Blong Gat Pis long Hom

Plante voes we oli kam long wol we yumi stap laef long hem i talem se yumi mas laef long wan laef we i spid. Oltaem i gat moa blong mekem mo moa blong kasem. Yet, dip insaed long wanwan long yumi, i gat wan nid blong gat wan ples blong haed, we pis mo kwaet i rul, wan ples we yumi save tingtingbak, kam tugeta bakegen, mo karem paoa bakegen blong rere from ol fiuja hadwok.

Stret ples blong kasem pis ia, i stap insaed long ol wol blong haos blong yumi, long ples we yumi mekem evri samting we yumi save mekem blong Lod Jisas Kraes, i stap long medel blong hem.

Sam hom, oli gat wan papa we i klin inaf mo i gat prishud, mo wetem hem, i gat wan fetful mama we i gat strong tingting, mo tugeta, tufala i lidim hom long stret mo gud fasin. Plante hom, oli defren smol. Nomata wanem situesen blong yufala, yu save mekem hom blong yu mo laef blong yu i lukluk nomo long Lod Jisas Kraes, from Hem i spring blong tru pis long laef ia.

Yu mas save stret se evri desisen we yu mekem, long saed blong wol ia o long saed blong spirit, i folem wanem we Sevya bae i wantem yu mekem. Taem Hem i stap long medel blong hom blong yu, i gat pis mo kwaet. I gat wan spirit blong kamfot we i fulumap hom, mo evriwan we i stap laef ia i filim.

Blong advaes ia i kamtru, i no dipen long papa mo mama nomo, nomata hem i wok blong tufala blong lidim hom. Ol pikinini oli save responsibol blong wokhad blong mekem hom i luk moa long Kraes. Hem i impoten blong papa mo mama blong tijim ol pikinini blong luksave olsem wanem ol aksen blong olgeta i lidim wanwan man o woman we i laef insaed long hom. Ol pikinini we oli stap ansa from ol aksen blong olgeta, nating we oli stret mo gud, o oli defren, oli gro blong kam ol sitisen we oli save trastem olgeta insaed long kingdom blong God.

Mi sua se yu save faenemaot ol stamba prinsipol insaed long hom blong yu we i stap putum Sevya long medel. Advaes blong profet blong gat prea blong yuwan mo famle prea evri dei, skripja stadi blong yuwan mo famle evri dei, mo famle haos naet evri wik, oli ol impoten stamba pos long bilding blong haos we i putum Kraes long medel blong hem. Sapos i no gat ol praktis ia evri dei, bae i had blong faenem pis mo ples blong haed long wol ia.

Stap obei long ol tijing blong profet we Kraes bae i wantem yu blong folem. No faenem eskius mo sakemaot fiuja hapines taem yu tekem ol sotkat mo no folem ol gud gospel prinsipol. Tingbaot: ol smol samting i lidim yu long ol bigfala samting. Semmak, ol smol taem blong foget, o no wantem save, i save lidim yu long ol bigfala problem. Moa impoten, ol simpol, gud fasin we i hapen oltaem, i lidim yu long fulap long ol gud blesing.

Yufala, ol pikinini long Praemeri. Yufala, ol yang man mo woman long yut program, mo yufala, ol strong misinari we i stap long misin naoia, i stap mekem plante moa samting i we oli moa gud bitim we mi bin save mekem taem mi olsem yufala. Long laef bifo laef long wol ia, yufala i bin soemaot se yufala i strong, i obei mo i klin evriwan. Longwe, yufala i bin wokhad blong developem ol talen, ol paoa, blong mekem yufala i rere blong fesem laef long wol ia wetem strong paoa long tingting, respek, ona mo sakses.

I no longtaem i pas, yufala i bin kam long wol ia wetem evri gudfala paoa mo plante moa blong kasem. Yet, i gat wan bigfala denja long ol ples raonabaot long yufala. Ol bigfala paoa mo samting we yufala i save mekem, i save stop o lus sapos yufala i folem trabol blong devel we i stap go raon long yufala. Be, Setan i no naf long Sevya. Fiuja blong Setan, i stap finis. Hem i save se hem i lus, be hem i wantem tekem plante man wetem hem. Bae hem i traem blong spolem gud fasin mo paoa blong yu taem hem i yusum ol samting we yu no strong long hem. Stap long saed blong Lod, mo bae yu win evri taem.

Yufala i laef long wan wol we ol niu teknoloji oli kamaot long wan kwik spid. Hem i had long plante man long jeneresen blong mi blong folem ol samting we i stap. Folem wei we oli yusum teknoloji, hemia i save kam olsem wan blesing, o olsem wan samting we i stopem yu. Teknoloji, taem oli andastanem gud mo yusum blong ol samting we oli stret mo gud, i no nid blong i stap olsem wan denja, be i sapos blong stap olsem wan samting we i leftemap komunikesen long saed blong spirit.

Eksampol: plante long yumi i gat wan lektronik tul we yumi save putum long poket blong yumi. Oltaem nomo yumi stap holem wetem yumi; yumi save yusum plante taem long wan dei. Be sore tumas, ol tul ia, oli save stap olsem wan stamba blong doti samting mo i westem taem. Be, taem oli yusum wetem disiplin, teknoloji ia, i save kam olsem wan tul blong proteksen agensem wan sosaeti we i nogud tumas.

?Hu nao i save tingting, long sam yia i pas, se ful standet tabu wok mo toktok blong jeneral konfrens blong plante yia bae i save fit insaed long poket blong yu? Blong gat olgeta samting ia insaed long poket blong yu bae i no protektem yu; be taem yu stadi, tingting hevi, mo lisin long olgeta long ol kwaet taem long evri dei, bae i mekem yu gat gud komunikesen tru long Spirit.

Yufala i mas waes long olsem wanem yufala i yusum teknoloji. Makem ol impoten skripja long lektronik tul blong yu, mo lukluk long hem plante taem. Sapos yufala, ol yang pipol, i save luklukbak long wan ves long skripja semmak olsem yufala i stap sendem ol teks mesej, bae i no longtaem, bae yufala i gat plante handred ves blong skripja we yufala i lanem baehat. Ol ves ia, bae oli stap olsem wan strong ples blong kasem insperesen mo bae oli lidim yu tru long Tabu Spirit long ol taem blong nid.

Blong yumi mekem evri samting we yumi save mekem blong invaetem kaen paoa blong Tabu Spirit insaed long laef blong yumi, i impoten long taem we yumi stap traem blong mekem hom blong yumi i folem Sevya. Taem yumi obei mo tekem aksen long ol kwaet toktok ia, i mekem yumi kam strong moa.

Bigfala pis bae i kam moa taem yu joenem hadwok blong yu ia blong stap obei wetem fasin blong givim seves long olgeta raon long yu. Plante pipol tumas we oli ting se oli gat ol smol talen, oli putum tingting i stap daon mo wetem open hat, oli yusum talen blong olgeta blong blesem laef blong olgeta raon long olgeta. Fasin blong stap selfis i rus blong bigfala nogud fasin. Meresin blong fasin blong devel, yu save faenem long eksampol long laef blong Sevya. Hem i soem long yumi, olsem wanem blong lukluk moa long laef blong yumi aotsaed tru long seves we i no selfis i go long ol nara man.

Mi bin lanem wan trutok we i bin hapen fulap taem long laef blong mi, mekem se mi kam blong save hemia olsem wan impoten loa. Hem i soemaot olsem wanem fasin blong obei mo givim seves i joen long paoa blong God. Taem yumi obei long ol komanmen blong Lod mo givim seves long ol pikinini blong Hem we yumi no selfis long hem, wanem i kamaot afta i paoa we i kam long God— paoa blong mekem moa bitim wanem yumi save mekem yumiwan. Ol niu tingting, ol talen, mo ol skil blong yumi oli kam bigwan moa from se yumi kasem paoa long bodi mo paoa we i kam long Lod. Paoa blong Hem i stamba blong stanemap wan hom we i fulap long pis.

Taem yu putum Sevya i stap long medel blong hom blong yu, bae hom ia i kam wan ples blong haed, i no long famle blong yu nomo, be tu, long ol fren we oli laef long ol situesen we oli moa had. Bae oli kam blong laekem kwaet ia we oli filim long ples ia. Welkamem ol fren olsem insaed long hom blong yu. Bae oli kam antap insaed long ples ia we i putum Kraes long senta. Kam ol fren wetem ol fren blong pikinini blong yufala. Stap olsem wan klin eksampol long olgeta.

Wan long ol bigfala blesing we yumi save givim long wol i paoa blong wan hom we Kraes i stap long medel blong hem, long ples we oli tijim gospel, we oli kipim ol kavenan, mo lav i fulap long hem.

Sam yia i pas, afta long wan misin tua, waef blong mi, Janin, i talem long mi abaot wan elda we hem i mitim. Janin i bin askem hem abaot famle blong hem. Hem i sapraes taem elda ia i talem long hem se hem i no gat famle. Afta, hem i eksplenem se taem hem i bon, mama blong hem i givim hem long gavman blong lukaotem hem. Hem i spendem taem blong hem, olsem smol pikinini, long wan hom mo afta i go long wan narafala hom. Hem i bin gat blesing, olsem wan yangfala, blong faenem gospel. Wan famle long wod we i gat lav i bin helpem hem blong gat janis blong go long wan misin.

Afta, Janin i askem waef blong misin presiden abaot gudfala elda ia. Hem i lanem se, sam manis bifo, elda ia i bin stap long misin hom blong sam dei from hem i sik. Long taem ia, elda ia i joenem tufala blong gat famle haos naet. Bifo hem i aot blong gobak long misin, hem i bin askem misin presiden sapos hem i save spendem 2 o 3 dei long en blong misin blong hem insaed long misin hom bakegen. Hem i bin wantem blong luk olsem wanem wan famle we i lukluk long Kraes i wok. Hem i bin wantem blong mekem famle blong hem i folem paten ia.

Mekem evri samting we yu save mekem blong gat wan hom olsem. Go aot long olgeta we oli stap laef long ol had situesen. Stap wan tru fren. Kaen rilesensip ia i olsem kolta we i fulumap ol hol blong laef mo mekem rod ia i smut moa mo i gud moa. Hem i no mas stap olsem wan samting blong kasem moa samting, be wan rij samting blong glad long hem mo serem. Welkamem, insaed long hom blong yu, ol narafala man we oli nidim blong kam strong wetem wan eksperiens olsem.

Mi wantem givim sam las tingting long olgeta we oli lavem wan memba blong famle we i no stap mekem ol gudfala joes. Hemia i save givim jalenj long fasin blong wet mo fasin blong stanap strong. Yumi nidim blong trastem Lod mo taem blong Hem, se i save gat wan gud ansa long ol prea blong yumi mo ol hadwok blong sevem man. Yumi mekem evri samting we yumi save mekem blong givim seves, blesem, mo folem tingting blong God long saed blong evri samting. Hem i invaetem yumi blong putum ol trabol blong yumi daon long leg blong Hem. Wetem fet, bae yumi save kam blong save se hem we yumi lavem we i stap go lus i no stap hemwan, be i stap anda long gudfala ae blong Sevya we i gat lav.

Luksave gud samting we i stap long narafala man, be i no ol nogud samting. Samtaem, wan nogud samting i nidim blong yumi stretem blong i kam klin, be oltaem, bildimap ol klin fasin blong hem.

Taem yu filim se i gat wan tintin tred blong hop, hem i no wan tred be i wan bigfalawan, we i holemtaet laef blong mekem yu kam strong moa mo i leftemap yu. Bae i givim kamfot, mekem se yu save stop blong fraet. Traehad blong laef klin inaf mo putum tras blong yu long Lod.

Yumi no nid blong wari sapos yumi no save mekem long semtaem evri samting we Lod i bin advaesem yumi blong mekem. Hem i bin tokbaot se i gat taem mo stret taem blong evri samting. Olsem ansa blong ol tru prea blong yumi blong Hem i lidim yumi, bambae Hem i lidim yumi long wanem yumi mas lukluk moa long hem long wanwan taem blong laef blong yumi. Yumi save lanem, gro, mo kam olsem Hem, wan stret step afta wan narawan.

Mi talem testemoni blong mi se blong stap laef long wan laef blong stap obei, we i tekem rus insaed long gospel blong Jisas Kraes, i givim wan bigfala stret save blong gat pis mo ples blong haed insaed long hom blong yumi. Bae i gat yet plante jalenj, o hat i soa, be nomata yumi stap long medel blong trabol, yumi save stap glad long pis insaed long yumi mo bigfala glad. Mi testifae se Atonmen blong Jisas Kraes i stamba blong bigfala pis ia, long nem blong Jisas Kraes, amen.