Va na iTutu

E dua na itutu e vakamacalataki keda kece, ena sala bibi duadua, sai koya na luvena na Tamada Vakalomalagi. Veitalia na cava tale o keda se na ka eda cakava ena noda bula, me da kakua sara ni guilecava ni o keda na luvena dina sara vakayalo na Kalou. Eda a Luvena tu ni bera ni da lako mai ki vuravura, ka da na Luvena tikoga me tawamudu. E dodonu me veisau na dina taumada oqo ena ivakarau eda raici keda kina, o ira na tacida kei na ganeda, kei na bula sara mada ga.

E kalouca, ni sega ni dua vei keda e bulataka vakavinaka sara na veika kece e vakaibalebaletaki ena itutu oqo, “ni sa ivalavala ca ko ira kecega na tamata, ka ra sega ni yacova na ka e vakarokorokotaki kina na Kalou.”¹

E rawa ni veivakayalolailaitaki ena so na gauna me da kila na kena ibalebale me da luve ni Kalou ka da qai sega ni yacova sara yani. E dau vinakata na meca me vakayagataka na ivakarau ni rai oqori. E vinaka cake vei Setani mo kilai iko ena nomu ivalavala ca ka sega ena nomu rawa ka vakalou. Kemuni na veitacini, ni kua ni rogoci koya.

Eda sa raica kece e dua na gonelailai ni vuli lako. E dua na ikalawa lailai ka tataivatia. E dalasai. Ena tagi sara beka. Eda na cudruvaka beka na sasaga vakakoya? Sega sara ga. Na mataqali tama vakacava ena totogitaka na luvena lailai ni dalasai? Eda veivakayaloqaqataki, eda vakasausau, eda veivakacaucautaki, baleta ena veikalawa lalai yadua, sa yaco tiko na gone me vakataki rau na nona itubutubu, ka rawa duadua ga ni yaco oqo ena dua na ikalawa ena dua na gauna.

Oqo kemuni na taciqu, ni vakatauvatani ki na nona sa uasivi sara na Kalou, o keda na tamata eda sa sega ni uasivi sara mai vua e dua na gonelailai, tataivatia voli. Ia na Tamada Vakalomalagi dau loloma e vinakata me da vakataki Koya vakalevu cake, kemuni na taciqu lomani, oqori talega e dodonu me noda sasaga tawamudu. Sa kila tiko na Kalou ni da na yaco yani ki kea, sega ena dua na gauna lekaleka walega ia ena noda cavuta yadudua na ikalawa ni yaloqaqa, ena tataivatia beka.

Au sega ni vakabauta e dua na Kalou ka na vakotora na lawa kei na ivakaro oti qai waraka ga me da druka me rawa ni totogitaki keda. Au vakabauta e dua na Tamada Vakalomalagi dauloloma ka veikauwaitaki ka dau rekitaka na veisasaga yadua me da tu vakadodonu ka lako yani Vua. Ia ena gauna sara mada ga eda tarabe kina, sa dau vakayaloqaqataki keda o Koya me da kakua ni yalolailai—me da kakua ni soro se drovaka na noda ilesilesi ni veiqaravi—ia me da yaloqaqa, kunea na noda vakabauta, ka tovolea tikoga.

Sa dau vakauqeti ira na Luvena na Tamada mai Lomalagi ka dau vakauta mai na veivuke sega ni laurai vei ira, ena nodra vakabauta, era gadreva me ra muria na iVakabula.

Sa kauti keda oqori ki na ikarua ni itutu eda tautauvata kina: O ira kece era segata vagumatua me ra muri Karisito era vakatokai me ra Nona tisaipeli. E dina ni da kila tu ni sega ni dua vei keda sa vinaka sara, eda sega ni dau vakayagataka na dina oqori me da vakalolovirataka kina na veika eda namaka, me da bula kina ena ruku ni noda galala, me da vakadaroya kina na siga ni noda veivutuni, se me da besetaka na tubu me da vinaka cake, me da uasivi sara, me da daumuria na noda iVakavuvuli ka noda Tui sa vakasavasavataki vakalevu cake.

Nanuma tiko Na Lotu i Jisu Karisito ni Yalododonu Edaidai e tarai cake, sega ni baleti ira na tagane kei na yalewa era sa uasivi sara se sega ni ra dau rawai ena veitemaki vakayago, ia e tara me baleta na tamata sara ga vakataki iko kei au. Ka tarai cake ena nona uluvatu na noda Dauveisereki, na Turaga o Jisu Karisito,² mai na nona Veisorovaki eda na rawa ni vakasavasavataki ka yaco me “koro vata ga … ka [da] lewe ni vale ni Kalou.”³

Ke sega na Veisorovaki nei Jisu Karisito, ke na ka wale ga na bula ka sega kina na inuinui se na veisiga ni mataka. Ena Veisorovaki, sa yaco kina na bula me ilakolako vakaturaga, ka veivakauqeti ni tubu kei na veivakatorocaketaki ka na kauti keda yani ki na bula tawamudu ena nona iserau na Tamada Vakalomalagi.

Ia me vaka ni inaki ni Veisorovaki me vukei keda me da yaco me vaka na Karisito vakalevu cake, e sega ni kena inaki me vakatautauvatataki keda. Ena so na gauna eda dau wakia vata na duidui vakatamata kei na ivalavala ca. E rawa sara mada ga ni da vakacalai ena noda nanuma ni dua e duatani mai vei keda, kena ibalebale ni sega ni taleitaki koya na Kalou. Na ivakarau ni vakasama oqori ena vakavuna na nodra vakabauta eso ni vinakata na Lotu me vakatautauvatataka kece na lewena yadua—me tautauvata na keda irairai, noda nanuma, ivakarau ni vakasama, kei na itovo. Oqo ena veisaqasaqa kei na vuku ni Kalou, ka bulia na tamata yadua me duidui mai vua na tacina, na gonetagane yadua me duidui mai vei tamana. O ira sara mada ga na drua era sega ni tautauvata ena nodra ivakarau ni bula kei na kedra ivakatakilakila vakayalo.

E saqata talega na inaki ni Lotu i Jisu Karisito ni Yalododonu Edaidai, ka dau doka ka taqomaka na galala ni tamata—kei na kena revurevu kece sara—ni luvena yadua na Kalou. Ni da tisaipeli i Jisu Karisito, eda sa duavata ena noda ivakadinadina me baleta na kosipeli vakalesui mai kei na noda yalayala me da rokova na ivakaro ni Kalou. Ia e duidui na noda itovo, ivakarau ni veimaliwai, kei na veisaqasaqa.

Ena vaqaqacotaki na Lotu ni da vakayagataka na duidui oqo ka veivakayaloqaqataki me da vakatorocaketaka ka vakayagataka na noda taledi me da laveta ka vaqaqacotaki ira kina na noda itokani vakatisaipeli.

Kemuni na taciqu na bula vakatisaipeli e ilakolako ni bula taucoko ena noda muria na iVakabula. Ena noda ilakolako oqo mai Peceliema ki Kolikoca, ena basika mai e levu na madigi me da biuta na noda ilakolako. Ena so na gauna ena vaka ni levu cake na veika e gadreva na noda salatu mai na veika eda namaka. Ia me vaka ni da tagane ena matabete, sa dodonu me tu vei keda na yaloqaqa me da muria na iVakabula, kevaka mada ga sa rui bibi na noda kauveilatai ka da sega ni colata rawa.

Ena ikalawa yadua eda cavuta ni da muria na Luve ni Kalou, me da nanuma tiko ni se bera ni da vinaka sara. Ia me da tu vakarau ka tisaipeli tudei. Me da kakua ni soro. Me da dinata na noda veiyalayalati. Me kakua ni yali mai matada na noda Dautataro ka Dauveivueti ni da lako yani Vua, dua na ikalawa sega ni taucoko ena dua na gauna.

Kemuni na taciqu, kevaka me da muria dina sara na noda Turaga o Jisu Karisito, me da na ciqoma e dua me ikatolu ni noda itutu: dau vakabula na yalo. O keda eda sa tabaki ki na matabete ni Kalou eda sa kacivi me da “veivueti talega.”⁴

Na noda cakacaka me da tara cake, vakavinakataka, vaqaqacotaka, laveta cake, ka vakataucokotaka. Na noda ilesilesi me da muria na nona ivakaraitaki na iVakabula ka dolele yani vei ira era kune rarawa. Me da “tagi vata kei ira sa tagi … ka vakacegui ira sa rarawa.”⁵ Eda vadretitaka na nodra mavoa o ira era vakararawataki. Eda “vakaukauwataka na liga sa wadamele, kei na duru sa malumalumu.”⁶

Ni da dauniveituberi vakamatavuvale, eda sa dau veivakabulai. Ni da iliuliu ni matabete, eda sa dauveivakabulai. Ni da tama, ka gonetagane, kei na tagane vakawati, sa dodonu me da dauveivakabulai yalodina ka gugumatua. Me da taura ena dua na ligada na tavaya ni waiwai vakatabui me ra vakalougatataki kina na tauvimate; ena kena kadua me da taura kina na ibuli madrai me ra vakani na viakana; ia e yaloda eda kauta voli kina na nona vosa ni veivakacegui na Kalou, “sa vakamavutaka na yalo sa mavoa.”⁷

Oqo na noda itavi taumada ka bibi duadua ni da veiliutaki ni matabete—ka baleti keda ruarua na Matabete i Eroni kei na Melikiseteki. Na kosipeli vakalesui mai nei Jisu Karisito e vakalougatataka na bula sega walega ena gauna eda vakabauta kina ia vakalevu cake ena gauna eda bulataka kina. Ena gauna e bulataki kina na ivakavuvuli ni kosipeli era na laveti cake na tamata yadua ka vaqaqacotaki na veimatavuvale. Sa noda galala ka noda itavi sega walega me da cavuta na kena vosa ia me da lakova talega na kena ilakolako.

Na iVakabula e vakayacora na cakacaka mana. Sai koya na Dauveivakabulai levu. Sai Koya na noda ivakaraitaki, na noda rarama, ena veigauna butobuto duadua sara mada ga, sa vakaraitaka vei keda o Koya na sala dodonu.

Me da muri Koya. Me da tu yani ki na noda itavi ka yaco me dauveivakabulai ena noda qarava na Kalou kei ira na kai noda.

Na ikava ni itutu eda wasea kece e kauti keda lesu tale ki na imatai ni itutu ena noda ituvatuva—ni da luvena tagane na Tamada Vakalomalagi, o keda eda sa vakaivotavota kece ena veika e Nona.

“A yalo oqo sa tukuna mai ki na yaloda, ni da sa luve ni Kalou:

“Kevaka eda sa gone eda na qai itaukei, eda na taukena na veika ni Kalou, eda sa itaukei vata kei Karisito; kevaka eda sa vosota vata kaya na ca, eda na vakalougatataki vata kaya talega.”⁸

Vakasamataka mada qo, kemuni na taciqu lomani. Eda sa itaukei vata kei Karisito!

Ia e vakaibalebale beka kina ni vuqa vei keda era sa vakayagataka e levu na nodra gauna bibi, nodra vakasama, veika e tu vei ira, kei na nodra kaukauwa ena kena vaqarai na dokai se na iyau vakavuravura se me ra vakamarautaki mai na veimisini vakalivaliva vovou ka vakasakiti duadua?

Sa biuta tu vei keda na Turaga na yalayala vakalou ni “ko ira sa gumatua ka yalodina ki na ilesilesi ruarua vakabete, … ka vakayacora vakavinaka na nodra itavi, … [era na] vakabauti au, sa kaya na Turaga; … ia ko koya sa vakabauti au sa vakabauti Tamaqu; … io ena soli vua na ka kecega sa tu vei Tamaqu.”⁹

E sega ni tu vei au na kaukauwa ni vakasama meu raitayalotaka kina na veika kece e umani koto ena yalayala oqo. Ia au kila ni sa rui cecere, e vakalou, e tawamudu, ka ganita na noda sasaga kece sara ena bula oqo.

Ni da sa kila tu oqo, e rawa vakacava me da sega ni vakaitavitaki keda yani ena lomasoli kei na yalomarau ena veiqaravi vua na Turaga kei ira na kai noda ka da tutaka na noda itavi ena matabete ni Kalou?

Oqo na noda cakacaka vakaturaga duadua ka na bolea na noda wakilakila kece sara ka vakadreta na noda kaukauwa taucoko. Eda gadreva beka me da raica ni tadolavi na lomalagi ka vakadinadinataka na veivakauqeti ni Yalo Tabu ni vakaraitaka vei keda na sala? O koya me da taura cake na noda isele takelo ka soli keda yani ki na cakacaka cecere oqo—na inaki oqo ka cecere cake mai vei keda!

Ena bolei keda ka veisautaki keda ki na dua na ka cecere cake mai na veika kecega eda nanuma ni rawa ni yaco na noda qarava na Kalou kei ira na kai noda.

O na nanuma beka ni sega ni o gadrevi, ka raibaleti ka sega ni vinakati, ni o sega ni dua na ka.

Au na kerea na veivosoti kevaka e dua na matabete e vaqo na nona nanuma. E ka dina taucoko, ni sega ni dua e raibaleti se sega ni vinakati koya na Tamada Vakalomalagi. E lomani kemuni o Koya. Kau tukuna vei kemuni ena lomadei ni gadrevi kemuni na nomuni Lotu.

O ni kila tiko beka ni “sa digitaka na Kalou na veika vakalialia e vuravura me vakamaduataki ira na vuku; ia na veika sa malumalumu e vuravura sa digitaka na Kalou me vakamaduataka na veika sa kaukauwa”?¹⁰

E dina beka ni da malumalumu. Eda sega beka ni vuku se kaukauwa. Ia ni cakacaka mai vei keda na Kalou, e sega ni dua na tamata se dua na ka e rawa ni vorati keda.¹¹

Oqo na vuna o ni gadrevi kina. E dui tu na nomuni cau mo ni vakayacora, e rawa vua na Kalou me vakalevulevuya ena dua na ivakarau qaqa na cau oqori. Na nomu rawa ni cau sega ni vakatau ki na nomu ilesilesi ena Lotu. E sega ni vakaiyalayala na nomuni madigi ni veiqaravi. Kevaka o ni wawa tu e yasa ni rara, au vakayaloqaqataki kemuni mo ni curu yani ki loma.

Kakua ni waraka me yaco mai e dua na ilesilesi mo qai vakaitavi vakavinaka ena kena tarai cake na matanitu ni Kalou. Ni da matabete, o sa kacivi oti tu ki na cakacaka. Vulica e veisiga na vosa ni Kalou, masuta na Tamada Vakalomalagi e veisiga, me tiki ni nomu bula na ivakavuvuli ni kosipeli vakalesuimai, dau vakavinavinaka vua na Kalou, ka kerea na veituberi. Qai bulataka na veika o vulica, taumada ena nomu matavuvale ia ena veituvaki kece talega ni bula.

Ena nona mataivakatagi na Daubulisere cecere, e tiko ga na nomu itavi mo vakatagitaka—na nomu qaqana mo lagata. Kevaka o sega ni lagata rawa, e sega ni vakataratutu ni na toso ga na ivakatagi. Ia kevaka o tu cake ka duavata kei na matasere ka vakatara me cakacaka mai vei iko na kaukauwa ni Kalou, o na raica ni dolavi na “katuba ni lomalagi,” ka “sovaraka vei kemudou na ka ni veivakalougatataki, me na sautu dina sara.”¹² Tu cake yani ki na kemu ituvuka dina me vaka ni o luvena tagane na Kalou, ka na yaco mo igu ni vinaka ena nomu matavuvale, nomu vuvale, nomu itikotiko, nomu vanua, io e vuravura.

Ia ena iwalewale oqori, ni o “vakayalia na [nomu] bula” ni o veiqaravi ena vukudra na tani,¹³ ka sega mada ga ni kauwai, o na tubu ka toroi cake me yacova ni o sa vavaca yani “me da tautauvata kei na ivakarau ni tamata dina, era sa sinai sara kei Karisito.”¹⁴ O sa vakarau kina mo itaukei vata kei Karisito, ni veika kecega e tu vua na Tamamu.

Kemuni na taciqu, kemuni na noqu itokani lomani, o ni ka bibi. O ni lomani. O ni gadrevi. E dina na cakacaka oqo. Na matabete e nomuni na kena galala mo ni ciqoma e nona dina sara na Kalou.

Au masuta ena nomuni vakananuma vakatitobu na itutu e vuqa ni dua na matabete bula kilikili, o ni na vakila e dua na cagi vakalou mai dakumuni, ena laveti kemuni cake tikoga, ki na ivotavota cecere sa maroroya tu na Tamada Vakalomalagi me baleti kemuni. Au laiva vei kemuni na veivakalougatataki oqo kei na noqu ivakadinadina ena yaca tabu i Jisu Karisito, emeni.