Rikaļoor ro an Kraist

Juon iaan al in jar ko ad rōm̧m̧an ippād ej jino kōn naan kein:

Naan kein, kar im̧we jen Rilo̧mo̧o̧r eo ilo kūr eo m̧oktata n̄an rikaļoor ro An (lale Matu 4:19), kar jeje jen John Nicholson, juon rioktak in Schottish. Āinwōt elōn̄ iaan ritōl ro ad m̧okta ilo bwebwenato an kabun̄ in, eaar jab ļap an jikuuļ bōtaab juon iakwe em̧wilaļ n̄an ad Rilo̧mo̧o̧r im karōk in lo̧mo̧o̧r eo.²

Aolep ennaan ko ilo kweilo̧k in raar jipan̄ kōj lo̧o̧r jenkwan ne ko neen ad Rilo̧mo̧o̧r, eo waanjon̄ak eo im katak ko rej kwaļo̧k iaļ eo n̄an kajjojo rikaļoor ro an Jisōs Kraist.

Āinwōt aolep Rikūrjin ro jet, membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej ekkatak kōn mour eo an ad Rilo̧mo̧o̧r āinwōt an waļo̧k ilo bok in Matu, Mark, Luk, im Jon ilo Kallim̧ur Ekāāl. Inaaj kwaļo̧k waanjon̄ak ko im katak ko repād ilo bok kein emen ilo Baibōļ eo Ekwojarjar im kūr kajjojo n̄an kōļmenļo̧kjeņ ekōjkan an jepļaaktok in Kabun̄ eo An im n̄an kakōrbōb kōj kajjojo āinwōt rikaļoor ro an Kraist.

Jisōs ar katakin bwe peptaij emenin aikuj n̄an deļo̧n̄e aelōn̄ in kiin̄ eo an Anij (lale Jon 3:5). Eaar jino jerbal in kwaļo̧k eo An ilo an kar peptaij (lale Mark 1:9), im E im rikaļoor ro An raar peptaiji ro jet (lale Jon 3:22–26). Jej kōm̧m̧an āindein.

Jisōs ar jino kwaļo̧k eo An kōn kūr riron̄jake ro An n̄an ukwelo̧k (lale Matu 4:17). Ejja ennaan eo wōt an ro Rikarejeran n̄an laļ in.

Ilo aolepān jerbal in kwaļo̧k eo an Jisōs ar leļo̧k kien ko. Im Eaar katakin, “Eļan̄n̄e kom̧ij yokwe Eō, kom̧ naaj kōjparok kien ko Aō” (Jon 14:15; barāinwōt lale eoon 21, 23). Eaar kōmejajaik bwe kōjparok kien ko An emenin aikuj bwe Rikaļooran ren likūt ta eo Eaar ba “bwe men eo e utiej ippān armej” (Luk 16:15) im “m̧anit ko an armej raņ” (Mark 7:8; barāinwōt lale eoon 13). Eaar barāinwōt kakkōl: “Eļan̄n̄e kom̧ an laļ, laļ enaaj kar yokwe men eo an; a bwe kom̧ jab an laļ, a Iar kāālōt kom̧ jān laļ, kōn men in laļ ej kōjdate kom̧” (Jon 15:19). Āinwōt an kar Rijilōk Piter kwaļo̧k, rikaļoor ro an Jisōs raar “armej ro an Anij wōt” (1 Piter 2:9).

Armej ro Rekwojarjar ilo Raan-ko Āliktata remeļeļe bwe rejjab “jān laļ in” ak lo̧kjak n̄an “m̧anit ko an armej raņ,” ak āinwōt rikaļoor ro jet an Kraist, jet iien jej lo bwe epen n̄an ļo̧o̧r Rilo̧mo̧o̧r ilo men in. Jet armej rej likūt mour ko aer ilo wāween ko an laļ in kōnke, āinwōt an Jisōs kar ba kōn jet iaer ilo An kar katakin, “bwe rej yokwe nōbar an armej eļap jān nōbar an Anij” (John 12:43). Likjab kein n̄an ļo̧o̧r Kraist rellōn̄ im repād n̄an kōlaajraki ijin. Rej kobaiki aolep iminene ko an laļ in āinļo̧k wōt n̄an juon tōmak me kajin im iminene ko remaron̄ jelet kurup in armej im jekjek ko ilo nuknuk n̄an ukōt jon̄ak ko āinwōt piktok eo ad indeeo im pedped eo an baam̧le.

Katak ko an Jisōs raar jab naan bajjōk. Raar aolep iien kipel n̄an kōm̧m̧ane. Jisōs ar kwaļo̧k, “Innām jabdewōt eo ej ron̄jake naan kein Aō, im kōm̧anm̧ani, naaj kajjion̄e er āinwōt armej eo e jeļāļo̧kjeņ” (Matu 7:24; barāinwōt lale Luk 11:28) im “E m̧ōņōņō ri karijeran eo, an irooj enaaj itok im lo an kōm̧anm̧an āindein” (Matu 24:46). Ilo al in jar eo juon jaar al kake:

Āinwōt an Jisōs kar kwaļo̧k, ro rej iakwe E renaaj kōjparok kien ko An. Ļo̧o̧r Kraist ejjab juon men bajjōk ak iminene an jet iien ak ej juon kien ej wōnm̧aanļo̧k wōt ilo wāween mour me ekitbuuj ilo aolep iien im ilo aolep jikin ko. Rilo̧mo̧o̧r ar kwaļo̧k pedped in im ekōjkan ad maron̄ kememej e im kōkajoorļo̧k n̄an ļo̧o̧r e ilo iien eo Eaar ruje kain̄i eo an kwojkwoj (kōm̧m̧ao, āinwōt an ro ņa etan). Jejeļā jān revelesōn eo ekāāl bwe Eaar kakien ro Rikaļooran n̄an bōk m̧ōttan kōkkaļe ko ilo emeemej E (lale Joseph Smith Translation, Mathew 26:22 [ilo Matthew 26:26, footnote c], 24 [ilo Bible appendix eo]; Joseph Smith Translation, Mark 14:21−24 [ilo Bible appendix]). Membōr ro ilo an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej ļo̧o̧r kien in kajjojo wiik ilo aer pād ilo kabun̄jar n̄an aer bōk m̧ōttan pilawā im dān eo im kallim̧ur bwe renaaj kememej E iien otemjej im kōjparok kien ko An.

Jisōs ar katakin bwe “armej ren jar iien otemjej” (Luk 18:1). Eaar barāinwōt kwaļo̧k waanjon̄ak in, ilo An kar “pād aolepen bon̄ ilo jar n̄an Anij” (Luk 6:12) m̧okta jen an kar kūr Rijilōk ro An Jon̄oulruo. Āinwōt Rikūrjin ro jet, kōmij jar ilo aolepn iien kabun̄jar koam. Kōm̧ij barāinwōt jar kōn tōl, im kōm̧ij kwaļo̧k bwe eaikuj emakijkij kōm̧m̧ani jar ko am make im bukwelōlō ilo jar ko am kajjojo iien āinwōt juon baam̧le. Āinwōt Jisōs, kōm̧ij jar n̄an Jemed lo Lan̄, im kōmij kōm̧man āindein ilo āt eo ekwojarjar etan Jisōs Kraist.

Rilo̧mo̧o̧r ar kūr Jon̄oulruo Rijilōk ro n̄an jipan̄ Kabun̄ eo An im leļo̧k n̄an er kii ko im mālim n̄an kowōnm̧aanļo̧k jerbal eo An ālkin An mej (lale Matu 16:18–19; Mark 3:14–15; 6:7; Luk 6:13). Kabun̄ eo an Jisōs Kraist im Armej ro Rekwojarjar ilo Raan-ko Āliktata, āinwōt Kabun̄ eo an Jisōs Kraist em̧ōj an bar jepļaaktok, ļo̧o̧r waanjon̄ok in ilo ejaak eo im ilo leļo̧k kii ko im mālim ioon Rijilōk ro.

Ro jet Jisōs ar kūr er n̄an ļo̧o̧r E raar jab m̧ōkaj in uwaak ak raar karum̧wijļo̧k n̄an lali eddo ko rekkar an baam̧le. Jisōs ar uwaak, “Ejjeļo̧k armej ekar n̄an aelōn̄ in Anij, eļan̄n̄e ej likūt pein ioon plau, im oktaklik” (Luk 9:62). Elōn̄ Armej ro Rekwojarjar ilo Raan-ko Āliktata rej kōm̧m̧ani men eo im̧aan tata Jisōs eaar katakin.Menin ekoba waanjon̄ak eo an taujin mijenede ro rōrūtto im ro jet me kar likūt ajri ro nejier im jibwier n̄an kōm̧m̧ani jerbal ko an mijenede me kar kūr er nani.

Jisōs ar katakin bwe Anij ar kōm̧anm̧an m̧aan im kōrā im bwe m̧aan eo enaaj ilo̧k jān jemen im jinen, e enaaj eddāp n̄an lio pāleen (lale Mark 10:6–8). Kallim̧ur eo ad n̄an katakin eļap jeļā kake.

Ilo juon būrabōļ jejeļā kake kōn siip eo ejbwābwe, Jisōs ar katakin bwe jeaikuj in ilo̧k n̄an pukōt jabdewōt siip me em̧ōj an jōbwābwe (lale Matu 18:11–14; Luk 15:3–7). Ilo ad jeļā, Būreejtōn Thomas S. Monson eaar ļap an kwaļo̧k tōl in ilo waanjon̄ak eo an im katak ko kōn lo̧mo̧o̧ren em̧m̧aan im kōrā ro m̧ōttad.⁴

Ilo kijejeto ko ad n̄an lo̧mo̧o̧ren im jerbal, jej ļo̧o̧r waanjon̄ak eo ejjetjet an ad Rilo̧mo̧o̧r im katak ko rem̧m̧an kōn iakwe “Kwōn yokwe ri turuōm̧ im āinwōt kwe” (Matu 22:39). Eaar barāinwōt kakien kōj n̄an iakwe rikōjdat ro ad (lale Luk 6:27–28). Im ilo katak ko an reļļap ilo jem̧ļo̧kin jerbal in kwaļo̧k eo An, Eaar ba:

“Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon.

“Ilo men in armej otemjej renaaj jeļā bwe kom̧ij rū kaļora, eļan̄n̄e kom̧ij yokwe doon” (Jon 13:34–35).

Ejja m̧ōttan iakwe doon, Jisōs ar katakin bwe n̄e jej bōd ņae armej ro, jej aikuj in jeorļo̧k aer bōd (lale Matu 18:21–35; Mark 11:25–26; Luk 6:37). Ilo an lōn̄ n̄ūrbōktak kōn kien in epen, jooj aolep jeļā kōn waanjon̄ak ko reim̧we an Armej ro Rekwojarjar ilo Raan-ko Āliktata ro rej kwaļo̧k iakwe kōn jeorļo̧k bōd, men̄e bōd ko reļļap. N̄an waanjon̄ak, Chris Williams ar pedped wōt ioon tōmak eo an ilo Jisōs Kraist n̄an jeorļo̧k an rikadōk eo bōd kōn jako eo an kōrā eo ippān im ruo iaan ajri ro nejiero. Ruo wōt raan ālkin kabūrom̧ōjm̧ōj in im būrom̧ōj wōt, em̧m̧aan in etiraim̧o, innām ar juon iaan bisop ro am̧, ar ba, “Āinwōt juon rikaļoran Jisōs, ejjeļo̧k bar juon aō kālet.”⁵

Elōn̄ Rikūrijin ro rej leļo̧k n̄an rijeram̧ōl im riaikuj, āinwōt an Jisōs kar katakin (lale Matu 25:31–46; Mark 14:7). Ilo ļo̧o̧r katak in an ad Rilo̧mo̧o̧r, Kabun̄ eo an Jisōs Kraist im Armej ro Rekwojarjar ilo Raan-ko Āliktata im membōr ro ie rej ļo̧o̧ri. Membōr ro am rej leļo̧k menin tiriam̧o ko aer im leļo̧k jerbal in jipan̄ ko aer make im menin leļo̧k ko jet n̄an rijeram̧ōl im riaikuj ro. Ilo kakobaba, membōr ro am rej jitlo̧k ium̧win ruo iien m̧ōn̄ā ko kajjojo allōn̄ im leļo̧k jon̄an eo wōņāān iien m̧ōn̄ā ko āinwōt jortak in jitlo̧k, eo me bisop im branch būreejtōn ro am rej kōjerbal e n̄an jipan̄ membōr ro am reaikuj. Ad jitlo̧k ruo iien m̧ōn̄ā n̄an jipan̄ ro rōkwōle ej juon jerbal in iakwe em̧ool im, n̄e ej kōm̧m̧an kōn kōņaan erreo, ej kōkajoorļo̧k kōj ilo jetōb.

Jerbal in jipan̄ eo an Kabun̄ in edik jeļā kake ej humanitarian ipeļaakin laļ in. Kōjerbal jāān ko aeni jen jortak ko an membōr ro, Kabun̄ eo an Jisōs Kraist im Armej ro Rekwojarjar ilo Raan-ko rej jilkinlok m̧ōn̄ā, nuknuk, im menin aorōk ko jet n̄an jipan̄ rūtto ro rekwōle im ajri ro ipeļaakin laļ in. Menin tiriam̧o kein ilo humanitarian, oran bukwi in milien tala ko ilo tōre eo lok, raar kōm̧m̧an ilo ejjeļo̧k kalijōkļo̧k an kabun̄, kumi, ak laļ.

Jerbal in kijejeto eo ad eļap ālkin 2011 m̧akūtkūt laļ eo an Japan im tsunami kar leļo̧k $13 milien tala im menin jipan̄ ko. Ilo kakobaba, eļōn̄ ļo̧k jen 31,000 rijipan̄ ro an Kabun̄ in raar leļo̧k eļōn̄ jān 600,000 awa in jerbal in jipan̄. Humanitarian eo ad ejipan̄ m̧akūtkūt laļ eo ilo Sandy ilo turear in United States ekoba menin jipan̄ ko reļļap, ekoba 300,000 awa in jerbal in jipan̄ ilo kijejeto in karreeo ko an 28,000 membōr ro an Kabun̄ in. Ilubwiljin elōn̄ waanjon̄ak ko jet iiō eo lo̧k, jaar leļo̧k 300,000 baun (136,000 kg) in nuknuk im juuj n̄an laļ en an riAfrica ilo Chad. Kuwōta ko 25 rem̧ootļo̧k jaar jipan̄ enan̄in 30 milien in armej ilo 179 laļ ko.⁶ Ilo m̧ool, armej rej kūr “Mormon” rejeļā ekōjkan leļo̧k n̄an rijeram̧ōl im riaikuj.

Ilo katak eo An ilo baibōļ, Rilo̧mo̧o̧r eo ad ar tōl rikaļoor ro An n̄an bōk katak ko An n̄an aolep laļ im aolep menin mour. Jān jinoin Jepļaaktok eo, Kabun̄ eo an Jisōs Kraist im Armej ro Rekwojarjar ilo Raan-ko Āliktata rej pukot n̄an ļo̧o̧r katak in. Men̄e jej juon rijeram̧ōl ak apan̄ ilo kabun̄ in kōn jejo taujin membōr ro, ritōl ro ad m̧okta raar jilkinļo̧k mijenede ro kijoon lomalo ko, rilik im rear. Āinwōt juon armej, jej wōnm̧aanļo̧k wōt n̄an kwaļo̧k ennaan eo an Rikūrjin m̧ae raan eo ejjejet n̄e būrookram̧ eo an mijenede enaaj lōn̄ ļo̧k jān 60,000 mijenede ro rej jerbal aolep raan, koba taujin ro rej jerbal part-time. Ewōr mijenede ro ad ilo 150 laļ ko im territory ko, ilo aolepān laļ in.

Ilo jem̧ļo̧k in kwaļo̧k eo An ioon To̧l eo, Jisōs ar kwaļo̧k, “Kom̧ naaj weepān āinwōt Jememwōj I lan̄ E weepān” (Matu 5:48). Un eo an katak in im un eo n̄an ļo̧o̧r Rilo̧mo̧o̧r eo ad ej n̄an itok n̄an Jemen, eo ad Rilo̧mo̧o̧r ar ba kake āinwōt “Jema, im Jememi, … Aō Anij, im ami Anij” (Jon 20:17).

Jān revelesōn ko rekāāl, ejej uwaan n̄an jepļaaktok eo an ko̧jpeļ eo, jejeļā bwe katak kein rej m̧ōttan karōk eo an Anij Jemed n̄an lo̧mo̧o̧r eo an ajri ro Nejin. Ium̧win karōk in jej aolep rijolet an ro jined im jemed ilan̄. “Kōj ro Nejin Anij,” Rijilōk Paul ar kwaļo̧k, “im eļan̄n̄e ro nejin, innām ri jolōt an Anij, im ri jolōt ippān Kraist” (Rom 8:16–17). Meļeļein, ilo kar jiron̄ kōj ilo Kallim̧ur Ekāāl, bwe kōj “ri jolōt kōn mour indeeo” (Titus 3:7) im bwe eļan̄n̄e jej itok n̄an Jemen, jenaaj “jolōt men kein” (Revelesōn 21:7)—aolep men ewōr Ippān—juon unin kōnono kōn kōļmenļo̧kjeņ ko ad ilo mour wabanban in maron ij jino meļeļe. Ak jon̄an eo jemaron̄ meļeļe n̄an bōk jem̧ļo̧k in ad āliktata ej make wōt ilo ad ļo̧o̧r ad Rilo̧mo̧o̧r, Jisōs Kraist, eo ar kwaļo̧k bwe “Ejjeļo̧k armej ej itok n̄an Jema, eļan̄n̄e jab kōn Eō” (Jon 14:6). Jej pukot n̄an ļo̧o̧r E im erom ļapļo̧k āinwōt E, ijin im ijeņ. Kōn men in ilo āliktata in eoon ko ilo al in jar eo ad “Come, Follow Me,” jaar al:

Ij kam̧ool kōn ad Rilo̧mo̧o̧r, Jisōs Kraist, eo katak ko im waanjon̄ak ko jej pukoti n̄an ļo̧o̧ri. Eaar kūr ro rej jerbal im ban n̄an itok n̄an E, n̄an jeļā kōn E, n̄an ļo̧o̧r E, im aaet n̄an pukot kakkije n̄an jetōb ko ad (lale Matu 4:19; 11:28). Ij kam̧ool kōn m̧ool in ennaan eo An im kōn mijen eo ekwojarjar im mālim eo an jepļaaktok eo an Kabun̄ eo An ilo etan Jisōs Kraist, amen.