Kar Bōke jen Irooj

Ke iaar juon ļaddik jidikdk, ij keememej an jema jet iien ān̄in eō ippān n̄an jerbali būroojāāk ko. Eaar wōr juon am̧ jikin kallip jet wōt kilomita jān ijo kōm̧ ar jokwe ie, im ijin aolep iien eban jab lōn̄ jerbal ko n̄an kōm̧m̧ani n̄an kōpooj jikin kallib eo kajjojo jijen. Kōm̧ kijon̄ jerbal ioon im̧ōn jikin kallib eo ak kalōk ak kōkāāl oror ko. Ij keememej jerbal in aolep iien ekar kōm̧m̧an ilo iien m̧ōļo̧, lukkuun jino̧, ak wōtleplep. Ak eaar em̧m̧an ippa. Jema eaar katakin eō wāween aō kōm̧m̧ane jerbal ko ilo kijenmej im errā.

Juon raan eaar kūrtok eō n̄an kapenļo̧k juon jikru im kar kakkōl, “Keememej, eļan̄n̄e kwoj lukkuun kapen jikru eo, enaaj bwilak.” Ilo em̧ōņōņō, iaar kōņaan kwaļo̧k n̄an e ta eo imaron̄ kōm̧m̧ane. Iaar jikruki kōn aolepān aō maron̄, im, aaet, iaar bwilake jikru eo. Eaar kwaļo̧k juon naan ekōjak, im kōm̧ ar bar jinoe. Aaet n̄e ij “kōm̧m̧an bōd,” aolep iien ij en̄jake an iakwe im lōke ilo n̄a. Eaar mej em̧ootļo̧k jen 10 iiō ko rem̧ootļo̧k, ak ij maron̄ wōt keememej men ko eaar katakin eō, en̄jake an iakwe, m̧ōņōņō kōn an rōjan̄, im en̄jake errā.

En̄jake in ej waļo̧k jen kar bōk kōj jen juon armej jej iakwe ej juon menin aikuj an armej. Kar bōk jen armej eo em̧m̧an ej kōketak kōj. Ej kōļapļo̧k ad en̄jake aorōk eo ad make im ad leke kōj make. Ro rejjab maron̄ lo errā eo jān jipan̄ ko rekam̧ōņōņō jet iien rej pukōti ijoko jet. Remaron̄ lale ippān armej ro rejjab m̧ōņōņō ilo ājmour eo aer. Remaron̄ kobaik er make n̄an ro jerāer reriab im pukōt men ko rejeļā rebōd n̄an kajjieon̄ bōk errā eo rej pukōte. Remaron̄ pukōt errā jen aer kōņak juon ed in nuknuk n̄an ejaake juon en̄jake ke reaorōk ak kautiej. N̄an jet, jibadōke juon eddo ak juon jerbal eaorōk maron̄ barāinwōt erom wāween ko n̄an pukōt errā. Remaron̄ kōmeļeļeik aer aorōk jen juon jerbal rej kabwijere ak utiej eo rej bōke.

Aaet ilo Kabun̄ in jejjab aolep iien anemkwoj jān kain ļōmņak rot in. Pukōt errā jān jipan̄ ko rebōd ak kōn un ko rebōd rej likūt kōj ioon juon iaļ ekauwōtata—juon eo me ekōņaan tōl kōj jān jim̧we eo im aaet n̄an kakkure. Ijjelo̧kin en̄jake iakwe im leke kōj make, jenaaj āliktata en̄jake elļo̧k im atōm̧jenemjen.

Alma eaar kōkpilōklōk ļaddik eo nejin Hilamōn, “Reilo̧k n̄an Anij im mour.”¹ Jipan̄ eo eļap an anemkwoj in jerbal im errā eo ejjeļo̧k jem̧ļo̧kin ej Jemedwōj Ilan̄ im Nejin, Jisōs Kraist. Rejeļā kajjeed. Rej iakwe kōj. Raar jab bōk kōj kōnke taitōļ ak jerbal eo ad. Rejjab kalimjōke jekjek rot eo ad. Rej kalimjōk būruwōd. Rej bōk kōj kōnke wōn kōj im ta eo jej jibadōke n̄an erom. Pukōt im bōk errā jān Er naaj aolep iien kotak im rōjan̄ kōj.

Inaaj kwaļo̧k juon jon̄ok epidodo, eo eļan̄n̄e eaar jerbal, emaron̄ jipan̄ aolepād wōj lo errā eo eļap. Jon̄ok in kar letok jen Irooj n̄an Rikanaan Joseph Smith: Eaar ba bwe aolep ro rejeļā bwe būrwāer rej m̧ool im rub im aer jetōb ettā im ro rej m̧ōņōņō in kōjparok bujen ko aer jen kaarmejete—aolep kaarmejete ko Ej kean̄—Ej bōk er.²

Jon̄ok in ekitbuuj jilu iaan bun̄tōn ko reļam waan:

1. Jeļā bwe būruwōd rej m̧ool im rub,

2. Jeļā bwe jetōb ko ad rej ettā, im

3. Maron̄ m̧ōņōņō in kōjparok bujen ko ad jen kaarmejete āinwōt Irooj eaar kean̄.

Kein kajuon, jej aikuj in jeļā bwe būruwōd rej m̧ool im rub. Ewi wāween ad jeļā menin? Jej ijjino jen m̧ool in etale mour ko ad make. Bōro eo ej ioļapļap in en̄jake ko ad. Ilo ad kejōkļo̧kjeņ ilo būruwōd, jej etale kōj make. Ta n̄e juon armej ipeļaakid ejjab jeļā, jelukkuun in jeļā. Jejeļā un ko im kōņaan ko ad. N̄e jej pād ilo m̧ool, lukkuun paaktokid, jejjab kune ak moņe kōj make.

Ewōr bar juon wāween n̄an ekajete eļan̄n̄e būrwōd rej rub. Juon bōro erub emera, eppeļļo̧k, im juon bōro ekibliie. N̄e ij ron̄ an Rilo̧mo̧o̧r eo ba, “Lo, Ij jutak im̧aan kōjām im kaļļaļļal. .”³ Ij ron̄ An kaļļaļļal im̧aan kōjām in būruwō. Eļan̄n̄e ij kōppeļļo̧ke kōjām eo n̄an E, eļapļo̧k aō eo̧ron̄ kūr ko an Jetōb eo, im ļapļo̧k aō errā kōn ankilaan Anij.

Ilo ad m̧ool im lukkuun kejōkļo̧kjeņ n̄an leļo̧k n̄an būruwōd ke rej m̧ool im rub, jenaaj ekkatak jen Jetōb Kwojarjar eo. Jenaaj bōk juon kapen eo em̧m̧an ak kajim̧we, ej kūr kōj n̄an m̧akūtkūt.

Kein karuo, jej aikuj in jeļā bwe jetōb eo ad ej ettā. Naan eo ettā ilo Oxford dictionary eo ej kōmeļeļeiki āinwōt in “en̄jake ak kwaļo̧k en̄jake eo ekajoor ilo kile bwe juon eaar kōm̧m̧an bōd.”⁴ Eļan̄n̄e ewōr ippād juon jetōb ettā, jej kile jerawiwi ko ad im likjab ko. Jej kibliie “kōn aolep men [otemjeļo̧k] in men ko an wānōk.”⁵ Jej en̄jake būrom̧ōj ekkar n̄an Anij im m̧ōņōņō in ukweļo̧k. Juon jetōb ettā ej m̧ōņōņō n̄an ron̄jake “n̄an kareelel ko an Jetōb Kwojarjar.”⁶

Juon jetōb ettā ej waļo̧k jen ad m̧ōņōņō im kijejeto n̄an jerbal. Jej m̧ōņōņō n̄an kōttāik kōj make im̧aan Anij, m̧ōņōņō n̄an ukweļo̧k, m̧ōņōņō n̄an ekkatak, im m̧ōņōņō n̄an oktak. Jej m̧ōņōņō n̄an jar, “A en jab ankil Aō a Am̧ wōt.”⁷

Kein kajilu bun̄tōn n̄an maron̄ bōk jen Irooj ej juon jokālet n̄an kōjparok bujen ko ad jen kaarmejete, aaet aolep kaarmejete eo Irooj enaaj kean̄⁸. Emakijkij ad ļōmņak bwe naan eo kaarmejete ej kōnono kōn jet men ko reļļap ak repen n̄an kōj n̄an kōm̧m̧ane. Ilo jekjek ko rem̧ool menin emaron̄ m̧ool, ak aolepān ej kōnono kōn mour raan n̄an raan āinwōt juon rikaļoor an Kraist.

Juon wāween ilo ad kōjparok bujen ko ad jen kaarmejete ej erreeo n̄an bōk m̧ōttan kwojkwoj eo kajjojo wiik. Jej lukkuun kōpooj kōj make n̄an kain̄i ko. Jej kōkāāl im kapen kalim̧m̧ur ko ad rekwojarjar n̄an Irooj. Ilo wāween in jej en̄jake An errā im bōk kile eo An bwe kijejeto ko ad rej kili im jerawiwi ko ad em̧ōj jeorļo̧ke jen Pinmuur eo an Jisōs Kraist. Ilo kain̄i in, Irooj ej kalim̧m̧uri kōj bwe ilo ad m̧ōņōņō n̄an bōk iood etan Nejin im aolep iien keememej E im kōjparok kien ko An, jenaaj aolep iien bōk Jetōb eo An ippād. Bōk Jetōb Kwojarjar eo āinwōt eo m̧ōttad aolep iien ej kōkkaļļe eo eļap ilo an Anij bōk kōj.

Wāween ko jet n̄an kōjparok bujen ko ad jen kaarmejete rej lem waan āinwōt bōk juon kūr ilo Kabun̄ eo im tiljek jerbal ilo kūr eo ak ļoor kūr eo an rikanaan eo ad, Thomas S. Monson, n̄an pukōtļo̧k ro rej jutak irājetid im aikuj n̄an bōk lo̧mo̧o̧r ilo jetōb. Jej kōjparok bujen ko ad jen kaarmejete jen leļo̧k jerbal in jipan̄ n̄an ro iturir ak kapejuknen eo ad ak jen pukōt āt ko an ro nukid etto im kōm̧m̧ane jerbal in tampeļ kōn er. Jej kōjparok bujen ko ad jen kaarmejete jen jibadōk eo elem waan kōn kwojarjar, kapidodoik, im eo̧ron̄ im̧we ko an Jetōb ilo ad mour mour ko ad aolep iien. Jet iien kōjparok bujen ko ad ej meļeļein ejjab ļapļo̧k jen jutak dim im tiljek n̄e jej en̄jake pen im apan̄ an mour.

Ālkin kōmeļeļeiki jon̄ok eo kōn wāween eo maron̄ bōk jen E, Irooj ej kōjerbal juon kōmeļeļe em̧m̧an n̄an kwaļo̧k wāween ad jeram̧m̧an āinwōt kajjojo im baam̧le ko ilo ad pukōt An errā. Irooj eaar ba Enaaj kōm̧m̧an bwe ren bōktok āinwōt leen wōjke eōūne eo kar katōke ilo juon āne em̧m̧an jen juon dān erreeo, eo ej kalle eļap leen ko rem̧m̧an.⁹

Ilo ad lukkuun leļo̧k ad n̄an Jetōb eo an Irooj im en̄jake An errā, jenaaj jeram̧m̧an ilōn̄ in ad meļeļe im bōktok elōn̄ leen ko rewāppen. Jenaaj pād ilubwilijin ro Eaar ba, “Em̧m̧an am̧ kōm̧m̧an kwō karijera em̧m̧an im tiljek. Kwaar tiljek kōn men ko re iiet, Inaaj kairooj eok ioon men ko re lōn̄: kwōn deļo̧n̄ ilo lan̄lōn̄ an am irooj.”¹⁰

Pukōt im bōk errā an Irooj enaaj tōlļo̧k n̄an jeļāļo̧kjeņ eo me Eaar kālet kōj im kar kōjeram̧m̧an. Jenaaj bōk eļapļo̧k leke bwe Enaaj tōlļo̧k kōj im jineete kōj n̄an em̧m̧an. An tūriam̧o ejouj enaaj meļeļe ilo būruwōd, ilo mour ko ad, im ilo baam̧le ko ad.

Kōn aolepān būruwō ij karuwaineneik kom̧ n̄an pukōt errā eo an Irooj im lan̄lōn̄ kōn kōjeram̧m̧an ko Eaar kalim̧m̧ur kaki. Ilo ad ļoor jon̄ok in elem waan Irooj eo eaar letok, jenaaj jeļā bwe E ar bōk kōj, mekarta jerbal eo ad, jekjek rot, ak jon̄ok ko ad rewabanban. An errā in iakwe enaaj kōm̧akūtkūt kōj, kōļapļo̧k ad tōmak, im jipan̄ kōj jerbali men otemjej jej jelm̧ae ilo mour. Men̄e apan̄ ko ad, jenaaj tōprak, jeram̧m̧an,¹¹ im en̄jake ilo aenōm̧m̧an.¹² Jenaaj pād ilubwilijin ro Irooj eaar ba:

Irooj eaar jiron̄ kōj, ajri ro Nejin, rej jab aikuj mijak, bwe jej ro Nejin im Eaar anjo̧ jen laļ in, im bwe jaar bōk n̄an E jen Jemān.

Ejjeļo̧k juon iaer kar letok n̄an E jen Jemān naaj jako.”¹³

Ilo etan Jisōs Kraist, amen.