangel.

A Merredelir, a mle, ungil medengelii a ringel er a Gethsemane me a Kolkata el di kmedung el omuchel. Aikel iilkolk el taem er a reksi er a beluulechad e di merman; me a leuaisei, e a Jesus a dula er tir el kmo, “Omngara beluulechad e ko mo chuarm: eng di bo el meklou e rengmiu; ak mla mo mesisiich er a beluulechad” (Johanes 16:33).

Kid er chelechal sils a kiei er a taem er a klou el nglemuu me a rrau el reng, ng taem el Rubak a ullemlaoch el mo er a Enoch el kmo ng mo “sils er a klengit me a omelai el techei.” (Moses 7:60). Ongarm me a ringel a ngar medad, eng di kid a ngarngii a uchul eng mo klou a rengud e oldeu a rengud, le ke de kiei er a ulebongel el klebesei, el Dios a mla olutii a Ikelesia er Ngii me a rengedel el mei er a beluulechad el mengedmokl er a lluut er a Ngelkel el mei.

President Boyd K. Packer a milngedecheduch el kirel a rengelel me a di merael el mo obdois a telemellel el beluulechad el de kiei er ngii. Ng dilu el kmo: “Te mo mes a betok el teletael el mo duubech er a chelsel a klengar er tir. A bebil a mo ringelii er a dechal a rengrir me a klaumerang er tir a mo ngimes. Eng di alskum te meluluuch el olengit a ngeseu me a olechotel a rael, eng mo er tir a klisiich me te mo mesisiich er aika el ongarm.”

A uriul eng mlo dochelii el kmo: “A kldung el mengeluolu a klechad a di merael el moreou el dikea el ngii me a lengara rirei. Me ng uasei, e ngak a diak medakt er a ngar medad” (“Do Not Fear,”Ensignmalechub Liahona, May 2004, 77, 78).

Rodam me a rodos, ng diak demedakt er a ngar medad, me a lechub e bo el mechitechut er a ikel doureng me a kllou el reng er kid, ele a Dios a obengked. A ta er a kot el ulleklatk el Jesus a milsterir a rurebengkel er a le ngara Galilee a erul tekoi, “Lak Medakt” (Lukas 5:10). Ng mle betok el lomelekl er tia el omellach er a lorael el olsisechakl. A Osobel a melekoi er a Resanto er chelechal sils me, bo el meklou a rengud, e lak kede medakt, le Rubak a obengked, e dechor er a bitang er kid ( D&C 68:6).

A Rubak a dechor er bitang er a Ikelesia er ngii me a rechedal e mengeluolu er tir el di merko se el llemei. Ngarngii a budech er a Zion me a stakes er ngii, ele ng mla dmu kmo: a omengidb er a beluu er a Zion, me a stakes er ngii, a mo mesebechakl, e blai er a ses el eolt, me a uldikel el ngii amo mechubel er a beluulechad el rokir ( D&C 115:6).

A Ikelesia a dechor el ewatel el mesebechakl er a rechad er a ikelesia. Erengel a taem eng di merael el mo mesisiich, ea blekeradel er a beluulechad a merael el mo meringel, eng di a remeklou a klaumerang er tir el Santo er a Uriul-klebesei a mo metik er a mo sobechekkelterir er a stakes er a Zion. A Rubak a mla otebedii a tekingel el kmo a se el bad el dimlak a chim el mlo tukur er a rois a melemolem el melitai el di merko lebekekii a tia el rokir el beluulechad, e diak a klisichel a chad el torbengii a omerolel (mesa Daniel 2:31–45; D&C 65:2). Ng diak a ultuill el klisichel me a duch er a rechad, ele Dios a milekdebechii tia el ureor, me a Jesus Kristo el dodai er ngii.

A Nephi a milsang er a ues el kmo a uriul el klebesei ea klisichel a Sib er a Dios a mei er a resanto “e mei er a rechad el ngar a telbiil el obengkel a Rubak, el berrid er a beluulechad” me te mo “kliuokl er a llemeltel me a klisichel a Dios el ngara klou el klebkall” (1 Nephi 14:14).

Kid el rokui, me a telungalk er kid, a sebeched el mo kliuokl er a klisichel a Dios el tekerengel a mekemad alsekum ke de melemolem el chad er a Ikelesia er a Jesus Kristo er a Uriul-klebesei el Santo a mecherei a Chedaol Reng meng omekrael er kid. Ke de mo chemau a ringel, ea ltang ng diak bo dungil el medengelii a uchul a bek a tekoi el mo duubech el mei er kid. Eng di a le ngariou a rengrir, e oumerang er a Rubak, a mo er ngii a omekrael er tir e melisiich er tir a bek el ringel er a klechad. Alsekum sel soal a rengud a ungil er Ngii, e kede mo mukngeltengat er a dmolech el budech.

Se er a uchelel Oluut, ea rechad er a Ikelesia a mlo elebangel a kmal merigel el ongarm. A President Brigham Young a dilung el kirel aika el ongarm: “Se el iiliuekl er ngak a remekngit el chad, ea kodall me a tellemall a di mermang, e ak kmo lotkii se [el] deu el reng er a delbengek, el di uai chelechang. A domes er medad eng uaia louchetau, eng di ng dirkak a taem el kudengelii el kmo a ulebengelel a di mo klungiaol el mo er tirke el oumerang e betik a rengrir er a llemalt” (Teachings of Presidents of the Church: Brigham Young [1997], 357).

A kldemek er a kngara mission, el Paul, a mle blechoel dmeu a rengul chad. Sera le ngeasek el chedam eng mlo betook a secherel. Eng diak el iior er a ongarm luleak kuriul, e ngii a millemolem el mesiou er a rebebil loba deureng me a ungil ngellakel. Ng mle tal lemei er a obis er ngak e dengchokl er a wheelchair e kmo, “A klengar omuchel el ngara wheelchair!” Ak melemolem el melbedebek er ngii, sesei el rak ruchei er a lemad, lorreked er a Olympic torch el ngara wheelchair er ngii ea retelael chad a oeng er a ngii. Meng uai tial tuich, ea klaumerang er a Paul a dimlak bo lekekerei er a chelsel a ses el eolt er a klengar.

Se er ak ngara skuul er a Brigham Young University, e ak kiliei e a blai lobenterir a remla mo er a mission er tir. A Bruce, el kim kiliei er a imong el delmerab, a mle ungil a rengul e diak a meringel er ngii. Ng dimlak a ta el krengesii el melekoi a mekngit el kirel a ngidil chad me a lechub a teletael, e dimlak el sebeched el mekngit a rengud se el dobengkel. Tia el klungel a rengul a omaoch er a mesisiich el klaumerang er ngii er a Osobel me a llemalt er a osisecheklel.

A ta er a tutau eng kmal mekelekolt, a ta er a sechelik, el Tom, a milrael el di melobech er a mekesekesel a skuul. Tia ng a dirke mle euid el klok, ea skuul a medideriik e dirk milkolk. Ng mle meses a eolt, e merberebet a snow. A Tom a ulemdasu el kmo, “Ng meral imis el mekngit a eanged.” Eng di a lolemolem el merael, eng rirngesii a chad el mengitakl.

Ea lomes, eng dumia sechelil er a Bruce, lomekall er tial kmal mekelekolt el taem. Ea chimal a uldars el bedul bab, e ngii a mengitakl er a chelitakl er a Broadway musicalOklahoma: “Oh, what a beautiful morning! Oh, what a beautiful day! I’ve got a beautiful feeling, everything’s going my way” (Richard Rodgers and Oscar Hammerstein II, “Oh, What a Beautiful Morning” [1943]).

Omerolel a taem, e tia el ngor a milngitakl er chelsel tia el mekngit a eanged a mlo olchotel a klaumerang me a ike el doureng. Me a lomdois a klengit er a beluulechad, e kid a Ruriul-klebesei el Santo a sebechel el mengitakl el obang a deu el reng, ele ke de medengei el kmo a klisiich er a babeluades a ngara Ikelesia er a Dios me a rechedal. Mei me doldeu a rengul er a klebokel e ungil tutau el ngar medad—se el mechututau er a taltelael rak, el Ngelkel a Dios a mo ngmasech er Ongos el me orrurt er a beluulechad.

Ak dirrek el mo omdasu er a ungil tutau er a kmeed el eru el telael el rak er a mla memong. Sera rak er a 1820, el mle klebokel el tutau, lungil a eanged er a beluu er a Palmyra, New York, eea ngeasek el buik el ngklel a Joseph Smith a siliseb er a chereomel e mlo outubaruach e meluluuch. A nger er tial nglunguuch a, dmiel a Chedam me a Ngalek, e ulechais el kirel a Olutel a Ikelesia er a Jesus Kristo el mei er a beluuelchad.

Ea kuk tara klebokel tutau er a kmeed el eru el telael el rak er a mla memong er a beluu er a Ierusalem. Ng mle meringel a sils er tia el tutau er a Easter. A kekerei delebechel er a redil a mle oldingel er a debull, tulemdasu el mo mengedmokl er bedengel a Rubak. Te mlo kaseuses tir me a reterung el anghel e tirka el anghel a dilu el kmo: “Ngerang me ko mosiik er a ngar er a delongelir a lulekeuad? Ng diak el ngar tiang, ng mla mekiis” (Lukas 24:5–6).

A Jesus Kristo a mlo mesisiich er a klengit me a kodall, tiang a sioning er ngak. Ak sioning er a ubechub el telbillel me a beltkil a rengul a Diak a Ullebengel el Chedam. Se el debekiis er a tutau, e domes el mo er bab el mo er a eanged el oba klaumerang e dedung el uase, “Ng, meral klebokel tutau,” ak meluluuch el obang a ngklel a Jesus Krito, amen.