2010–2019
Mla Kongei er Kid a Rubak
April 2013


Mla Kongei er Kid a Rubak

A skel me a ngeiul a kengei er a Rubak a uchul a klemedengei el kmo kede ngellitel e ngeltengat er Ngii.

Sera kekerei el buik, eak medengelii a demak el bebil er a taem e ngoikak lobengkel el mora urerel. Ng mlarngii a kekerei el sersam el diak el sal cheroid er a blimam, e kmal mle betook a ureor er tial sers er a bek el taem. Aki ulereor er tial kora ultobed el berandang e omekedechor malechub a ki omekbeches er a kakine. Sel kumtab e tial ureor a mle blechoel ngarngii er a taem er a kelekolt, el kmal klou a snow, malechub e ngosebelab el chull. Eng di kmal mle soak. A demak a ulisechakl er ngak el meruul a kmo ngera loba kllouelreng me a kengei.

A tara klebesei en dilu er ngak me kulsiich er a screw, e “Ulemeklatk, er ngak el kmo aleskum a kmal losichii el mo kmes, eng metemall.” Ak ansing, el soak lochotii el mo er ngii a bla ksubii. Me a kulsichii tial screw el kmal mle renguk, meng,uaisei, el miltemall. Ng kora ulengelakel, ea ki luueta el mo oureor. Uldimukl aikel taem el ngak a “tilmellii a ngerang,” ea kmal di milchesuar a beltikelreng er ngii me a ungil uldasu el kirek. Ng mlo smecher er a kmeed el teruich el rak er a memong, eng di kmal dirk sebechek el rongesii oto er a ngerel, melchesuar a beltkil a rengul, me a tekingel melisiich, me a kengei er ngii.

A domelchesiu er a chad el mla kongei er kid a usbechall er a rebek el chad. Sel kengei er kid a rungil chad a melisiich er kid. Ng choisisii sel klou elultuteled me a rengud el kmo ng sebeched. Tirkel tir a diak el betik er a kengei er tirkel sorir a blechoel mo osiik er ngii er kmo ngker. Te locha mo osiik er ngii er a rechad el kuk diak el sal semeriar el kirir. Te mo osiik er ngii er a delongelir a remekngit el sechelei e meruul a tekoi lodengei el kmo ng diak lungil el melasm losiik er seikid el kengei el tir osiik er ngii. Te locha mo osiik er tial kengei el mo oubail el uchul el kengei malechub e bol teloi er tir. Ea rebebil, ea skel a ngarbab el deruchall a sebechel rael kirel a skel a kengei.Te metik er sel ngii a klou el belkrir lultuil er a deruchall el tir olab.

Dirrek el chelsel a Ikelesia eng diak desal cheroid er tiaikid el uldasu. Sel dosiik er a kengei er a chelsel a cheleuid malechub eng chelbirukel a sebechel osisebid er a kengaol rael—el ngii a sebechel lotucheklid el bedul a tellemall. Meng diak domelchesiu er kid el meklou a belkud e blekebek, e bai omelchesiu er kid el cheloit e diak a ultuteled.

A Alma milellach er a ngelekel er a Helaman me lomes el bedul a Dios me bol ngar.1 Ngkel kmal uchul a klisiich me a diak a ulebengelel kengei a Demad er a Babeluades me a Ngelekel, Jesus Kristo.Tir a medengelkid. Ng betik a rengrir er kid. Tir a diak el kengei er kid el dui malechub el deruchall a uchul. Tir a diak lomes a deruchelled. Tir omes a chelsel a rengud. Tir a kongei er kid er sel teleteled me sel sebeched el morngii. Me sel dolai e dosiik er a kengei er tir e kede blechoel mo ngara selbechakl e mesisiich.

Ak mo ouchais er a beot el okesiu, el sekum e kede oltirakl er ngii, e ngoseuir a dersta er kid el mo metik er a ngarbab el kengei. Tial teletael a le ngiluu a Rubak el msa Profet Joseph Smith: Ng dilu el kmo tirkel rokui el klikiid a chelsel a rengrir e ouchel a rengrir e blak a rengrir loltirakl a telbiileir lokiu a mo chuarm—bek el ongarm el Ngii a dmung a Ngii a kongei er tir.2

Tial teletael a olab a edei el beot el tekoi:

  1. Mo medengei el kmo a rengud a klikiid e ouchel a rengud,

  2. Mo medengei el kmo ngariou a rengud, e

  3. Mo blak a rengud el oltirakl a telbiil lokiu a mo chuarm el Rubak a mla kmu er kid.

A kot, eng kired el mo medengei el kmo a rengud a klikiid e ngariou. Kede mekera mo medengelii tiang? Kede omuchel el skeng a klengar kid. A rengud a kmal uchul aikel domelchesiu. Sel domes a rengud, e kede merritel er kid. Aikel diak lodengei a re ngara bitar kid, a kmal dodengei. Kede medengei a moktek me a soad. Sel de skeng, a chelsel a rengud, eng diak dongkekerei malechub e dil kid lomulak er kid.

Ng dirrek el ngarngii a teletael sel dorritel a rengud me a ngariou el reng. A ngariou el reng a medemdemek, blok, e orrenges el reng. Sel krengesii Osobel el kmo, “Oi, ak dechor er bita er a chesimer, e melengod,”3 A kurrenges er Ngii el melengod er a chesmerel a chelsel a renguk. Omko ak mekengii a chesimer el Kirel, eng sebechek el siotai er a Chedaol Reng, e sebechek el kongei er a soal a Dios.

Me sel de ngara blakelreng el meluluuch e melbedebek el kirel a klikiid e ngariou a rengud, e kede mosisechakl er a Chedaol Reng. Kede mo nguu a ungil oterkeklel malechub a meral teletael, el siotai er kid el mo ngara omeruul.

Ongerung, ng kired el mo medengelii ouchel reng. A belkul a tekoi el ouchel el renger a chelsel a Oxford Dictionary a kmo “sel klengit el reng el mui el medengei el kmo kede mla rullii a mekngit.”4 A douchel a rengud, e kede kongei a kngtid me a chelitechetud. Kede mosisechakl el “kirel a [rokui] el tekoi el melutk el kirel a llemalt.”5 Kede mo omelchesiu er a klou el klengit el reng e soad el mo ouchel a rengud er a kngtid. A ouchel reng a soal lorrenges er a “okedongel Chedaol Reng.”6

A ouchel reng a morngii lokiu a blakelreng me a mesisiich el reng el mo ngara omeruul. Kede blak a rengud el kmal mo ngariou a rengud er medal a Dios, e ouchel a rengud er a kngtid, e soad el mengodech. Kede soad el meluluuch, el “Diak el sel soak, ng bai sel, soal.”7

A ongedei el teletael el Rubak a kongei er kid a sel dolilt el mo oltirakl a telbiieled lokiu a mo chuarm, “oi, luldimukl aikel ringel el Rubak a mo meskid.”8 Kede blechoel lomdasu er a tekoi el chuarm el bedul a kmal klou malechub eng meringel er kid a meruul er ngii. A bebil er a teletael e tia locha klemerang, eng di ng blechoel melutk el kirel a klengar kid er a bek el sils el meral loltirakl er a Kristo.

A tara teletael e kede oltirakl a telbiieled lokiu a mo chuarm a sel dolai er a sacrament er a bek el sandei. Sel dongedmokl er kid el kirel tial chedaol ruoll. Kede omekbeches e smisiich a chedaol telbiieled el mora Rubak.Seikid e kid a mo melchesuar a kengei er Ngii e nguu a nger er Ngii el kirel a blakelreng er kid ea kngtid a mo mousubes lokiu a Tngakireng er a Jesus Kristo. Chelsel tiaikid el chedaol ruoll, ea Rubak a yaksok er kid el kmo alsekum eng blak a rengud el nguu a ngklel a Ngelekel e blechoel melbedebek er Ngii e oltirakl a Llechul, ea Reng er Ngii a mo blechoel lobengked. Sel kot el olchotel a kmo a Dios a mla kongei er kid a sel sekum a Chedaol Reng a blechoel kldemed.

A bebil er a teletael el dotirakl a telbiieled lokiu a mo chuarm a sel de kengei a beot el okedong er a Ikelesia e blak a rengud el ngara omesiou er tial okedong, malechub e kede otireklii a tekingel a profet, Thomas S. Monson, el mora siik el kirir tirkel mla touchakl e ousbech el muut el mei. Kede otirakl a telbiieled lokiu a mo chuarm sel dosiou er a tonari er kid malechub a beluu malechub e kede mo osiik a ngklir a rebeldeked e meruul a ureor er a templo el kirir. Kede otirakl a telbiileled lokiu a mo chuarm sel dolasm el meruul a llemalt, blok a rengud, e orrenges er a odbechel a Reng er a bek el sils. Bebil er a taem ea otireklel a telbiieled a belkul a kmo kede dechor el mesisiich e blak a rengud sel sekum a ses el eolt er a klengar a meliuekl er bitar kid.

Uriul er a omesodel a teletael el kmo kede mekera e Ngii a kongei er kid, ea Rubak a ousbech er a kmal ungil el okesiu el uchul e kede mosebechakl kid me a telungalek er kid sel dosiik er a kengei er Ngii. A Rubak a mla kmu el kmo ngii a mo rulterir me te kmal mo bekerredechel el kerrekar el delalm er a kmal ungil chutem, el kmeed er a ungil ralm, el loltobed a betook lungil rodech.9

Me sel dultuil er a Reng er a Rubak e domelchesiu er a kengei er Ngii, e kede mo mukngeltengat el chengelakl er a klemedengei er kid e mo ocholt a betook el ungil rodech er a llemalt. Kede mo teloi er tirkel Ngii a kmu el kmo, “Ngungiang, kau el blak a rengum el mesiungek: ke mla blak a rengum er a mekesai el tekoi, chelecha eak rullau el mo mengedereder a betook el tekoi: bem siseb er a deureng er a Rubak.”10

A skel me a ngeiul a kengei er a Rubak a uchul a klemedengei el kmo kede ngellitel e ngeltengat er Ngii. Kede mo blekebek el kmo Ngii a mo omekrael er kid el bedul a klungiaol. A chubechub er ngii a mo kltukl er a chelsel a rengud, klengar kid, me a telungalek er kid.

Me a kuba renguk el rokir e siotai er kmeiu el mo osii er a kengei er a Rubak me bo de ngara deureng er a ikel yaksok el klengeltengat er Ngii. Me sel doltirakl er a beot el teletael el Rubak a mla ochotii, e kede mo medengei el kmo Ngii a mla kongei er kid, el diak el iior er a deruchelled, klechad er kid, malechub a ngelsengesed. Sel chubechub el kengei er Ngii a mo smisichid, oisisii a klaumerang er kid, e ngosukid el mo obangel aikel chelbengeled er a klengar.Meng diak el iior er a ringel el ngar kid, le kede ngoriakl, e mo ungil besud,11 e mo ngara budech.12 Kede mo teloi er tirkel Rubak a melekoi el kmo:

A Rubak a mla kmu er kid, a remekekerei el Ngelekel, el diak de medakt, ele kid Obengkel e Ngii a mla mo kats er a beluulechad, e kid a mlo er Ngii lokiu a Chedam.

“E diak a ta er tirkel mlo er Ngii lokiu a Chedam el remiid.”13

El ngara ngklel a Jesus Kristo, amen.