« E haere mai outou Ia’u nei »

Te oaoa nei au ia tae mai i rotopu ia outou i roto i teie amuiraa a Te Ekalesia a Iesu Mesia i te Feia Mo‘a i te Mau Mahana Hopea Nei. Teie Ta’na Ekalesia. Te rave nei tatou i To’na i‘oa i ni‘a iho ia tatou ia tomo ana‘e tatou i roto i To’na basileia. Oia te Atua, te Rahu Nui, e ua maitai roa Oia. E taata tahuti tatou, e pohe e e hara. E na roto i To’na here ia tatou e i to tatou mau utuafare, ua ani mai Oia ia tatou ia vai noa i piha‘i iho ia’na. Teie Ta’na parau: « A haafatata mai ia’u nei e haafatata atu ïa vau ia outou na ; a imi itoito noa mai ia’u nei e e ite mai hoi outou ia’u, a ani mai, e e farii ïa outou ; a patoto mai e e iritihia’tu ïa ia outou na ».¹

I teie pu‘e tau Pasa te faahaamana‘ohia nei ia tatou e, no te aha tatou e here ai Ia’na, e i te fafauraa Ta’na i fafau mai i Ta’na mau pĭpĭ haapa‘o maitai ia riro ei mau hoa herehia e A’na. Ua fafau mai te Faaora i taua fafauraa ra e ua parau mai e nahea Oia ia haere mai ia tatou nei, ia tavini ana‘e tatou Ia’na. Te vai ra hoê hi‘oraa i roto i te hoê heheuraa ia Olive Kaudere a tavini ai oia i te Fatu i piha‘i iho i te peropheta Iosepha Semita i roto i te iritiraa i te Buka a Moromona : « Inaha, o Olive oe, e no to oe mau hinaaro i parau atu ai au ia oe ; no reira a haaputu maite i teie nei parau i roto i to oe na aau. A haapao maitai e a faaitoito hoi i te haapaoraa i te mau faaueraa a te Atua, e e faaati au ia oe i na rima o to’u nei here ».²

Pinepine roa vau i te ite i te oaoa o te haafatataraa i piha‘i iho i te Faaora e To’na haafatataraa mai ia’u na roto i te mau ohipa rii ha‘iha‘i o te haapa‘oraa i te mau faaueraa.

Ua farii outou i taua huru iteraa ra. Peneia‘e i te taime a faaoti ai outou e haere i te hoê pureraa oro‘a. No’u nei, ua tupu te reira i te hoê Sabati i te tau e mea apî roa â vau. I taua tau ra, e ravehia te oro‘a i roto i te hoê pureraa i te ahiahi. Ia haamana‘o ana‘e au i te hoê mahana hau i te 65 matahiti i ma’iri ra, a haapa‘o ai au i te faaueraa ia haaputuputu e to’u utuafare e te Feia Mo‘a, e haafatata roa te reira ia’u i te Faaora.

E mea pouri e te to‘eto‘e i rapae. Te haamana‘o nei au e, ua ite au i te maramarama e te mahanahana i roto i te fare pureraa i taua ahiahi ra i piha‘i iho i to’u na metua. Ua rave matou i te oro‘a mo‘a tei haamaitaihia e to te Autahu‘araa a Aarona, ma te fafau i to tatou Metua i te Ao ra ia haamana‘o noa i Ta’na Tamaiti e ia haapa‘o i Ta’na mau faaueraa.

I te hopea o te pureraa ua himene matou i te himene ra « E ia’u nei to’u Atua e », e teie mau parau i roto ra, « Ei ia’u nei e te Fatu ».³

Ua ite au i te here e te fatata o te Faaora i taua ahiahi ra. E ua ite au i te tamahanahana a te Varua Maitai.

Ua hinaaro vau e faaiho faahou mai i te here o te Faaora e To’na piri ia’u, ta’u i ite i roto i taua pureraa oro‘a ra i roto i to’u taure‘are‘araa. No reira, aita i maoro a‘enei, ua haapa‘o vau i te tahi atu faaueraa. Ua imi au i te parau i papa‘ihia. I roto i te reira, ua itehia ia’u e, e nehenehe ta te Varua Maitai e faaite faahou mai ia’u i te mana‘o tei fariihia e na pĭpĭ e piti a te Fatu ti‘a faahou, i te taime a farii ai Oia i ta ratou titauraa ia haere mai i roto i to ratou fare e ia parahi i piha‘i iho ia ratou.

Ua tai‘o vau i te mau parau no te toru o te mahana i muri a‘e i To’na faasatauroraahia e te hunaraahia. Ua ite atura te tahi mau vahine faaroo i te ofa‘i ua faataa-ê-hia i te menema, e aita atoa To’na tino i reira. No to ratou here Ia’na i haere mai ai ratou e faatahinu i To’na tino.

Te ti‘a noa ra e piti na melahi i reira e ua ani maira eaha ratou i măta‘u ai, e na ô maira :

« Eaha outou i imi ai i tei ora i te vairaa o te pohe ?

« Aore oia i ŏ nei, ua tia ïa i nia ; a haamana‘o i ta’na i parau mai ia outou ia’na i parahi i Galilea ra,

« A na ô mai ai ra e, E tuuhia te Tamaiti a te taata nei i te rima o te feia rave hara, e faasataurohia, e e tia faahou ia tae i te rui toru ra ».⁴

Te parau faahou nei te Evanelia a Mareko no te parau faaite a te hoê o na melahi : « E haere râ outou e parau atu i ta’na mau pĭpĭ e ia Petero, e te na mua ra oia ia outou i te haere i Galilea, ei reira outou e ite ai ia’na, ta’na i parau mai ia outou na ».⁵

Ua putuputu te mau Aposetolo e te mau pĭpĭ i Ierusalema. E mai ia tatou atoa, ua măta‘u e ua maere ratou, a tau‘aparau ai ratou i te auraa no te pohe e te mau parau faaite no To’na ti‘afaahouraa.

E piti na pĭpĭ na Ierusalema mai te haere na ni‘a i te purumu no Emausa i taua avatea ra. Ua fâ maira te Mesia ti‘a faahou i ni‘a i te purumu e ua haere atura na muri iho ia raua. Ua haere mai te Fatu ia raua ra.

Te farii nei te buka a Luka ia haere tatou na muri iho ia ratou i taua ahiahi ra :

« E te paraparau noa ra raua, e te feruri noa ra raua raua iho, ua taati atoa maira Iesu ia raua, haere atoa’tu ra ratou.

« Ua faaorehia râ te ite i to raua mata, aita’tura raua i ite ia’na.

« Ua parau maira oia ia raua, eaha tena na parau ta orua i paraparau noa na ma te mata huru oto ?

« Ua parau atura te hoê o raua ra ia’na o Keleopa te i‘oa na ô atura, O oe ana‘e na paha te taata ê i Ierusalema nei aore i ite i te mau mea i tupu i reira i teie nei pue mahana ? »⁶

Ua faaite atura raua i to raua pe‘ape‘a i te mea e, ua pohe Iesu i te taime hoi a ti‘aturi ai ratou e, e riro Oia ei Faaora no Iseraela.

E mea papû e, e reo here to te Fatu ti‘a faahou a paraparau atu ai Oia i teie na pĭpĭ pe‘ape‘a e te oto hoi :

« Ua parau maira oia ia raua, auê ia pue taata mana‘o ore e, e te faaroo taiata i tei hope i te parauhia mai e te mau peropheta ra e !

« E ere anei ia na reirahia to te Mesia pohe e tia’i, a reva’tu ai i to’na ra ao ?

« Ua faaite maira oia ia raua i te auraa i te mau parau atoa i papaihia ra, mai ia Mose mai â e tae roa a‘era i te mau peropheta atoa ».⁷

E ua tae maira te hoê taime tei haamahanahana i to’u aau mai to’u tamariirii-raa mai â :

« E fatata maira ia raua taua oire haerehia e raua ra, ua faahua haere roâ oia.

« Tapea atura râ raua ia’na, na ô atura, e faaea na tatou ; ua huru ahiahi hoi, ua mure te mahana. Haere atura oia i roto e parahi atoa ratou ».⁸

Ua farii te Faaora i taua pô ra i te aniraa manihini ia tomo i roto i te fare o to’na na pĭpĭ i piha‘i iho i te oire iti no Emausa.

Tei te amuraa maa Oia e o ratou atoa ra. Rave ihora Oia i te faraoa, haamaitai ihora, vavahi ihora, e horo‘a’tura ia ratou ra. Ua araara to ratou mata i ite ai ratou Ia’na. E i muri iho, mo‘e atura Oia. Ua papa‘i o Luka no tatou i te mau mana‘o o taua mau pĭpĭ haamaitaihia ra : « Ua parau ihora raua raua iho, e ere, e hoa, i anaanatae to tâua aau ia’na i paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra ? »⁹

I taua iho hora ra, horo atura na pĭpĭ i Ierusalema no te faaite i na Aposetolo hoê ahuru e ma hoê i te ohipa tei tupu i ni‘a ia raua. I taua taime ra, fâ faahou mai nei te Faaora.

Ua hi‘o faahou a‘era Oia i te mau parau tohu no Ta’na misioni ia pohe ei taraehara no te hara a te mau tamarii taatoa a To’na Metua e ia ofati i te tapea o te pohe.

« Ua na ô maira oia ia ratou, i na reirahia taua parau ra i te papai, e ia na reirahia to te Mesia pohe e tia’i, e ia tia faahou mai te pohe mai i te rui toru :

« e ia poro-haere-hia te tatarahapa e te faaoreraa i te hara i to’na ra i‘oa, na Ierusalema’tu nei â, e ati noa‘e te mau fenua atoa e tia’i.

« E teie nei, ei ite outou i teie nei mau parau ».¹⁰

E parau mau te mau parau a te Faaora no tatou mai tei To’na ra mau pĭpĭ. Te ite nei tatou i teie mau mea. E te ohipa hanahana ta tatou i farii a bapetizohia ai tatou i roto i Te Ekalesia a Iesu Mesia i te Feia Mo‘a i te Mau Mahana Hopea Nei, ua haapapû-maitai-hia mai ïa ia tatou na te peropheta Alama e râ ê te tau, i te pae pape no Moromona ra :

« E ua parau atura oia ia ratou e, inaha, tei ŏ nei te pape o Moromona ; (ua parauhia hoi te pape ra i te reira i‘oa). E teie nei, no te mea ua hinaaro outou ia ô i te aua o te Atua, e ia parauhia i to’na ra mau taata, e ua hinaaro outou ia tauturu te tahi i te tahi i te hopoi i ta outou mau hopoia, ia mâmâ te reira ;

« Oia ïa, ua au ia outou ia oto, a oto ai te feia oto ra ; oia ïa, e ia haanahanahana ia ratou i tei au ia haamahanahanahia ra, e ia tia ei ite o te Atua i te mau mahana atoa, e i te mau mea atoa, e i roto i te mau vahi atoa ta outou e parahi ra, e ia amuihia i roto i to te tia-faahou-raa matamua, ia noaa te ora mure ore ia outou—

« E teie nei, te parau atu nei au ia outou e, mai te mea i hinaarohia teie e to outou aau, eaha te mea e ore e au ai ia outou ia bapetizohia i te i‘oa o te Fatu ei faaite i mua ia’na e, i faaau outou i te hoe faufaa ia’na ra, ia haamori atu outou ia’na, e ia haapao i ta’na ra mau faaue, ia rahi atu ta’na niniiraa mai i tona Varua i nia ia outou ?

E teie nei, ia faaroo a‘era te feia i teie nei mau parau, ua paipai ihora ratou i to ratou rima i te oaoa, e ua tiaoro maira ratou, o te hinaaro teie o to matou aau ».¹¹

Tei raro a‘e tatou i te fafauraa ia faati‘a i tei nava‘i ore e ia riro ei mau ite no te Faaora a ora noa ai tatou.

E ti‘a ia tatou ia rave i te reira ma te maitai mai te mea noa e, e here tatou i te Faaora e e here mai Oia ia tatou. Mai te mea e, e haapa‘o maitai tatou i te mau fafauraa ta tatou i rave, e ite tatou i to tatou here Ia’na. E tupu te reira i te rahi no te mea, e ite tatou i To’na mana e To’na haafatataraa mai ia tatou ia rave ana‘e tatou i Ta’na ohipa.

Ua faahaamana‘o pinepine mai te peresideni Thomas S. Monson ia tatou i te fafauraa a te Fatu i Ta’na mau pĭpĭ haapa‘o maitai : « E o oia o te farii mai ia outou na, ei reira atoa ïa vau, no te mea e haere au na mua i to outou mata. E vai hoi au i to outou pae atau e i to outou pae aui, e ei roto hoi to’u Varua i to outou mau aau, e ta’u mau melahi hoi e ati noa‘e ia outou na, ia haamaraa mai ia outou i nia ».¹²

Te vai ra te tahi atu rave‘a ua ite outou e o vau atoa nei Ia’na i te tupu-fatata-raa mai i piha‘i iho ia tatou. Mai te mea e, e rave maite tatou i Ta’na ohipa, e haafatata Oia i piha‘i iho i te feia ta tatou i here i roto i to tatou utuafare. I te mau taime atoa a piihia ai au i roto i te ohipa a te Fatu ia tere e aore râ, ia faaru‘e i to’u utuafare, ua ite au e, ua haamaitai te Fatu i ta’u vahine e i ta’u mau tamarii. Ua faaineine Oia i te mau tavini maitai Na’na e i te mau rave‘a no te haafatata i to’u utuafare Ia’na ra.

Ua ite atoa outou i te reira mau haamaitairaa i roto i to outou oraraa. E rave rahi outou te vai nei te mau taata ta outou i here o te overe haere nei na rapae i te e‘a o te ora mure ore. Te uiui nei outou e, eaha’tu â te ti‘a ia’u ia rave no te faaho‘i mai ia ratou. E nehenehe ta outou e turu‘i i ni‘a i te Fatu no te haafatata atu ia ratou a tavini ai outou Ia’na ma te faaroo.

Te haamana‘o ra outou i te fafauraa a te Fatu ia Iosepha Semita e ia Sideney Rigdon, i te taime tei te atea ê raua i to raua utuafare no te rave i Ta’na ohipa : « O ta’u na hoa ra o Sidene e o Iosepha, te ora maitai nei to orua na utuafare ; tei roto ratou i to’u pue rima, e na’u ïa e haapao ia ratou mai te au i te mana‘o i roto ia’u nei ; no te mea tei roto ia’u nei te mana atoa ».¹³

Mai ia Alama e te Arii Mosia, ua tavini maoro te tahi mau metua haapa‘o maitai i te Fatu ma te maitai, e noa’tu râ, e tamarii ta ratou tei hahi ê, noa’tu te faatusiaraa a to ratou mau metua i te Fatu. Ua rave ratou i te mau mea atoa e ti‘a ia ratou ia rave, e aita e haavareraa, ma te tauturu-atoa-hia mai e te tahi atu mau hoa here e te maitai.

Ua pure Alama e te Feia Mo‘a i to’na tau ra no ta’na tamaiti e no te mau tamaiti a te Arii Mosia. E ua tae mai te hoê melahi. Na ta outou mau pure e te pure a te feia e faaohipa nei i to ratou faaroo, e arata‘i mai i te mau tavini o te Fatu no te tauturu i te mau melo o to outou utuafare. E tauturu ratou i ta outou mau tamarii ia ma’iti ia ho‘i mai i te Atua ra, noa’tu e, ua haru satane e to’na mau tauturu ia ratou, inaha, ta’na opuaraa o te haamou ïa i te utuafare i roto i teie oraraa e i roto i te tau a muri atu.

Te haamana‘o ra outou i te mau parau i faahitihia e te melahi i ni‘a ia Alama Tamaiti e i ni‘a i te mau tamaiti a Mosia i roto i to ratou orurehau : « Ua parau faahou maira te melahi, na o maira, Inaha, ua faaroo a‘enei te Fatu ra i te pure a to’na ra mau taata, e te mau pure hoi a to’na ra tavini a Alama, to oe ra metua ; e ua pure hoi oia ia oe ma te faaroo rahi, ia arataihia oe i te ite i te parau mau : e no reira i haere mai ai au e faaite atu ia oe na i te mana e te puai o te Atua ra, ia faatiahia te pure a to’na ra mau tavini mai te au i to ratou ra faaroo ».¹⁴

Ta’u fafauraa ia outou o te pure nei e o te tavini nei i te Fatu, e ere ïa e, e farii outou i te mau haamaitairaa ta outou e hinaaro nei no outou iho e no to outou utuafare. E nehenehe râ ta’u e fafau atu ia outou e, e haafatata mai te Faaora ia outou, e e haamaitai mai ia outou e i to outou utuafare i te mea maitai a‘e. E roaa ia outou te marû o To’na here, e e haafatata mai Oia ia outou ei pahonoraa i ta outou mau pure, mai te mea e, e faatoro outou i to outou rima no te tavini ia vetahi ê. Mai te mea e, e tapiri outou i te mau puta o te feia nava‘i ore, e e pûpû i te tamaraa o Ta’na Taraehara i te feia e oto nei no ta ratou hara, e paturu mai te mana o te Fatu ia outou. Te toro mai nei To’na na rima e to outou no te tauturu e no te haamaitai i te mau tamarii a to tatou Metua i te Ao ra, tera atoa i roto i to outou utuafare.

E ho‘iraa hanahana tei faaineinehia no tatou. Ei reira tatou e ite ai i te tupuraa o te fafauraa a te Fatu ta tatou i here. Na’na e farii mai ia tatou i roto i te ora mure ore i piha‘i iho Ia’na e i to tatou Metua i te Ao ra. Teie te faaiteraa a Iesu Mesia no te reira :

« A imi i te mau ravea no te faatupuraa e no te haamauraa i ta’u Ziona. A haapao i ta’u mau faaueraa no nia i te mau mea atoa ra.

« E, mai te mea e haapao oe i ta’u mau faaueraa e e itoito noa e tae noa’tu i te hopea e noaa ïa ia oe te ora mure ore, o te horoa hau a‘e te reira i te mau horoa atoa a te Atua ».¹⁵

« No te mea o ratou atoa o te ora ra no ratou ïa te fenua nei, e o ratou atoa ra o te pohe ra e faaea ïa ratou i ta ratou mau ohipa atoa, e e pee mai ta ratou mau ohipa ia ratou ra ; e e farii ratou i te hoe korono i roto i te mau aorai o to’u Metua ra, o ta’u i faaineine no ratou ra ».¹⁶

Te faaite nei au e, na roto i te Varua, e nehenehe ta tatou e pee i te aniraa manihini a te Metua i te Ao ra : « O Ta’u Tamaiti Here teie. A faaroo Ia’na ! »¹⁷

Na roto i Ta’na mau parau e To’na hi‘oraa maitai, ua faaite mai te Mesia ia tatou nahea ia haafatata i piha‘i iho Ia’na. Te mau tamarii atoa a te Metua i te Ao ra tei ma’iti e tomo na roto i te uputa o te bapetizoraa i roto i Ta’na Ekalesia, e farii ïa ratou i te rave‘a i roto i teie oraraa ia haapiihia i Ta’na evanelia e ia faaroo, na roto mai i To’na mau tavini ma’itihia, i Ta’na aniraa manihini e, « E haere mai outou ia’u nei ».¹⁸

E farii te mau tavini fafauhia Na’na ra i roto i To’na basileia, i ni‘a i te fenua nei e i roto i te ao varua, i Ta’na arata‘iraa na roto i te Varua a haamaitai ai ratou e a tavini ai ratou ia vetahi ê No’na ra. E e farii ratou i To’na here, e i te oaoa i te haafatataraa’tu Ia’na ra.

E ite au no te Ti‘a-faahou-raa o te Fatu mai te huru e, tei reira vau i te ahiahi i piha‘i iho i na pĭpĭ toopiti i roto i te fare i ni‘a i te e‘a no Emausa. Ua ite au e, te ora nei Oia mai ia Iosepha Semita atoa i ite na, a ite atu ai oia i te Metua e te Tamaiti i roto i te maramarama o te hoê po‘ipo‘i anaana i roto i te hoê uru raau i Palmyra.

Teie te Ekalesia mau na Iesu Mesia. Tei roto ana‘e i te mau taviri autahu‘araa tei mauhia e te peresideni Thomas S. Monson, i vai ai te mana ia taatihia tatou i roto i te utuafare no te ora e a muri noa’tu i piha‘i iho i to tatou Metua i te Ao ra e i te Fatu ia Iesu Mesia. Ia tae i te mahana haavâraa, e ti‘a’tu tatou i mua i te Faaora, mata e mata. E taime ïa no te oaoa no ratou tei haafatata Ia’na i roto i Ta’na ohipa i roto i teie oraraa. E oaoa e tupu mai no te faarooraa i te mau parau ra : « Ua tia roa, e teie nei tavini maitai e te haavare ore ».¹⁹ Te faaite papû nei au i te reira ei ite no te Faaora tei ti‘a faahou e to tatou Faaora na roto i te i‘oa o Iesu Mesia ra, amene.