N̄an Kōm̧m̧an bwe en Wōr Aenōm̧m̧an ilo Kapijuknen

Elōn̄ ainikien ko jān laļ in me jej mour ie rej jiron̄ kōj jej aikuj mour ilo juon jekjek eo ekairiir. Elōn̄ eļapļo̧k iien otemjej n̄an kōm̧m̧ane im n̄an kadedeļo̧k eļapļo̧k. Kōn menin itum̧wilaļ ilowaad ej juon aikuj n̄an wōr juon jikin kone me aenōm̧m̧an im lure rej anjo, juon jikin me jemaron̄ kakkije, bar aiin doon, im bar kōkajoorļo̧k n̄an m̧aanjappopo n̄an kajoor ko ilju im jekļaj.

Jikin eo em̧m̧an me aenōm̧m̧an ej pād ilowaan kapijuknen ko ad make, ijo jej kōm̧m̧ane aolep men jemaron̄ e n̄an kōm̧m̧an bwe Irooj Jisōs Kraist ej ioļapļap eo.

Jet kapijuknen ewōr juon baba me ej juon rikabwijer priesthood eo erreo im barāinwōt juon m̧am̧a eo etiljek, ekije me rej ippān doon ilo tōl ilo jim̧we. Elōn̄ kapijuknen eoktak jekjek ko ie. Jekdo̧o̧n jekjek rōt ko ami, kom̧ maron̄ likūt kapijuknen eo ami ioļap in mour eo ami ioon Irooj Jisōs Kraist, bwe E ej unin aenōm̧m̧an eo em̧ool ilo mour in.

Kom̧ij aikuj kōm̧m̧an bwe aolep jokālet ko kom̧j kōm̧m̧ani, men̄e ilo kanniōk ak jetōb, ej pedped ioon ta eo Rilo̧mo̧o̧r eo enaaj kar kōņaan bwe kom̧in kōm̧m̧ane. N̄e ej ioļapen kapijuknen eo ami, ewōr aenōm̧m̧an im jokane. Ewōr juon jetōb in kam̧ool me ej kobrak kapijuknen eo, im kar en̄jake jān aolep ro me rej jokwe ie.

Kūrm̧ool eo an kapilōk in ejjab aikuj pād wōt ioon ro jinen im jemen, men̄e ej eddo eo aer n̄an tōl. Ajri ro remaron̄ eddo n̄an kōkōm̧anm̧anļo̧k kijejeto ko an piktok in Kraist ilo kapijuknen eo. Eaorōk n̄an ro jinen im jemen n̄an katakin ajri ro n̄an kile ekōjkan an m̧akūtkūt ko aer jelet kajjojo ro rej jokwe ilo kapijuknen eo. Ajri ro rej kōm̧m̧an bwe ren eddo kōn m̧akūtkūt ko aer, men̄e rejim̧we ak bōd, eddōkļo̧k n̄an erom rilaļ ro lōke er ilo aelōn̄ in kiin̄ eo an Anij.

Ijeļā kom̧ maron̄ kile pedped ko raorōk me rekaioļapļap kapijuknen eo ami ilo Rilo̧mo̧o̧r eo. Kanaan in kapilōk in n̄an kōm̧m̧ane jar eo am̧ make im an baam̧le, ekkatak jeje ko rekwojarjar am̧ make im an baam̧le kajjojo iien, im nokon in jota aolep wiik rej aorōk, jekjek ko raorōk n̄an kaioļapļap kapijuknen eo ilo Kraist. Ilo an jako iminene kein aolep iien enaaj pen n̄an lo ikdelel eo im aenōm̧man eo im jikin kone eo eļap aikuji jān laļ in.

Pokake n̄an kanaan in katak ko Kraist enaaj kar kōņaan bwe kom̧in ļoori. Jab jekpen ņae m̧ōņōņō eo ilju im jekļaj kōn bōk iaļ ko rekadu ijello̧kin kōjerbal pedped ko an ko̧jpel eo pedped ioer. Kememej: men ko reddik rej tōļļo̧k n̄an men ko reļļap. Ealikkar an jabwe jab kea ak kowaan maron̄ tōlļo̧k n̄an jorrāān ko reļļap. Me eo eaorōkļo̧k, elem waan, jejjet, iminene em̧m̧an ej tōl n̄an juon mour eobrak kōn kōjeram̧m̧an ko rem̧m̧an.

Kom̧ ajri ro ilo Būraimere, kom̧ likao ro im jiron̄ ro ilo būrookraam̧ ko an rūm̧m̧an ded, im kom̧ mijenede ro retiljek kiiō rej jerbal rej kōm̧m̧ani men ko rellōn̄ rewejepedik jān ke iaar maron̄ kōm̧m̧ani ilo dedjab kane ami. Ilo mour eo m̧okta kom̧ kar kam̧ool n̄an erom peran, pokake, im erreo. Ijo, kom̧ kar buuļ jerbal n̄an kōļapļo̧k tōļan ko im maron̄ ko n̄an kōpooj kom̧ make n̄an jelm̧ae wabanban kōn peran, utiej, kautiej, im wejepedik.

Ejjab etto kom̧ kar itok n̄an mour wabanban in kōn aolep maron̄ kein rekabwilōn̄lōn̄ im kōjatdikdik ko ejjeļo̧k jem̧ļo̧kier. Kōn menin ewōr juon kauwōtata em̧ool ilo peļaak eo ipeļakiimi. Aorōk eo ami eļap im maron̄ eo emaron̄ in wōr jon̄an ak kakkure eļan̄n̄e kom̧ij ron̄jake im̧we-nana eo ettoon ipeļakiimi. Mekarta, Satan ejjab maron̄ jum̧we Rilo̧mo̧o̧r eo. Jem̧ļo̧k eo an Satan kar jokālete. Ejeļā eaar jōbwābwe, bōtaab ekōņaan kakkure jon̄an lōn̄ in armej ro ekōņaan. Enaaj kajieon̄ kakkure em̧m̧an eo im maron̄ eo ami ilo kakkure m̧ōjņo ko ami. Pād wōt ijo ippān Irooj, im kom̧ naaj anjo aolep iien.

Kom̧ij mour ilo juon laļ eo me menin kapeel ko remootļo̧k im̧aan ilo juon jekjek eo eļap. Epen n̄an elōn̄ iaan epepen eo aō n̄an pād wōt ilo men kein. Pedped ioon ekōjkan an menin kapeel eo jerbal, ļapļo̧k kein remaron̄ in juon kōjeram̧m̧an ak juon jorrāān. Menin kapeel, n̄e meļeļe kake im kōjerbale n̄an jibadbad ko an rejim̧we, ejjab aikuj juon kauwōtata bōtaab ijello̧kin juon eddōkļo̧k n̄an letok letak meļeļe ilo jetōb.

N̄an waanjon̄ak: elōn̄ iaad ewōr nejin electronic device me jon̄an wōt bōjo̧ eo an. Jemaron̄ jaje ta n̄e ejako; jemaron̄ kōjerbale elōn̄ alen ilo juon raan. Ejerata, device kein remaron̄ erom juon unin ettoon im joļo̧k eļap iien. Bōtaab, kōjerbale ilo kipel, menin kapeel in emaron̄ juon kein jerbal an kōjparok jān nana ko juon jukjukinpād ej kwaļo̧ki.

Wōn emaron̄ in kar ļōmņak ejjab lōn̄ iiō ko remootļok aolepān jerbal ko rekwojarjar im iiō ko an ennaan ko an kweilo̧k eo eļap naaj kar deļōn̄ n̄an lowaan bōjo̧ eo am̧? Bōk men kein ilo bōjo̧ eo am̧ naaj jab kōjparok eok, bōtaab ekkatak, kejōkļo̧kjeņ, im ron̄jaki ilo iien ko reikōn̄ kajjojo an raan naaj kōkōm̧anm̧anļo̧k kōnono kōn Jetōb.

Lo̧le kōn ekōjkan am̧ kaorōk menin kapeel ko. Kōkaļļeik eoon ko raorōk ilo device eo am̧ im kōmakijkij bar ro̧o̧l n̄ani. Eļan̄n̄e kom̧ jodikdik ro naaj etale juon eoon in jeje ko rekwojarjar emakijkij in wōt an jet iaami jeje ennaan ko, emaron̄ m̧ōkaj ami kakilōklōk buki eoon in jeje ko rekwojarjar. Eoon kein naaj maron̄ kam̧ool juon kein jipan̄ ekajoor an im̧we im tōl jān Jetōb Kwojarjar ilo iien aikuj ko.

Kōm̧m̧ane aolep men jemaron̄e n̄an kūr tok kareel eo ejouj, tōl an Jetōb Kwojarjar n̄an mour ko ad ej aorōk ilo ad kajieon̄ kaioļapļap kapijuknen ko ad ilo Rilo̧mo̧o̧r. Jerbal ilo pokake im̧we ko ej kōkajoorļo̧k kōj em̧ool eļapļo̧k.

Aenōm̧m̧an eo eļapļo̧k naaj itok ilo ami kobaik kijejetok ko ami n̄an pokake kōn jerbal n̄an ro ipeļaakimi. Elōn̄ kajjojo ro me ewōr ta eo rej loe āinwōt tōļan ko rejabwe rōkōttā im kōjerbali ilo jouj tōļan ko n̄an kōjeram̧m̧an mour ko an ro ipeļakier. Ļōmņak kōn eok make ej okran nana eļap. Uwaak eo n̄an nana jab in ej waanjon̄ak ilo Mour eo an Rilo̧mo̧o̧r.Ej kwaļo̧k n̄an kōj ekōjkan kalimjōk wōt mour ko ad itulik ilo jab ļōmņak kōn kōj make ilo jerbal in jipan̄ n̄an ro jet.

Iaar katak juon m̧ool me kar emakijkij āliji ilo mour eo aō me iaar itok n̄an jeļā kake āinwōt juon kien em̧ool. Ej kōmeļeļeik wāween eo pokake im jerbal in jipan̄ rej iookļo̧k kajoor eo an Anij. N̄e jej pokake kien ko an Irooj im jerbal n̄an ajri ro Nejin ilo jab ļōmņak kōn kōj make, lukkuun aorōk eo ej kajoor eo jān Anij— kajoor eo n̄an kōm̧m̧an eļapļo̧k jān ad maron̄ kōm̧m̧ane kōn kōj make. Meļeļe ko ad, tōļan ko ad, maron̄ ko ad rej ļapļo̧k kōnke jej bōk kije im kajoor eo jān Irooj. Kajoor eo An ej juon m̧ōttan eaorōk n̄an kajutak juon kapijuknen eobrak kōn aenōm̧m̧an.

Ilo ami kaioļapļap kapijuknen eo ami ilo Rilo̧mo̧o̧r eo, enaaj make erom juon jikin kone ejjab wōt n̄an baam̧le eo ami bōtaab barāinwōt n̄an ro m̧ōttami me rej mour ilo jekjek ko reppenļo̧k. Renaaj kepaakwaj inem̧m̧an eo rej en̄jake ijo. Karuwainene rein m̧ōttami n̄an kapijuknen eo ami. Renaaj romaak ilo mejatoto eo eioļapļap ilo Kraist. Erom m̧ōttā ippān ajri ro nejin ro m̧ōttami. Erom waanjon̄ak eo erreo n̄an er.

Juon iaan kōjeram̧m̧an ko reļļap jemaron̄ leļo̧k n̄an laļ in ej kajoor eo an kaioļapļap kapijuknen ilo Kraist me ko̧jpeļ eo ej katakin, bujen ko rej kōjparoki, im iakwe eļap ej waļo̧k.

Iiō ko ļo̧k, ālkin loļo̧k juon mijen, lio pāleō, Jeanene, kar jiron̄ eō kōn juon elder eo eaar ioone. Jeanene eaar kajjitōk ippān kōn baam̧le eo an. Eaar bwilōn̄ ke eaar uwaak bwe ejjeļo̧k an baam̧le. Eaar kōmeļeļeik bwe ke eaar ļotak, jinen eaar leļo̧k e n̄an kien n̄an kōkajiririki. Eaar joļo̧k iien an ajri jān juon im̧ōn ritajinemjen n̄an bar juon. Eaar jeram̧m̧an ke eaar juon jodikdik n̄an lo ko̧jpel eo. Juon baam̧le jān juon ward eiakwe eaar jipan̄ e n̄an bōk iien eo em̧m̧an n̄an jerbale juon mijen.

Tokālik Jeanene eaar kajjitōk ippān lio ippān mijen būreejtōn eo kōn elder in em̧m̧an. Eaar jeļā bwe jet allōn̄ m̧oktaļo̧k elder in eaar pād ilo m̧weo im̧ōn mijen eo ium̧win jet raan ko kōn an nan̄inmej. Ilo iien in eaar koba ippāer n̄an juon nokon in jota an baam̧le. M̧okta jān an kar bar ro̧ol n̄an jikin jerbal, eaar kajjitōk ippān mijen būreejtōn eo eļan̄n̄e emaron̄ kar joļo̧k ruo ak jilu raan ilo jem̧ļo̧k in mijen eo an ilo m̧weo im̧ōn mijen bar juon alen. Eaar kōņaan lale ekōjkan an jerbal ko an baam̧le eo ioļapļap ilo Kraist. Eaar kōņaan jon̄ake baam̧le eo an ālkin eo aer.

Kōm̧m̧ane aolep men kom̧ maron̄ n̄an wōr kain kapijuknen rōt in. Pukōt ļo̧k ro rej mour ilo jekjek ko reppen. Erom juon m̧ōttan eo em̧ool. Kain jemjerā rōt in eaitok kitien ej jipan̄ ro jet niknik ilo men ko reppen im kōm̧m̧an bwe mour ko ad ren em̧m̧an. Ejjab aikuj in erom juon kein jipan̄ eo kōjerbale n̄an bōk jeram̧m̧an an juon make bōtaab juon menin aorōk n̄an kam̧oolol im kwaļo̧ke. Karuwaineneik ro jet n̄an kapijuknen eo ami me rej aikuj in kōkajoorļo̧k jān kain en̄jake rōt in.

Ij lewaj jet ļōmņak ko āliktata n̄an ro me rej iakwe ro uwaan baam̧le eo me ejjab kōm̧m̧ane kālet ko rem̧m̧an. Menin emaron̄ idajon̄jon̄e kijenmej eo ad im niknik eo. Jej aikuj in lōke ilo Irooj im ilo iien eo An bwe juon uwaak em̧m̧an n̄an jar ko ad im jerbal ko an kijejeto eo ad emaron̄ waļo̧k. Jej kōm̧m̧ane aolep men jemaron̄ n̄an jerbal, n̄an kōjeram̧m̧an, im n̄an leļo̧k ilo kile ankilan Anij ilo aolep men ko. Jej kōjerbal tōmak im kememej bwe ewōr jet men ko me aikuj in doori wōt n̄an Irooj. Ej kūr kōj n̄an door eddo ko ad ilo Neen. Kōn tōmak jemaron̄ jeļā bwe in ebōd ejitōnbōro ejjab kowaane bōtaab ej pād ilo mije an Rilo̧mo̧o̧r eo eiakwe.

Kile em̧m̧an eo ilo ro jet, ejjab bōd ko aer. Ilo iien ko juon bōd ej aikuji kalimjōk eo ejejjet n̄an erom erreo, bōtaab iien otemjej kalōk im kōketak wānōk ko aer.

N̄e jej en̄jake bwe ewōr wōt jidik kōjatdikdik, ejjab juon men edik bōtaab juon ekkeijel, āinwōt juon kein kōjparok mour n̄an kōkajoorļo̧k im ļōn̄aj kom̧. Enaaj letok kaenōm̧m̧an bwe kom̧in maron̄ bōjrak ami mijak. Kajieon̄ mour erreo im likūt ami lōke ilo Irooj.

Jejjab aikuj inepata eļan̄n̄e jejjab maron̄ ilo ejja iien eo wōt kōm̧m̧ane aolep men ko me Irooj eaar kapilōk kōj n̄an kōm̧m̧ani. Eaar kōnono kōn juon iien im juon un n̄an aolep men ko. Ilo uwaake jar ko ad rem̧ool kōn tōl, Enaaj tōl kōj ilo ta eo jej aikuj kaorōke ilo kajjojo tōre in mour eo ad. Jemaron̄ katak, eddōk, im eromļo̧k āinwōt E juon bun̄tōn ilo juon iien.

Ij kwaļo̧k naan in kam̧ool bwe mour juon mour epokake, eliok titbok ilo ko̧jpeļ eo an Jisōs Kraist, ej letok kam̧ool eo eļapļo̧k kōn aenōm̧m̧an im jikin kone ilo kapijuknen ko ad. Enaaj lōn̄ wōt apan̄ ko ak rup bōro ko, bōtaab em̧ool ilo ioļapļap in jorrāan eo, jemaron̄ lan̄lōn̄ kōn aenōm̧m̧an im lo m̧ōņōņō. Ij kam̧ool bwe Pinmuur eo an Jisōs Kraist ej un eo me aenōm̧m̧an ko rellōn̄ ilo etan Jisōs Kraist, amen.