ການລາຍງານຂອງພະແນກກວດສອບບັນຊີຂອງສາດສະໜາຈັກ, ປີ 2012
ຮຽນ ຝ່າຍປະທານສູງສຸດຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ
ຮຽນ ເຈົ້າໜ້າທີ່ຊັ້ນຜູ້ໃຫຍ່: ດັ່ງທີ່ໄດ້ອະທິບາຍໄວ້ໂດຍການເປີດເຜີຍໃນພາກທີ 120 ຂອງ Doctrine and Covenants, ສະພາຈັດການເລື່ອງເງິນສ່ວນສິບມີອຳນາດໃນການໃຊ້ຈ່າຍເງິນທຶນຂອງສາດສະໜາຈັກ. ສະພານີ້ປະກອບດ້ວຍຝ່າຍປະທານສູງສຸດ, ສະພາອັກຄະສາວົກສິບສອງ, ແລະ ຝ່າຍອະທິການຄວບຄຸມ.
ສະພານີ້ຈະກຳນົດເງິນທຶນໃຫ້ພະແນກຕ່າງໆ, ການດຳເນີນງານຂອງສາດສະໜາຈັກ, ຕະຫລອດທັງໜ່ວຍດຳເນີນງານດ້ານສາດສະໜາທີ່ມີສ່ວນກ່ຽວຂ້ອງ. ພະແນກຕ່າງໆຂອງສາດສະໜາຈັກຈະອະນຸມັດການງົບປະມານສຳລັບການໃຊ້ຈ່າຍຕາມນະໂຍບາຍ ແລະ ລະບຽບປະຕິບັດການຂອງສາດສະໜາຈັກ.
ພະແນກກວດສອບບັນຊີຂອງສາດສະໜາຈັກໄດ້ຮັບອະນຸຍາດໃຫ້ກວດສອບບັນທຶກທຸກຢ່າງທີ່ຈຳເປັນເພື່ອປະເມີນການຄວບຄຸມລາຍໄດ້ ແລະ ລາຍຈ່າຍຂອງເງິນທຶນ ແລະ ປົກປ້ອງດູແລຊັບສິນຂອງສາດສະໜາຈັກ. ພະແນກກວດສອບບັນຊີເປັນໜ່ວຍທີ່ທຳງານຢ່າງອິດສະລະ ໂດຍບໍ່ຂຶ້ນຢູ່ກັບພະແນກ ຫລື ໜ່ວຍງານໃດຂອງສາດສະໜາຈັກ. ພະແນກກວດສອບບັນຊີປະກອບດ້ວຍນັກບັນຊີເອກະຊົນທີ່ມີໃບອະນຸຍາດ, ຜູ້ກວດສອບບັນຊີພາຍໃນທີ່ມີໃບອະນຸຍາດ, ຜູ້ກວດສອບບັນຂໍ້ມູນທີ່ມີໃບອະນຸຍາດ, ແລະ ເຈົ້າໜ້າທີ່ອື່ນໆລະດັບມືອາຊີບ.
ຕາມການດຳເນີນງານການກວດສອບ, ພະແນກກວດສອບບັນຊີລົງຄວາມເຫັນວ່າ ລາຍໄດ້ ແລະ ລາຍຈ່າຍເງິນບໍລິຈາກ ແລະ ການໃຊ້ຊັບສິນຂອງສາດສະໜາຈັກ ລະຫວ່າງປີ 2012 ໄດ້ຮັບການຈັດການ ແລະ ບັນທຶກຕາມແນວທາງທີ່ປະຕິບັດຕາມລະບົບບັນຊີ ທີ່ໄດ້ຮັບອະນຸມັດ ແລະ ຕາມນະໂຍບາຍ ແລະ ລະບຽບປະຕິບັດທີ່ສາດສະໜາຈັກກຳນົດໄວ້ທຸກປະການ.
ດ້ວຍຄວາມນັບຖືເປັນຢ່າງສູງ,
ພະແນກກວດສອບບັນຊີຂອງສາດສະໜາຈັກ
ຣໍເບີດ ດັບເບິນຢູ ແຄນແວວ
ຫົວໜ້າຜູ້ຈັດການ