“Mbad Ngog”

Falfalaen’ug ngay ni gubay romed ko bineye mo’ulung ko Fare Galasia ku Yesus Kristus ni fan ko Gidii’ ko Tin Tomur e Rran. Ireray e Galasia Rok. Gidad befek Fithngan u napan nikad bad nga lan gil’ilignun. I’ir Got, cha’ nib Tasunmiy, mab machalbog. Gadad bugi yafos ni rayog ni ngad m’ad ma rayog ni ngad denen gad. Machane u fithik e tu’ufeg Rok ngodad nge tabinaew rodad, e ma piningdad ni ngad chuchugurgad Ngak. Ba aray e pi thin rok: “I yog ni susun ni ngad chuchgur gad Ngak me Ir era chuchgur ngodad; susun ni ngan gay e fithik e athamgil ma gadad ra pirieg Ngak, susn ni ngad fithed maran fulweg tabon ngodad, ma susun ni ngad tugtuguyed maran bing ngodad.”¹

Bineye Easter ke sulaen’dad fan ni Ir e rib t’uf rodad nge fare michmicheg ni ke pii’ pi gachalpen nib yul’yul’ ni ngar manged e pi tafagar Rok. Fare Tathapeg ke micheg meyog rogon, ni u fithik e pigpig rodad Ngak, me Ir e rayib ngodad. Reb e pow riy e bay ko yi’iy rok Oliver Cowdery u napan ke pigpig ngak Somoel rok fare Profet Joseph Smith kar pilyegew e thin ko fare Babyor ku Mormon: Somoel e yog ngak Oliver Cowdery ni bochan e tin nibe ba’adag Oliver. Ba t’uf rok Oliver ni nge cha’riy e pi fanow ku Somoel ngalan gumirchaen. “Me ba t’uf Oliver ni nge paer nib michaen’ mab athamgil i fol ko pi motochiyel rok Got, ma Somoel e ra lungbiy pa’u daken e t’ufeg Rok.”²

Kug thamiy e falfalaen’ ko wub nib chuchugur ngak fare Tathapeg nge fare wub Rok nibe chuchugur ngog u fithik e pigpig nib mom niybe fol ko pi motochiyel.

Ke buch boch e ren’ey romed. Sana ko ngiyal nikam mel’eg ni ngam man ko mo’ulung ko sacrament. Ya arragon ni buch rog ko reb e Madnom ni kugub bitir. Pi rran nem e yima pi ea sacrament ko mo’ulung ni balayal. Ere nen nikug manang nike pag nel’ I ragag nge lal e duw kafarm, napan ni kug fol ko fare motochiyel ni ngan kalangan’uy gothon e tabinaew ngak fapi Gidii’en Got, ea kabe chugur nigeg ngak fare Tathapeg.

Ya rib kireb e lang mab garbeb u wan. Ma kug manang ni gube thamiy ea magal nge gowal u lan fare chapel e re balayal nem ni gamad e gallabthir rog. Kug feked fare sacrament, nike pii’ fapi cha’ nibay e Aaronic Priesthood rorad, ni gamad be michmicheg ngak ea Chitmangmad nib Manemus ni ngug ted u wun’mad Fak ni Pum’on ma ngan fol ko pi motochiyel Rok.

Yan I tomuren fare mo’ulung kug yon’ed fare hymn ni “Paer Romad; Ko Bineye Balayal,,” nge fapi thin ni “O Tathapeg, mu paer rog e bineye balayal.”³

Kug thamiy e t’ufeg nge chugur rok Somoel ere balayal nem. Makug thamiy ea gapasaen’ ko Kan Thothup.

Kug adag ni ngug gelnag biyay fapi thamtham ko tu’feg ko en Tathapeg nge chugur Rok ni kug thamiy napan e mo’ulung ko sacrament napan kab fal yangreg. Ere kug fol u reb e motochiyel. Kug gay u lan fapi chep nib thothup. Kug nang ni u langgin e rayog ni ngug sul biyay ni ngayog e Kan Thothup ngog pin’en nike thamiy fapi gachalpen Somoel napan ke fas biyay u napan ke fulweg tabon e pong ni nge yaen nga tabinaew rorad ni nge paer rorad.

Mug bi’eg marngagaen ea bin dalip e rran nga tomren nikan richbiy ko kuruth min keyag. Bpin nib michaen’rad nge kaboch ea ri patgad ko fare malang nikan yil’oweg nge chuw ko fare tomb mar guyed ni fare dagur Rok e danimoy u rom. Ya karbad u fithik e t’ufeg rorad Ngak ni ngar gapgepniged e dowef Rok.

Lagruw e angel ea kar ningew nagrad mangfan nikar rus gad, niybe ga’ar:

“Mangfan ni gimed be gay e pi’in nib fas u fithik e yam’?

“Ir e danimoy u roy, machane ba fas: mu pug’ngan’med u rogon ni non ngomed u napan nibay u Galilee,

“Ni ga’ar, Fare Pum’on ni fak e gidii ea yira pi’ nga pa’ e gidii nib kireb, maran kuruth nag, ma bin dalip e rran e ra fas ko yam’ biyay.”⁴

U lan e Gospel ku Mark ea be uneg ngay fare kanawo’ niyog reb fapi angel: “Machane maen ko kanawo rom, mog ngak e pi gachalpen nge Peter nike m’on romed nga Galilee: urom e gamed ra guy riy, niwad nike yog ngomed.”⁵

Fapi Apostal nge pi gachalpen ea ri gakgad nga Jerusalem. Niwad ni sna gadad, kar rus gad ma kar lemniged u napan kar nonaed nga ta’bang ni marngagaen e yam’ nge mange be yip fan ngorad nikan fasag ko yam’.

Lag’ruw e gachalpen ea ranow u but’ e re balayal nem u Jerusalem ko fare kanawo nga Emmaus. Kristus nikan fasag ko yam’ e yibi m’ug u kanawo ngorad meyad yan. Ya Somoel nikan fasag ko yam’ e keyib ngorad.

Babyor ku Luke ea ke pagdad ni ngad uned ngorad e re balayal nem:

“Ma nap’an ni yow be weliy murung’agen, me chugur Yesus i yib ngorow ngu’u ranod i yan.

“Miyow guy, machane de poy rorow.

“Me ga’ar Yesus ngorow, Mang e gimew be weliy murung’agen ni fa’ani gimew be yib, ni gabmew be kireban’?

“Ma bagayow, ni Cleopas fithingan, e fith Yesus ni ga’ar, mog, kemus ni go’gur e ka ga bay u Jerusalem ndawor mu nang e n’en ni kan rin’ u rom ko fa in i rran ni ba’aray nike yan?”⁶

Miyow weliy Ngak ea kirbaen rorow nike yim’ Yesus u napan nikar pagan’row ngay ni ir e mang Tabiyul kuyu Israel.

Dabisiy nibay e t’ufeg u laman Somoel u napan ni nike non ngak e gali gachalpen ney niyow be kirbaen’:

“Ma aram me ga’ar Yesus ngorow, “Ri gimew bbalyang, ri gimew ba sowath ni nge mich u wun’mew urngin e tin ke mu’iyog rok e pi profet:

“Gathi ri dabisiy ni nge gafgow fare Messiah ko pin’ey nge mu’ me yan ko fla’ab rok?

“Ni tabab ko yu ke rok Moses e babyor nge urngin e tin ni yoloy e pi profet, niyog ngorad gubin u lan fapi chep nib thothup e pi nen ni marngagaen.”⁷

Ere meyib e ngiiyal nikan gowaliy gumircha’eg u napan nikugub pagal:

“Miyad chugur i yib ko fare binaw ni ir e yad be sor i yan ngay, ma susun e dabi un Yesus ko matal ni aram e ka be yan.

“Machane miyow tal’eg ni be lungurow, mu par romow: ya ke chugur ni nge m’ay e biney e rran ma ere nge aw e lumor. Ma aram me un ngorow nga naun ni nge par rorow.”⁸

Fare Tathapeg e fol ngorad ea re nap nem ni nge un nga naun ko fare gachalpen Rok nib chugur ko fare binaw u Emmaus.

Me yan I un ngorow ko par nga tebel, me fek e flowa, me pining e magaer riy ngak Got me t’ar fare flowa nge pi’ ngorow. Ma gowa puf owcherow miyow poy. Machane me m’ay ngabang ndakur guyew. Me lungurow, “Gathi da thamiyew rodow ni bod ba nifiy ni be yik’ u ngorongordow ni fa’ani i welwelthin ngodow u daken e kanawo’ me weliy fan fapi thin nu babyor nib thothup ngodow?”⁹

Ma kara awa nam, fagli gachalpen e ri gurgur gow ni ngar sulow nga Jerusalem ni ngar yogew ko fapi Apostal e nen nike buch rorow. Ma ki ngiyal nem me m’ug biyay fare Tathapeg.

Ke sul u daken fapi machib ni marngagaen ea murwel Rok ni nge bayul nifan ea denen ko pafak e Chitamangin Rok ma nge tha’ab e gaf ko yam’.

“Me ga’ar ngorad, Ba’aray e n’en ni kan yoloy, en ni Messiah e thingar ni gafgownag min faseg ko yam’ ko chirofen nra gaman e dalip ngay:

“Mu fithingan e ngan machibnag riy e thin rok Got ni murung’agen ni ngan kolngan’uy nga ni pi’ keruuy ko denen, me n’ag Got fan, ni thingar ni machibnag ngak urngin e pi nam, ni ngan tabab ngay u lan yu Jerusalem.

“Ma gimed e mich ko pin’ey.”¹⁰

Pi thin rok en Tathapeg ea riyul ngodad niwad pi gachalpen Rok. Gadad ta michaen’ ko pin’ey. Gubin pin’em nibe tay chilen ngodad nib falel’ napan nikad tawfe gad nga lan Fare Galasia ku Yesus Kristus ni fan ko Gidii’en Got Rok’ ko Tin Tomur e Rran e kan mom nag ngodad rok fare profet Alma nike yo’or e duw kafram ko fargi raen ku Mormon:

“Me yibi buch ni ga’ar ngorad: Musap gaed, ba’aray fare raen rok’ Mormon (ya ireray fithingan ni kar tunguyed) ere chiney, e bachan e gimed ba’adag ni ngam baed ko ulung rok’ Got, ma noeg ni gimed e gidii’ rok’, mab m’agaen’med ngay ni ngam ayuweged gimed, ni nge yog ni ngam ba’ud gaed;

“Arragon, mab m’agaen’med ngay ni nge kirbaen’med ngak’ e pi’in nibe kirbaen’; arragon, mi gimed fal’eg laniyaen’ e pi’in nib t’uf rok’ ni ngan fal’eg laniyaen’, ma ngam pired ni gimed e pi mich rok’ ni gubin e ngiyal’ ngo fithik’ gubin ban’en, nge gubin yang ni gimed bay riy, nge yaeni mada’ ko ngiyal’ ni kam m’aed, ni nge yog ni bayuliymed Got, mi gimed un nga fithik’ e matha’eg ngak’ e pi’in ni yaed bay ko bin somm’on e foskoyam’, ni nge yog ngomed e yafos ni gubinfen—

Ere chiney e gube yoeg ngomed, fa’anra ireray e athap ko gum’ircha’ romed,m ere mangfan ni dab ni tawfe nagmed u fithgan Somoel, nib mich riy ngak’ ni kam fal’eged ba m’ag u thilmed, ni gimed ra pigpig ngak mi gimed fol ko pi motochiyel rok’, ni nge yog ni pii’ e Kan ni Thothup rok’ nga dakeanmed?

“Ere ngiyal’ ney u nap’an ni rung’ag fapi gidii’ e pi thin ney, mar weywey gaed ko falfalaen’, miyaed ga’ ar: Ireray e re athap ko gum’ircha’ romaed.”¹¹

Kagdad bay u tan ba m’ag ni ngad chibiyed ngalang pi’in nike t’uf ma ngad manged ea mich ko en Tathapeg ufithik e yafos rodad.

Kemus ni rayog ni ngad rined ni dabi mul’ riy napan gadad be thamiy ea t’ufeg ngak Somoel nge t’ufeg Rok ngodad. Napan gad be yul’yul’ ko pi michmicheg kad falaged, ra gaa nag e t’ufeg rodad Ngak bochan ni gad thamiyed gelngin Rok nib chugur ngodad ufithik e pigpig rodad Ngak.

President Thomas S. Monson ea be pug’ngan’dad nib yo’or yay ko fare michmicheg rok Somoel ko fapi gachalpen nib yul’yul’: “ni cha’ nira fol ko Tapigpig Rok e Ir e paer rorad, ya Ir ra yan nib m’on rorad, me Ir ra paer nib mat’aw pa’rad nga ba’an gilaey rorad, me Kan Thothup Rok ea ra paer u gumircha’ rad, me pi angel Rok ea ra liyeg rad, mara chibiyrad ngalang.”¹²

Kabay reb wo’en nikad thamiyed nike chugur ngodad. Napan ni pigpiggad Ngak u fithik e yul’yul’, Ran chuchgur ngak picha’ nib t’uf nge tabinaew rodad. Gubin ngiyal nikan pinngeg ko murwel rok Somoel ni ngug chuw fa ngug digey e tabinaew rog, ma kugg uy ni Somoel ke tawa’ath nag e bpin rog nge pi bitir rog. Ke falag rogon e tapigpig nib t’ufeg nge fal’eg kanawo’en ni nge chuchugur ngorad.

Kam thamiy e tawa’ath nib taborgon u lane yafos rom. Boech i gimed nibay picha’an nib t’uf romed nib malog ko fare kanawo ko yafos nib manemus. Kam lemnag ko mang e ngam rrin ni ngam sulwegrad. Rayog ni ngam pagaen’um ngak Somoel ni nge chuchgur ngorad napan ni gabe pigpig Ngak u fithik e michaen’.

Gabe pug’an’um ko fare michmicheg nitay Somoel ngak Joseph Smith nge Sidney Rigdon napan kar chuwgow ko tabinaew rorow niyow be pigpig Ngak: “Pi fagar rog ni Sidney nge Joseph, gothon e tabinaew romew e kab fal rogon; yad bay u tan pa’ag, ma nggu rrin e tin nib mangil ngog; ya bayrog gubin e gelngiy.”¹³

Ni woed Alma nge King Mosiah, boch i med ea tapigpig nib michaen’ nikam pigpig gad ngak Somoel nib n’uw napan nib mangil rogon machane ba’ pifakmed nib malog mus ni pi maligach nitay e gallabthir rorad ngak Somoel. Niwoed gur, kar rined gubin rayog rorad, ma amrogon ke ayuweg yo’or e fagar nib yul’yul’.

Alma nge pi Gidii’en Got kar meybil gad nifan fak ni pagal nge pi pagal nifak Pilung ni Mosiah. Meyib fare angel. Pi meybil rom nge meybil ko gidii’ nibe muruweliy nga daken e mich rorad ea ran yib e ayuw ko tapigpig rok Somoel ngak gothon e tabinaew rom. Yadra ayuwegrad ni ngar meleged ea wo’ nga tabinaew ku Got, dem turug nibe og Mo’oniyan nge pi girdii’en, ni fa’nrad ea ngan gathay ea tabinaew ko chiney nge manemus.

Ke pug’ngan’um pi thin niyog fare angel ngak Alma ni Fak nge pi pagal rok Mosiah napan e togopluw rorad: “Ma ku bayay, fare angel e ga’ar: Musap, fare Somoel e ke rung’ag e pi meybil ko gidii’ rok’, nge ku pi meybil ko tapigpig rok’, ni Alma, ni’ir e chitamam; ya ke meybil u fithik’ e mich ni fan ngom ni gomanga yog ni ngam nang fare llowaen’ ni mornga’agen e tin riyul’; ere, aray fan ni kugub ni nggu micheg ngom fare gelingin nge mat’awon Got, ni nge yog, ni pi meybil ko pi tapigpig rok’ e ngan pii’ e fulweg riy u rogon e mich roraed.”¹⁴

Micheg rog ngomed nibe meybil nge pigpig ngak Somoel ea gathi ni ngayog gubin e tin ni ga ba’adag rom nge tabinaew rom. Machane rayog ni nggu michmicheg ni fare Tathapeg e ra chuchgur ngom mara tawa’ath nigem nge tabinaew rom ko tin nib mangil riy. Rayog e falag laniyaen’um ko t’ufeg Rok ma ram thamiy ea fulweg tabon nibe chuchgur ngom napan ni ram foleg pa’am ni gabe pigpig ngak e gidii. Napan ni gabe m’ag e mad’ad ko picha’nib t’uf ban’en rorad ma gab oged e bi’echnag ko fare Bayul nike tay nifan picha’ nib kirbaen’rad u fithik e denen, gelngin e Somoel era aywegem. Pa’ Rok ea be kiyag ni wad gur ni ngan ayweg min tawa’ath nag pifak e Chitmangmad nu Tharmiy.

Bay reb e madnom nib falel’ kan fa’leg napan gu suled nga tabinaew. Ma ran guy boch e michmicheg nikan mu’nag Somoel nib t’uf rodad. I’ir e ra piningdad nga lane yafos nib manemus Rok nge Chitmangdad u Tharmiy. Yesus Kristus e yog ni arragon:

“Mu gay rogon ni ngam fek mag toy ea Zion rog. Mu fol ko pi motochiyel rog u fithik gubin banen.

“Ma fa’an gidad ra fol ko pi motochiyel rok magdad athamgil ko tomur ma rayog e yafos ngodad nib manemus, ni ir e tha’ibi gaa ko tawa’ath rok Got.”¹⁵

“Ya pi cha’an nira fas ea rayog e faileng ngorad, ra falfalaen’ e pi yam’ ni bay ur m’ad e chiney ya yad ra felfelan’ ko matal nra yib ngorad ko maruwel nib gel nra ted, ya bay ra feked wenegan e pigpig ni ur ted ngak Somoel nge un ngorad.”¹⁶

Gu micheg ni u daken e Kan ni Thothup rayog ni ngad leked e pong rok Chitamangdad nu Tharmiy: Ireray Fakag nib t’uf nib Magagirag rog. Mmotoyil Ngak!”¹⁷

Ma daken pi thin nge pow rok, Kristus ke dag ngodad rarogon ni ngad chuchgur gad Ngak. Gubin fak e Chitamangdad nu Tharmiy nibe ronoed ngak udakaen e tawfe nga lane Galasia Rok ea rayib kanawo’en ni ngar filed e gospel Rok mar rungaged pi tapigpig Rok nikan pining fare pong Rok ni “mbad ngog.”¹⁸

Gubin ea tapigpig Rok u tan e m’ag u lan gil’ilignun u daken e fayleng nge lane fayleng ko ya’el ran athapeged e ayuw Rok napan yadbe pigpig bee’ nifan Ngak. Aram e ngiyal niyad ra thamiy e tu’feg Rok, min pat ko falfalaen’ ko ngiyal niybe chuchgur Ngak.

I gag reb e micheg nifan e Fas ko Yam rok en Somoel niwoed rogon ni gubay u rom ko re balayal nem rok pi gachalpen u lane naun ko fare kanawo nga Emmaus. Gumnang nib fas ni woed ke nang Joseph Smith u napan ni gguy fare Chitmangdad nge Fak u fithik e magal ko kakadbul u fithik e pi gakiy u Palmyra.

Ireray bin riyul’ e Galasia rok Yesus Kristus. Kemus nu fithik fapi kiy nibe kol’ President Thomas S. Monson e bay gelngin nifan dad ni ngan m’ag e tabinaew ni ngar pired u ta’bang ni dariy num’ngin napan rok Chitamangdad nu Tharmiy nge Somoel ni Yesus Kristus. Ma rofan e pufthin u p’owchen en Tathapeg, nib pulow owchdad. Ra mang bingiyal nrib falfalaen’ ngak picha’ nikan chuchugurgad Ngak u fithik ea pigpig rorad Ngak u bineye yafos ni ngan rung’ag fapi thin: “Mangil e murwel rom, i gur tapigpig nib mangil mab michaen’.”¹⁹ Gube micheg e ren’ey ni reb e m’ag ko en Tathapeg nike fas ko yam’ nge Tabiyul rodad u daken fithngan Yesus Kristus, amen.