Kam, Yufala Evriwan Ol Boe blong God

Tu taem evri yia, i luk olsem bigfala Konfrens Senta ia i stap talem long yumi, wetem voes blong hem blong pulum man: “Kam, yufala evriwan ol boe blong God we i bin kasem prishud.”¹ I gat wan spesel kaen spirit we i kavremap jeneral prishud miting blong Jos.

Tunaet, i gat plante taosen blong ol prishud truaot long wol we oli stap givim seves long Lod olsem ol misinari blong Hem. Olsem we mi bin talem long mesej blong mi long moning ia, naoia yumi gat ova 65,000 misinari long fil, wetem taosen moa we oli stap wet blong go insaed long misinari trening senta o we oli stap putum naoia aplikesen blong olgeta. Mifala i lavem mo presem olgeta we oli wantem mo oli glad tumas blong givim seves.

Insaed long ol tabu skripja, i no gat ofisol toktok we i moa stret, no gat responsabiliti we i nidim moa, no gat tijing we i moa stret bitim komanmen we Lod we i girap bakegen long ded i bin givim taem Hem i kamaot long Galili long ol leven disaepol. Hem i talem se:

“Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.

Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.”²

Tabu komanmen ia, wetem ol spesel promes blong hem, i olsem prinsipol blong yumi tedei semmak olsem long taem we Jisas i bin stap long wol. Misinari wok i wan mak ia nao we oli faenem long Jos blong Jisas Kraes blong Ol Lata-dei Sent. Oltaem i bin stap olsem, mo bae i stap olsem oltaem. Taem Profet Josef Smit i bin talemaot se: “Afta evri samting we oli bin talemaot, bigfala mo moa impoten diuti i blong prijim Gospel.”³

Blong 2 sot yia, evri fultaem misinari we oli stap stap long misin naoia long tabu ami blong God, bae oli endem ol wok blong olgeta mo bae oli gobak long ol hom mo long olgeta we oli lavem. Blong ol elda, olgeta we bae oli tekem ples blong olgeta, yumi save luk olgeta oli stap tunaet long grup blong ol Aronik Prishud blong Jos. Ol yang man. ?Yufala i rere blong ansa? ?Yufala i wantem wok? ?Yufala i rere blong givim seves?

Blong mekem gud, misinari wok i nidim wan blong mekem bigfala jenis long wei blong laef blong hem. I nidim plante aoa mo bigfala komitmen, sakrifaesem yuwan mo wan tru prea. Olsem wan risal, taem wan i komitim hem bigwan long misinari seves, hem i save kasem wan blesing blong wan glad we i no save finis, we i blong laef long wol ia mo long laef we i no save finis.

Jalenj blong kam ol wokman we i save mekem gud wok long plantesen blong Lod. Hemia i blong evriwan, nomata yu yang o olfala, mo i no blong olgeta nomo we oli rere blong stap olsem ol fultaem misinari, be komanmen ia i go long wanwan long yumi blong serem gospel blong Kraes.

Bae mi givim wan paten we bae i givim tru sakses blong yumi: nambawan, luklukgud insaed ol skripja wetem strong tingting; nambatu, mekem plan blong laef blong yu wetem wan stamba tingting (mo, bae mi ademap, mekem plan blong laef blong yu nomata hamas yia yu gat); nambatri, tijim trutok wetem testemoni; mo nambafo, givim seves long Lod wetem lav.

Bae yumi lukluk long wanwan long ol fo pat blong paten ia.

Faswan, luklukgud insaed ol skripja wetem strong tingting.

Ol skripja oli testifae abaot God mo oli ol toktok blong laef we i no save finis. Oli kam fandesen blong mesej blong yumi.

Impoten samting long Jos kurikulum, hem i ol tabu skripja, mo kurikulum ia oli joenem ol hadwok blong mekem i stret mo i go tugeta. Oli leftemap yumi tu blong stadi olgeta skripja evri dei yumiwan mo wetem famle blong yumi.

Bae mi givim wan refrens we yumi save yusum kwik long laef blong yumi. Long Buk blong Momon, long Alma japta 17, yumi ridim wan stori abaot glad blong Alma taem hem i bin luk bakegen ol boe blong Mosaea mo rekodem hamas oli stap strong long trutok. Rekod i talem long yumi se: “Oli bin kam strong long save blong trutok; from oli ol man blong wan stret haremsave mo oli bin stadi long ol skripja strong oltaem, blong oli save andastanem toktok blong God.

“Be i no hemia nomo; oli bin mekem plante prea, mo livim kakae; taswe oli bin gat spirit blong profesi, mo spirit blong revelesen, mo taem we oli bin tij, oli bin tij wetem paoa mo raet blong God.⁴

Ol brata. Luklukgud insaed long ol skripja wetem strong tingting.

Nambatu, folem step blong yumi: Mekem plan long laef blong yu wetem stamba tingting.

Ating i nogat jeneresen blong yut i bin eksperiensem ol longfala desisen olsem we ol yut blong tedei oli stap fesem. Oli mas rere from skul, misin, mo mared. Blong sam, oli gat ami seves.

Blong rere from wan misin, i stat eli. Wetem fasin blong rere long saed blong spirit, wan waes papa o mama bae i mekem evri wei blong wan yang boe i save statem wan misinari mane blong hemwan. Oli save leftemap tingting blong hem tu afta sam yia i pas blong stadi wan defren lanwis, mekem se, sapos i nidim, save blong hem long lanwis bae i save help. Long en, spesel dei i kam taem we bisop mo stek presiden i invaetem yang man ia blong kam visit. Oli jekem sapos hem i klin inaf; mo oli fulumap wan misinari rekomen.

I no gat wan nara taem long laef we ful famle i wari mo wet long man blong postofis, o leta ia we i kam long adres ia 47 Is Saot Tempol, Sol Lek Siti,Yuta. Leta i kam; Evriwan i stap kwaet mo wet; oli ridimaot misin kol. Plante taem ples we oli singaotem olgeta blong go i longwe long hom. Nomata long hemia, be ansa blong misinari ia we i rere gud mo stap obei i semmak nomo: “Bae mi givim seves.”

Oli stat blong rere blong hem i go. Ol yang man, mi hop yu glad long ol sakrifaes we ol papa mo mama blong yufala oli mekem wetem hat blong yu save go long misin. Ol wok blong olgeta bae i sastenem yu, fet blong olgeta i leftemap yu, prea blong olgeta bae i sapotem yu. Wan misin i wan bisnis blong famle. Nomata bae yu stap seperet long famle, from ol kantri mo bigfala solwota i seraotem yufala, ol hat i stap wan oltaem.

Ol brata. Taem yu plan wetem stamba tingting long laef blong yufala, tingbaot se janis blong yu olsem misinari i no blong 2 yia nomo. Blong yufala we i stap long ami, taem ia i yu save mekem misinari wok. Evri yia ol yang man blong yumi long yunifom, oli karem plante sol i kam long kingdom blong God taem oli givim ona long prishud blong olgeta, stap laef folem ol komanmen blong God, mo tijim ol tabu toktok blong Lod long ol nara man.

Yu no tingting nating long spesel janis we yu gat blong stap wan misinari taem yu stap gohed nomo long edukesen blong yu. Eksampol blong yu olsem wan Lata-dei Sent bae oli luklukgud, oli skelem, mo plante taem bae oli mekem i semmak long hem.

Ol brata. Nomata hamas yia yu gat, wanem situesen yu stap long hem, mi askem strong long yu blong mekem plan long laef blong yu wetem stamba tingting.

Nao, go stret long nambatri poen blong step blong yumi: tijim trutok wetem testemoni.

Obei long kaonsel blong Aposol Pita, we i talem se: “Oltaem yufala i mas rere blong givim wan ansa long evri man we i askem yu wan risen blong hop we i stap long yu.”⁵ Leftemap ol voes blong yufala mo testifae abaot hu i Godhed. Talemaot witnes blong yu abaot Buk blong Momon. Talemaot gudfala mo naesfala trutok we i stap insaed long plan blong sevem man.

Taem mi bin stap olsem wan misin presiden long Kanada bitim 50 yia i pas finis, wan yang misinari we i bin kam long wan smol, rurol komuniti, i bin sapraes long saes blong Toronto. Hem i bin wan sot man be testemoni blong hem i strong. I no longtaem afta we hem i bin kam, tugeta wetem kompanion blong hem, i bin visitim hom blong Elma Polad long Osawa, Ontario, Kanada. From hem i filim sore long tufala yang man we i bin stap muv long haos i go long nara haos long taem blong wan strong win, Mista Polad i bin invaetem tufala misinari i go long hom blong hem. Tufala i bin serem mesej blong tufala long hem. Hem i no bin filim spirit. Long en, hem i bin askem blong tufala i aot mo nomo kambak. Las toktok blong hem long ol elda taem tufala i stap livim haos, hem i jikim tufala se: “!Yutufala i no save talem long mi se yutufala i biliv se Josef Smit i bin wan profet blong God!”

Doa i sat wantaem. Ol elda i stap wokbaot folem rod blong haos. Kantri boe blong mifala ia i toktok long kompanion blong hem: “Elda, yumi no bin ansarem Mista Polad. Hem i se yumitu no bin bilivim se Josef Smit i bin wan tru profet. Yumitu gobak mo serem testemoni blong yumitu long hem.” Long fastaem misinari we i gat moa eksperiens i no filim tumas be afta i agri blong go wetem kompanion blong hem. Wetem fraet, tufala i stap go kolosap long doa we tufala i jes kamaot long hem nomo. Tufala i noknok, fesem Mista Polad, mo stanap smol taem wetem harem nogud, mo afta wetem paoa we hem i kam long Spirit, misinari ia we i nogat eksperiens i talem: “Mista Polad, yu bin talem se mitufala i no rili bilivim se Josef Smit i bin wan profet blong God. Mi testifae long yu se Josef i bin wan profet. Hem i bin transletem Buk blong Momon. Hem i bin luk God Papa mo Jisas we i Pikinini. Mi save hemia.”

Samtaem afta, Mista Polad, naoia we i Brata Polad, i bin stanap long wan prishud miting mo talem: “Long naet ia, mi no save silip. Biaen long sora blong mi, mi harem ol toktok ia, ‘Josef Smit i bin wan profet blong God. Mi save hemia. Mi save hemia.’ Long nekis dei, mi ringim ol misinari mo askem olgeta blong kambak. Mesej blong tufala tugeta wetem testemoni, i bin jenisim laef blong mi mo famle.” Ol brata. Tijim trutok wetem testemoni.

Las poen long step blong yumi i blong givim seves long Lod wetem lav. I no gat wan samting i save tekem ples blong lav. Ol nambawan misinari oli lavem ol kompanion blong olgeta, ol misin lida blong olgeta, mo ol spesel pipol we oli stap tijim. Long nambafo seksen blong Doktrin mo Ol Kavenan, Lod i putum ol kwaliti blong olgeta we oli wok long seves ia. Bae yumi luk long sam ves nomo

we i talem se yufala we i stat blong mekem wok blong God, yufala i mas luk se yufala i wok blong hem wetem ful hat, paoa blong tingting, maen mo paoa blong yufala, blong yufala i no gat rong taem bambae yufala i stanap long fored blong God long las dei. Se bae

fet, hop, mo bigfala hat mo lav, wetem wan ae we i lukluk nomo long glori blong God, bae i mekem yufala i inaf long wok ia.

Yufala i tingbaot blong gat fet, gud fasin, save, fasin blong kontrolem yufalawan, fasin blong save wet longtaem, kaen fasin long brata blong yufala, fasin olsem hemia blong god, bigfala hat, fasin blong gat tingting i stap daon, mo fasin blong wok strong wetem strong tingting.⁶

Yes, ating wanwan long yufala we i stap lisin long mi i stap askem hemwan kwestin ia: “?Tedei, mi mi gat fet, klin fasin, save, fasin olsem hemia blong god mo lav i kam antap o nogat?”

Nomata taem mo komitmen blong yu long hom o long nara ples, ol sol ia we yu helpem blong sevem, bae i save olgeta we yu lavem tumas.

Plante yia i pas finis, ol dia fren blong mi, Kreg Sadberi mo mama blong hem, Pel, i bin kam long ofis blong mi bifo Kreg i flae i go long Ostrelia Melben Misin. Mi luk se Fred Sadberi, papa blong Kreg, i no bin stap. Twantefaef yia bifo hemia, mama blong Kreg i bin maredem Fred, be hem i no bin serem lav blong hem abaot Jos mo hem i no bin wan memba.

Kreg i bin talemaot long mi dip mo bigfala lav blong hem long papa mo mama blong hem mo hop se, nomata hao mo long wan wei, bae Spirit i tajem papa blong hem blong hem i openem hat blong hem long gospel blong Jisas Kraes. Mi prea from insperesen long olsem wanem wan strong tingting olsem i save hapen. Insperesen ia i bin kam, mo mi talem long Kreg: “Givim seves long Lod wetem evri hat. Stap obei long ol tabu koling blong yu. Evri wik raetem wan leta long papa mo mama blong yu; mo wanwan taem, raet long papa blong yu hemwan, mo letem hem i save hamas yu lavem hem, o talem long hem from wanem yu glad blong stap olsem boe blong hem.” Hem i talem tangkyu long mi mo wetem mama blong hem tufala i aot long ofis.

Mi no bin luk mama blong Kreg blong 18 manis, taem hem i bin kambak long ofis blong mi, mo long toktok blong hem, hem i krae mo talem: “Hem i bin kolosap tu yia nao we Kreg i bin aot i go long misin. Hem i neva stop blong raetem leta long mifala evri wik. I no longtaem i pas, hasban blong mi, Fred, i bin stanap blong fastaem long wan testemoni miting mo i bin mekem mi sapraes mo evriwan we i bin stap long taem ia, mo anaonsem se hem i bin mekem desisen blong kam memba blong Jos. Hem i bin talem se bae mitufala i go long Ostrelia blong mitim Kreg long en blong misin blong hem, blong Fred i save kam las baptaes blong Kreg olsem wan fultaem misinari.”

I no gat wan misinari we i bin stanap antap olsem we Kreg Sadberi i bin mekem, taem we, longwe long Ostrelia, hem i bin helpem papa blong hem i go long wota we i kasem hip blong hem mo, i leftemap raet han blong hem long skwea, mo i ripitim ol tabu toktok ia: “Frederik Jals Sadberi. From Jisas Kraes i givim raet long mi, mi baptaesem yu long nem blong Papa, mo long nem blong Pikinini mo long nem blong Tabu Spirit.”

Lav i bin winim viktri blong hem. Givim seves long Lod wetem lav.

Ol brata. Bae wanwan long yumi i luklukgud insaed long ol skripja wetem strong tingting, mekem plan long laef blong yumi wetem stamba tingting, tijim trutok wetem testemoni, mo givim seves long Lod wetem lav.

Man blong Lukaot long ol sol, Man ia we i stret gud evriwan, misinari ia we pemaot sin blong evri man, i bin givim yumi tabu promes ia se

!sapos yumi stap wok evri dei blong laef blong yumi blong taltalemaot long ol pipol ia blong oli sakem sin, mo tekem wan sol nomo i kam long mi, bambae glad blong yumi i bigwan wetem hem insaed long kingdom blong Papa blong mi!

!Mo sapos glad blong yumi bae i bigwan wetem wan sol we yumi bin tekem i kam long Hem insaed long kingdom blong Papa blong Hem, bambae glad blong yumi i bigbigwan moa sapos yumi tekem plante sol i kam long Hem!⁷

Abaot Hem we i talem ol toktok ia, mi talem witnes blong mi: Hem i Pikinini blong God, Ridima blong yumi, mo Sevya blong yumi.

Mi prea se bae yumi oltaem ansa long kwaet invitesen ia: “Yu yu mas biaen long mi.”⁸ Long tabu nem blong Hem—we i nem blong Jisas Kraes we i Lod—amen.