Ni nge Yoeg e Gapas ko Tabinaew

Bay yo’or e laman ko fayleng ni gadad be paer riy nibe yoeg ni thingarda papay nag e yafos rodad. Ba yo’or nge yo’or pin’en thingarda rin’ed. Machane bay bang u langidad ni be t’uf e tafen ni nge yoeg e toffan ngodad, ni’ir ri bay riy e gapas nge falan’, ni’ir tafen ni rayog ni ngad fal’eg laniyan’dad nge fal’eg rogdad ko tin nibe yib.

Tafen nib fel’ riy ko re gapas nem e nibay ulangin pi tabinaw rodad, ni’ir tafen kug tayed Somoel ni Yesus Kristus e kengin e yalen rodad.

Boech e tabinaw ni bay e chitimang nib yul’yul’ nibe koel e priesthood nge chitingin nib yul’yul’ mab m’ag u wun’uy ni yow be powi’iy nib fel’ rogon. Ma boech e tabinaw be thil rogon. Dem turug e gin’em, ku rayog ni ngam tay Somoel ni Yesus Kristus e kengin ko tabinaw nge yafos rom, ya I’ir e gin’en ko gapas nib riyul ko yafos ney.

Mu nang ni urngin e tin gabe mel’eg, f’anre tin nu fayleng fa tin nu tharimy, e ma yaen ko tin ni ba’adag Somoel ni ngam rin ngay’. Nap’an I’ir e kengin ko tabinaw rom, ba’ gapas nge falflaen’. Bay e thaemthaem nib ayal nibe paer ko tabinaw, ma kan thamiy riy ko urngin ne be paer aram.

Gathi kemus pi gallibthir ni yad b’tuf ni ngar mugu’uliy pi fonow ney, mus ni kan duwgliy rad ni ngar powi’iyad. Kan duwgliy ngak pi bitir ni ngar tayed Krisuts e kengin ko tabinaw rorad. Be ga’fan ko gallibthir ni ngar filed pi bitir ni uragon pi ngongol rorad be thiliyeg picha’ nibe paer ko tabinaw rorad. Pi bitir nib bung ragon e pufthin nagraed, f’anre be fel’ fab kireb e ngongol rorad, ran manged gidii’ nib yul’yul’ u gil’ilingun Got.

Gu lemnag ni gamanang pin’en nib ga’fan ni ngam tay Somoel e kengin ko tabinaw rom. Pi fonow ko profet rodad ni ngam meybil nge bi’eg e babyor nib thothup rom ma nga ta’abang ko tabinaw, min un ko family home evening e tin nib t’uf ni ngam fel’aged Kristus e kengin ko yalen e tabinaw rom boed rogon e dayif ko na’un . F’anre dariy e ren’ey be mom’aw ni ngam gay e gapas nib t’uf ni gabadag ko yafos ney.

Mu fol ko pi machib rok pi profet ni ba’adag Kristus ni ngam fol gad ngay. Dam siyeg e falflaen’ rom nga m’on min fek e kanawo’ nib moem ni daniy taw nga pi kengin e gospel riy’. Mu sulaenum: tin nib achig be fek iyaen nga tin nibe ga’. Pi denen fa malmal nib chig chig rodad ma fekiyaen nga magowan nib ga’. Machane pi ngongol nib fel’ kan rin’ bayay ngo bayay ra fekey pi taw’ath nib ga’ mab fel’.

Gimew ni pi bitir u Primary, gimew pi pum’on nge ppin nib fel’ yangrem, ma gimew pi missionary nib yul’yul’ nibe pigpig gad be ngognoliy pin’en nib yo’or nib fel’ rogon ko gag fini kug fel’ yangren. U yafos ou’mon e fayleng ney kam daged e pangiy nib yul’yul’, liyor ko motochiyel, mab be’ech. Kam muruwliy nib gel ngaram ni ngam cheg nag ko tin nib t’uf ko yafos nu fithik e pangiy nib madangdang, liyor, nge salap.

Ma de n’uw faram kam baed nga fayleng ni kam cheg gad riy’ ko urngin e pin’em ni ran aywegem nib yo’or ko yafos. Machane be gel e yoyowol ngara’ ko fayleng. Ram malog tin ni gabe cheag nag riy’ f’anre gabe motoyil ngak tin ku m’oniyan ni bay ko fayleng u bangem. Machane, fare Mo’niyan dabiyog ni nge gel nag Somoel. Ya kan duwgliy tin bayi buch ngak. Ir ma nang ni ke waer machane ir ba’adag ni nge mad’ad gubin ni rayog. Ran gay rogon ni nge gathay e tin ni gabe cheag riy’ udakaen pi mo’owaer rom. Mu paer rok Somoel, ma gara gel nag Ir gubin ngiyal’.

Gabe paer nga dakaen e fayleng ni bay yo’or e technology nib papay. Be mom’aw ko gidii’ rog nib elal ni ngad nanged fan riy’. Rogon e ngongoliy rom ko technology ney ku rayog ni nge mang e taw’ath rom fa machaan. Nap’an technology kan use nag ko tin nib fel’ ban’en, be mang gathi to’ogor rodad machane ban’en nibe ayuweg e tin nu tharimy rodad.

Susun, gadad nib yo’or ka bay e cell phone fa ban’en ni rayog ni ngan tay u pi pocket rodad. Dariy ngiyal’ ni de un ngoad; ma ngad sap gad ngay nib yo’or e yay u t’areb e ran. Machane, pinn’ey ku rayog ni ngar manged e tin nib kireb nge maelmael. Machane fini mu use nag nib fel’ rogon, rayog ni nge ayuwegem nib yo’or.

Ya mini’ ke lemnag de n’uw nap’an faram ni urngin e babyor nib thothup nge duw ngo duw ko general conference ku rayog ni ngan toey nga langin e pocket rom? Nap’an ni bay u pocket rom ra matangiyem, ma rayog ni ngam fil rogon riy’, lemnag ni marunga’agen, nge motoyil ngak ni ngam gel nag e sabethin udakaen e Kan Thothup.

Mu gonop nag ko uragon gabe use nag technology. Mark nag pi scripture nib ga’fan ko cell phone rom min sul ngak bayay nib yo’or e yay. F’anre kam bi’eg t’areb e verse urngin e ngiyal’ kam text nag, de n’uw nap’an ma ram tafnay nang nag miriyay nge miriyay e guruy. Fapi guruy nem ra gay gelngin ma thogthog ngom ma powiy’ udakaen fare Kan ni Thothup u ngiyal’ nib t’uf.

Be ga’fan ni ngad ngongoliy gubin ni rayog rogdad ni ngad pinning e Kan Thothup ni nge powi’iy e yafos rodad ya ran tay Somel e kengin e tabinaw rodad. Ra gel nagdad u nap’an gad be motoyil min ngognoliy fa binem e thaemthaem.

Ra yib e gapas nib ga’ rom u nap’an mu fol ko pi motochiyel min pigpig nag e gidii’ u to’obem. Bay yo’or e gidii’ ni yad be lemnag ni de cheag gad riy, machane ni yad be ayweg pi gidii’ u bangraed ko tin ni fel’ ma b’chig ni bay rorad. Uf’anthin e kengin ko gubin e tin rib kireb. Fare fly ko re kireb nem ni kan dag ulane yafos ko Tathepeg, Ke dag ngodad urrogon ningad chel e yafas rogdad nga wuru’ ufithik e pigpig ngak reb e gidii’

Kug fil rogon e tin nib riyul’ bayay ngo bayay ko yafos rog ma ireram gu nang ni’r e tin nib riyul’. Be weliy ko uragon mafol ko motochiyel nge ayuw be yaen nga gelingin Got. Nap’an gadad ma fol ko pi motochiyel rok Somoel min pigpig gad pifak rok nib sobtaen’ ngay, tin nibe yib riy e gelingin ku Got—gelingin ni ngan ngongoly nib yo’or ko tin rayog rodad. Lowaen’ rodad, tin ni gad be cheag riy’, nge nangfal rodad be gel nag ni bachaen ke yib e gelining rok Somoel. Gelingin rok e ban’en nib t’uf ni ngad fal’eg e tabinaw nu fithik e gapas.

Nap’an mu tay Somoel e kengin e tabinaw rom, ra mang e tafen nu’uw tabinaw rom nge pi ta fagaer nib gafgow ku rayog ni ngad miitheg ko tin kireb. Yaed re ba’adag riy ni bachaen e gapas ni yad be thamiy ngaram. Mu pinning rad ni ngar un ko tabinaw rom. Yad ra falflaen’ gad nge mon’og u tafen nem. Mu fel’ yathin ko pi fagaer ko pifak rom. Mu mang bee’ nib yul’yul’ ni yad be sap gad ngay.

Reb e taw’ath nib ga’ ku rayog ni ngad pii’ed ngak gidii’ nu fayleng e gelingin ko tabinaw nib fal’edg dakaen Kristus nu’uw kan machib nag e gospel, kan liyor nag e m’ag ma ba’ t’ufeg.

Bo’or e duw faram tomuren e mission romow, ppin rog, Jeanene, ke weliy ngog marunga’agen reb e elder ke mada’nag. Jeanene ke fith ngak marunga’agen e tabinaw rok. Ke gin’ ni be yoeg dariy e tabinaw rok. Ke weliy ni nap’an ke gargeleg e ninia’ rok ke pii’ ngak e nam ni ngan chathowliy. Nap’an e bitir ke yaen nga reb e tabinaw ngo reb. Nap’an elal buchuw ke taw’ath nag ni nge pirieg fare gospel. Reb e tabinaw ko ward ke ayuweg ir ni nge yaen nga dakaen e mission rok.

Tomuren Jeanene ke fith e ppin ko mission president marunga’agen biney e elder. Ke fil ni boech e pul faram re elder ney ke paer u mission home boech e rran ni bachan ke m’aer. Chirofen nem ke un ngorad ko e family home evening. Ou’mon ke sul nga mission field, ke ning e mission president rok f’anre rayog ni nge paer rorad ko l’agruw fa dalip e rraen tumor e mission rok. Ke ba’adag ni nge fil ni uragon e tabinaw rayog ni ngan tayed Kristus e kenginn rorad. Ke ba’adag ni nge toey e tabinaw rok amrogon.

Aygi rin’ed gubin ni rayog rodad ni ngu tayed Kristus e kenginn rodad. Mu ayuweg picha’ ni yad be gafgow. Mang e fagaer nib riyul’. Ireray e mit e fagaer ni be ayuweg yug gidii’ ko pi mo’owaer rorad ma be ayweg yafos rodad. Dam rin’ed pinn’ey ni ngam pufthin nag bee’, machane ni ngam taw’ath nag nbe pii’ falflaen’ ngak bee’. Mu pinning picha’ ni yaed be t’uf ayuw ni ngar baed nga lan e tabinaew rom.

Nggu oge boech e thin ngak picha’ ni bay gidii’ u tabinaew rorad nib t’uf ni dani fol ko motochiyel. Pinn’ey ran sikeng nag e gumaen’ nge athmgil rodad. Thingarda tay pagaen’dad ngak Somoel nge pangiy ni ran fulweg pi meybil nge ngongol rodad borran. Gu rin’ed urngin ni rayog nggu ayuweg, taw’ath nag, nge motoyil nib sobtaen’ ngak pangin Got u gubin ban’en. Gu michaen dad min sulaen’dad ni boech pin’en thingariy rin’ Somoel. Be pinning dad nggu tay be gafgow rodad ou’mon pi aye rok. U fithik michaen’ dad rayog ningad nanged ni pi cha’ney e gathi kan digey machane Somoel be matangiyraed.

Mu guy e tin nib fel’ ku bee’, gathi pi mo’owaer rorad. Boech ngiyal pi mo’owaer b’tuf e thin rom ni ngan be’ech nag, machane mu tay u kengin riy e tin nib fel’ rorad.

Nap’an gabe lemnag be lich mab waer e athap rom riy’, gathi amrogon, ya be gel e athap ma kan peth ngay nib gel ngak Somoel, boed n’en nra ayweg min gel nagem. Ran pii’ gapas ngom ni ran churiy’ e murus rom. Mu gel rogon ni ngam paer nib yul’yul’ min tay pagan’um ngak Somoel.

De t’uf ni ngad murus gaed fa’anre de yoeg ni ngad rin’ed urgin e tin u ta’aban ni kan duwgliy Somoel rodad. He yoeg ni bay ngiyal’ ni fan ko gubin e ban’en. Ni nge fulweg pi meybil nib yul’yul’ rodad, Ran powiy’idad ngak tin nib t’uf ko gubin e bang ko yafos rodad. Rayog ni ngad fil rogon, mon’og, min boeded Ir bayil’ nga dakaen bayil’.

Nggu gog micheg rog ni nap’an gaed be fol ko motochiyil min tay gospel ku Yesus Kristus e kenginn e yafos rodad, mra yib e gapas nib gel ni nge matangiy pi tabinaw rodad. Nriyul’ ra bay bo’or e magowan nge gafgow, machane ku nu fithik e biney, rayog ni ngad falflaen’ gad ko gapas nge falflaen’ ni bay ulangidad. Gu nang ni fare Bayul ku Yesus Kristus ma fekey e gapas nge falflaen’ nem u fithingan ku Yesus Kristus, amen.