Sruokyac Noa uh

Sel Elder Russell M. Nelson

Ke U luhn Mwet Sap Singucul Luo


Nga kuloh nuh sin God ac Wen Nahtuhl, Jisus Kraist, ke Fohlohkyak se ac kuh oasr kac in kahsruh tahfwelah ma pwacye ac suwohswohs wolacna fin facluh nohfohn.

Tamuhlwel ac tahmtahel sacohk an, nga wi fahk lal Prestuhn Thomas S. Monson ac mwet sahyac ke kaksyakihn elos suc ukwe pahng luhn mwet pahluh in puhseni misineri likina met ah. Ingena oasr engan yohk likina met ke orekma luhn misineri ma som nuh fin facluh nohfohn. Ke na mwe fahkwack se lal Prestuhn Monson ke Ohktohpa tari ah, tausin ke elder, tahmtahel, ac siyacnyacn pucspucs pahngonyuck, ac puhkantwen sahyac ahkolah in wi.1 Ingena kuht eis kihsen siyuck ma oacna, “Meac kowos ac oruh ke misineri nge nohfohn uh?” Top uh fihsrwacsr. Elos fah oruh ma misineri uh oruh pacl nuh kwewa. Elos ac fahkwack wosasuc! Elos fah ahkinsewowoye tuhlihk nuhtin God Kuhlwacna!

Puhs suwos mukul ac muhtwacn fuhsr fah sruokyac noa uh ke kowos srihke in nwacsnwacs ke pahng luhn misin. Kowos liye ma se inge oacna noa luhn ma pwacye ac suwohswohs. Kowos liye pacl wo lowos in suhpwaclihk ma pwacye ac suwohswohs uh.

Kowos mwet fuhsr, sruok mwe luti sasuc lowos ac luti sie sin sie ke mwe luti luhn Jisus Kraist. Ingena pa pacl lowos in ahkolah in luti sie sin sie ke ma wo luhn God.

Mukul ac muhtwacn fuhsr, lutlut lowos yohk srihpac nuh pwacye—nuh sesr, nuh suwos, ac nuh sin God. Kowos fin kuh, kowos fin luhngse wi college kuh university se tukun misin lowos, kuht kaifwe kowos in sang application lowos nuh ke lutlut ma kowos ke wi met liki kowos muhtwacwacack misin lowos. Lutlut luhlahp pucspucs kuh in sang sie pacl mwesahs ke lusen mahlwem 18 nuh ke 30 nuh sin mwet suc ke wi misin. Ma inge fah lwelah elder ac tahmtahel uh in kuhlwacnsap ac tiac enenuh in sensenkihn acn elos fah som in eis lutlut luhlahp tohkoh. Kuht kuhlohkihn na pwacye mwet kol luhn lutlut ma orwaclah ma inge in sikyak!

Kowos pahpah ninac an, mwet luti, ac mwet sahyac an, sruokyac noa an ke kowos ahkolah fihl sasuc nahtuhsr uh in nwacsnwacs in ahkolah nuh ke kuhlwacnsap luhn misineri. Ke pacl inge, srihkasrak wo lowos ac kuh in kahsruh kawuck ac mwet tuhlan lowos an. Ahkolah in sang top nuh selos suc siyuck ke ohiyac ma kowos moulkihn. Ahkolah in sang srihpac ke finsrak ac engan ma elos liye keiwos an.2 Ke kain kihsen siyuck inge tuhkuh, kowos kuh in topuk in fahk, “Lwelah kuht in siyuck sin misineri an! Elos kuh in kahsrwe kuht! Ac kowos fin luhngse, nga ac wi kowos ke pacl misineri uh topuk ac luti kom.”

Kowos mwet mahtuhyak an, sruokyac noa an in kahsruh ke ahkolah ip luhn nguhn, mahno, ac mani nuh ke misineri pacl fahsruh an. Kihnkihnis sacn sruhsrah uh nuh ke nien wihk sacn uh oruh ip se ke ahkpah lowos an. Kowos siacnyacn mahtuh an, plwacniyac ke lwen se kowos kuh in som wi misin lowos. Kuht ac sruikihn na pwacye kuhlwacnsap lowos an. Nuh ke pacl sacn, sahp kuhtuh suwos kuh in sang mani lowos nuh ke misin ke mwe sang nuh ke General Missionary Fund, oacna ke sifil pac fwackyuck sel Prestuhn Monson olutu uh. 3

Puhseni pihsen mukul sollac ac muhtwacn kiyaclos sruokyac noa an ke elos pahngonyuck in karihngihn misin ke Alu uh. Ke kuhlwacnsap sacn, elos fah orwaclah acn luhn fihl ingena ac pacl fahsruh uh. Misin prestuhn uh sruok ki luhn kunohkohn nuh ke kahsruh, loango ac orwaclah wo luhn misineri lalos. Tukun sramsram yurin prestuhn luhn stek kuh tistrik ke misin lal uh, kais sie prestuhn luhn misin an ac sulwaclah misineri in kuhlwacnsap ke stek, ward, ac pracns an.

Prestuhn luhn stek ac pisap luhn stek sruokyac noa an ke elos sang pacl yohk in kihsen siyuck in lohlngohki mwet soenna misineri an. Mwet kol ke pristut inge sruok ki ke kunohkohn nuh ke orekma luhn misineri ke unit lalos, ac elos mokle mempucr in wi.

Tamuhlwel ac tahmtahel ke kais sie kaunsucl luhn ward uh muhtwacwacack in sruokyac noa uh. Ke kaunsucl sacn pa mwet kol ke ward misin an.4 Nga ke sramsram nuh suwos mwet kol ke ward misin an. Kowos pahngonyuck sin pisap lowos in kol orekma luhn misineri ke ward an. Ac kuhtuh suwos oruh arlac wo mwet in kahsruh pahngonyuck in kahsrwe kowos. Wi mwet sahyac ke kaunsucl luhn ward an, kowos konwacack mempucr ma suhkwac alu lac, ip ke sucu pa mempucr, ac mwet tuhlan suc kena etuh kuhtuh ma kac. Kowos ohsun pacl pucspucs nuh sin misineri pacl nuh kwewa uh. Kowos sang kahs in kahsruh ac tahfuh misineri an. Nuhnak muhnahs kahsrwelos in nwacklah pacl lalos ke pacl wowo in lohacng ac luti. Pa inge ma kunowos an. Kunohkohn lowos uh yohk srihpac na pwacye nuh ke orekma inge. Kowos fin sruokyac noa an ke luhlahlfongi ac rahrah, mwet sahyac fah oruh pac. Kowos, mwet kol luhn misin luhn ward an, pa kuhpahsrse inmahsrlon mempucr ac misineri uh ke orekma muhtahl in molwelah tuhlihk nuhtin God.5

Kawuck ac mwet tuhlan lasr suc tiac wi luhlahlfongi lasr uh kuh pac in wi sruokyac noa an. Kuht ahkkweyaclos in karihngihn ma wo ac pwacye nuh kwewa ke moul lalos. Ac kuht suli elos in eis yohk liki met ah, yohk nuh ke ma pwacye wolacna ma tuhkuh ke plwacn in molwelah luhn God, sucu uh kuh in tuhkweni muhta ne tok ma pahtpaht. 6

Noa luhn ma pwacye ac suwohswohs se inge pa wo nuh pwacye! Tiac ma mwet orwaclah! Tuhkuh sin Leum, suc fahk lah El ac salkweack orekma Lal ke pacl Lal.7 Noa se inge eis kuh ke sulkackihn muhtahl se oreklac ke yac 193 somlah ah. Tuhkuh ke kahs ohnkohsr: Pa inge Wen Kuloh Nuhtihk. Lohngohl!8 Fahkwack sin God Kuhlwacna, suc fahkwack nuh sel Joseph Smith fuhsr ke Leum Jisus Kraist. Kahs ohnkohsr inge muhtwacwacack Fohlohkyak luhn wosasuc Lal. Efuh? Ke srihpen God suc moul pa God suc luhngse! El kena tuhlihk Nahtuhl in Etwacl ac Jisus Kraist, suc El suhpwacma! 9 Ac El kena tuhlihk Nahtuhl in eis moul ma pahtpaht Yohrohl!10

Ke srihpac wolacna se inge, misineri lasr uh luti ke Fohlohkyak sac. Elos etuh lah ke yac 2,000 somlah ah, Leum El akiyac Alu Lal. Tukun srihpsrihpyak Lal ac misac luhn Mwet Sap Lal, mwet uh ekuhllah Alu ac mwe luti uh. Na, tukun fihl pucspucs ke lohsr luhn nguhn, ac oacna palyeyuck sin mwet pahluh met ah,11 Pahpah Lucng ac Jisus Kraist fohlohkohnwack Alu uh, mwe luti kac uh, ac kuh ac wal luhn pristut. Ke srihpen Fohlohkyak sac, etwacack ac akwuck yohk srihpac nuh ke moul ma pahtpaht uh sifilpac oasr nuh sin mwet nuh kwewa.12 Na, mwe sang se inge lwelah kais sie sesr in muhta yurin sucu lasr ye muhtuhn God ac Jisus Kraist ne tok ma pahtpaht!

Nga tiac kuh in sramsram ke Fohlohkyak se ke puhsra upac. Ma pwacye ke sramsram mahtuh inge pa wo na pwacye! Sun na pwacye! Kahto na pwacye! Yac tiac wo na pwacye lah mwet utuck pweng inkuhsrao me sang kuh ac wal nuh ke orekma se inge?

Pahpah tuhmasr Inkuhsrao ac Jisus Kraist sikyang pacl pucspucs nuh sel Mwet Pahluh Joseph Smith.13 Ke kolyuck Lalos, mwet utuck pweng sahyac inkuhsrao uh tuhkuh, kais sie ke srihpac sefanna. Nuh ke mwe srihkasrak:

  1. Lihpufacn Moroni el ahkkahlwemye Puk luhn Mormon.14
  2. Jon Pacptais el fohlohkohnwack Aaronic Pristut.15
  3. Piter, Jemes, ac Jon el fohlohkohnwack Melchizedek Pristut.16
  4. Moses el sang ki nuh ke fahsrweni luhn Israel.17
  5. Elias el sang ki ke etuh kacl Abraham.18
  6. Elijah el fohlohkohnwack ki nuh ke kuh in siliyac.19

Oacyacpac, Fohlohkyak sac sang etwacack sahyac ma Mwet Luhlahlfongi met ah etuh kac. Leum El sang sie puk sasuc ke ma suhmuhslah. Nuh ke Pwacpuhl Muhtahl, El sang Puk luhn Mormon: Siepac Wuhlweacng ke Jisus Kraist. Pa ma sihmlac mahtuh ke palye ac orekma luhn Leum moulyak sac nuh sin mwet mahtuh fin acn Macrike. Ahkuhtweyac Plwacn in Engan luhn God20—plwacn in molwelah.21 Puk luhn Mormon pa suwohswohs nuh ke Pwacpuhl uh. Kwewana ma sihmlac muhtahl uh ahkkweye ma pwacye ke wosasuc luhn Jisus Kraist ac ma yohk srihpac ke Iwaclah Lal.22

Fohlohkyak sac ahkfalye palye pucspucs ke pwacpuhl uh. Nuh ke sie srihkasrak, Isaiah el palye lah lohm sin Leum fah akiyucki luhng ke finohl ah.23 Fuhfahsryucsr luhn payonir luhn Mormon nuh ke finohl fin acn rohtoh Macrike ahkfalyelah palye se inge ke kihsac ac luhlahlfongi. Isaiah el oacyacpac fahk lah God El fah oruh sie orekma wolacna ac usrnguck se.24 Ma inge ahkfalyeyucklac ingena ke orekma muhtahl luhn misineri lasr suc kalweni in kapkapwack uh.

Mwe luti ke Wuhlweacng Mahtuh ke sie tahfuh singucul uh fohlohkihnyuckyak.25 Ke srihpen ma inge, mwet suc moli sie tahfuh singucul yohk likina met ahkinsewowoyeyuck ke srihpen ahkostwen lalos. Ma sramsram ke Melchizedek ahksuwohsye ke ma suhmuhslah luhn Fohlohkyak sac.26 Palye lah sahk soko lal Joseph (Puk luhn Mormon) ac sahk soko luhn Judah (Pwacpuhl) ac fah orwacni nuh sie nuh in poun God ahkfalye tari.27

Fohlohkyak luhn Alu uh oacyacpac ahksuwohsye ma suhmuhslah ke Wuhlweacng Sasuc uh. Mwe kahsruh nuh ke pacptais luhn mwet misac fihsrwacsr in kahlwem ingena. 28 Akwuck nuh ke mwet misac lasr sikyak ke tempuhl 141 fin facluh nohfohn! Wacngihn ohiyac sahyac in sang molwelah nuh sin mwet mahtuh lasr suc misac ac nihkihn wosasuc an!29 Aruhrruhma lal Jon Mwet Fwackyuck ke “sie pac lihpufacn sohksohk infulwacn yen engyeng uh, eis sie wosasuc kawihl in luti mwet fin facluh,” sruhmuhnyuck ke misin lal lihpufacn Moroni ac Puk luhn Mormon.30

Puk luhn Mormon pa ma yohk srihpac emet ke Fohlohkyak luhn Alu uh. Sihmlac, karihngihnyuckyang, ac ituckyang nuh ke kolyuck luhn Leum. Luhngasyucklac ke mwe sang ac kuh luhn God.31 Puk ke Doctrine and Covenants nein fwackyuck sahyac pucspucs ma ituckyang nuh sel Mwet Pahluh Joseph Smith. Kacl me, kuht eis sra puk puhs ke ma suhmuhslah uh likina kuhtwena mwet pahluh sahyac uh. Ke sie pacl ma el nuhnkuh ac ahsor kuhtuh, el fahk nuh sin Mwet Luhlahlfongi fin acn Nauvoo, Illinois, “Nga tiacna fahk lah nga suwohswohs; tuhsruhktuh wacngihn ma stuhuh ke fwackyuck nga luti uh.”32

Tuhkweni, mempucr ac misineri uh suli mwet nuh kwewa in lutlut ke God, ac Jisus Kraist, ac ke wosasuc Lal. Kais sie mwet suc ke etuh enenuh in suk ke pruhe in eis mwe loh se ma ma inge pwacye uh. Ma pwacye uh kuh in ahkpwacyeiyuck ke kuh luhn Nguhn Muhtahl.33

Nga kuloh nuh sin God ac Wen Nahtuhl, Jisus Kraist, ke Fohlohkyak se ac kuh oasr kac in kahsruh tahfwelah ma pwacye ac suwohswohs wolacna fin facluh nohfohn. Lwelah kuht in sruokyac noa se inge ac ahkfalye masap luhn Leum in us wosasuc nuh ke “muhtuhnfacl, sucu, kahs, ac mwet nuh kwewa,”34 nga pruhe ke inen Jisus Kraist, amen.

Mostrar referencias

  1.  

    1. Liye Thomas S. Monson, “Welcome to Conference,” Ensign kuh Liahona, Nohfuhmpuh 2012, 4–5.

  2.  

    2. Liye1 Piter 3:15.

  3.  

    3. Liye Thomas S. Monson, “It’s Conference Once Again,” Ensign kuh Liahona, Mei 2011, 6.

  4.  

    4. Liye Handbook 2: Administering the Church (2010), 5.1.

  5.  

    5. Kuht kuloh nuh sin Mwet Luhlahlfongi suc suk pwacye in sun ma muhtahl. Elos srihke in muhtahl likina met ah. Elos suk “ma se met in muhsaheack tohkohsrahi luhn God, ac in akiyac suwohswohs lal” (Joseph Smith Translation, Matthew 6:38 [ke Mattu 6:33, mwe kahsruha]).

  6.  

    6. Liye “Families Can Be Together Forever,” Hymns, no. 300; ma sahyac kac oasr luhn Doctrine and Covenants 132:7, 19.

  7.  

    7. LiyeDoctrine and Covenants 88:73.

  8.  

    8. Joseph Smith—History 1:17.

  9.  

    9. Liye Jon 17:3.

  10.  

    10. Liye Moses 1:39.

  11.  

    11. Liye Mattu 17:11; Orekma 3:20–21; Met Efesus 1:10; 2 Nephi 30:8; Doctrine and Covenants 132:40, 45.

  12.  

    12. Liye3 Nephi 27:13–14, 21; Doctrine and Covenants 39:6; Ip Yohk ke Luhlahlfongi 1:4.

  13.  

    13. Liye Karl R. Anderson, The Savior in Kirtland (2012), 228–43.

  14.  

    14. Liye Doctrine and Covenants 27:5; liye pac Joseph Smith—History 1:33–34.

  15.  

    15. Liye Doctrine and Covenants 13.

  16.  

    16. Liye Doctrine and Covenants 20:2–3;27:12; 128:20; liye pac Larry C. Porter, “Dating the Restoration of the Melchizedek Priesthood,” Ensign, Jun 1979, 4–10.

  17.  

    17. LiyeDoctrine and Covenants 110:11.

  18.  

    18. Liye Doctrine and Covenants 110:12

  19.  

    19. Liye Doctrine and Covenants 110:13–16.

  20.  

    20. Liye Alma 42, yohk nuh ke fuhs 8.

  21.  

    21. Liye, nuh ke srihkasrak, Alma 12:28–30.

  22.  

    22. Liye, nuh ke mwe srihkasrak, 1 Mwet Korint 15:22; Alma 34:9.

  23.  

    23. Liye Isaia 2:2.

  24.  

    24. Isaia 29:14.

  25.  

    25. Liye Genesis 14:18–20; Malakai 3:8–10; Doctrine and Covenants 119–20.

  26.  

    26. Liye Genesis 14:18; Psalm 110:4; liye pac Alma 13:14–18; Doctrine and Covenants 84:14–22.

  27.  

    27. Liye Ezikiel 37:16, 19; Doctrine and Covenants 27:5.

  28.  

    28. Liye 1 Mwet Korint 15:29; Doctrine and Covenants 128.

  29.  

    29. Liye Doctrine and Covenants 137:7; 138:31–34.

  30.  

    30. Fwackyuck 14:6; liye pac Doctrine and Covenants 133:36–39.

  31.  

    31. Sifen Sra Puk ke Puk luhn Mormon, sihmlac sel Moroni; Doctrine and Covenants 135:3.

  32.  

    32. Teachings of Presidents of the Church: Joseph Smith (2007), 522.

  33.  

    33. Liye Moroni 10:4–5.

  34.  

    34. Fwackyuck 14:6; liye pac 1 Nephi 19:17; Doctrine and Covenants 133:37.