Roltirakl er a Kristo

Mlara Elder Dallin H. Oaks

Era Chelechad er a Teruich me a Terung el Apostol


A oltirakl er a Kristo a diak el kora derstang el omeruul me a teletael, ng bai melemolem el blakelreng me a teletael er a klechad er a rokui el taem me a rokui el basio.

A tara klebokel el chelitekled, el bilskid a Tabernacle Choir, a omuchel aikakid el tekoi er a chelsel:

“Mei, moltirakl er ngak,” a Osobel a melekoi.
Me bo doltirakl a blekeklel,
Me do bo de tang el rokui
Lobengkel a betik er a rengul a Dios, el Ngelekel.1

Aika el, tekingel Osobel er a uchelel a mle siotai el mora rultirakl er Ngii (mesa Mateus 4:19) ), a lulluches a John Nicholson, el mle chad er a Scottish. Meng di uaia rebetok el mengetekled er a uchelel, e ngika el chad a dimlak a kmal skulel eng dim le dmolech a beltkil a rengul el mora Osobel me a uldasu el kirel a diak a ulebengelel klengar.2

A rokui el klumech er tial ongdibel a mla ngosukid el oltirakl a blekeklel a Osobel, el okesiul me a osischeklel a smodii a rael el mora rebek el oltirakl er a Jesus Kristo.

Me ngosisiu er a rebek el Kristiano, ea rechedal a Ikelesia er a Jesus Kristo er a Uriul-klebesei el Santo a mesuub er a klengar er a Osobel el llechukl er a Beches el Renged er a chelsel a hong er a Mateus, Markus, Lukas, me a Johanes. Ak mo mesaod a okesiu me a osisechakl el llechukl er a chelsel aika el kleua el hong er a chelsel a Chedaol Biblia e siotai er a dersta er kid el mo omtab el ko ng mekera tia el mla moluut el Ikelesia er Ngii me a dersta er kid a mo sebeched el mo oltirakl er a Kristo.

A Jesus a ulisechakl el kmo a techolbechelid a klou a belkul kirel a sisbelled er a rengedel a Dios (mesa Johanes 3:5) ). Ngii a ulemuchel er a osischeklel el mlo metecholb (mesa Markus 1:9), e Ngii me a rultirakl er Ngii a millecholb er a rebebil (mesa Johanes 3:22–26). Kid me kede meruul er a osisiu.

A Jesus a ulemuchel er a Osischeklel el mle siotai er tirkel ulerrenges er Ngii el mo ouchel a rengrir (mesa Mateus 4:17). Tia osisiu el klemechir a Remesiungel el mora beluulechad.

Chelsel a taem le ngara beluulechad ea Jesus a milskid a llach. E Ngii a ulisechakl el kmo, “A le betik a rengum er ngak, e moltirakl a llechuk” (Johanes 14:15; dirrek el mesa bades 21, 23). Ng milketeklii el kmo a otireklel a Llechul a mo kirir tirkel loltirakl er Ngii el mo mechei aikel Ngii oleker el kmo “ng meklou a belkul el mora rechad” (Lukas 16:15) me a “siukang er a rechad” (Markus 7:8; dirrek el mesa bades 13). Ng dirrek el ulemeklatk: “A moltirakl a teletael er a beluulechad, ea beluulechad a soal sel lobang: eng di kemiu el diak moltirakl a teletael er a beluulechad, le ngak el mla ngiltemiu er a beluuelchad, maleuaisei ea beluulechad ouketiu er kemiu” (Johanes 15:19). Al uaia tekingel a Apostol Petrus ruriul, a roltirakl er a Jesus a kirir el “ngellitel el chad” (1 Petrus 2:9).

A Ruriul-klebesei el Santo a medengei el kmo ng diak el kired el mo “soad a teletael er a beluuelchad,” malechub e doltirakl a “siukang er a chad,” eng di kede uaia roltirakl er a Kristo, e tia lebebil er a taem eng meringel e doltirakl er ngii el osisechakl. A rebebil a remuul a klengar tir loltirakl a teletael er a beluulechad, el uaia osischeklel Osobel el dilu el kmo, “ng sorir a chetengakl er a chad e diak el sorir a chetengakl er a Dios” (Johanes 12:43). A telitur tir el mo oltirakl er a Kristo a kmal betok e meringel a domasech. Ng uldimukl a omeruul er a beluulechad el uaia tekoi er a balatiks ma uldirekork el bail ma besiich el mengeuid er sel ngii a meral diak a ulebengelel teletael me a moktek er a telungalek.

A osischeklel a Jesus a diak el kora di suobel el mo dodengei e mechei. Ng kired el blechoel ngara omeruul. A Jesus a ulisechakl, “Ngkel remenges aikal tekingek, e meruul, a kungaisisiu er ngii el mora mellomes a rengul chad” (Mateus 7:24; dirrek el mesa Lukas 11:28) e “Ngeltengat ngike el mesiou, el sel lemei a rubak eng metik er ngii el meruul” (Mateus 24:46). A kuk tara klebokel el chelitakl eng kmo:

Osobel, bo kubeltikelreng leko er kau,
Merael er a rael el kau a mla ochotii, …
Osobel, bo kubeltikelreng leko er kau—
Rubak, ak mo oltirakl er kau.3

Ng uaia ikel osischeklel a Jesus, tirkel betik a rengrir er Ngii a oltirakl a Llechul. Te mo olngesenges, el uaia lullekoi a President Thomas S. Monson er chelechal tutau. A oltirakl er a Kristo a diak el kora derstang el omeruul me a teletael, ng bai melemolem el blakelreng me a teletael er a klechad er a rokui el taem me a rokui el basio. A Osobel a ulisechakl er tial osisechakl e kired el mo melbedebek e mesisiich el oltirakl er ngii er sera lekedmeklii a chedaol ruoll er a sacrament (malechub eng komunuion el rebebil oleker ngii). Kede medengei lokiu a ocholt er chelechal taem el kmo Ngii a dilu er a rultirakl er Ngii el mo melai er a bedengel me a rsechel el omeltkir er Ngii (mesa Joseph Smith Translation,Mateus 26:22 [er a Mateus 26:26, footnote c], 24 [er a the Bible appendix]; Joseph Smith Translation, me a Markus 14:21–24[er a Bible appendix]). A rechedal a Ikelesia er a Jesus Kristo er a Uriul-klebesei el Santo a oltirakl er tial llach er a bek el sandei el mora ongdibel engara omengull e melai er a blauang me a ralm e tibir el mo blechoel melbedebek er Ngii e oltirakl a Llechul.

A Jesus a ulisechakl el kmo a “chad a kirel blechoel meluluuch” (Lukas 18:1). Ngii a kildmeklii tial okesiu, el uaia sera “lolemolem el tal kesus loluluuch el mora Dios” (Lukas 6:12) ruchei er a lomekedong er a Reteruich me a Terung el Apostol. Me kede osisiu me a rebebil er a Kristiano, e kid a ngara nglunguuch er a ikel rokui el omengull el doruul. Kede meluluuch lolengit a ulekrael, e olisechakl el kmo ng kirel ngarngii a blechoel nglunguched me a nglunguuch er a telungalek er a bek el sils. Me kede uaia Jesus, e kid a meluluuch el mora Chedam er a Babeluades, e meruul er ngii el ngara chedaol ngklel a Jesus Kristo.

A Osobel a ulemekedong er a Reteruich me a Terung el Apostol el mo olngeseu er a Ikelesia er Ngii e milsterir a kiis me a ngerachel el melemolem ruriul er a Kodellel (mesa Matthew 16:18–19; Markus 3:14–15; 6:7; Lukas 6:13). A Ikelesia er a Jesus Kristo er a Uriul-klebesei el Santo, el mla moluut el Ikelesia er a Jesus Kristo, a oltirakl er a osisiu el derider me a kiis me a ngerachel lolab are Apostol.

A rebebil el Jesus a ulemekedong er tir el mo oltirakl er Ngii a dimlak el mereched el kongei e bai ulemekeoud e mlo chemau a tekoi er a telungalek. A Jesus a millekoi, “Ngikel omuchel el mesib e di mechechisngekl el bedul uriul a diak el ungil el kirel a rengedel a Dios” (Lukas 9:62). Ng betok el Ruriul-klebesei el Santo a meruul er sel kot el tekingel Osobel. Tia uldimukl er ngii a okesiu er a retelael el obekel el misionari me a rebebil el mla me iikri a rengelekir me a rengelekir a rengelekir el kirel a ureor er a misionari el tir a mla mokedong el kirel.

A Jesus a ulisechakl el kmo a Dios a milebii a sechal me a redil, ea sechal a mo cheroid er a delal me a demal e mo kiei lobengkel a bechil (mesa Markus 10: 6–8). A blakelreng er kid el kirel tial osisechakl a di lodengelii.

Sel dodengelii el olachitnger er a mla remiid el sib, ea Jesus a ulisechakl el kmo ng kired el tuobed el mora siik er a ngii dil charm el mla remiid (mesa Mateus 18:11–14; Lukas 15:3–7). Kede medengei el kmo a, President Thomas S. Monson a mla melisiich er tial ongit lokiu a okesiul me a osischeklel el kirel a siik el kirir a rebebil er kid el sechal me a redil.4

Kede oltirakl er a meang, el okesiul Osobel me a bekokeuii el osischeklel el kirel a beltikelreng el mora siik el kirir tirkel mla remiid. “Bol betik a rengum er a ngara bitar kau el uaia le betik a rengum er kau” (Mateus 22:39). Ngii a ulisechakl. Ngii a dirrek el millekoi er kid me bol betik a rengud er a recherreued (mesa Lukas 6: 27–28). Ea, chelsel sel klou el Osischeklel er a mocha er a ulebongel er a urerel, e Ngii a dilu el kmo:

“A beches el llach el ngak a meskemiu a kmo, Bom kaubeltikelreng; el uaia beltkil a renguk lekor kemiu, me dirrek el bom kaubeltikelreng.

“Tiaikid ea rechad a mo medengei el kmo ko moltirakl er ngak, alsekum e kom kaubeltikelreng” (Johanes 13: 34–35).

Me tara telengtengil a klaubeltikelreng, ea Jesus a ulisechakl el kmo alsekum a rechad a tomellii a rengud eng kired el ousubes er tir (mesa Mateus 18: 21–35; Markus 11: 25–26; Lukas 6:37). Betok a meringel lotireklii tial llach, eng di kid el rokui a medengei a oksiu er a Ruriul-klebesei el Santo el tir a mla ochotii a beltikelreng er a klausubes, luldimukl aikel kmal diak lungil lomeruul er a rechad. Okesiul tiang, ea Chris Williams a mle ultuil er a mle ultuil er a klaumerang er ngii er a Jesus Kristo e ousubes er a mlke chetelaol chad el mle uchul a kodellel a bechil me a reteru el ngelekel. Meng dirk eru el klebesei ruriul er tial kerior meng dirk ngara klengitelreng, e ngika el mui er a klausubes el chad, el a tara bisop er kid, a dilu el kmo, “Ngak el oltirakl er a Kristo, eng diak a ngodech el sebechek el melilt el rullii.”5

Betok el Kristiano a oldars el mora remechebuul me a rekosekodel, el uaia lullisechakl a Jesus (mesa Mateus 25: 31–46; Markus 14:7). Me a otireklel tial osischeklel a Osobel ea, Ikelesia er a Jesus Kristo er a Uriul-klebesei el Santo me a rechedal a bleketakl el meruul er ngii. A rechedal a ikelesia a oldasr a ngeso el mora cheldebechel er a remechebuul me a dirrek el omesiou me a ngeso el mla er a redestalchad el mora remechebuul me a rekosekodel.Osisiu, ea rechedal a ikelesia a olsengerenger el diak lomengur er a chelsel eru el blengur er a bek el buil e odars aikel uaia le cheral aikel blengur, ea rebisop me a remerreder er a branch a ousbech lolngeseu er a rekosekodel el chedal a ikelesia. Me sel dolsengerenger e dolngeseu er a resongerenger a olchotel a beltikelreng, sel lemekedmokl lultuil er a klikiid el reng, e melisiich er a reng er kid.

Te kesai a diak lodengelii a chisel a Ikelesia er kid el kirel a ngeso el mora mechebuul el beluu. Me kede ousbech e udoud lodars a rebekokeuii el rechedal a ikelesia, el uchul ea Ikelesia er a Jesus Kristo er a Uriul-klebesei el Santo a oldurokl a kall, bail, me a bebil er a meklou a belkul el mo olngeseu er a re ngara ringel el meklou el chad me a rengalek er a beluulechad el rokir. Aikel ngesou, a derdart el dart million a iidisel udoud er a ikal mereko el rak, a mekedmokl el diak el iior er a klechelid, teletael er a kelchad, malechub a beluu.

A klou el ngeso er kid ruriul er sel 2011 el desiu er a Siabal me a tsunami a mle $13 million el udoud me a dirrek el klekedall. Osisiu, ete betok er a okedei me a ta el telael el chad a ulengeseu el mle betook er aelolem me a eai el dart el telael el sikang lolngeseu. A ngesou el duldersii el mo er tirkel miltemall er a Hurricane Sandy er a Beluu er a Merikel a uldimukl a kakerous el ngeso, me a betook er a edei el dart el telael el sikang er a ngeso el mengedmokl er a re kmeed el lluich me a eai el telael el chedal a Ikelesia. A bebil er a okasiu er tial mlo merek el rak, e kede uldars a edei el dart el telael el bond el bail me a oeacher el mo er tirkel dimlak a blirir el rechad er a Chad el beluu er a Africa. Chelsel aika el mereko el lluich me a eim el rak e kede mla ngosuterir a re kmeed el okedei el million el chad er a chelsel a dart me a okeuid me a etui el beluu.6 Ng klemerang, a rechad el okedongall el “Mormons” a meduch el olngeseu er a remechebuul me a rekosekodel.

Chelsel sel ulebongel el osischeklel, ea Osobel a millekoi er a rultirakl er Ngii me lengai osischeklel el mora bek el beluu me a rebek el chad. Me sera uchelel Oluut, ea Ikelesia er a Jesus Kristo er a Uriul-klebesei el Santo a mla oltirakl er tial osisechakl. Luldimukl er a taem el dirk ble de chebuul e beches el Ikelesia el dirk ke kesai el telael a rechedad, ea remerredeled er a uchelel a uledurokl er a remisionari loleong a teuachel, el mora diluches me a ngebard. Me kid el chad, a melemolem lolisechakl a klmechel a kle Kristiano el me lmuut er chelecha el sils el prokuram er a misionari a ngarngii a obdois er a okolem el telael el cherrungel el misionari, me a tela el telael el tir a tedobech a temir el misionari. E remisionari er kid a ngara chelsel a betok er a dart me a okeim el beluu, me a basio, me a beluulechad el rokir.

Sel rokiolel osischeklel er a Bebul a Rois, ea Osobel a ulisechakl el kmo, Ng kiriu el mo cherrungel, el uaia Demmiu el ngara eanged el cherrungel” (Mateus 5:48 A moktek er tial osisechakl me a moktek er a oltirakl er a Osobeled a mora Chedam, el ngii Osobel a melekoi el kmo “ng Demak, e Demmiu; e … Dios er ngak, e Dios er kemiu” (Johanes 20:17).

Chelsel a ocholt er chelechal taem, el meang el mora tial mla moluut el ebangkelio, e kede medengei el kmo aikal osisechakl a telengtengil a uldesuel a Dios el Chedam el kirel osebelir a Rengelekel.Chelsel tial uldasu e kid el rokui a sebeched el mo ngmai aikel rokui lolab a rechad er a blid er a babeluades. “Kid a ngelekel a Dios,” a Apostol Paulus a ulsisechakl, “Me kid el ngelekel, el mo ngmai, ngmai; aikel lolab a Dios me a dirrek el Kristo” (Rom 8: 16–17). Ng belkul a kmo, aikel mla medu er kid er a Beches el Renged, el sekum e kede “mo nguu a … a diak a ulebengelel klengar” (Titus 3:7) ea lsekum e kede mora Chedam, e kede mo “ngmai aikel rokui lolab” (Ocholt 21:7)—aikel rokui el Ngii olab—a tekoi el meringel a dotebengir. Eng di ng sebeched el mo medengei el kmo a ngeiul aikal rokui er sel diak a ulebengelel klengar a di sebechel mekedmokl alsekum e kede oltirakl er a Osobel, el Jesus Kristo,el lullisechakl el kmo “ng diak a chad el mora Chedam, a lak lokiu ngak” (Johanes 14:6 Kid osiik el mo oltirakl er Ngii e mo uai Ngii, er chelechang me a merael mei el klengar. Me a chelsel aikel ulebongel el bades ser sel chelitakl, el kmo “Mei, e Moltirakl er Ngak,” eng kmo:

Ng klebech a dib o dodengei
El kmo ng kired el oltirakl er ngii,
Er tial klengar kid er tial beluulechad?
Ng diak, tiang a dauch el mora chedaol beluu. …
El kirel a kingall, dereder, renged, klisiich,
Me a ngarbab el klebkall a bo dolab,
Omko, kede outekangel el mora ulebongel,
Loltirakl a tekingel, “Mei, e Moltirakl er ngak.”7

A kuchais el kirel a Osobeled, el Jesus Kristo, el osischeklel me a okesiul a dosiik el mo oltirakl. Ngii a siotai er kid el rokui el chellungel a berraod el mei er Ngii, e mesuub er Ngii, e oltirakl er Ngii, me bo debetik a ulengull er a rengud (mesa Mateus 4:19; 11:28). A kuchais el kirel a klemerang er a Klemechel me a chedaol ureor me a ngerachel er a mla moluut el Ikelesia er Ngii el ngara ngklel a Jesus Kristo, amen.

Mostrar referencias

  1.  

    1. “Come, Follow Me,” Chelitakl, no. 116.

  2.  

    2. Mesa Karen Lynn Davidson, Our Latter-day Hymns: The Stories and the Messages (1988), 142–43, 419.

  3.  

    3. “Lord, I Would Follow Thee,” Chelitakl, no. 220.

  4.  

    4. Mesa, el uaia, Heidi S. Swinton, To the Rescue: The Biography of Thomas S. Monson (2010), 149–61; Thomas S. Monson, “To the Rescue,” Ensign, May 2001, 48–50; Liahona, July 2001, 57–60.

  5.  

    5. Chris Williams, er a Jessica Henrie, “Father Relies on Faith to Forgive Intoxicated Teen Driver,” Deseret News, Aug. 1, 2012, deseretnews.com/article/865559847/Let-It-Go-Chris-Williams-shares-his-story-of-tragedy-and-forgiveness.html; dirrek el mesa Chris Williams, Let It Go: A True Story of Tragedy and Forgiveness (2012).

  6.  

    6. Mesa “Emergency Response: Church Assists Worldwide,” Church News, Mar. 9, 2013, 9; Welfare Services Emergency Response, “2012 Year in Review,” 8.

  7.  

    7. Chelitakl, no. 116.