2010–2019
Kom Muaj Kev Kaj Siab Lug Hauv Tsev
April 2013


Kom Muaj Kev Kaj Siab Lug Hauv Tsev

Ib txoj koob hmoov zoo kawg nkaus uas muaj peev xwm rau neeg ntiaj teb yog lub hwj chim ntawm tej tsev uas tsom ntsoov rau Khetos; nyob ntawd peb qhia txoj moo zoo, ua raws li peb tej kev khi lus, thiab muaj kev hlub puv npo.

Ntau lub suab ntawm lub ntiaj teb uas peb nyob qhia peb tias peb yuav tsum ua yam ub yam no. Yeej muaj ntau yam peb yuav tsum ua. Tiam sis peb txhua tus xav muaj ib qhov chaw pov hwm uas muaj kev kaj siab lug tas mus li, ib qhov chaw uas peb nyob tau kom txhawb nqa peb thiab txhawb peb lub zog kom npaj rau tej teeb meem ntawm yav tom ntej.

Qhov chaw zoo tshaj plaws rau kev kaj siab lug no yog nyob hauv peb lub tsev, thaum peb sib zog ua txhua yam peb ua tau kom tus Tswv Yexus Khetos nrog nraim peb nyob hauv.

Tej tsev neeg muaj ib tug txiv tsev uas yog ib tug tsim nyog tuav lub pov thawj hwj uas muaj ib tug poj niam rau siab ntseeg es nyob ua ke nkawd coj ncaj ncees. Ntau tsev neeg tsis zoo li no. Txawm nej muaj tsev neeg zoo li cas los, nej yeej nruab nej tsev neeg thiab lub neej rau tus Tswv Yexus Khetos, vim Nws yog lub hauv paus ntawm kev kaj siab lug tseeb nyob hauv lub neej no.

Ua tib zoo kom nej txhua txoj kev txiav txim siab, txawm los ntawm sab nqaij daim tawv los yog sab ntsuj plig, yog raws li qhov uas tus Cawm Seej xav kom nej ua. Thaum nws yog lub ntsiab ntawm nej tsev neeg, yeej muaj kev kaj siab lug. Muaj kev kaj nplij siab uas nyob hauv lub tsev ntawd puv npo, thiab txhua tus uas nyob haud muaj qhov ntawd.

Tsis yog cov niam tsev txiv tsev yuav tsum ua kom muaj raws li tej lus ntuas no xwb, txawm yog lawv yuav coj txoj hauj lwm no. Cov me nyuam kuj lav ris txoj hauj lwm kom tsom ntsoov rau tus Khetos nyob hauv tsev. Cov niam tsev txiv tsev yuav tsum qhia cov me nyuam paub hais tias tej yam lawv ua yuav ua li cas rau txhua tus uas nyob hauv tsev. Cov me nyuam uas paub tias lawv lav ris tej yam lawv ua, txawm lawv ua ncaj los yog tsis ncaj los yog, yuav loj hlob tuaj ua neeg tsim nyog nyob hauv Vajtswv lub nceeg vaj.

Kuv paub tias nej yuav nco qab tej ntsiab cai tseem ceeb uas ua rau nej tsev neeg tsom ntsoov rau tus Cawm Seej. Cov yaj saub ntuas kom nej thov Vajtswv txhua hnub ib leeg thiab nrog nej tsev neeg, kawm vaj lug kub txhua hnub nej ib leeg thiab nrog tsev neeg, thiab muaj tsev neeg hmo ua ke txhua lub lim tiam; tej no yog tej nqaj tsev thaum yus ua ib lub tsev uas tsom ntsoov rau Khetos. Yog tsis ua tej yam no ces yuav nyuaj rau peb nrhiav tau kev kaj siab lug thiab kev tiv thaiv ntawm lub ntiaj teb uas peb xav tau.

Cia li ua raws li tej uas cov yaj saub qhia tias tus Khetos xav kom nej coj. Tsis txhob tawm tswv yim kom tej kev zoo siab thaum yav tom ntej yuav ploj mus thaum nej taug txoj kev luv thiab tsis ua raws li txoj moo zoo tej ntsiab cai uas ruaj khov kho. Nco ntsoov tias: tej yam me coj yus mus rau tej yam loj. Tej kev txhaum uas yus xav tias tsis tseem ceeb los yog tej yam yus tsis saib xyuas zoo yuav ua rau yus muaj tej teeb meem loj. Qhov tseem ceeb, tej cwj pwm me thiab zoo uas tsis hloov yuav ua rau nej muaj ib lub neej uas muaj koob hmoov ntau npluas mias

Nej cov me nyuam nyob hauv lub Koom Haum Me Nyuam Yaus, nej cov tub hluas ntxhais hluas hauv nej koom haum, thiab nej cov tub txib uas ua hauj lwm tam sim no txawj ua ntau yam zoo dua kuv ua tau thaum kuv muaj hnub nyoog ib yam li nej. Nyob hauv lub neej ua ntej yug los nej yog neeg rau siab heev, nej mloog lus, thiab nej huv. Nyob ntawd, nej tau khwv ua hauj lwm kom muaj txuj ci thiab peev xwm npaj nej tus kheej los rau hauv lub ntiaj teb nrog kev ua siab loj, koob meej, sam xeeb, thiab kev vam meej.

Tsis ntev tas los nej los rau lub ntiaj teb nrog tej txuj ci zoo kawg nkaus thiab kev muaj peev xwm uas tsis paub tag. Tiam sis ntshe muaj xwm txheej nyob ib puag ncig nej. Nej qhov txuj ci thiab kev muaj peev xwm yuav raug txwv tsis pub siv los yog raug puas tsuaj yog tias nej ua raws li tej kev phem kev qias ntawm tus dab phem tej kev ntxias. Tiam sis, Dab Ntxwg Nyoog kov tsis yeej tus Cawm Seej. Peb yeej paub Dab Ntxwg Nyoog txoj hmoov yog dab tsi. Nws paub tias nws twb swb lawm, tiam sis nws xav coj neeg coob npaum li nws coj tau. Nws yuav sim ua rau nej txoj kev zoo thiab kev muaj peev xwm raug puas tsuaj los ntawm qhov uas nws siv nej tej kev qaug zog. Nyob ntawm tus Tswv sab tas li, thiab nej yuav yeej txhua lub sij hawm.

Nej nyob hauv ib lub ntiaj teb uas tej txuj ci technology pheej hloov sai kawg nkaus li. Nyuaj rau kuv tiam neeg feem coob kom paub txhua yam uas hloov npaum li no. Nyob ntawm seb yus siv tej txuj ci technology no, tej kev hloov no tej zaum yuav foom koob hmoov los yog yuav cuam tshuam. Tej txuj ci technology, thaum peb to taub thiab siv rau tej lub hom phiaj ncaj ncees, tsis tas cuam tshuam peb tiam sis yuav pab peb sib txuas lus nrog sab ntsuj plig.

Piv xam hais tias, peb feem coob muaj ib lub tshuab uas ntim hauv peb lub hnab tsho los hnab ris. Qhov no yeej nrog nraim peb; tej zaum peb yuav siv qhov no ntau zaus txhua hnub. Tej zaum tej lub tshuab no muaj tej yam qias neeg thiab laug sij hawm. Tiam sis, yog peb tswj peb tus kheej, qhov txuj ci technology no yog ib lub cuab yeej pov hwm kom txhob raug tej kev phem hauv peb lub sawm fem.

Leej twg yuav ua npau suav tias tsis ntev tas los yus yuav txawj ntim tag nrho tej txhooj vaj lug kub thiab tej zaj ntawm lub rooj sab laj nyob hauv nej lub hnab ris? Qhov uas nej muaj tej ntawd hauv nej lub hnab ris yuav tsis pov hwm nej, tiam sis qhov uas nej kawm, xav txog thiab mloog tej ntawd thaum muaj sij hawm ntsiag to txhua hnub yuav pab nej sib txuas lus dhau ntawm tus Vaj Ntsuj Plig.

Cia li muaj tswv yim siv tej txuj ci technology. Kos cim rau tej nqe vaj lug kub tseem ceeb nyob hauv nej lub tshuab no thiab rov qab saib ntau zaus. Yog nej cov tub hluas ntxhais hluas yuav rov qab saib ib nqe vaj lug kub ntau npaum li nej xa kev ntaus ntawv text, ntshe tsis ntev ces nej yuav cim ntsoov ob peb puas tawm nqe vaj lug kub. Tej nqe no yuav los ua ib lub hauv paus ntawm tus Vaj Ntsuj Plig Dawb Huv txoj kev tshoov siab thiab txoj kev coj thaum nej xav tau.

Peb yuav tsum ua txhua yam peb ua tau kom muaj tus Vaj Ntsuj Plig Dawb Huv txoj kev coj hauv peb lub neej thaum peb pab peb tsev neeg tsom ntsoov rau tus Cawm Seej. Qhov uas peb ua raws li tej kev tshoov siab no txhawb peb lub zog ntxiv.

Nej yuav muaj kev kaj siab lug ntxiv yog hais tias thaum nej siv zog mloog lus nej kuj pab cov neeg uas nyob ib puag ncig. Ntau tus neeg uas xav tias lawv muaj tej txuj ci tsawg tsawg xwb txo hwj chim thiab ua siab dawb siv tej txuj ci no foom koob hmoov rau cov neeg lub neej nyob ib puag ncig lawv. Kev ua qia dub yog lub hauv paus ntawm kev phem loj. Qhov uas kov yeej tau kev phem ntawd yog tus Cawm Seej lub yam ntxwv. Nws qhia peb paub ua neej kom pab lwm tus thiab tsis khuv xim li.

Kuv tau kawm ib qhov tseeb uas yeej hais tas li nyob rau hauv kuv lub neej ua rau kuv paub tias qhov tseeb no yog ib txoj kev cai khov kho. Qhov tseeb no qhia tias kev mloog lus thiab kev pab lwm tus nruab rau Vajtswv lub hwj chim li cas. Thaum peb ua raws li tus Tswv tej lus txib thiab ua siab dawb pab Nws cov me nyuam, ces peb txais Vajtswv lub hwj him—lub hwj chim kom ua tau ntau tshaj qhov uas peb ua tau peb tus kheej. Peb tej kev xav, tej txuj ci, thiab kev muaj peev xwm loj tuaj vim peb txais lub dag lub zog thiab lub hwj chim los ntawm tus Tswv. Nws lub hwj chim yog ib qhov tseem ceeb kom yus tsev neeg muaj kev kaj siab lug puv npo.

Thaum nej muab nej lub tsev tsom ntsoov rau tus Cawm Seej, ces tsis yog nej lub tsev yuav los ua ib qho chaw pov hwm rau nej tsev neeg xwb tiam sis yuav pab nej cov phooj ywg uas muaj tej xwm txheej nyuaj heev thiab. Lawv yuav xav muaj qhov ntsiag to hauv lawv lub siab thaum lawv nyob ntawd. Tos txais cov phooj ywg zoo li no hauv nej tsev. Lawv yuav vam meej hauv qhov chaw uas tsom ntsoov rau Khetos li ntawd. Ua phooj ywg nrog nej cov me nyuam cov phooj ywg. Coj yam ntxwv tsim nyog rau lawv xyaum.

Ib txoj koob hmoov zoo kawg nkaus uas muaj peev xwm rau neeg ntiaj teb yog lub hwj chim ntawm tej tsev uas tsom ntsoov rau Khetos; nyob ntawd peb qhia txoj moo zoo, ua raws li peb tej kev khi lus, thiab muaj kev hlub puv npo.

Ntau xyoo tas los, tom qab wb mus xyuas cov tub txib, kuv tus poj niam, Jeanene, qhia kuv txog ib tug txwj laug uas nws ntsib. Jeanene tau nug txog nws tsev neeg. Jeanene xav tsis thoob thaum nws teb tias nws tsis muaj ib tsev neeg. Nws piav ntxiv hais tias thaum nws yug los, nws niam tau muab nws rau lub tseem fwv tu. Thaum nws loj hlob tuaj nws mus rau ib lub tsev dhau ib lub tsev. Nws tau koob hmoov thaum nws yog ib tug tub hluas vim nws nrhiav tau txoj moo zoo. Ib pawg ntseeg uas hlub nws pab nws muaj cib fim ua tub txib.

Tom qab ntawd Jeanene nug qhov chaw tshaj tawm txoj moo zoo tus thawj tswj hwm tus poj niam txog tus txwj laug no. Nws kawm hais tias ob peb hlis ua ntej tus txwj laug no tau nyob hauv qhov chaw tshaj tawm txoj moo zoo lub tsev tau ob peb hnub vim nws muaj mob. Thaum lub sij hawm ntawd nws tau koom nrog lawv muaj tsev neeg hmo ua ke. Ua ntej nws yuav rov qab mus, nws nug qhov chaw tshaj tawm txoj moo zoo tus thawj tswj hwm seb puas kam nws rov qab los nyob hauv qhov chaw tshaj tawm txoj moo zoo lub tsev ob peb hnub ua ntej nws yuav mus tsev. Nws xav saib ib tsev neeg uas tsom ntsoov rau Khetos ua dab tsi. Nws xav coj nws tsev neeg raws li lawv tsev neeg tus yam ntxwv.

Cia li ua txhua yam nej ua tau kom muaj ib lub tsev zoo li no. Ncav tes pab cov uas muaj lub neej tsis zoo. Cia li ua phooj ywg zoo. Kev ua phooj ywg ruaj khov li no yeej zoo li cov pob zeb uas puv tej qhov zawj ntawm lub neej thiab pab peb txoj kev taug kev tsis nyuaj thiab ua rau peb zoo siab. Kev ua phooj ywg tsis yog ib qho uas yus siv kom tau tej yam yus tus kheej tiam sis yog ib qho muaj nqi uas yuav tsum faib rau lwm tus. Tos txais cov uas xav tau lub dag lub zog ntawm qhov no los rau hauv nej lub tsev.

Kuv xav qhia ob peb yam rau cov uas hlub ib tug hauv tsev neeg uas tsis xaiv qhov zoo. Qhov no yuav sim peb lub siab thiab sim peb txoj kev nyiaj tau. Peb yuav tsum tso siab rau tus Tswv thiab Nws txoj kev teem sij hawm hais tias Nws yuav teb peb tej lus thov thiab peb cawm tau tus ntawd. Peb ua txhua yam peb ua tau kom pab lwm tus, foom koob hmoov rau lawv, thiab lees yuav Vajtswv lub siab nyiam rau txhua yam. Peb siv peb txoj kev ntseeg thiab nco ntsoov tias muaj tej yam uas tus Tswv yuav tsum ua. Nws caw peb muab peb tej nra tso ntawm nws txhais ko taw. Nrog kev ntseeg peb yuav paub tias tsis tau muab tus uas peb hlub no tso tseg tiam sis ib tug Cawm Seej uas hlub nws yeej saib xyuas.

Cia li pom tej yam zoo ntawm lwm tus, txhob nco txog tej yam tsis huv. Tej lub sij hawm yuav tsum pab kom qhov tsis huv yuav raug ntxuav mus, tiam sis txhua lub sij hawm cia li txhawb nqa tej yam tsim nyog uas lawv ua.

Thaum nej xav tias muaj kev cia siab zoo li ib txoj xov nyias nyias xwb, nws tsis yog ib txoj xov tiam sis ib txoj hlua loj uas pab txhawb nqa nej thiab txhawb nej lub dag zog. Nws yuav nplij nej lub siab kom nej thiaj tsis ntshai ntxiv. Cia li ua neej tsim nyog thiab tso siab rau tus Tswv.

Peb tsis tas txhawj yog tias peb ua tsis tau txhua yam thaum tib lub sij hawm uas tus Tswv tau ntuas peb ua los lawm. Nws kuj hais txog ib lub sij hawm thiab ib lub caij uas tau teem rau txhua yam. Thaum peb thov Vajtswv tiag tiag seb peb yuav tsum ua dab tsi, Nws yuav coj peb txoj hau kev kom paub tej yam twg tseem ceeb hauv peb lub neej txhua lub sij hawm. Peb yuav kawm, loj hlob tuaj, thiab rais los ua neeg zoo li Nws ib ruam dhau ib ruam.

Kuv ua tim khawv tias kev ua neej raws li Vajtswv hais, uas tsom ntsoov rau Yexus Khetos txoj moo zoo, yuav ua rau peb muaj kev kaj siab lug thiab kev pov hwm hauv peb tej tsev. Yuav muaj ntau yam kev nyuaj siab thiab kev tu siab, tiam sis txawm yog peb raug kev ntxov siab dab tsi los, peb yuav muaj kev kaj siab lug thiab kev zoo siab loj kawg nkaus. Kuv ua tim khawv hais tias Yexus Khetos txoj Kev Theej Txhoj yog lub hauv paus ntawm txoj kev kaj siab lug no los ntawm Yexus Khetos lub npe, amees.