Txais tej Nthwv Dej

Cov kwv tij thiab cov muam, kuv ntxiv kuv lub suab rau Thawj Tswj Hwm Thomas S. Monson thiab lwm tus uas tau qhuas lawv cov uas tau txiav txim siab los mus ua tub txib qhia txoj moo zoo thaum tus yaj saub nqua hu kom ua li ntawd. Nim no muaj neeg coob heev uas zoo siab txog txoj kev qhia txoj moo zoo uas tshoob mus nyab lub ntiaj teb. Txij thaum Thawj Tswj Hwm Monson tshaj tawm txog txoj kev mus ua tub txib lub Kaum Hli Ntuj tas los no, txhiab txhiab tus tub hluas thiab ntxhais hluas, thiab khub niam txiv, tau raug hu mus ua tub txib, thiab coob tug tseem npaj mus.¹ Nim no peb muaj neeg nug peb hais tias, “Peb yuav ua li cas nrhiav chaw rau tag nrho cov tub txib no?” Lo lus teb yeej yooj yim hais. Lawv yuav ua tej yam uas cov tub txib ib txwm ua los lawm. Lawv yuav qhia txoj moo zoo! Lawv yuav foom koob hmoov rau Vajtswv cov me nyuam!

Thaum nej cov tub hluas ntxhais hluas yim rau rau siab ua neeg tsim nyog mus ua tub txib, nej yim yuav muaj lub siab xav mus ua tub txib thiab. Nej pom tej no ua ib nthwv dej ntawm qhov tseeb thiab qhov ncaj ncees. Nej pom nej lub cib fim kom caij nthwv dej ntawd.

Nej cov uas tiav nkauj tiav nraug lawm, cia li rau siab kawm tej kev qhia tshiab thiab nej ib leeg qhia ib leeg Yexus Khetos cov lus qhuab qhia. Nim no yog lub sij hawm npaj qhia lwm tus neeg txog Vajtswv lub siab zoo.

Cov tub hluas thiab ntxhais hluas es, qhov uas nej kawm txawj kawm ntse yeej tseem ceeb—rau peb, rau nej, thiab rau Vajtswv. Thaum twg ua tau, yog tias koj xav kawm ntawv qib siab tom qab koj mus ua tub txib rov qab los lawm, peb yaum kom nej sau npe kawm ntawv ntawm lub tsev kawm ntawv qib siab uas koj xaiv lawm ua ntej pib mus ua tub txib. Tej lub tsev kawm ntawv qib siab yuav cia cov tub ntxhais kawm ntawv uas yuav mus ua tub txib ncua lub sij hawm pib kawm ntawv ntev li 18 mus rau 30 lub hli. Ua li no yuav cia nej cov uas yog txwj laug thiab muam ua tub txib es tsis txhawj xeeb saib yuav pib nej tej kev kawm ntawv qib siab qhov twg. Peb xav hais lus ua tsaug rau cov thawj coj ntawm cov tsev kawm ntawv qib siab uas cia peb ua li no!

Nej cov uas yog niam txiv, kws qhia, thiab lwm tus neeg, txais nthwv dej thaum nej npaj peb tiam tub hluas ntxhais hluas no loj hlob tuaj ua neeg tsim nyog mus ua tub txib. Nej cov yam ntxwv yuav ua rau nej cov phooj ywg thiab cov neeg zej zog xav paub ntxiv txog nej lub neej. Npaj siab teb lawv cov lus nug saib yog vim li cas nej ua neej li nej ua. Npaj siab qhia yog vim li cas nej muaj kev cia siab ntau.² Thaum lawv nug nej li ntawd, nej teb tau hais tias, “Cia peb nug cov tub txib! Lawv yuav pab tau peb! Thiab yog tias nej xav, kuv yuav nyob ntawm nej ib sab thaum cov tub txib teb nej cov lus nug thiab qhia nej.”

Nej cov uas tiav niam tiav txiv, txais nthwv dej no es pab cov tub hluas ntxhais hluas uas yuav ua tub txib npaj ntawm sab ntsuj plig, lub cev, thiab nyiaj txiag. Nej yuav tau pab lawv xyaum txuag nyiaj. Nej cov uas yog khub niam txiv laus, npaj rau hnub uas nej yuav mus ua tau tub txib thiab. Peb yuav ris nej txiaj rau nej tej kev pab. Mus txog thaum ntawd, tej zaum nej ib txhia yuav xa tau me ntsis nyiaj mus ua tub txib thaum nej muab nyiaj pub rau Pawg Nyiaj Tseg rau cov Tub Txib, raws li Thawj Tswj Hwm Monson hais.³

Thiab tseem muaj ntau khub niam txiv uas txais nthwv dej mus ua thawj tswj hwm saib xyuas tej qhov chaw qhia txoj moo zoo ntawm lub Koom Txoos. Ua txoj hauj lwm ntawd, lawv yuav pab ntau tiam neeg txawm yog cov uas twb yug los thiab cov uas tseem yuav yug los. Cov thawj tswj hwm saib xyuas qhov chaw qhia txoj moo zoo tuav cov yawm sij saib xyuas thiab lav ris cov tub txib hauv lawv qhov chaw ntawd. Tom qab nrog tej ceg txheem ntseeg thawj tswj hwm hauv nws qhov chaw qhia txoj moo zoo, txhua tus thawj tswj hwm muab nws cov tub txib faib mus ua hauj lwm pab tej ceg txheem ntseeg, tej pawg ntseeg, thiab tej ceg ntseeg.

Tej thawj tswj hwm rau ceg txheem ntseeg thiab tej npisov txais nthwv dej thaum lawv siv sij hawm ntau dua xam phaj rau cov tub hluas ntxhais hluas uas xav mus ua tub txib. Cov thawj coj ntawm lub pov thawj hwj no tuav cov yawm sij ntawm txoj kev qhia txoj moo zoo hauv lawv tej pawg ntseeg thiab lawv txhib tau cov ntseeg los koom pab.

Cov kwv tij thiab cov muam uas koom pawg ntseeg pawg sab laj tab tom txais nthwv dej thiab. Pawg ntseeg tus neeg saib xyuas kev qhia txoj moo zoo koom pawg sab laj ntawd.⁴ Kuv xav hais lus rau nej txhua tus uas yog nej pawg ntseeg tus neeg saib xyuas kev qhia txoj moo zoo. Nej tus npis sov tau hu nej los coj tej hauj lwm qhia txoj moo zoo hauv pawg ntseeg. Thiab nej ib txhia ua tau zoo kawg npaum li tias tus npis sov tau hu ib tug pab nej khiav nej tej hauj lwm thiab. Ua ke nrog lwm tus neeg hauv pawg ntseeg pawg sab laj ntawd, nej nrhiav kom tau cov mej zeej uas tsis tshua tuaj mus tshawj, tej tsev neeg uas muaj ib co neeg uas tsis tuaj mus tshawj, thiab cov neeg zej zog uas txaus siab kawm txog lub koom txoos. Nej ntsib cov tub txib uas hauj lwm hauv nej lub cheeb tsam ntshawv ntshis. Nej pab cov tub txib thiab pab tawm tswv yim rau lawv. Thov pab cov tub txib muaj cib fim qhia neeg coob. Nov yog nej txoj kev lav ris. Nej lub luag hauj lwm yeej tseem ceeb rau txoj hauj lwm no. Yog tias nej muaj siab ntseeg txais nthwv dej, lwm tus neeg yuav txais thiab. Nej, ua pawg ntseeg ib tug neeg saib xyuas kev qhia txoj moo zoo, yog cov uas pab cov mej zeej thiab cov tub txib sib pab sib txuas lus hais txog tej hauj lwm dawb ceev no kom cawm tau Vajtswv cov me nyuam.⁵

Peb cov phooj ywg thiab cov neeg uas txaus siab kawm txog peb txoj kev ntseeg kuj txais tau nthwv dej no thiab. Peb yeej xav kom lawv ceev txhua yam uas zoo thiab muaj tseeb hauv lawv lub neej. Thiab peb caw lawv los txais tej yam ntxiv, twb yog qhov tseeb uas hais tias dhau ntawm Vajtswv txoj hau kev nyob mus ib txhis, tsev neeg nyob tau ua ke mus ib txhis li.⁶

Nthwv dej ntawm qhov tseeb thiab qhov kev ncaj ncees no yeej ua rau yus xav tsis thoob li! Nws tsis yog tib neeg tsim! Nws los ntawm tus Tswv los, uas hais tias, “Kuv yuav rawm maj ua kuv tej hauj lwm raws li kuv lub sij hawm.”⁷ Nthwv dej no muaj zog vim yog txoj kev tshaj tawm los saum ntuj los 193 xyoos dhau los lawm. Cov lus tshaj tawm no tsuas muaj xya lo lus xwb: “Nov yog Kuv Tib Leeg Tub uas Kuv Hlub. Mloog Nws!”⁸ Yog Vajtswv Huab Tais Ntuj hais, thiab cov lus tshaj tawm no qhia tus Tswv Yexus Khetos rau tus tub hluas Yauxej Xamiv. Xya lo lus ntawd txawm pib txoj Kev Txum Tim Nws txoj moo zoo rov qab los. Yog vim li cas? Vim peb tus Vajtswv yog ib tug Vajtswv uas hlub peb tiag! Nws xav kom Nws cov me nyuam paub Nws thiab Yexus Khetos, uas Vajtswv tau xa los! ⁹ Thiab Vajtswv xav kom Nws cov me nyuam txais kev tsis txawj tuag thiab lub neej nyob mus ib txhis!¹⁰

Kom ncav tau lub hom phiaj zoo kawg no, peb cov tub txib qhia txoj Kev Txum Tim txoj Moo Zoo Rov Qab Los. Cov tub txib paub hais tias kwv yees li 2,000 xyoo dhau los, tus Tswv txhim tsa Nws lub Koom Txoos. Tom qab Yexus raug ntsia saum ntoo khaub lig thiab Nws cov Thwj Tim tas sim neej, tib neeg hloov lub Koom Txoos thiab nws cov lus qhuab qhia. Ces, tom qab ntau tiam neeg uas nyob tsaus ntuj nti, thiab raws li cov yaj saub yav thaud tau qhia txog,¹¹ Leej Txiv Saum Ntuj Ceeb Tsheej thiab Yexus Khetos txum tim lub Koom Txoos, nws cov lus qhuab qhia, thiab nws lub pov thawj hwj rov qab los. Vim yog txoj kev Txum Tim txoj Moo Zoo Rov Qab Los, kev txawj ntse thiab tej kab ke tseem ceeb kom tau kev cawm seej thiab kev tsa nto muaj txawm peem rau tag nrho txhua leej txhia tus.¹² Thaum kawg, qhov kev tsa nto ntawd cia peb txhua tus nrog peb tsev neeg nyob ua ke rau ntawm Vajtswv thiab Yexus Khetos lub xub ntiag nyob mus ib txhis li!

Kuv hais tsis tau txog txoj kev Txum Tim txoj Moo Zoo Rov Qab Los siv ib lub suab yau yau. Qhov tseeb ntawm zaj liv xwm no yeej ua rau yus xav tsis thoob li tiag! Yeej yog ib qho zoo kawg! Yeej ua rau yus zoo siab heev! Yeej zoo kawg npaum li cas uas cov tim tswv saum ntuj tau nqis los muab txoj cai thiab lub hwj chim rau tej hauj lwm no?

Peb Leej Txiv Saum Ntuj Ceeb Tsheej thiab Yexus Khetos tau tshwm sim rau tus Yaj Saub Yauxej Xamiv ob peb zaug.¹³. Raws li nkawd txoj kev coj, lwm tus tim tswv saum ntuj tau nqis los, es txhua tus muaj ib lub ntsiab. Piv txwv hais tias:

• Tus tim tswv Maulaunais tau tshwm sim Phau Ntawv Maumoos.¹⁴

• Yauhas tus Muab Neeg Ua Kev Cai Raus Dej tau txum tim lub Pov Thawj Hwj Aloos rov qab los.¹⁵

• Petus, Yakanpaus, thiab Yauhas tau txum tim lub Pov Thawj Hwj Mekixedes rov qab los.¹⁶

• Mauxes muab cov yawm sij kom thiaj sau tau tsev neeg Ixayees rov qab los ua ke.¹⁷

• Eli-as muab cov yawm sij kom thiaj paub tau txog Anplaham.¹⁸

• Eliyas tau txum tim cov yawm sij ntawm txoj cai sib khi rov qab los.¹⁹

Tsis tas li ntawd, txoj kev Txum Tim txoj Moo Zoo Rov Qab Los ntxiv tej kev txawj ntse uas cov Ntseeg muaj yav thaum ub. Tus Tswv tau npaj ib phau vaj lug kub tshiab. Ntxiv rau phau Vaj Lug Kub Npaiv Npaum Nws ntxiv Phau Ntawv Maumoos: Ib zaj Lus Tim Khawv Ntxiv txog Yexus Khetos. Yog ib phau ceev xwm txheej hais txog cov lus qhia txog thiab tej kev qhia ntawm tus Tswv uas tau sawv rov los rau cov neeg uas nyob hauv teb chaws Amelikas yav thaud. Nws piav txog Vajtswv txoj kev zoo siab²⁰—txoj kev cawm seej.²¹ Phau Ntawv Maumoos yeej nrog Phau Npaiv Npaum sib phim sib raug zoo. Ob phau vaj lug kub no qhia qhov tseeb txog Yexus Khetos txoj moo zoo thiab saib yog vim li cas Nws txoj Kev Theej Txhoj thiaj tseem ceeb.²²

Kev Txum Tim txoj Moo Zoo Rov Qab Los ua tiav ntau zaj lus qhia txog qhov yuav muaj los yav tom ntej. Piv txwv hais tias, Yaxayas qhia tias tus Tswv lub tsev yuav raug txhim tsa saum lub roob.²³ Qhov uas cov pioneer Maumoos taug kev tuaj rau cov roob hauv Amelikas qhov chaw sab hnub poob no yog ib yam uas muaj los raws li cov lus uas Yaxayas hais ntawd. Yaxayas kuj qhia tias Vajtswv yuav ua “ib txoj hauj lwm tseem ceeb thiab xav tsis thoob.”²⁴ Peb cov tub txib tab tom ua tiav cov lus no thiab.

Cov lus qhia hauv Phau Qub hais txog kev them ib feem kaum tau rov qab los.²⁵ Vim yog li ntawd, cov ntseeg uas them ib feem kaum kuj tau koob hmoov vim yog lawv mloog lus. Cov lus hais txog Mekixedes yeej meej dua hauv cov vaj lug kub uas los ntawm qhov Txum Tim txoj Moo Zoo Rov Qab Los.²⁶ Cov lus qhia hais txog Yauxej phau (Phau Ntawv Maumoos) thiab Yudais phau (phau Npaiv Npaum) yuav los nyob ua ke hauv Vajtswv txhais tes twb muaj tiav lawm.²⁷

Qhov Kev Txum Tim txoj Moo Zoo Rov Qab Los kuj piav tej nqes lus vaj lug kub hauv Phau Tshiab zoo dua thiab. Nqes lus uas hais txog kev cai raus dej rau cov neeg tuag lawm peb to taub zoo dua niaj hnub nim no.²⁸ Nim no tej kab ke rau peb cov poj koob yawm txwv yog ua rau hauv 141 lub tuam tsev nyob thoob plaws lub ntiaj teb no! Tsis muaj lwm txoj kev uas yuav muab tau txoj kev cawm seej rau peb cov poj koob yawm txwv uas tas sim neej es tsis paub txog txoj moo zoo!²⁹ Qhov uas Yauhas tus Tshwm Sim ua yog toog pom “ib tug tim tswv ceeb tsheej ya saum nruab ntug, nws coj Txoj Moo Zoo uas nyob mus ib txhis los qhia rau tej neeg uas nyob thoob plaws hauv lub qab ntuj no,” qhia txog txoj hauj lwm ntawm tus tim tswv Maulaunais thiab Phau Ntawv Maumoos.³⁰

Phau Ntawv Maumoos yog lub plawv zeb ntawm qhov Txum Tim txoj Moo Zoo Rov Qab Los. Yog sau, tshwj tseg, thiab qhia tawm dhau los ntawm tus Tswv kev coj. Yog txhais “raws li lub txiaj ntsim thiab lub hwj chim ntawm Vajtswv.”³¹ Phau lus Qhuab Qhia thiab Kev Khi Lus yeej muaj ntau zaj lus tshwm sim ntxiv uas yog muab rau tus Yaj Saub Yauxej Xamiv. Dhau los ntawm tus yaj saub, peb tau txais ntau phab ntawv vaj lug kub, ntau dua lwm tus yaj saub. Tus yaj saub tau hais rau cov Ntseeg hauv Nauvoo, Illinois, hais tias, “Kuv yeej tsis qhia nej tias kuv zoo tag nrho; tiam sis tej kev tshwm sim uas kuv tau qhia nej yeej tsis muaj dab tsis uas tsis yog.”³²

Ua ke, cov mej zeej thiab cov tub txib caw txhua leej txhia tus kawm txog Vajtswv, Yexus Khetos, thiab Nws txoj moo zoo. Txhua tus neeg yuav tsum rau rau siab thov Vajtswv kom paub tseeb hais tias tej no muaj tseeb tiag. Tus Vaj Ntsuj Plig Dawb Huv lub hwj chim yuav qhia qhov tseeb rau nws.³³

Kuv ua Vajtswv thiab Nws Leej Tub, Yexus Khetos, tsaug rau Kev Txum Tim txoj Moo Zoo Rov Qab Los thiab qhov uas nws muaj lub hwj chim tshoob qhov tseeb thiab kev ncaj ncees mus caij nthwv dej mus thoob plaws ntiaj teb no. Thov kom peb txais nthwv dej no thiab ua raws li tus Tswv txoj lus txib kom coj txoj moo zoo mus rau “txhua teb chaws, tsev neeg, yam lus, thiab haiv neeg,”³⁴ Kuv thov los ntawm Yexus Khetos lub npe, amees.