2010–2019
“Mei er Ngak”
April 2013


“Mei er Ngak”

Ngokiu a tekingel me a okesiul, ea Kristo a mla chotii er kid el kmo kede mekerang e mo kmeed er Ngii.

Ng dmeu a renguk el teloi er kemiu er tial ongdibel er a Ikelesia er a Jesus Kristo er a Uriul-klebesei el Santo. Tia Ikelesia er Ngii. Kede nguu a Ngklel sel bo desiseb er a Rengedel. Ngii a Dios, Ulemeob, e klikiid. Kid a di chad me kede mora kodall e ruebet er a klengit. Eng di sel beltikelreng er Ngii el mei e rkid me a telungalek er kid, e Ngii a siotai er kid el mo kmeed er Ngii. Aikakid a Tekingel. Ng dilu el kmo bem keed er ngak me bo keed er kemiu; bol blak a rengmiu losiik er ngak me bo betik er ngak; molengit, me bo mngai; molengod me lobok a chesimer el kiriu.”1

Chelechal temel a Basqua e kede muklatk el kmo ngera uchul meng betik a rengud er Ngii me a yaksok el Ngii a tibir el mora re mui a klaumera er tir el mo Sechelil. A Osobel a rirellii tial yaksok e ulechotii er kid el kmo kede mekerang, a omesiou er kid el mor Ngii, e Ngii a mei er kid. A tara okesiul tiang a ngara ocholt el mora Oliver Cowdery er a losiou er a Rubak lobengkel a Profet Joseph Smith loleiuid er a Babier er a Mormon. A Rubak a dilu er a Oliver el kmo ng mla mengedecheduch er ngii el kirel a blakelreng er ngii. A Oliver a mle kirel loltirakl a tekingel a Rubak er a rengul. A Oliver a kirel mo oltirakl a llechul a Dios, me a Rubak a mo milii er a beltikelreng er Ngii.2

Ak mla oremii tial teletael er a mo kmeed er a Osobel me Ngii el me kmeed er ngak lokiu a mekekerei lomeruul er a blekongesenges er a llach.

Kemiu me ko mla oremii. Ng loch ikel taem el mullilt el mora miting er sacrament. Ng osisiu el mlei er ngak er a mle chedaol sils er a dirk kekerei. Seikid el taem ea ki mora sacrament a lekebesengei. A kudengelii er tiaikid el sils el kmeed el okolem me a eim el rak er a memong, er a kultirakl er a llach el mo teloi er a telungalek er ngak me a Resanto, a dirk okedak er a Osobel.

Ng mle milkolk e mekelkolt a iikr. Ak medengei lulmelchesiu el mekekeald er a chelsel a ikelesia er sel kesus lobengkel a telungalek er ngak. A ki millai er a sacrament, el mlekedmokl er a roba Priesthood er a Aaron, e tilbir lobengkel a Diak a Ulebengelel Chedam el mo blechoel melbedebek er a Ngelekel e oltirakl a Llechul.

A ulebongel er a miting ea ki milngitakl er a “Abide with Me; Tis Eventide,” me a tekoi er a chelsel el kmo: “O Savior, stay this night with me.”3

Ak mlo melchesuar a beltikelreng er a Osobel er tiaikid el kesus. Eak mlo melchesuar ongelodel Chedaol Reng.

Ng mle soak el muut el mo omekbeches er sel kulmelchesiu er ngii el beltikelreng er a Osobel me a sel kmeed er Ngii el kulchesuar tiaikid el temel a sacrament er a kngeasek. Me a kultirakl er a tara llach. Ak milsuub chedaol llechukl. Chelsel, eak mle medengei el kmo ng sebechek el mo melchesuar Chedaol Reng el di uai tirkel lultirakl er a mla mekiis el Rubak er a longer er a ongterir el mei er a rekeblirir e kiei lobengterir.

Ak milenguiu el kirel sel ongedei klebesei ruriul er a Omengerus me a omelakl er Ngii. A re mui er a klaumera el redil me a rebebil a mlei e metik er a bad el mla metitiai mo cheroid er a debull ea Bedengel a mle dibus. Te mle loba beltikelreng el mor Ngii e mengilt er a Bedengel.

A reteru el anghel a dilechor e uleker el kmo ngera uchul me te medakt, e kmo:

“Ngera me ko mosiik er a ngar er a delongelir a re mla mad?

“Ngii a diak el ngar tiang, ng mla mekiis: ko medengei er a lolekoi er kemiu er a mngara Galilee,

“El kmo, A Ngelekel a chad a modars el mora chimorir a remekngit el chad, e mo mekerus, ea ongedei er a klebesei eng mekiis.”4

Chelsel a hong er a Markus eng dochel a tekingel a ta er tirkel anghel: “Morael mong, e mosubed er a rechedal me a Petrus el kmo ng ma mo ruchei el mora Galilee: e seikid e ko mo mesang, el uaia ikel dilu er kemiu.”5

A re Apostol me a rultirakl er ngii a mle kldibel er a Jerusalem. Me kede locha osisiu, e tir a mle medakt e chadecheduch el melchedech el kirel a belkul a kodall me a ikel tekoi el kmo Ngii a mla mekiis.

Teru er a rechedal er sel kesus a mirrael er a rael el mlara Jerusalem el mora Emmaus. Ea mla mekiis el Kristo a duum er a tkul a rael e merael lobengterir. ARubak a mla me duum er tir.

A hong er a Lukas a ngoikid el merael lobengterir er sel kesus.

“Me tia, er a, lorael el chadecheduch, ea Jesus a mlo kmeed, e merael lobengterir.

“Eng di a mederir a mle urresorch meng dimlak lesang.

“Eng dula er tir el kmo, Ngera kom chadecheduch el kirel, el merael, e mekngit e rengmiu?

“Ea chimo er tir, el ngklel a Cleopas, a dula er ngii el kmo, Kau ke ngodech el chad el ngara Jerusalem, meng diak modengei el kmo ngera mla duubech?”6

Me te uchisa er Ngii el kmo ng mekngit a rengrir ele Jesus el tir a ulemera er Ngii el kmo ng mo Osobelel a Israel a mla mad.

Ng di locha mla er ngii a klengit el reng er ngika el mla mekiis el Rubak er a longedecheduch er tirkal teru el ngara klengitelreng el chedal.

“Meng dula er tir el kmo, Kemiu el mekebelung, el meoud el mo oumera er a rengmiu aikel lullekoi a reprofet:

“A Kristo ng diak el kirel mora ringel, me bol siseb er a klebkellel?

“Lulemuchel er a Moses me a rokui el profet, e nguluchais er tir a rokui el chedaol llechukl el mesaod el kirel.”7

E mocha er sel taem el kmeldii a renguk er a dirk kekerei el buik.

“Me te kmeda er a chelsel a beluu, el mo er sel borngii: e ngii a di melemolem el merael.

“Me te mocha melekoi er ngii, el kmo, Mkiei lobengkemam: ele ng milkelkang, e cheroid a tutau. Meng ngulbengterir el soisebang.”8

A Osobel a kilengei er a ongit er a roltirakl er Ngii el mo soiseb er a blirir el kmeed er a beluu er a Emmaus.

E ulemesoill lobengterir. Ngiluu a blauang, ulemekngeltengat er ngii, e millebtib er ngii, e ngiluu el mesterir. Me a mederir a ulebok me te mlo medengelii. E sola ng mlo dibus er mederir. A Lukas ouchais er kid aikel blo lomelchesiu tirkal ngeltengat el chedal: Me te mocha chadecheduch el kmo, A rengud ng dimlak bol mekekeald, er a longedecheduch er kid er a dorael mei, e losaod chedaol llechukl el mei er kid?”9

Osisiu el taem e tirkel teru el chedal a ulerreched el remurt el mora Jerusalem el mo ouchais er tirkel teruich me a ta el Apostol a mla duubech el mo er tir. Tiaikid ea Osobel a liluut el me duum er tir.

Ng liluut el smaod a ulaoch el kirel a Urerel el mo tenget el kirel a klengit er a rokui el ngelekel a Chedam e mo kodekedii a lechetel a kodall.

“E dula er tir el kmo, Ng llechukl, el Kristo a kirel mora ringel, e mo mekiis er a kodall er a ongedei el sils:

“Ea ouchel el reng me a ngbetel a klengit a kirel mo mosisechakl er a ngklel el mora rokui el beluu, lomuchel er a Jerusalem.

“E kemiu a sioning er a ikal tekoi.”10

Aika el tekingel Osobel a kmal klemerang el mei er kid el di uaia roltirakl er Ngii er sel taem. Kid a sioning er a ikal tekoi. Me sel klebokel el ngerachel el de kilengei er ngii er sera de metecholb el mora Ikelesia er a Jesus Kristo er a Uriul-klebesei el Santo el bleketakl el ledillii a profet Alma er a ngara mong el taem er a ralm er a Mormon:

“Meng dula er tir el kmo: Oi, tiakid a Ralm er a Mormon (le tia mle ngklel) me chelechang, el msemeriar el chedal a Dios, me bo mokedongall el chedal, el ngarngii er a rengmiu el mo mesebechakl er a ta me a tang er a berraod, me bol mekebekakl;

“Oi, e ngara klengitelreng lobengterir a re ngara klengitelreng; oi, e mengelim er a rechelmongel, e mo dechor el sioning er a Dios er a rokui el taem me a rokui el tekoi, er a rokui el basio el mngarngii, el mol muut er a kodall, me bom sobel er a Dios, e bo mucherangel er tirkel ngara kot el okiis er a kodall, me bo mnguu a diak a ulebengelel klengar—

“Me a kmu er kemiu, alsekum e tiaikid a kmal somiu, e ngera meng diak bo metecholb el ngara ngklel a Rubak, el sioning er medal el kmo ko mla soiseb er a telbiil lobengkel, me ko mo mesiou e oltirakl a llechul, me luchul e ngii lochebelii a Reng er ngii el mo obdois leko er kemiu?

“Me a rechad er a rengesa aikal tekoi, e te ulemrotech er a deureng, e uleldiu: Tiaikid a soal a rengmam.”11

Kid a ngar cheungel a telbiil el mo mesebechakl er a rengesool e mo sioning er a Osobel er tial klengar kid.

Ng mo sebeched el kudmeklii tiang e diak demeterob alsekum e kede melchesuar a beltikelreng el mora Osobel me a beltikelreng er Ngii el mei er kid. Me sel doltirakl a telbiil el bla deruul, e kede mo melchesuar a beltikelreng er kid el mo er Ngii ele kid el mo melchesuar a Klisichel e mo kmeed er kid sel dosiou er Ngii.

A President Thomas S. Monson a mla blechoel lomeklatk er kid er a yaksok er a Rubak el mora re mui er a klaumerang el chedal ngike el ngoikemiu, a dirrek el kbo er ngii, ele ak mo oeak medemiu. Ak mo ngara kadikm me a katur kemiu, ea Reng er ngak a mo ngara rengmiu, ea anghel er ngak a mo iiliuekl er kmeiu, el mesebechakl er kemiu.12

Ng dirrek el ngarngii a tara teletael el kau me ngak a mla melchesuar el merael me kmeed er kid. Sel le blak a rengud el mesiou er Ngii, e Ngii a mo kmeed er tirkel betik a rengud er tir el chedal a telungalek. Bek el taem el knguu okedong el mo mesiou er a Rubak er cheroid malechub ak mo cheroid er a telungalek er ngak, e ak mlo medengei ruriul el kmo a Rubak a ulemekngeltengat er a bechik me a rengelekek. Ngii a kudmekelterir a remesiungel me a techall el rulterir el mo kmeed er Ngii.

Kom dirrek el mla melcheuar osisiu el klengeltengat er a klengar kemiu. Betok er kemiu a ngarngii a rebetik er a rengrir el mla touchakl er a rael bedul a diak a ulebengelel klengar. Ke melchedech el kmo ngera lmuut el sebechiu el remuul el uchul ete lmuut el mei. Ng sebechiu lultuil er a Rubak el uchul e ko mo kmeed er tir sel mosiou er Ngii loba mui el klaumerang.

Ko medengelii a yaksok er a Rubak el mora Joseph Smith me a Sidney Rigdon er a le ngara cheroid er a telungalek el meruul a Urerel. A Rubak a dilu er a Sidney me a Joseph el kmo a telungalek er kemiu a ungil beserir; te ngara chereuel Chimal, e ak mo meruul aikal soak el mo er tir; le ngak olab a rokui el klisiich.13

Meng di uaia Alma me a King Mosiah, ea bebil er kemiu el blak a rengrir el mla mesiou er a Rubak el kmal kemanget e kmal ungil a ngarngii a rengelekiu el mla touchakl el diak el iior er a blakelreng er a rechedam me a rechedil mesiou er a Rubak. Te di uai kemiu, el riruul aikel rokui el sebechir, luldimukl a ngeso er a rebebil er a roubeltikelreng e blak a rengrir el chad.

A Alma me a Resanto a milluluuch el kirel a ngelekel me a rengelekel a King Mosiah, e a anghel a mle duum. A nglunguchiu me a nglunguchir tirkel lultuil er a klaumerang a mo uchul ea remesiungel a Rubak a mo ngosuterir a rechedal a telungalek er kemiu. Te mo ngosuterir el ngiltii a rael el mo remei er a Dios, luldimukl a le ngara odechelakl er a Diablong me a rechedal, el moktek er ngii a di melemall a telungalek er tial klengar me a diak a ulebengelel.

Ko medengei a tekingel a anghel el mora Kekerei el Alma me a rengelekel a Mosiah er a ultok le bla er ngii: “Me a, anghel a dula el kmo: Oi, a Rubak a mla remenges a nglunguchir a rechedal, me a nglunguchel a mesiungel, el Alma, el demam; le ng mla ngara nglunguuch el blak a rengul el kirem me bol sebechem el mo medengelii a klemrang; maleuaisei, e tiaikid a uchul eak merema dum lorrimel er kau el kirel a klisichel me a deruchellel a Dios, me a nglunguchel a remesiungel bol morrenges loltirkal er a klaumerang er tir.”14

A yaksok er ngak le ko er kemiu a re ngara nglunguuch e mesiou er a Rubak a diak el belkul a kmo ko mo ngmai a bek el klengeltengat el moureng el kiriu me a telungalek er kemiu. Eng di ng sebechek el yaksok er kemiu el kmo a Osobel a mo kmeed er kemiu e omekngeltengat er kemiu me a telungalek er kemiu er sel mo klungiaol. Ko mo nguu ongelaod er a beltikelreng er Ngii e melchesiu a nger er Ngii el me kmeed sel modars chimomiu lolngeseu er a rebebil. Me sel momkungil a tellemall er tirkel ngesool e modersii a mengikiid el Tngakireng er Ngii el mo er tirkel ngara klengitelreng er a klengit, ea klisichel a Rubak a mo melisiich er kemiu. A chimal a modars lobengkemiu sel mosebechakl e momekngeltengat er a rengelekel a Chedam er a Babeluades.

Ngarngii a klebokel lomengemedaol el kldmokl el kired. Seikid e kid a mo mesa sel yaksok er a Rubak el ngii a soad. Ngii a mo mengemaol er kid el mo soiseb er a diak a ulebengelel klengar Lobengkel me a Chedam er a Babeluades. A Jesus Kristo a smodii tiakid el teletael:

Mosiik el mo uchul a kedmeklel a Zion er Ngii. Moltirkal a llechuk er a chelsel a rokui el tekoi.

Ea lsekum e koltirakl a llechuk e outekangel el mora ulebongel, e ke mo nguu a diak a ulebengelel klengar, el ngii, a kot el ngarbab el sengk er a Dios.15

Le tirkel ngar a mo kiei er a beluulechad, e tirkel mla mad a mora ulengull er a urerir, ea urerir a di okiuellir; me te mo nguu a krone er a Chedam, el Jesus a mla kudmeklii el kirir.16

A kuchais el kmo ng sebeched lokiu Chedaol Reng loltirakl er a ongit er a Chedam er a Babeluades: “Ngika Betik er a renguk el Ngelekek. Mrengesii!”17

Ngokiu a tekingel me a okesiul, ea Kristo a mla chotii er kid el kmo kede mekerang e mo kmeed er Ngii. A bek el ngelekel a Chedam er a Babeluades el mla soiseb er a techolbechelid el mora Ikelesia er Ngii a mo er ngii a techellel el mosisechakl er a ebangkleio er Ngii a mo rongesterir a re mla mokedong el Mesiungel a Ongtil el “Mei er ngak.”18

A bek el mla soiseb er a telbiil el Mesiungel el ngara Rengedel er a beluulechad, me a belu er a redeleb, a mo nguu a ulekrael er Ngii sel lomekngeltengat er a rebebil el Kirel. E mo melchesuar a beltikelreng er Ngii, e metik er a deureng sel bol keed er Ngii.

Ngak a sioning er a Okiis er kodall er a Rubak el kmal di uaia tirkel teru el chedal er sel kesus er a lorael el mora Emmaus. Ak medengei el kmo Ngii a ngar el di ua tekingel a Joseph Smith er a lesa Chedam me a Ngalek er a llomes er sel dmiich el tutau er a delul a chereomel er a Palmyra.

Tiaikid a klemera el Ikelesia er a Jesus Kristo. Ng di kiis er a priesthood lolab a President Thomas S. Monson a klisiich el uchul e kid a mo moak el telungalek el mora ulebongel lobengkel a Chedam er a Babeluades me a Rubak el Jesus Kristo. Sel Sils er a Kerkeriil e kede mo dechor medal Osobel, el chachebangel. Ng mo taem er a deureng el mo er tirkel tir a mlo kmeed er Ngii er a omesiou el mo er Ngii er tial klengar el mo remenges aikal tekoi: “Ngungiang, kau el ungil e blak a rengum el mesiungek.”19Aika kdung ngak el sioning er a mla mekiis el Osobel e Olsobel er kid el ngara ngklel a Jesus Kristo, amen.