2010–2019
Suleyucklac sin Leum
April 2013


Suleyucklac sin Leum

Suk ac eis luhngse luhn Leum ac fah kol nuh ke etwacack ma kuht sulaclah ac ahkinsewowoyeyuck Sel.

Ke nga sie tuhlihk mukul srihsrihk ah, nga esam pahpah tuhmuhk kuhtuh pacl el usyuc weluhl nuh ke orekma el oruh. Oasr kihtin imac lasr an loes kuhtuh srihk lusac ah nuh ke acn kuht muhta we ah, ac pacl nuh kwewa oasr ma enenuh in orek in ahkolah imac sac ke kais sie pacl. Kuht orekma ke lohm kuh muhsahi kuh ahkwoye kalkal uh. Nga esam orekma se inge sikyak pacl nuh kwewa ke mihsrihsr upac, snow upac, kuh af upac. Tuhsruhk nga luhngse. Pahpah tuhmuhk el lutiyuc in etuh orekma ke muhtweng ac insese.

Sie pacl ah el pahngonyuc in urokyac osra soko ac el ahksensenkihnyeyuc, “Esam, fin kom oruh in tihngtihnglac, ac fah muhsahllah.” Engan, nga ke oruh elan liye ma nga kuh in oruh uh. Nga urokyac ke kuhiyuck nohfohn, ac, pwacnwacng, nga kuhnahoslah osra soko ah. El fahklah ma na pwacr se, na kuht sifilpac muhtwacwacack. Finne ke nga “orwaclah tahfonglac se,” nga srwackna puhla luhngse lal ac luhlahlfongi lal in nga. El misac puhs liki yac 10 somlah ah, tuhsruhk nga kuh in srwackna esam ma el lutiyuc, puhla luhngse lal, engan ke ahkkweye lal, ac puhla luhlahlfongi lal.

In puhla luhlahlfongiyuck sin sie mwet kuht luhngse pa sie enenuh fihsrwacsr luhn mwet uh. In luhlahlfongiyuck sin mwet wo uh ahkkweye kuht. El ahkyohkye puhla ke suwohs ac luhlahlfongi kacsr sifacna uh. Nuh selos suc koflah konwacack luhngse ke akwuck kuh pac in suk sahyac. Elos kuh in srihke in sokwack luhlahlfongiyuck sin mwet suc tiac luhngse ohiyaclos sifacna uh. Elos kuh in wi mwet elos muh elos kawuck nuh se tuhsruhk tiac inse pwacye nuh selos ac oruh ma elos etuh muh tiac suwohs in srihke in eis etwacack elos suk uh. Elos sahp kuh in suk luhngse ke nuknuk elos nukum in oruh elos puhla pwengpweng. Nuh sin kuhtuh, suk sie ma kunac kuh sie orekma yohk srihpac kuh pac in inkacnek in suk ke luhngse. Elos ac kuh in ahkkahlwemye ohiyaclos ke kunohkohn elos sruok kuh wal elos eis an.

Finne ke Alu uh kuht tiac sukohsohk pacl nuh kwewa liki kain nuhnak se inge. In suk luhngse ke ohiyac suhtuhuh kuh nuh ke srihpac suhtuhuh iskuhtyang nuh ke soko inkacnek sensen—ma se ma kol kuhtlac nuh ke tuhlac ac finne nuh ke muhsahllah. Sahyacn in puhla engan ac luhlahlfongi kacsr sifacna, kuht ac fah puhla muhkahimtacl ac muhnahs.

Alma el sang kahs in kahsruh nuh sin wen nahtuhl Helaman in ngwet nuh sin God ac moul.1 Kahsruh sahflah ke ahkfokoko ac in luhlahlfongiyuck ne tok pa Pahpah tuhmasr Inkuhsrao ac Wen Nahtuhl, Jisus Kraist. Elos etwekuht. Elos luhngse kuht. Srihpac se oruh elos luhngse kuht uh tiac ke srihpen wal kuh acn kuht oasr kac uh. Elos tiac nuhnkuh ke ma kuht oasr kac uh. Elos liye insiyacsr. Elos luhngse kuht ke ohiyacsr ac ke ma kuht kampare in sun. Suk ac eis luhngse Selos ac fah sruhk ac ahkkweye kuht pacl nuh kwewa.

Nga ac fah akacsruhi sie atac na fihsrwacsr suc, fin orekmakihnyuck, kuh in kahsrwe kuht nohfohn in konwacack luhngse sahflah se. Pactuhn se inge ituckyang sin Leum sel Mwet Pahluh Joseph Smith me: El fahk lah elos nuh kwewa suc etuh lah insiyaclos pwacye ac muhlahlah ac nguhnalos auliyak ac elos insese in liyacacng olwelah lalos ke kihsackuhnlah—kihsackuhnlah nuh kwewa ma El sapkihn uh—ahkkweyeyucklac Sel.2

Pactuhn se inge sruok ip fihsrwacsr tolu:

  1. Etuh lah insiyacsr pwacye ac muhlahlah,

  2. Etuh lah nguhnasr toasr, ac

  3. Insese in liyacacng olwelah lasr ke kihsackuhnlah, oacna sapkihnyuck sin Leum.

Ma se emet, kuht enenuh in etuh lah insiyacsr pwacye ac muhlahlah. Kuht ac etuh fuhkah? Kuht muhtwacwacack ke lohacng na pwacye ke moul lasr sifacna. Insiyac pa infulwen nuhnak lasr uh. Ke kuht lohacng nuh ke insiyacsr, kuht ahkwoye kuht sifacna. Meac mwet rauni kuhtlac tiac etuh, kuht etuh suwohs. Kuht etuh srihpac ac luhngse lasr. Ke kuht srihke in suwohs, liye kuhtyang sifacna, kuht tiac pihlesruh kuh kiacpwekuht sifacna.

Oacyacpac oasr sie inkacnek in nuhnuhnkuh fin insiyacsr muhsahlsahluh. Muhsahllah luhn sie insiyac el sie insiyac fihsrwacsr, mwesahs, ac puhsisacl. Ke nga lohng ke Mwet Lahngo el fahk, “Liye, Nga tu ke sruhnguhl, ac tongtong,”3 nga lohng El tongtong ke sruhnguhl luhn insiyuck. Fin nga ikacslah sruhnguhl se inge nuh Sel, nga ac sa in topuk suliyuck luhn Nguhn, ac nga ac luhngse yohk ke kena luhn God.

Ke kuht suwohs ac pruhe in motko ke tahfweyacn ma insiyacsr suwohs ac muhsahlsahluh, kuht ac fah lutiyuck sin Nguhn Muhtahl. Kuht ac fah eis sie ahkkweyeyucklac wolacna kuh ahkpwacye fihsrwacsr, suli kuht in mukwikwi.

Ahkluo, kuht enenuh in etuh lah toasr nguhn lasr. Kahs se toasr ke Oxford Dictionary el lwenglah muh “puhla kuh ahkkahlwemye auli ke akihlen lah sie mwet orwaclah ma suhfal.”4 Fin oasr sie nguhna toasr, kuht ahkkahlwemye ma koluk lasr ac ma suhfal uh. Kuht lutiyuck ke ma nuh kwewa ma ahkkahlwemye ke suwohswohs.5 Kuht puhla ahsor ke ma koluk ac kena in auliyak. Sie nguhn toasr ac kena in lihpsre ke finsrak luhn Nguhn Muhtahl.”6

Sie nguhna toasr fahkwack ke kena lasr ac srihpac lasr in mukwikwi. Kuht kena in ahkpuhsisaclye kuht sifacna ye muhtuhn God, kena in auliyak, kena in eis etuh, ac kena in eklac. Kuht kena in pruhe, “Tiac ke luhngse luhk, tuhsruhk ke luhngse lom, lwelah in sahflah.”7

Ip se ahktolu in luhngseyuck sin Leum pa sie sulaclah sensen in liyacacng olwelah lasr uh ke kihsackuhnlah, finne kihsackuhnlah nuh kwewa ma Leum el sapkihn.8 Puhs pacl kuht nuhnkuh lah kahs se kihsackuhnlah el ahkuhtweyac ke ma luhlahp kuh upac nuh sesr in oruh. Ke ohiyac na pwacye se inge sahp ac pwacye, tuhsruhk yohkna el ahkkahlwemye ke kais sie lwen oacna sie mwet tuhma lutlut pwacye luhn Kraist.

Sie inkacnek kuht suk olwelah lasr ke kihsackuhnlah pa in moul suwohswohs in wi ipeis ke kuhfa luhn Leum ke kais sie wik. Kuht ahkoekuhtlac sifacna nuh ke akwuck muhtahl. Kuht ahksasucye ac ahkkweyelah olwelah muhtahl lasr nuh sin Leum. Ke inkacnek se inge kuht puhla luhngse Lal ac eis olwelah Lal lah orekma upac lasr uh ac akihlenyuck ac ma koluk lasr uh ac nuhnak muhnahs ke Iwaclah luhn Jisus Kraist. Ke akwuck se inge, Leum el olwelah nuh sesr lah ke kuht kena in eis nuh facsr inen Wen Nahtuhl ac esamuhl pacl nuh kwewa ac liyacacng masap Lal, ac fah oasr yohrohsr Nguhn Lal pacl nuh kwewa. Fin oasr Nguhn Muhtahl wi kuht karihngihn kuht pa inge akucl in luhngse sin God.

Kuhtuh pac inkacnek in liyacacng olwelah lasr ke kihsackuhnlah uh ac fihsrwacsr oacna in ahokkuhnlah sie kunohkohn ke Alu uh ac kuhlwacnsap suwohs ke kunohkohn sac kuh ukwe solsol luhn mwet pahluh lasr, Thomas S. Monson, in kahsruh mwet suc muhnahs ac enenuh in moliyucklac ke nguhn. Kuht liyacacng olwelah lasr ke kihsackuhnlah in oruh kuhlwacnsap ma mwet in tiac etuh kac yurin mwet tuhlan lasr kuh mura kuh in konwacack inen mwet mahtuh lasr ac oruh orekma in tempuhl kaclos. Kuht liyacacng olwelah lasr ke kihsaclah in kampare ke ma suwohswohs, in mwesahs, ac lihpsre kolyuck luhn Nguhn ke kuht moulkihn moul lasr pengana lwen. Kuhtuh pacl uh akihlenyuck olwelah lasr ke pacl ma kuht tu kuh ac yohk luhlahlfongi ke pacl ma upac kuh mwe sruhf ke moul uh.

Tukun ahkuhtweyac pactuhn se in etuh luhngse Sel, Leum el orekmakihn sie atac wowo in sang ahkkahlwemye ma kuht ac eis ke mwet ac sucu ke kuht suk luhngse Lal. Leum el fahk lah elac fah oruh tuh elos in use fukunsahk suc yoki ke acn wolacna, ke soko infacl nwacsnwacs, ma fok puhs fukunsahk kac.9

Ke kuht sifacna eis Nguhn luhn Leum ac puhla luhngse Lal, kuht ac fah insewowo yohk liki na kuht kuh in etuh ac use fukun ma puhs ke suwohswohs. Kuht ac fah inmahsrlon mwet suc El fahk lah, “Wo orekma lom, mwet kuhlwacnsap wowo ac oaru: kom oaru ke ma puh, Nga ac fah oruh tuh kom in lwem fin ma puhs: kom ilyak nuh ke engan yurin Leum lom.”10

Suk ac eis luhngse luhn Leum ac fah kol nuh ke etwacack ma kuht sulaclah ac ahkinsewowoyeyuck Sel. Kuht ac fah ahkyohkye luhlahlfongi kacsr sifacna lah El ac fah kol kuht ac ahkkahlwemye nuh sesr ke soko inkacnek na wo. Pahkomuhta Lal ac fah akihlenyuck ke insiyacsr, ke moul lasr, ac ke sucu lasr uh.

Ke insiyuck nohfohn nga suli kowos in suk luhngse luhn Leum ac engankihn olwelah Lal ke mwe insewowo uh. Ke kuht ukwe atac fihsrwacsr luhn Leum ma ahkkahlwemyeyuck, kuht ac fah etwaclah lah kuht luhngseyuck Yohrohl, oacna sie acn kuht oasr kac, ohiyacsr, kuh mwe muhnahs luhn facluh. Luhngse Lal in lwelah ac fah kahsrwe kuht, ahkyohkye luhlahlfongi lasr, ac kahsrwe kuht fosrngahkihn ma nuh kwewa kuht puhlakihn ke moul uh. Finnwe oasr mwe sruhf uh, kuht ac fah kuhtanglah, kapkapwack,11 ac puhla mihs.12 Kuht ac fah inmahsrlolos suc Leum el fahk nuh se:

Leum el nuh fahk nuh sesr, tuhlihk srihsrihk Nahtuhl, nikmet sahngweng, tuh kuht fah ma Lal ac El ac fah kuhtanglah facluh, ac kuht ituckyang nuh Sel sin Pahpah;

Ac wacngihn sie selos ma ituckyang nuh Sel sin Pahpah ac fah tuhlac.13

Ke inen Jisus Kraist, amen.