No te hau i te fare

Ua rau te mau reo i roto i teie ao ta tatou e ora nei o te parau mai nei ia horo haere i roto i te oraraa. Ua pu‘e noa te ohipa ia rave e te ohipa ia faaoti. Noa’tu râ te reira, i roto i te hohonu o to tatou hiro‘a tata‘itahi, te vai ra te titauraa ia vai te hoê vahi haapuraa i reira te hau e te au maitai e vai tamau noa ai, te hoê vahi e nehenehe ai ta tatou e faaapî ia tatou, e haaputuputu e e faaineine e e faaitoito faahou no te mau faaheporaa no ananahi.

Te vahi tano maitai no taua hau ra, tei roto ïa i te patu o to tatou fare, i reira tatou i te rohi-noa-raa no te faariro i te Fatu ra ia Iesu Mesia ei tuhaa tumu no tatou.

Te vai ra te mau utuafare e metua tane ti‘amâ o te mau nei i te autahu‘araa, apitihia e te hoê metua vahine haapa‘o maitai o te te pûpû nei ia’na iho ; e raua toopiti e arata‘i ra na roto i te parau-ti‘a. E rave rahi utuafare e faanahoraa taa ê to ratou. Noa’tu â te huru o to tatou oraraa, e nehenehe ta tatou e faatumu i to tatou utuafare e i to tatou oraraa i ni‘a i te Fatu ra ia Iesu Mesia, o Oia ho‘i te tumu no te hau mau i roto i te oraraa nei.

A haapapû maitai e, te mau faaotiraa atoa ta outou e rave, i te pae tino anei e aore râ i te pae varua, tei te huru ïa i te mea ta te Faaora e tia‘i ia outou ia rave. Ia riro ana‘e Oia ei tumu no to outou utuafare, e vai ïa te hau e te au maitai. E varua taiâ ore te tomo mai i roto i te fare, e pauroa te taata e noho i reira e farii mai i te reira.

Aita te manuïaraa o teie parau e turu‘i noa i ni‘a i na metua toopiti, noa’tu â pai na raua te hopoi‘a ia faatere. E ti‘a atoa i te mau tamarii ia amo i te hopoi‘a no te haamaitairaa i te mau tautooraa o te utuafare, ia faatumu i ni‘a i te Mesia. E mea faufaa roa no te mau metua ia haapii i te mau tamarii ia ara e nahea ta ratou mau ohipa i te haaputapû i te taata hoê e ora ra i roto i te utuafare. Te mau tamarii tei haapiihia ia amo i te utu‘a no ta ratou mau ohipa, te mea parau-ti‘a anei e aore râ aita, e paari mai ïa ratou ei tino huiraatira ti‘aturihia i roto i te basileia o te Atua.

Ua papû ia’u e, ua nehenehe ta outou e faataa mai i te mau ture niu no te faatumu i to outou utuafare i ni‘a i te Faaora. Te parau a‘o a te peropheta ia rave i te pure taata hoê e te pure utuafare i te mau mahana atoa, te tuatapaparaa i te papa‘iraa mo‘a a te taata hoê e a te utuafare i te mau mahana atoa, e te pureraa pô utuafare i te mau hebedoma atoa, e mau pou faufaa ïa o te turu nei i te paturaa i te hoê fare faatumuhia i ni‘a i te Mesia. Aita ana‘e teie mau raveraa tamau, e fifi ïa tatou no te ite mai i te hau e hinaarohia e o te titauhia, e i te haapuraa no te paruru ia tatou i to teie nei ao.

A haapa‘o i te mau haapiiraa a te peropheta ta te Mesia e tia‘i ra ia outou ia pee. Eiaha te popou no ananahi e faatumu-haere-noa-hia i ni‘a i te mana‘o, e na te mau tapu-haapoto-raa e mono i te mau parau tumu papû o te evanelia. A haamana‘o e : e arata‘i te mau mea iti i te mau mea rarahi. E te mau mana‘o rii paari ore e te mau haapa‘o-ore-raa na‘ina‘i, e nehenehe ïa e arata‘i i te fifi rahi. Hau atu râ, te mau peu rii ohie e te tamau e te maitai, e arata‘i ïa te reira i te oraraa ua î i te mau haamaitairaa.

O outou te mau tamarii o te Paraimere, outou te feia apî tamaroa e tamahine e ta outou mau faanahoraa ohipa, e outou atoa te mau misionare aueue ore e tavini ra, ua rahi a‘e te mau mea aravihi ta outou e rave ra i tei noaa ia’u i to outou faito matahiti. I roto i te oraraa hou i te tahuti nei, ua faaite outou i to outou itoito, to outou haapa‘o maitai e to outou ti‘araa mâ. I reira, ua haa puai outou no te faatupu i te mau taleni e te mau aravihi no te faaineine ia outou no te faaruru i te tahuti nei ma te itoito, te ti‘amâ, te tura e te manuïa.

Aita i maoro a‘enei ua tae mai outou i te tahuti nei e to outou mau aravihi teitei e ta outou mau rave‘a pau ore. Teie râ, te vai mau ra te fifi rahi i roto i te ao e faaati ra ia outou. To outou faito puai rahi e to outou aravihi, e nehenehe te reira e taoti‘ahia e aore râ e mou roa ia hema outou i mua i te viivii e faaati ra ia outou tei faaûruhia e te diabolo. Noa’tu râ, eita te faito o Satane e ti‘a i te faito o te Faaora. Ua oti te parau o Satane i te faataahia. Ua ite oia i to’na pau, ua hinaaro noa râ oia e huti mai ia’na ra te rahi a‘e e noaa ia’na. E tamata oia i te tu‘ino i to outou maitai e to outou aravihi na roto i te ‘umeraa i to outou mau paruparu. A faaea i te pae o te Fatu e e upooti‘a outou i te mau taime atoa.

Te ora nei outou i roto i te hoê ao no te mau rave‘a apî o te nuu vitiviti roa nei. E mea fifi rii no te rahiraa o te u‘i no to’u faito matahiti ia pee i teie mau rave‘a. Ia au i te faaohiparaa i teie mau rave‘a apî, e riro mai teie mau nuuraa ei haamaitairaa e aore râ ei faahahi-ê-raa. Teie mau rave‘a apî, ia maramaramahia e ia faaohipahia no te mau opuaraa parau-ti‘a, eita ïa te reira e riro mai ei haamăta‘uraa, ei rave‘a faarahi râ i te aparauraa pae varua.

Ei hi‘oraa, e rave rahi o tatou e fana‘o nei i te hoê matini uira o te ô i roto i te pute. Varavara tatou e vaiiho i te reira ; e e hi‘o tatou i te reira e rave rahi taime i te mahana hoê. Te vahi ino ra, e nehenehe i teie mau matini e riro mai ei tumu no te ha‘iriiri e no te taime pau. Ia faaohipahia râ ma te auraro i te tahi ture, e riro mai ïa teie mau rave‘a apî ei tauihaa paruru ia tatou i te ino rahi o te sotaiete.

I roto i te mau matahiti i ma‘iri na, o vai pai te nehenehe e feruri e, e ô roa mai te mau buka tumu a te Ekalesia e te mau a‘oraa o te mau amuiraa rahi i ma‘iri i roto i to’na pute ? Aita te fana‘oraa i te reira i roto i to outou pute e paruru ia outou, na te tuatapaparaa râ, e te feruri-maite-raa e te faarooraa i te reira i roto i te mau taime maniania ore o te mahana hoê e faarahi i te aparauraa na roto i te Varua.

A faaite i te paari i roto i te huru o ta outou faaohiparaa i te mau rave‘a apî. A tapa‘o i te mau papa‘iraa mo‘a faufaa rahi i ni‘a i ta outou matini e a hi‘o pinepine i te reira. Ahani outou te feia apî e hi‘o pinepine i te hoê irava o te papa‘iraa mo‘a mai ta outou e hapono nei i te parau niuniu, oioi roa ïa outou i te tamauraa e rave rahi hanere irava papa‘iraa mo‘a. E riro mai teie mau irava ei puna rahi no te faaûruraa e no te arata‘iraa na roto i te Varua Maitai i te taime hinaarohia.

Te imiraa i te mau rave‘a atoa no te titau i te faaûruraa mărû e te arata‘iraa a te Varua Maitai i roto i to tatou oraraa, e ohipa faufaa ïa te reira i roto i ta tatou mau tamataraa no te faatumu i to tatou utuafare i ni‘a i te Faaora. E na te raveraa i te ohipa ma te haapa‘o i teie mau muhumuhu e haapuai atu â ia tatou.

E hau rahi a‘e te tae mai a rave apiti ai outou i te mau tautooraa ia haapa‘o ma te taviniraa ia ratou e faaati ra ia outou. E rave rahi ho‘i taata, o te hi‘ohia nei ei taata taleni na‘ina‘i, e faaohipa nei i te reira mau taleni ma te haehaa e te rima here no te haamaitai i te oraraa o te feia e faaati nei ia ratou. O te peu pipiri te aa o te ino rahi. E ite-papû-hia te rave‘a no te faaoraraa i teie ino i roto i te oraraa o te Faaora. Te faaite nei Oia e, nahea ia haamo‘e i to tatou oraraa i roto i te taviniraa pipiri ore.

E parau mau ta’u i apo mai, tei tupu pinepine roa i roto i to’u oraraa, e ua tae roa vau i te faariro i te reira ei ture rahi mau. Te faataa nei te reira i te huru haapa‘oraa e te taviniraa e tu‘ati i te mana o te Atua. Ia haapa‘o ana‘e tatou i te mau faaueraa a te Fatu ma te tavini i Ta’na mau tamarii ma te pipiri ore, te hopearaa ohie o te tae mai, o te mana ïa no ô mai i te Atua ra—te puai no te rave rahi atu â, i te mea o ta tatou e nehenehe e rave no tatou iho. To tatou mau mana‘o, ta tatou mau taleni, to tatou mau aravihi, ua faaaanohia ïa no te mea ua farii tatou i te puai e te mana no ô mai i te Fatu ra. O To’na mana te hoê tuhaa faufaa rahi roa no te faati‘a i te hoê utuafare ua î i te hau.

A faatumu ai outou i to outou utuafare i ni‘a i te Faaora, e riro ohie mai ïa te reira ei haapuraa eiaha no to outou noa utuafare no to outou atoa râ mau hoa e ora ra i te mau taime fifi. E ‘umehia mai ratou i te au maitai ta ratou e ite i reira. A farii i taua mau huru hoa ra i roto i to outou fare. E u‘aa mai ratou araua‘e i roto i taua vahi ra tei faatumuhia i ni‘a i te Mesia. A riro ei hoa no te mau hoa o ta outou mau tamarii. A riro ei hi‘oraa ti‘amâ no ratou.

Te hoê o te mau haamaitairaa rahi roa a‘e ta tatou e nehenehe e pûpû atu i teie nei ao, o te puai ïa o te hoê utuafare tei faatumuhia i ni‘a i te Mesia, i reira te evanelia e haapiihia ai, te mau fafauraa e haapa‘ohia ai e e unauna ai te here.

A rave rahi matahiti i teie nei, i muri iho i te hoê tere misioni, ua parau mai ta’u vahine Jeanene ia’u no ni‘a i te hoê misionare ta’na i farerei. Ua ani atu Jeanene ia’na no ni‘a i to’na utuafare. Ua maere roa oia e, ua pahono mai oia aita to’na e utuafare. Ua faataa atura oia e, i to’na fanauraahia, ua tuu to’na metua vahine ia’na i roto i te hoê pû a te hau no te haapa‘o ia’na. I to’na vai-tamarii-raa, ua haere noa oia mai tera utuafare i tera utuafare. Ei taure‘are‘a, ua haamaitaihia oia i te iteraa i te evanelia. Ua tauturu te hoê utuafare o te paroisa ia’na no te fana‘o i te rave‘a no te tavini i te hoê misioni.

I te hoê mahana i muri iho, ua ani o Jeanene i te vahine a te peresideni misioni no ni‘a i teie misionare maitai. Ua faaroo atura oia e, te tahi rii noa ava‘e na mua a‘e, ua faaea taua misionare ra i te fare misioni no te tahi rii mahana, ua roohia oia i te ma‘i. No tera roaraa taime, ua amui oia ia ratou no te pureraa pô utuafare. Hou oia a faaru‘e atu ai no te ho‘i i roto i te aua misioni, ua ani oia i te peresideni misioni, e nehenehe anei ta’na e faaea faahou â i te fare misioni e piti e aore râ e toru mahana i te hopea o ta’na misioni. Ua hinaaro oia i te hi‘o maitai nahea te hoê utuafare faatumuhia i ni‘a i te Mesia e tere ai. Ua hinaaro oia e faahoho‘a i to’na utuafare i ni‘a i to ratou.

A rave i te mea atoa e roaa ia outou no te faatupu i te hoê utuafare mai te reira. A faatoro atu i te rima ia ratou o te ora ra i roto i te oraraa huru ê. A riro ei hoa mau. Teie huru auhoaraa maoro, mai te tâ ïa e tapo‘i nei i te mau apoo o te oraraa no te faaohie i te tere ia riro mai ei mea au. Eiaha te reira ia riro ei rave‘a no te apî mai i te tahi faufaa na outou iho, ia riro râ ei tao‘a au i rotopu ia outou. A farii i roto i to outou utuafare i te tahi atu feia ia haapuaihia i teie huru iteraa.

Teie te tahi mana‘o hopea ta’u e pûpû nei no ratou o te here nei i te hoê melo utuafare aita e rave ra i te ma‘itiraa maitai. E riro te reira i te tamata i to tatou faaoroma‘i e to tatou tape‘a-noa-raa. E mea titauhia ia tatou ia ti‘aturi i te Fatu e i Ta’na tarena, ma te ti‘aturi e, e pahonoraa maitai te tae mai, no ta tatou mau pure e ta tatou tautooraa ia faaora’tu. E rave tatou mai te roaa ia tatou no te tavini, no te haamaitai e no te auraro maite i te hinaaro o te Atua i roto i te mau mea atoa. E faaohipa tatou i te faaroo e te haamana‘o e, te vai ra te tahi mau mea e ti‘a ia vaiihohia i te Fatu ra. Te titau nei Oia ia tatou ia tuu i ta tatou mau hopoi‘a i To’na ra avae. Na roto i te faaroo e ite ai tatou e, teie taata iti here tei taiva, aita oia i faaru‘e-roa-hia e tei mua oia i te mata here a te Faaora.

A hi‘o i te maitai i roto ia vetahi ê eiaha râ te mau hape. E tae mai ihoa te taime, e titauhia te hoê hape ia haapa‘ohia no te rapaau, e patu tamau râ i ni‘a i te mau maitai o taua taata ra.

Ia mana‘o noa’tu outou e, ua rairai roa te taura no te ti‘aturiraa ; e ere roa’tu ïa te hoê taura, e taamuraa me‘ume‘u râ no te puoi, mai te hoê ahu paruru no te haapuai e no te faateitei ia outou. E horo‘a mai te reira i te tamahanahana ia nehenehe ia outou ia faaea i te măta‘u. A tutava ia ora ti‘amâ noa e a tuu i to outou ti‘aturi i te Fatu.

Eiaha tatou e haape‘ape‘a aita ana‘e e roaa ia tatou ia rave i tera iho taime i te mau mea atoa ta te Fatu i a‘o mai ia tatou ia rave. Ua parau Oia e taime e e tau to te mau mea atoa. Ei pahonoraa i ta tatou mau pure aau tae no te arata‘iraa, e faaite mai Oia ia tatou i te mea e ti‘a ia haamaraa’tu i tera e tera taime o to tatou oraraa. E haapii mai tatou, e e tupu rahi tatou e e riro mai tatou mai Ia’na ra, te hoê taahiraa papû i muri mai i te tahi.

Te faaite nei au i to’u iteraa papû e, na roto i te oraraa i te oraraa haapa‘o, tei aa-papû-hia i roto i te evanelia a Iesu Mesia, e fana‘o ai tatou i te taiâ ore rahi roa a‘e o te hau e o te haapuraa i roto i to tatou mau fare. E vai noa mai â te mau tamataraa e rave rahi e aore râ te aau mauiui, e noa’tu â tei roto tatou i te ahoaho, e nehenehe ta tatou ia oaoa i te hau i roto e te popou hohonu. Te faaite papû nei au e, o te Taraehara a Iesu Mesia te puna no taua hau rahi ra, na roto i te i‘oa o Iesu Mesia, amene.