Tus Tswv Zoo Siab Rau Yus

Kuv nco qab tias thaum kuv tseem hluas, tej thaum kuv txiv coj kuv nrog nws mus ua hauj lwm. Peb muaj ib lub vaj me nyob ob peb kis lus mev ntawm peb lub tsev, thiab txhua lub caij ces muaj ntau yam yuav tsum ua hauv lub vaj. Wb ua hauj lwm kho ib lub tsev uas tsis muaj phab ntsa los sis xov laj kab los yog kho lawv. Raws li kuv nco, wb pheej ua tej hauj lwm no thaum nws no no heev, los daus hlob, los sis los nag xwb. Tiam sis kuv nyiam ua heev. Kuv txiv ua siab ntev thiab zoo siab rau tej yam kuv ua thaum nws qhia kuv ua hauj lwm.

Ib hnub nws hais kom kuv muab ib tug ntsia hlau tig thiab ntuas tias, “Nco ntsoov, yog koj tig nws sib zog dhau, nws yuav lov.” Kuv khav me ntsis thiab xav kom nws pom tias kuv ua tau. Kuv txawm siv tag nrho kuv lub zog tig tus ntsia hlau, ces ua rau nws lov kiag. Nws hais lus dab ros xwb, thiab wb rov qab pib dua. Txawm thaum kuv “ua tsis yog” los, kuv yeej paub tias nws hlub thiab tso siab rau kuv. Nws twb ncaim mus tau tshaj 10 xyoo dhau los lawm, tiam sis kuv tseem nco nws lub suab qhuab qhia, paub tias nws hlub kuv, tias nws txhawb kuv lub zog, thiab tias nws zoo siab rau kuv.

Peb txhua tus yeej xav kom lwm tus uas peb hlub zoo siab rau peb. Thaum tib neeg zoo siab rau peb, nws ua rau peb mob siab zog. Nws ua rau peb xav tias peb muaj nqis zog thiab peb tso siab zog rau peb tus kheej. Ntau zaus cov neeg uas tsis muaj cov uas lawv xav kom zoo siab rau lawv, yuav nrhiav lwm cov uas yuav ua li ntawd. Tej zaum lawv yuav nrhiav cov tib neeg uas twb tsis xav txog lawv txoj kev zoo siab. Tej zaum lawv yuav ntaus phooj ywg nrog cov uas twb tsis yog lawv cov phooj ywg tiag tiag thiab ua tej yam tsis zoo xwv kom luag thiaj li yuav zoo siab rau lawv. Tej zaum lawv yuav hnav khaub ncaws uas yuav ua rau lawv xav tias lawv phim ib pab neeg. Rau ib txhia, thaum lawv xav tau ib txoj hauj lwm siab los yog xav muaj koob muaj npe ces yog vim lawv kuj xav nrhiav kom luag zoo siab rau lawv thiab. Tej zaum lawv xav tias lawv muaj nqis raws li txoj hauj lwm lawv tau los sis raws li lawv muaj koob muaj npe li cas.

Peb cov uas nyob hauv lub Koom Txoos no tej zaum kuj tau xav li no thiab. Thaum peb nrhiav kom luag zoo siab rau peb ntawm cov neeg tsis zoo los sis vim peb lub hom phiaj tsis ncaj, peb taug ib txoj kev txaus ntshai-ib txoj uas yuav coj peb mus yuam kev thiab mus rau kev puas tsuaj. Tsis yog tias lawv yuav hlub peb thiab peb yuav tso siab zog rau peb tus kheej, tiam sis thaum kawg lawv yuav tso peb tseg thiab peb yuav xav tias peb tsis muaj nuj nqis.

Amas qhuab ntuas nws tus tub Hilamas hais tias, “Xyuas kom koj yuav ntsia Vajtswv ua koj lub neej.”¹ Ob tug uas peb yuav tau nrhiav xwv kom peb txais hwj chim thiab yuav zoo siab rau peb tas mus li yog peb Leej Txiv Saum Ntuj Ceeb Tsheej thiab Nws Leej Tub, Yexus Khetos. Nkawd paub peb. Nkawd hlub peb. Tsis yog nkawd zoo siab rau peb vim peb muaj koob muaj npe li cas los sis txoj hauj lwm twg. Nkawd yeej tsis quav ntsej tej ntawd. Nkawd tsuas saib seb muaj dab tsi nyob hauv peb tej siab xwb. Nkawd zoo siab rau peb raws li peb ua neeg zoo li cas thiab rau tej yam peb ua uas yuav pab peb ua neeg zoo. Thaum peb ua tej yam kom Nkawd zoo siab rau peb nws yeej yuav pab thiab txhawb nqa peb.

Kuv yuav qhia txog ib tug qauv yooj yim uas, yog tias peb ua, yuav pab tau peb txhua kom nkawd zoo siab rau peb uas zoo tshaj. Tus Tswv muab tus qauv no dhau los ntawm tus Yaj Saub Yauxej Xamiv: “Kuv hais tseeb rau nej tias, cov uas paub tias lawv muaj siab ncaj, thiab muaj siab mob, thiab muaj siab xav ua zoo, thiab txaus siab ua raws li lawv tej kev khi lus dhau los ntawm kev txi-muaj tseeb tiag, txhua txoj kev txi uas kuv, tus Tswv, yuav hais kom lawv ua-kuv zoo siab rau lawv.”²

Tus qauv no muaj peb yam yooj yim uas peb yuav tau ua:

1. Paub tias peb muaj siab ncaj thiab muaj siab mob,

2. Paub tias peb muaj siab xav ua zoo, thiab

3. Txaus siab ua raws li peb tej kev khi lus dhau los ntawm kev txi, raws li tus Tswv tau hais kom peb ua.

Qhov thib ib, peb yuav tsum paub tias peb muaj siab ncaj thiab siab mob. Peb yuav ua li cas paub li ntawd? Peb pib paub thaum peb xav txog peb lub neej zoo li cas tiag tiag. Lub siab yog lub hauv paus ntawm peb tej kev xav. Thaum peb ntsia hauv peb tej siab, peb yuav paub tias peb tus kheej zoo li cas. Peb paub yam uas cov uas nyob ib ncig peb tsis paub. Peb paub peb tej kev ntshaw thiab vim li cas peb xav dab tsi. Thaum peb xav zoo zoo thiab ncaj txog peb tus kheej, peb tsis keb los sis dag peb tus kheej.

Kuj muaj ib txoj kev uas qhia seb peb puas muaj siab mob thiab. Ib lub siab mob yog ib lub siab mos, uas qhib tos txais, thiab kam mloog lus. Thaum kuv hnov tus Cawm Seej hais tias, “Saib seb, kuv sawv sab qhov rooj nraud, thiab khob,”³ kuv hnov Nws khob kuv lub siab lub qhov rooj. Yog tias kuv qhib lub qhov rooj no rau Nws, thaum tus Ntsuj Plig caw kuv ua dab tsi kuv yuav mloog lus zog, thiab kuv zoo siab zog ua Vajtswv lub siab nyiam.

Thaum peb thov Vajtswv thiab xav zoo zoo txog seb peb muaj siab ncaj thiab siab mob npaum li cas, tus Vaj Ntsuj Plig Dawb Huv yuav qhia peb. Nws yuav qhia peb tias nws pom zoo los sis kho peb, peb thiaj li yuav ua kom muaj tau li ntawd.

Qhov thib ob, peb yuav tsum paub tias peb muaj siab xav ua zoo. Nyob hauv ib phau ntawv txhais lus, thaum yus muaj siab xav ua zoo txhais tau hais tias “yus tu siab vim yus paub hais tias yus ua dab tsi tsis yog lawm.”⁴ Yog peb muaj siab xav ua zoo, peb lees paub txog peb tej kev txhaum thiab tej yam peb ua tsis zoo. Peb mloog “txhua yam txog tej uas ntsig txog txoj kev ncaj ncees.”⁵ Peb tu siab tiag tiag thiab kam hloov siab lees txim. Ib tug neeg uas muaj siab xav ua zoo kam mloog “tus Vaj Ntsuj Plig Dawb Huv tej kev tshoov siab.”⁶

Peb paub thaum peb muaj siab xav ua zoo vim peb txaus siab ua thiab mob siab ua. Peb txaus siab txo peb hwj chim rau Vajtswv, txaus siab hloov siab lees txim, txaus siab kawm ntxiv, thiab txaus siab hloov peb tus kheej. Peb txaus siab thov Vajtswv hais tias, “Tsis txhob ua raws li kuv lub siab nyiam, tiamsis ua raws li koj lub siab nyiam xwb.”⁷

Qhov thib peb uas yuav ua rau tus Tswv zoo siab rau peb yog thaum peb txiav txim siab ua raws li peb tej kev khi lus dhau los ntawm kev txi, “muaj tseeb tiag, txhua txoj kev txi uas kuv, tus Tswv, yuav hais kom lawv ua.”⁸ Ntau zaus peb xav tias lo lus txi txhais hais tias peb yuav tsum ua dab tsi tseem ceeb los sis nyuaj. Tej thaum nws yeej yog li no, tiam sis feem ntau ces nws txhais hais tias peb yuav tsum ua neej ib hnub dhau ib hnub li Khetos ib tug pab coj tiag tiag.

Ib yam uas peb ua tau kom ua raws li peb tej kev khi lus dhau los ntawm kev txi yog peb tsim nyog noj lub cim nco txog txhua lub lis piam. Peb npaj peb tus kheej kom ua tau txoj kab ke dawb ceev no. Peb rov qab cog peb cov lus cog tseg dawb ceev rau tus Tswv. Thaum peb ua li no peb yuav paub tias Nws zoo siab rau peb thiab peb tso siab tau tias tej yam zoo uas peb ua Nws yeej pom thiab Nws zam txim rau peb tej kev txhaum dhau los ntawm Yexus Khetos txoj Kev Theej Txhoj. Thaum peb noj lub cim nco txog, tus Tswv cog lus rau peb tias thaum peb txaus siab txais Nws Leej Tub lub npe thiab nco ntsoov txog Nws thiab coj raws li Nws tej lus txib, peb yuav muaj Nws Leej Ntsuj Plig nrog peb nyob tas mus li. Thaum peb muaj tus Vaj Ntsuj Plig Dawb Huv nyob nrog nraim peb, nws qhia tias Vajtswv zoo siab rau peb lawm.

Lwm yam uas peb ua tau kom ua raws li peb tej kev khi lus dhau los ntawm kev txi yog xws li thaum peb zoo siab txais ib txoj hauj lwm hauv lub Koom Txoos thiab rau siab ua txoj hauj lwm ntawd los sis thaum peb ua raws li peb tus yaj saub, Thomas S. Monson, tau hais kom peb ncav tes pab cov uas tsis tshua muaj kev ntseeg thiab uas xav tau kev pab ntawm sab ntsuj plig. Peb ua tau raws li peb tej kev khi lus dhau los ntawm kev txi thaum peb ua hauj lwm pab peb cov neeg zej zog es tsis qhia leej twg paub los sis nrhiav peb cov poj koob yawm txwv tej npe thiab ua cov hauj lwm hauv lub tuam tsev rau lawv. Thaum peb ua neej nyob txhua hnub, peb ua tau raws li peb tej kev khi lus dhau los ntawm kev txi thaum peb rau siab ua ncaj ncees, kam mloog lus, thiab mloog Leej Ntsuj Plig thaum nws tshoov peb lub siab. Tej thaum peb ua tau raws li peb tej kev khi lus thaum peb tsuas nyob khov kho thiab rau siab muaj kev ntseeg thaum muaj kev ntxhov thiab kev cov nyom hauv peb lub neej.

Tom qab tus Tswv piav txog tus qauv uas Nws yuav zoo siab rau peb li cas, Nws hais lus piv txwv qhia yam uas peb tus kheej thiab peb tej tsev neeg yuav tau thaum peb nrhiav kom tau Nws kev zoo siab rau peb. Nws hais tias, “Vim kuv, tus Tswv, yuav ua kom lawv muaj ntau ib yam nkaus li ib tsob ntoo uas txi txiv ntau thiab qab heev uas tau raug muab cog hauv ib co av zoo, ze ib tug kwj deg ntshiab huv.”⁹

Thaum peb txaus siab mloog tus Tswv tus Ntsuj Plig thiab paub tias Nws zoo siab rau peb, peb yuav tau koob hmoov ntau tshaj peb to taub thiab ua tau ntau yam khoom ncaj ncees. Peb yuav nyob nrog cov uas Nws tau hais rau tias, “Zoo heev, koj yog tus tub txib zoo thiab rau siab ntseeg: koj tau rau siab ntseeg ua ob peb yam, kuv yuav tsa koj ua tus nom kav ntau yam: koj cia li los nrog koj tus tswv nyob.”¹⁰

Thaum peb nrhiav thiab txais tus Tswv kev zoo siab rau peb, peb yuav paub tias Nws xaiv peb thiab foom koob hmoov rau peb. Peb yuav tso siab tau ntau zog tias Nws yuav coj peb thiab qhia peb ua zoo. Peb yuav paub Nws tej kev hlub tshua nyob hauv peb tej siab, hauv peb lub neej, thiab hauv peb tej tsev neeg.

Kuv thov kom nej nrhiav tus Tswv kev zoo siab rau nej thiab tau cov koob hmoov uas Nws tau cog lug tseg. Thaum peb ua raws li tus qauv yooj yim uas tus Tswv tau qhia peb, peb yuav paub tias Nws zoo siab rau peb, txawm yog peb yog neeg muaj los tsis muaj, los sis tsis yog zoo tag nrho vim peb yog neeg ntiaj teb. Thaum peb paub tias Nws zoo siab rau peb, peb yuav mob siab zog, muaj kev ntseeg zog, thiab nws yuav pab peb ntawm txhua yam uas tshwm sim hauv peb lub neej. Txawm yog peb ntsib kev cov nyom los, peb yuav yeej tau, huaj vam,¹¹ thiab nyob kaj siab lug.¹² Peb yuav nyob nrog cov uas Nws tau hais rau tias:

“Tsis txhob ntshai, cov me nyuam yaus, vim nej yog kuv cov, thiab kuv tau kov yeej lub ntiaj teb lawm, thiab nej yog cov uas kuv Leej Txiv tau muab rau kuv;

“Thiab txhua tus uas kuv Leej Txiv tau muab rau kuv yeej yuav tsis ploj.”¹³

Los ntawm Yexus Khetos lub npe, amees.