2010–2019
Ciqoma na Ua
Epereli 2013


Ciqoma na Ua

Au sa vakavinavinaka vua na Kalou kei na Luvena, o Jisu Karisito, ena vuku ni Veivakalesuimai kei na kena kaukauwa me muataka yani ki liu e dua na ua cecere ni dina kei na ivalavala dodonu e vuravura taucoko.

Kemuni na taciqu kei na ganequ lomani, au tokona na veika a cauraka o Peresitedi Thomas S. Monson kei ira eso tale ena nodra vakacaucautaki o ira era sa vakaio mai ki na veikacivi ni parofita me vakavuqataki na iwiliwili ni daukaulotu kilikili. Ia oqo e dua na ua vou ni maqusataki ni cakacaka ni kaulotu sa drodrova yani na vuravura taucoko. Vakatekivu mai na gauna a vakaraitaka kina o Peresitedi Monson na itukutuku ni veigauna ena Okotova sa oti, era sa kacivi rawa e udolu na cauravou, kei na goneyalewa, kei na veiwatini daukaulotu, ka vuqa tale era sa vakavakarau tiko.1 Ia na taro e tiko oqo, “Na cava eda na cakava vei ira kece na daukaulotu oqo?” E rawarawa tu ga na kena isau. Era na cakava ga na veika era sa dau cakava tiko na daukaulotu. Era na laki vunautaka na kosipeli! Era na vakalougatataki ira na luvena na Kalou sa Cecere Sara!

E vuqa tale vei kemuni na cauravou kei na goneyalewa ko ni na ciqoma na ua oqo ni ko sasagataka mo ni kilikili kaya ki na veikacivi ni kaulotu. Ko ni raica oqo me dua na ua ni dina kei na ivalavala dodonu. Ko ni na raica na madigi mo ni vakaseua ena ua o ya.

Kemuni na itabagone, mo ni rokova na lewenivuli ka veivakavulici vakai kemuni yadua ena vunau i Jisu Karisito. Sa kena gauna oqo mo ni vakavakarau mo ni vakavulica vei ira na tamata na veika vinaka baleta na Kalou.

Kemuni na cauravou kei na goneyalewa, sa rui bibi na nomuni vuli—kivei keimami, kivei kemuni, vakakina vua na Kalou. Ni gadrevi vakakina, ke o ni vinakata mo ni vuli ena koliji se univesiti ni oti na nomuni kaulotu, keimami sa vakayaloqaqataki kemuni mo ni kere curu ki na koronivuli ko ni sa digitaka ni bera na nomuni kaulotu. E vuqa na koronivuli torocake sara era na tarova tu vakawawa na gauna ni vuli me 18 ki na 30 na vula vei ira sa namaki mera laki kaulotu. Sa na qai rawa kina vei kemuni na cauravou kei na goneyalewa daukaulotu mo ni laki kaulotu ka sega ni lomaleqataka na gauna o ni na laki tekivu vuli torocake kina. Eda sa vakavinavinaka kina vakalevu vei ira na iliuliu ni koronivuli torocake era sa vakayacora rawa na kena rawati na ituvatuva oqo!

Kemuni na itubutubu, qasenivuli, kei na so tale, ni ciqoma na ua ena nomuni vakarautaki ira na noda itabatamata tubu cake tiko mai mera kilikili kaya ki na veiqaravi ni kaulotu. Ia, na nomuni ivakaraitaki vinaka ena ka taleitaki vei ira na nomuni itokani kei ira na neiba. Ni vakarautaki kemuni mo ni sauma na taro era na taroga mai na vuna ko ni bula tiko kina ena ituvaki vakaoqo. Ni tu vakarau mo ni tukuna na vuna ko ni vakanuinui tiko kina kei na reki era raica tu vei kemuni.2 Ni yaco mai na taro vakaoqo, sa rawa mo sauma ka kaya, “Meda tarogi ira mada na daukaulotu! Era na vukei keda! Ke o ni gadreva, au na tiko e yasamuni ni ra saumi taro ka veivakavulici na daukaulotu vei kemuni.”

Kemuni na qase, ni ciqoma na ua ena veivuke ni vakavakarau vakayalo, vakayago, kei na veika vakailavo baleti ira sa namaki mera kaulotu. Ko ni sa na vakamatautaka mo vakatomiki sede me maroroi. Kemuni na veiwatini qase, ni lokuca na siga mo ni na kaulotu kina. Keimami na vakavinavinakataka na nomuni veiqaravi. Me yacova na siga o ya, ena rawa vei kemuni eso mo ni vakauta na nomuni ilavo ki na kaulotu ena nomuni cau ki na iLavo Raraba ni Lotu, me vaka sa vakatura tale tiko o Peresitedi Monson, ena mataka nikua.3

Sa toso cake tikoga na iwiliwili ni turaga digitaki kei na nodra itokani lomani era sa ciqoma na ua oqo ena nodra sa kacivi mera vakatulewa ena tabana ni kaulotu ena Lotu. Ena veiqaravi o ya, era na bulia cake na kedra icavacava na itabatamata era sa sucu mai kei ira se bera. Era taura tu na peresitedi ni kaulotu na idola ni ilesilesi ni nodra bula raraba, veitaqomaki, kei na rawa-ka na nodra daukaulotu. Ni oti na nona veivakasalataki kei ira na peresitedi ni iteki kei na tikina ena nona tabana ni kaulotu, na peresitedi yadua ni tabana ni kaulotu ena lesi ira na daukaulotu mera laki veiqaravi yani ki na veiiteki, tabanalevu, kei na tabana sa digitaki.

Era na ciqoma na ua oqo na peresitedi ni iteki kei ira na bisopi ena nodra vakayagataka e vuqa na auwa ena nodra veivakatarogi vei ira sa namaki tiko mera laki kaulotu. O ira na iliuliu ni matabete oqo era taura tu na idola ni ilesilesi ni cakacaka ni kaulotu ena nodra tabanilotu ka ra na vakauqeti ira tiko na lewenilotu mera na vakaitavi.

O ira na tacida kei na ganeda ena matabose ni tabanalevu yadua era sa tekivu mera ciqoma tiko na ua oqo. Ena matabose o ya e tiko kina o iliuliu ni kaulotu ni tabanalevu.4 Au gadreva meu na vosa vakayadudua vei kemuni na iliuliu ni kaulotu ni tabanalevu. O ni sa kacivi mai vei nomuni bisopi mo ni liutaka na cakacaka ni kaulotu ena tabanalevu. Ka so vei kemuni sa gugumatua sara ka sa kacivi talega kina e dua na ivukevuke me vukei kemuni. Vata kei ira tale era tiko ena matabose ni tabanalevu, ko ni sa kilai ira rawa era luluqa tu vakalotu, matavuvale lewenilotu vakatikina, kei ira na wekada era sa malele mai. Ko ni na bose vakawasoma kei ira na daukaulotu tudei. Ko ni na vakasalataka ka vukei ira na daukaulotu. Yalovinaka ni vukei ira mera vakatawana na nodrau ituvatuva ni veisiga ena veigauna donu ni veivakavulici e vakaibalebale cake. Oqo na nomu itavi. Sa ka bibi dina sara na nomu ilesilesi ki na kena rawati na cakacaka oqo. Kevaka o na ciqoma na ua oqo ena vakabauta kei na yalo marau, sa na vakakina vei ira na kena vo. Oi kemuni na iliuliu ni kaulotu ena tabanalevu, ko ni sa isema ena kedra maliwa na lewenilotu kei rau na daukaulotu ena cakacaka tabu oqo ni nodra vueti bula mai na luve ni Kalou.5

O ira na itokani kei na wekada era sega ni da lotu vata era rawa talega ni ciqoma na ua oqo. Eda na vakauqeti ira mera maroroya tikoga na veika e vinaka ka dina ena nodra bula. Ka da na sureti ira mera ciqoma vakalevu tale eso, vakabibi na dina lagilagi mai na ituvatuva tawamudu ni Kalou, me laki duavata tawamudu tale kina na matavuvale.6

Na ua oqo ni dina kei na ivalavala dodonu sa ka talei sara! E sega ni cakava na tamata! E lako mai vua na Turaga, ni a kaya, “Io au na kitaka kusarawa na noqu cakacaka ena kena gauna.”7 Na ua oqo sa vakaukauwataki tu ena dua na ivakaro vakalou a voqataki mai ena 193 na yabaki sa oti. E vitu ga na qaqa ni vosa: “Oqo na Noqu Gone-ni-Toko. Mo Rogoci Koya!”8 A cavuta oqori na Kalou sa Cecere Sara, ka vakatakilai cauravou Josefa Simici kina na ivakaro oqo vua na Turaga o Jisu Karisito. Na vitu na vosa oqori a tavoci kina na Vakalesuimai ni Nona kosipeli. Na vuna? Baleta ni noda Kalou bula e Kalou dauloloma! E gadreva vei ira na Luvena mera kilai Koya kei Jisu Karisito, o Koya sa tala mai!9 Ka gadreva vei ira na Luvena mera sega tale ni mate ka rawata na bula tawamudu!10

Ena vuku ni inaki lagilagi oqo, era sa vakavulica tiko kina na daukaulotu na Veivakalesuimai. Era kila tu ni 2,000 vakacaca na yabaki sa oti, a tauyavutaka kina na Turaga na Nona Lotu. Ni oti Nona mate ena Kauveilatai kei na nodra mate na Nona iApositolo, era veisautaka na tamata na Lotu kei na kena ivakavuvuli. Ni mai oti, e dua na itabatamata butobuto vakayalo, ka yaco na veika era a parofisaitaka tu mai na parofita taumada11, a vakalesuatale mai na Tamada Vakalomalagi kei Jisu Karisito, na Lotu, na kena ivakavuvuli, kei na kena lewa ni matabete. Ena vuku ni Veivakalesuimai oqo, sa yaco tale mai kina vei ira na tamata na kila-ka kei na cakacaka vakalotu bibi ni veivakabulai kei na bula vakalagilagi.12 Sa yaco kina, na bula vakalagilagi oqo meda rawata na tamata yadua meda tiko vata tale kei na noda matavuvale vata kei na Kalou kei Jisu Karisito me tawamudu!

E sega ni rawa meu tukuna tu ga vakamamada na veika e baleta na Veivakalesuimai. Na itukutuku dina oqo e veivakurabuitaki dina. E cecere sara! E vakatubu icegu! Sa dua na ka lagilagi mera tadu mai na italai mai lomalagi mera mai solia na lewa kei na kaukauwa ki na cakacaka oqo?

Rau a rairai vata mai ena vica na gauna na Tamada Vakalomalagi kei Jisu Karisito vua na Parofita Josefa Simici.13 Mai na Nodrau veidusimaki, era a tadu talega mai kina eso tale na italai mai lomalagi, ena nodra inaki yadudua. Me kena ivakaraitaki:

  • A vakatakila mai na Agilosi o Moronai na iVola i Momani.14

  • A vakalesuamai o Joni na Dauveipapitaisotaki na Matabete i Eroni.15

  • E ratou a vakalesuya mai o Pita, Jemesa, kei Joni na Matabete i Melikiseteki.16

  • Sa vakalesuya mai o Mosese na idola ni nodra vakasokomuni na Isireli.17

  • Sa mai vakatikora o Ilaija na idola ni veika e kilai baleti Eparaama.18

  • Sa vakalesuya mai o Ilaija na idola ni lewa ni veivauci.19

Me kena ikuri, sa mai vakuria na Veivakalesuimai na kila-ka a tu vei ira na yalododonu ena gauna makawa. A vakarautaka tale na Turaga e dua na ivola vou ni ivolanikalou. A vakuria ki na iVola Tabu na iVola i Momani: E Dua Tale na iVakadinadina kei Jisu Karisito. Oqo e dua na ivolatukutuku ni parofisai kei na cakacaka vakalotu ni Turaga sa tucaketale kivei ira na kai Amerika makawa. E vakamacalataka na ituvatuva cecere ni marau ni Kalou20—na ituvatuva ni veivakabulai.2120 Na iVola i Momani e rau salavata tiko kei na iVola Tabu. Na ivolanikalou e rua oqo e rau vakadeitaka ni sa dina na kosipeli i Jisu Karisito kei na kena bibi na Nona Veisorovaki.22

Na Veivakalesuimai sa mai yaco kina na veika a parofisaitaki tu mai vakaivolatabu. Me kena ivakaraitaki, a parofisaitaka o Aisea ni na tauyavutaki na vale ni Turaga ena dela ni ulunivanua cecere.23 Na nodra lako yani na ivuvu ni Momani ki na veiulunivanua ena ra kei Amerika sa vakayacori kina na solibula cecere kei na vakabauta. A parofisaitaka talega o Aisea ni na vakayacora na Kalou “e dua na cakacaka vakurabui vakaidina sara.”24 Sa mai yaco dina na ka oqo mai na nodra cakacaka tabu na mataivalu tubucake tiko ni daukaulotu.

Sa vakalesuimai na ivakavuvuli ni Veiyalayalati Makawa baleta na soli ikatini.25 Sa yaco kina, mera vakalougatataki kina vakalevu o ira era saumi ikatini ena vuku ni nodra talairawarawa kina. Na itukutuku baleti Melikiseteki sa vakamatatataki ena ivolanikalou ni Veivakalesuimai.26 Na parofisai baleta na ititoko nei Josefa (na iVola i Momani) vata kei na ititoko nei Juta (na iVola Tabu) me rau sa daubau ga ena liga ni Kalou sa mai yaco.27

E vakamatatataka talega na Veivakalesuimai na ivolanikalou na Veiyalayalati Vou. Na itukutuku e baleta na papitaiso ena vukudra na mate sa kilai vakamatata sara.28 Na cakacaka vakalotu ni veisosomitaki baleti ira na noda qase era sa mate sa mai vakayacori tiko oqo ena 141 na valetabu e vuravura taucoko! E sega ni dua tale na sala mera vakabulai kina o ira na noda qase era a mate ka ra sega tu ni kila na kosipeli!29 Na raivotu nei Joni na Daunivakatakila baleta e “dua tani tale na agilosi sa [vuka voli] e na maliwa kei lomalagi kei vuravura, a sa taura na itukutuku vinaka e sega ni oti rawa, me vunautaka vei ira era sa tiko e vuravura,” e tukuna tiko na cakacaka nei agilosi Moronai kei na iVola i Momani.30

Na iVola i Momani sa iusutu ni Veivakalesuimai. E sa volai, maroroi, ka vakatetei ena veidusimaki ni Turaga. A vakadewataki ena “isolisoli kei na kaukauwa ni Kalou.”31 Na ivola ni Vunau kei na Veiyalayalati era umani tu kina e vuqa na ikuri ni ivakatakila a soli vei Parofita Josefa Simici. Eda sa ciqoma kina mai vua, e vuqa na ivolanikalou ni vakatauvatani kei na dua tale na parofita. Mai na nona vakasama sara vakayalomatua, a kaya kina vei ira na Yalododonu mai Nauvoo, e Illinois, “Au a sega ni bau kaya niu taucoko; ia e sega ni dua na cala ni veivakatakila au vakatavulica.”32

Sa nodra itavi vata, na lewenilotu kei ira na daukaulotu meda veisureti vei ira na tamata kecega mera kila na Kalou, o Jisu Karisito, kei na Nona kosipeli. Na tamata yadua e vakatataro tiko mena vakasaqara vagumatua ka masu ena yalodina me vakadeitaki vua ni sa dina na veika oqo. Na dina ena vakatakilai ga ena kaukauwa ni Yalo Tabu.33

Au sa vakavinavinaka vua na Kalou kei na Luvena, o Jisu Karisito, ena vuku ni Veivakalesuimai kei na kena kaukauwa me muataka yani ki liu e dua na ua cecere ni dina kei na ivalavala dodonu e vuravura taucoko. Meda sa ciqoma na ua oqo ka vakayacora na ivakaro ni Turaga meda kauta yani na kosipeli “ki na veimatanitu, veimataqali, duivosavosa kei ira na tamata,”34 Sa noqu masu oqo ena yaca i Jisu Karisito, emeni.