ដើម្បីមានភាពសុខសាន្ដក្នុងគេហដ្ឋាន
ដោយអែលឌើរ រីឆាដ ជី ស្កត
នៃកូរ៉ុមនៃពួកសាវកដប់ពីរនាក់
ពរជ័យដ៏អស្ចារ្យមួយ ដែលយើងអាចផ្ដល់ទៅឲ្យពិភពលោក គឺអំណាចនៃគេហដ្ឋានដែលផ្ដោតទៅលើព្រះគ្រីស្ទ ជាកន្លែងដែលដំណឹងល្អត្រូវបានបង្រៀន រក្សាសេចក្ដីសញ្ញា និងពោរពេញដោយក្ដីស្រឡាញ់ ។
មានសំឡេងជាច្រើនមកពីលោកិយ ដែលយើងរស់នៅប្រាប់យើងថា យើងគួរតែរស់នៅក្នុងជំហានដ៏រូសរាន់មួយ ។ តែងតែមានអ្វីៗជាច្រើនត្រូវធ្វើ និង សម្រេច ។ ប៉ុន្តែក្នុងខ្លួនយើងម្នាក់ៗ យើងត្រូវការមានកន្លែងជម្រកមួយ ដែលភាពសុខសាន្ដ និង ភាពស្ងប់ស្ងាត់ ជាកន្លែងដែលយើងអាចសម្រាកឲ្យបានស្រួលខ្លួន ដើម្បីរៀបចំសម្រាប់សម្ពាធនាពេលអនាគត ។
កន្លែងដ៏ឥតខ្ចោះសម្រាប់ភាពសុខសាន្ដនោះគឺ ស្ថិតនៅក្នុងរង្វង់ជញ្ជាំងនៃគេហដ្ឋានយើងផ្ទាល់ ជាកន្លែងដែលយើងខំអស់ពីសមត្ថភាព ដើម្បីផ្ដោតទៅលើព្រះអម្ចាស់យេស៊ូវគ្រីស្ទ ។
គ្រួសារមួយចំនួនមានឪពុកដែលកាន់បព្វជិតភាពសក្ដិសម និងមានម្ដាយស្មោះត្រង់ មានការលះបង់ ដែលអ្នកទាំងពីរដឹកនាំគ្រួសារនៅក្នុងសេចក្ដីសុចរិត ។ គ្រួសារមានស្ថានភាពច្រើនប្រភេទផ្សេងៗគ្នា ។ មិនថាអ្នកស្ថិតក្នុងស្ថានភាពណាទេ អ្នកអាចផ្ដោតគេហដ្ឋាន និង ជីវិតរបស់អ្នកទៅលើព្រះអម្ចាស់យេស៊ូវគ្រីស្ទ ត្បិតទ្រង់គឺជាប្រភពនៃភាពសុខសាន្ដដ៏ពិតក្នុងជីវិតនេះ ។
អ្នកគួរតែប្រាកដថា រាល់ការសម្រេចចិត្តដែលអ្នកធ្វើ មិនថាខាងសាច់ឈាម ឬខាងវិញ្ញាណ គឺត្រូវផ្ដោតទៅលើអ្វីដែលព្រះអង្គសង្គ្រោះនឹងចង់ឲ្យអ្នកធ្វើ ។ នៅពេលទ្រង់ជាចំណុចសំខាន់នៅក្នុងគេហដ្ឋានអ្នក នោះសេចក្ដីសុខសាន្ដ និង ភាពស្ងប់ស្ងាត់នឹងកើតមាន ។ មាននូវអារម្មណ៍អះអាងមួយ ដែលមានក្នុងគេហដ្ឋាន ហើយមនុស្សទាំងអស់ដែលរស់នៅក្នុងនោះអាចដឹង ។
ឪពុកម្ដាយ ពុំបំពេញតាមដំបូន្មាននេះតែឯកឯងទេ ទោះបីវាជាតួនាទីរបស់ពួកគេដើម្បីដឹកនាំក្ដី ។ កូនៗ អាចទទួលខុសត្រូវដើម្បីធ្វើឲ្យការខិតខំដើម្បីមានព្រះគ្រីស្ទជាសំខាន់នៅក្នុងផ្ទះបានកាន់តែល្អប្រសើរ ។ វាសំខាន់ដែលឪពុកម្ដាយ ត្រូវបង្រៀនកូនចៅឲ្យដឹងថា ទង្វើរបស់ពួកគេមានឥទ្ធិពលលើសមាជិកម្នាក់ៗ ដែលរស់នៅក្នុងគេហដ្ឋាននោះ ។ កូនចៅដែលបង្រៀនឲ្យដឹងពីទំនួលខុសត្រូវចំពោះទង្វើរបស់ពួកគេ ទាំងសុចរិត ឬអសុចរិត នឹងធំឡើងក្លាយជាពលរដ្ឋដែលគួរទុកចិត្តនៅក្នុងនគរនៃព្រះ ។
ខ្ញុំប្រាកដថា អ្នកអាចស្គាល់គោលការណ៍គ្រឹះដែលដាក់គេហដ្ឋានរបស់អ្នកផ្ដោតទៅលើព្រះអង្គសង្គ្រោះ ។ ព្យាការីឲ្យដំបូន្មាន ឲ្យមានការអធិស្ឋានផ្ទាល់ខ្លួន និង ជាគ្រួសារជាប្រចាំថ្ងៃ សិក្សាគម្ពីរផ្ទាល់ខ្លួន និង ជាគ្រួសារជាប្រចាំថ្ងៃ និង ធ្វើរាត្រីជួបជុំក្រុមគ្រួសារប្រចាំសប្ដាហ៍ វាគឺជាធាតុដ៏សំខាន់នៅក្នុងការធ្វើឲ្យគេហដ្ឋានមានព្រះគ្រីស្ទជាចម្បង ។ បើគ្មានការអនុវត្តរឿងទាំងនេះជាប្រចាំទេ នោះវានឹងពិបាកដើម្បីស្វែងរកបាននូវភាពសុខសាន្ដ និង ការជ្រកកោនពីលោកិយ ដែលយើងប៉ងប្រាថ្នា និង ត្រូវការជាចាំបាច់នោះណាស់ ។
ចូរគោរពប្រតិបត្តិចំពោះការបង្រៀនរបស់ព្យាការី ដែលព្រះគ្រីស្ទចង់ឲ្យអ្នកធ្វើតាម ។ ចូរកុំបង្អាក់សុភមង្គលនាពេលអនាគត ដោយការដើរផ្លូវកាត់ជំនួសឲ្យការអនុវត្តគោលការណ៍ដំណឹងល្អ ដែលគួរឲ្យទុកចិត្តបាន ។ ចូរចាំថា ៖ រឿងតូចៗអាចនាំឲ្យកើតរឿងធំបាន ។ ទង្វើមិនឈ្លាសវៃ ឬ ដោយការធ្វេសប្រហែស អាចនាំឲ្យកើតបញ្ហាធំ ។ ដែលសំខាន់ជាងនេះ ទម្លាប់ល្អ ខ្ជាប់ខ្ជួន ហើយសាមញ្ញ នាំឲ្យជីវិតពោរពេញដោយពរជ័យបរិបូរ ។
កុមារក្នុងអង្គការបឋមសិក្សា យុវជន និង យុវនារីនៅក្នុងកម្មវិធីយុវវ័យ និង អ្នកផ្សព្វផ្សាយសាសនាស្មោះត្រង់ ដែលកំពុងតែបម្រើនាពេលនេះ កំពុងតែធ្វើរឿងជាច្រើនកាន់តែមានប្រសិទ្ធភាពជាងដែលខ្ញុំបានធ្វើកាលពីនៅវ័យស្របាលអ្នក ។ នៅក្នុងជីវិតមុនជីវិតនេះ អ្នកបានបង្ហាញថា អ្នកធ្វើជាអ្នកអង់អាច គោរពប្រតិបត្តិ និង បរិសុទ្ធ ។ ទីនោះ អ្នកបានធ្វើការយ៉ាងខ្លាំងដើម្បីអភិវឌ្ឍទេពកោសល្យ និង សមត្ថភាពជាច្រើន ដើម្បីត្រៀមខ្លួនប្រឈមមុខនឹងជីវិតរមែងស្លាប់ដោយក្លាហាន ថ្លៃថ្នូ កិត្តិយស និង ជោគជ័យ ។
មិនយូរប៉ុន្មានកន្លងទៅនេះ អ្នកមកកាន់ជីវិតរមែងស្លាប់ដោយមានសមត្ថភាព និង លទ្ធភាពដ៏អស្ចារ្យគ្មានទីបញ្ចប់ទាំងអស់នោះ ។ ប៉ុន្តែគ្រោះថ្នាក់ពិតជាមាននៅក្នុងបរិដ្ឋានជុំវិញអ្នក ។ សក្ដានុពល និង សមត្ថភាពដ៏អស្ចារ្យរបស់អ្នក អាចមានកម្រិត ឬ បំផ្លាញចោល បើអ្នកធ្វើតាមការបំពុលដ៏បំផុសរបស់អារក្សនៅជុំវិញអ្នកនោះ ។ ទោះជាយ៉ាងណា សាតាំងពុំអាចខ្លាំងជាងព្រះអង្គសង្គ្រោះឡើយ ។ ផលកម្មរបស់សាតាំងត្រូវបានកំណត់ ។ វាដឹងថាវាចាញ់ ប៉ុន្តែវាចង់បំផ្លាញមនុស្សឲ្យច្រើនបំផុតតាមដែលវាអាចធ្វើទៅបាន ។ វានឹងព្យាយាមបំផ្លាញសេចក្ដីល្អ និង សមត្ថភាពរបស់អ្នក ដោយការប្រើភាពទន់ខ្សោយរបស់អ្នក ។ សូមឈរនៅខាងព្រះអម្ចាស់ នោះអ្នកនឹងឈ្នះគ្រប់ពេល ។
អ្នករស់នៅក្នុងពិភពលោកមួយ ដែលជឿនលឿនខាងបច្ចេកវិទ្យាក្នុងល្បឿនដ៏ហួសវិស័យមួយ ។ វាពិបាកសម្រាប់មនុស្សជាច្រើននៅជំនាន់ខ្ញុំតាមទាន់ការរីកចម្រើនទាំងនោះណាស់ ។ អាស្រ័យលើរបៀបប្រើប្រាស់បច្ចេកវិទ្យា ការជឿនលឿនទាំងនេះ អាចជាពរជ័យមួយ ឬ ជាបញ្ហាមួយ ។ បច្ចេកវិទ្យា នៅពេលយល់ដឹង ហើយប្រើប្រាស់ដោយគោលបំណងសុចរិត នោះវាពុំមែនជាការគំរាមគំហែងទេ តែជាការពង្រីកទំនាក់ទំនងខាងវិញ្ញាណវិញ ។
ឧទាហរណ៍ ៖ ពួកយើងជាច្រើន មានឧបករណ៍អេឡិចត្រូនិចផ្ទាល់ខ្លួន ដែលដាក់ចូលហោប៉ៅយើងបាន ។ យើងកម្រថានឹងទៅណាដោយគ្មានវាណាស់ យើងអាចប្រើវាច្រើនដងក្នុងមួយថ្ងៃ ។ ជាអកុសល ឧបករណ៍ទាំងនេះ អាចជាប្រភពដ៏អាក្រក់មួយ ហើយខ្ជះខ្ជាយពេលវេលា ។ ប៉ុន្តែបើប្រើដោយមានវិន័យ បច្ចេកវិទ្យានេះ អាចជាឧបករណ៍ការពារមួយពីរឿងដ៏អាក្រក់ដែលសង្គមបង្កើតឡើង ។
តើមាននរណាអាចគិតឃើញថា ប៉ុន្មានឆ្នាំកន្លងទៅនេះ យើងនឹងមានបទដ្ឋាននៃគម្ពីរពេញលេញ និង សារលិខិតសន្និសីទទូទៅរាប់ឆ្នាំ នឹងដាក់ចូលក្នុងហោប៉ៅរបស់អ្នកបាននោះ ? ការមានវានៅក្នុងហោប៉ៅពុំអាចការពារអ្នកបានទេ ប៉ុន្តែការសិក្សា ការពិចារណា និង ការស្ដាប់វា អំឡុងពេលស្ងាត់រាល់ថ្ងៃនឹងពង្រីកទំនាក់ទំនងតាមរយៈព្រះវិញ្ញាណ ។
ចូរឈ្លាសវៃនៅក្នុងការប្រើបច្ចេកវិទ្យា ។ ចូរគូសចំណាំបទគម្ពីរសំខាន់ៗនៅក្នុងឧបករណ៍របស់អ្នក ហើយត្រឡប់ទៅមើលវាជាញឹកញាប់ ។ បើមនុស្សវ័យក្មេង នឹងរំឭកខគម្ពីរមួយឲ្យញឹកញាប់ដូចជាអ្នករាល់គ្នាមួយចំនួនផ្ញើសារ នោះអ្នកអាចមានវគ្គគម្ពីររាប់រយវគ្គទន្ទេញចាំយ៉ាងឆាប់ ។ វគ្គគម្ពីរទាំងនោះនឹងជាប្រភពនៃការបំផុសគំនិត និង ការណែនាំដោយព្រះវិញ្ញាណបរិសុទ្ធក្នុងពេលត្រូវការដ៏មានអានុភាព ។
ការខំអស់ពីលទ្ធភាពរបស់យើង អាចអញ្ជើញឲ្យមានឥទ្ធិពលដឹកនាំដ៏ទន់ភ្លន់ពីព្រះវិញ្ញាណបរិសុទ្ធ មកក្នុងជីវិតរស់នៅរបស់យើងគឺ សំខាន់នៅក្នុងការខិតខំរបស់យើង ដើម្បីផ្ដោតគេហដ្ឋានយើងលើព្រះអង្គសង្គ្រោះ ។ ទង្វើប្រកបដោយការគោរពប្រតិបត្តិទៅលើការបំផុសគំនិតទាំងនោះ ពង្រឹងយើងកាន់តែរឹងមាំ ។
ភាពសុខសាន្ដកាន់តែខ្លាំងនឹងកើតមាន នៅពេលអ្នកដាក់ការខិតខំគោរពប្រតិបត្តិរបស់អ្នកបញ្ចូលជាមួយនឹងការបម្រើដល់អ្នកដទៃនោះ ។ មានបុគ្គលជាច្រើន ដែលមានអ្វីដែលគេមើលឃើញថាមានទេពកោសល្យមិនគ្រប់គ្រាន់ បានប្រើទេពកោសល្យទាំងនោះដោយរាបសារ និង សន្ដានចិត្តល្អ ដើម្បីប្រទានពរដល់ជីវិតអ្នកដែលនៅជុំវិញពួកគេ ។ អត្មានិយមគឺជាឬសគល់នៃអំពើអាក្រក់ដ៏ធំ ។ ថ្នាំបន្សាបចំពោះអំពើអាក្រក់នោះ គឺជាគំរូនៅក្នុងជីវិតរបស់ព្រះអង្គសង្គ្រោះ ។ ទ្រង់បង្ហាញយើងនូវរបៀបដើម្បីផ្ដោតជីវិតរបស់យើងក្នុងការបម្រើដល់អ្នកដទៃ ដោយគ្មានភាពអត្មានិយម ។
ខ្ញុំបានរៀនសេចក្ដីពិតមួយ ដែលបានកើតឡើងដដែលៗយ៉ាងញឹកញាប់ក្នុងជីវិតខ្ញុំ ដែលខ្ញុំបានដឹងថាវាជាក្រិត្យវិន័យទាំងស្រុង ។ វាកំណត់ច្បាស់ពីរបៀបដែលការប្រតិបត្តិ និង ការបម្រើទាក់ទងនឹងព្រះចេស្ដារបស់ព្រះ ។ នៅពេលយើងគោរពព្រះបញ្ញត្តិព្រះអម្ចាស់ ហើយបម្រើកូនចៅទ្រង់ដោយពុំអត្មានិយម ជាលទ្ធផល គឺមានអំណាចមកពីព្រះ -- ជាអំណាចដើម្បីធ្វើឲ្យកាន់តែច្រើន លើសពីអ្វីដែលយើងអាចធ្វើបានដោយខ្លួនឯង ។ ការយល់ដឹង ទេពកោសល្យ សមត្ថភាពរបស់យើង ត្រូវបានពង្រីក ដោយសារយើងទទួលកម្លាំង និង អំណាចមកពីព្រះអម្ចាស់ ។ អំណាចរបស់ទ្រង់ គឺជាធាតុគ្រឹះមួយនៃការស្ថាបនាគេហដ្ឋានមួយ ដែលពោរពេញដោយភាពសុខសាន្ដ ។
នៅពេលអ្នកផ្ដោតគេហដ្ឋានរបស់អ្នកទៅលើព្រះអង្គសង្គ្រោះ នោះជាធម្មតាវានឹងក្លាយជាជម្រកមួយ ដែលពុំមែនសម្រាប់តែគ្រួសារអ្នកនោះទេ ប៉ុន្តែសម្រាប់មិត្តភក្ដិ ដែលរស់នៅក្នុងស្ថានភាពលំបាកខ្លាំងផងដែរ ។ ពួកគេនឹងខិតមករកភាពស្ងប់ស្ងាត់ ដែលពួកគេទទួលអាម្មរណ៍បានក្នុងគេហដ្ឋានអ្នក ។ សូមស្វាគមន៍មិត្តដូច្នោះមកក្នុងគេហដ្ឋានរបស់អ្នក ។ ពួកគេនឹងរីកចម្រើន ហើយអភិវឌ្ឍនៅក្នុងបរិស្ថានដែលផ្ដោតទៅលើព្រះគ្រីស្ទជាចម្បងនោះ ។
ពរជ័យដ៏អស្ចារ្យមួយ ដែលយើងអាចផ្ដល់ទៅឲ្យពិភពលោក គឺអំណាចនៃគេហដ្ឋានដែលផ្ដោតទៅលើព្រះគ្រីស្ទ ជាកន្លែងដែលដំណឹងល្អត្រូវបានបង្រៀន រក្សាសេចក្ដីសញ្ញា និងពោរពេញដោយក្ដីស្រឡាញ់ ។
ជាច្រើនឆ្នាំកន្លងទៅ បន្ទាប់ពីការទៅទស្សនាបេសកកម្មមួយ ភរិយាខ្ញុំ ជេនីន បានប្រាប់ខ្ញុំអំពីអែលឌើរម្នាក់ ដែលគាត់បានជួប ។ ជេនីន បានសួរអំពីគ្រួសារគាត់ ។ គាត់ភ្ញាក់ផ្អើលនៅពេល អែលឌើរនោះឆ្លើយថា គាត់គ្មានគ្រួសារទេ ។ គាត់ពន្យល់បន្ថែមទៀតថា នៅពេលគាត់កើតមក ម្ដាយគាត់បានប្រគល់គាត់ទៅឲ្យរដ្ឋាភិបាលចិញ្ចឹម ។ គាត់បានចំណាយពេលកុមារភាពរបស់គាត់រស់នៅពីគ្រួសារចិញ្ចឹមមួយទៅគ្រួសារមួយទៀត ។ គាត់មានពរនៅពេលធំពេញវ័យ ដែលបានរកឃើញដំណឹងល្អ ។ គ្រួសារក្នុងវួដជាទីស្រឡាញ់មួយ បានជួយគាត់ឲ្យមានឱកាសបម្រើបេសកកម្ម ។
ក្រោយមក ជេនីន បានសួរភរិយាប្រធានបេសកកម្មអំពីអែលឌើរនេះ ។ គាត់បានដឹងថា កាលពីប៉ុន្មានខែមុន អែលឌើរនេះបានមកស្នាក់នៅផ្ទះបេសកកម្មពីរបីថ្ងៃ ដោយសារមានជម្ងឺ ។ អំឡុងពេលនោះ គាត់បានចូលរួមនឹងពួកគេក្នុងរាត្រីជួបជុំក្រុមគ្រួសារ ។ មុនពេលគាត់ចាកចេញទៅតំបន់បម្រើវិញ គាត់បានសុំប្រធានបេសកកម្ម បើសិនជាគាត់អាចស្នាក់នៅពីរបីថ្ងៃទៀតនៅពេលបញ្ចប់បេសកកម្មរបស់គាត់ ក្នុងផ្ទះបេសកកម្មនេះម្ដងទៀត ។ គាត់ចង់សង្កេតមើលពីរបៀបដែលគ្រួសារផ្ដោតទៅលើព្រះគ្រីស្ទប្រព្រឹត្ត ។ គាត់ចង់ធ្វើឲ្យគ្រួសារគាត់ដើរតាមពួកគេ ។
ចូរខំឲ្យអស់ពីសមត្ថភាពរបស់អ្នក ដើម្បីមានគេហដ្ឋានបែបនេះ ។ ចូរឈោងទៅជួយអ្នកទាំងឡាយដែលរស់នៅក្នុងស្ថានភាពលំបាក ។ ធ្វើជាមិត្តពិត ។ មិត្តភាពដ៏ខ្ជាប់ខ្ជួនប្រភេទនេះ ជួយអ្នកដទៃឲ្យស៊ូទ្រាំក្នុងការលំបាក ហើយធ្វើឲ្យជីវិតកាន់តែសប្បាយ ។ វាពុំគួរជាធនធានមួយ ដែលប្រើដើម្បីទទួលយកប្រយោជន៍ផ្ទាល់ខ្លួនឡើយ តែជារតនៈសម្បត្តិមួយ ដើម្បីថ្លែងអំណរគុណ និង ចែកចាយ ។ សូមស្វាគមន៍អ្នកដទៃដែលត្រូវការកម្លាំង ដោយការស្នាក់នៅក្នុងគេហដ្ឋានដែលផ្ដោតទៅលើព្រះគ្រីស្ទមកក្នុងគេហដ្ឋានរបស់អ្នក ។
ខ្ញុំសូមផ្ដល់នូវគំនិតចុងបញ្ចប់មួយចំនួនសម្រាប់អ្នកទាំងឡាយដែលស្រឡាញ់សមាជិកគ្រួសារម្នាក់ ដែលពុំជ្រើសរើសត្រឹមត្រូវ ។ នោះអាចជាឧបសគ្គចំពោះការអត់ធ្មត់ និង ការស៊ូទ្រាំរបស់យើង ។ យើងចាំបាច់ត្រូវទុកចិត្តលើព្រះអម្ចាស់ និងពេលវេលារបស់ទ្រង់ ដែលជាចម្លើយវិជ្ជមានមួយ ចំពោះការអធិស្ឋានរបស់យើង ហើយការខិតខំជួយសង្គ្រោះអាចកើតមាន ។ យើងខិតខំអស់ពីសមត្ថភាពដើម្បីបម្រើ ប្រទានពរ និងទទួលស្គាល់ព្រះទ័យរបស់ទ្រង់ដោយការចុះចូលក្នុងរឿងគ្រប់យ៉ាង ។ យើងអនុវត្តសេចក្ដីជំនឿ ហើយចងចាំថា មានរឿងមួយចំនួនដែលចាំបាច់ត្រូវទុកឲ្យព្រះអម្ចាស់ ។ ទ្រង់អញ្ជើញយើងឲ្យដាក់បន្ទុកយើងចុះនៅព្រះបាទទ្រង់ ។ យើងអាចដឹងដោយក្ដីជំនឿថា មនុស្សវង្វេងជាទីស្រឡាញ់រូបនេះ ពុំត្រូវបានបំភ្លេចទេ ប៉ុន្តែស្ថិតនៅក្នុងការមើលថែរបស់ព្រះអង្គសង្គ្រោះជាទីស្រឡាញ់វិញ ។
សូមមើលឃើញពីសេចក្ដីល្អក្នុងខ្លួនអ្នកដទៃ ពុំមែនកំហុសគេឡើយ ។ ជួនកាលកំហុសមួយ ចាំបាច់ត្រូវមានការយកចិត្តទុកដាក់ត្រឹមត្រូវដើម្បីលាងសំអាត ប៉ុន្តែតែងតែផ្ដោត ហើយលើកកំពស់តម្លៃរបស់ពួកគេជានិច្ច ។
នៅពេលអ្នកមានអារម្មណ៍ថា មានក្ដីសង្ឃឹមតែបន្ដិចបន្ដួច នោះក្ដីសង្ឃឹមនោះពុំមែនមានបន្ដិចបន្តួចនោះទេ ប៉ុន្តែជាបណ្ដាញភ្ជាប់ដ៏ធំមួយ ដូចជាអ្នកការពារជីវិត ដើម្បីពង្រឹង និង លើកអ្នកឡើង ។ វានឹងផ្ដល់ការលួងលោមចិត្ត ដូច្នេះអ្នកអាចឈប់ភ័យខ្លាច ។ សូមព្យាយាមរស់នៅដោយសក្ដិសម ហើយដាក់ការទុកចិត្តរបស់អ្នកលើព្រះអម្ចាស់ ។
យើងពុំចាំបាច់បារម្ភឡើយ បើយើងពុំអាចធ្វើអ្វីៗទាំងអស់ ដែលព្រះអម្ចាស់បានទូន្មានឲ្យយើងធ្វើនោះ ។ ទ្រង់ បានមានបន្ទូលថា មានពេលវេលា និង រដូវកាលសម្រាប់រឿងគ្រប់យ៉ាង ។ ជាចម្លើយចំពោះការអធិស្ឋានដោយស្មោះរបស់យើង ដែលសុំការដឹកនាំ នោះទ្រង់នឹងដឹកនាំយើងក្នុងអ្វីដែលគួរតែយកចិត្តទុកដាក់ តាមចំណែកនីមួយៗនៃជីវិតរបស់យើង ។ យើងអាចរៀន រីកចម្រើន និង ប្រែក្លាយដូចជាទ្រង់មួយជំហានម្ដងៗដោយខ្ជាប់ខ្ជួន ។
ខ្ញុំថ្លែងទីបន្ទាល់ថា ការរស់នៅក្នុងជីវិតគោរពប្រតិបត្តិ ចាក់ឬសយ៉ាងមាំនៅក្នុងដំណឹងល្អនៃព្រះយេស៊ូវគ្រីស្ទ ផ្ដល់ជាការអះអាងដ៏មហិមាបំផុតសម្រាប់ភាពសុខសាន្ដ និង ជម្រកក្នុងគេហដ្ឋានរបស់យើង ។ វាក៏នឹងនៅមានឧបសគ្គ ឬ ការខូចចិត្តជាច្រើនផងដែរ តែទោះជាស្ថិតនៅក្នុងការលំបាកក្ដី ក៏យើងអាចរីករាយនឹងភាពសុខសាន្ដ និង សុភមង្គលក្នុងខ្លួនរបស់យើងដែរ ។ ខ្ញុំថ្លែងទីបន្ទាល់ថា ដង្វាយធួននៃព្រះយេស៊ូវគ្រីស្ទ គឺជាប្រភពនៃភាពសុខសាន្ដដ៏បរិបូរ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។