2010–2019
Plaub lub Npe
April 2013


Plaub lub Npe

Kuv xav qhia txog plaub lub npe ... uas pab peb paub txog peb tej hauj lwm hauv Vajtswv txoj hau kev nyob mus ib txhis thiab qhov uas peb yuav rais los ua neeg zoo li cas thaum peb tuav lub pov thawj hwj.

Kuv cov kwv tij thiab cov phooj ywg, kuv lub siab puv npo nrog kev ris txiaj thiab kev xyiv fab vim kuv nrog nej nyob hmo no. Kuv qhuas nej cov txiv tsev thiab yawg uas coj nej cov tub thiab cov xeeb leej xeeb ntxwv. Kuv qhuas nej cov tub hluas uas tau xaiv tuaj hnub no. Qhov chaw no yog qhov chaw yog rau nej. Kuv cia siab tias nej yuav paub txog kev ua kwv ua tij uas ua rau peb koom siab ua ke, thiab kuv thov Vajtswv kom nej yuav nrhiav tau kev txhawb nqa thiab kev ua phooj ywg nyob no.

Tej lub sij hawm peb cov txiv neej pheej xav tias peb muaj npe los ntawm tej yam peb ua. Peb feem coob muaj ntau lub npe, thiab txhua lub npe qhia ib qho tseem ceeb txog peb tus kheej. Piv txwv, tej lub npe piav txog peb tej hauj lwm nyob hauv peb tsev neeg, xws li tus tub, tus kwv tij, tus txiv, thiab leej txiv. Lwm lub npe piav txog peb tej hauj lwm hauv lub ntiaj teb, xws li tus kws kho mob, tub rog, los yog tus kws ntoo. Thiab tej lub npe piav txog peb tej hauj lwm hauv lub Koom Txoos.

Hnub kuv xav qhia txog plaub lub npe uas kuv ntseeg tias txhua tus uas tuav lub pov thawj hwj nyob thoob plaws lub ntiaj teb muaj---tej lub npe uas pab peb paub txog peb tej hauj lwm hauv Vajtswv txoj hau kev nyob mus ib txhis thiab qhov uas peb tuav lub pov thawj hwj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Leej Txiv Saum Ntuj Ceeb Tsheej tus Tub

Ib lub npe uas qhia txog peb txhua tus yog Leej Txiv Saum Ntuj Ceeb Tsheej tus tub. Txawm peb ua dab tsi hauv lub neej no, peb yeej yuav tsum nco qab tias peb yog Vajtswv cov me nyuam ntsuj plig tiag. Peb yog Nws cov me nyuam ua ntej peb los rau hauv lub ntiaj teb, thiab peb yuav ua Nws cov me nyuam tas mus li. Qhov tseeb no hloov peb txoj kev saib peb tus kheej, peb cov kwv tij thiab cov muam, thiab peb txoj sia.

Tiam sis, peb txhua tus tsis ua raws li txhua yam uas lub npe no qhia, “rau qhov txhua tus puav leej ua txhaum thiab tu ncua Vajtswv lub yeeb koob lawm.”1

Tej lub sij hawm ua rau yus poob siab thaum yus paub tias yus yog Vajtswv tus tub tiam sis yus tau ua yuam kev. Tus yeeb ncuab nyiam siv tej kev xav zoo li no. Dab Ntxwg Nyoog xav kom nco ntsoov nej tej kev txhaum thiab txhob nco ntsoov tias nej muaj peev xwm ua neeg zoo li Vajtswv. Cov kwv tij, tsis txhob mloog nws lus.

Peb txhua tus twb saib lawm ib tug me nyuam yaus kawm mus kev. Nws mus ib ruam tom ntej thiab ua yuj yees zoo li yuav vau. Nws vau. Peb puas cem nws thaum nws ua li ntawd? Peb yeej tsis ua li ntawd. Ib leej txiv yuav rau txim rau ib tug me nyuam yaus vim nws ntog los? Peb yaum, peb zoo siab, thiab peb qhuas nws vim txhua ruam tom ntej, tus me nyuam los ua neeg zoo li nws niam nws txiv.

Nim no, cov kwv tij, piv rau Vajtswv txoj kev ua neeg zoo tag nrho, peb cov nyob hauv lub ntiaj teb yeej zoo li cov me nyuam yaus uas tsis paub mus ko taw zoo. Tiam sis peb Leej Txiv Saum Ntuj Ceeb Tsheej xav kom peb ua neeg zoo li Nws, thiab cov kwv tij uas kuv hlub, peb yuav tsum muaj lub hom phiaj ntawd thiab. Vajtswv to taub hais tias peb yuav tsis siv ib me pliag xwb tiam sis peb yuav tsum mus ib ruam dhau ib ruam tom ntej.

Kuv tsis ntseeg tias Vajtswv tsa kev cai kom ua rau nws muaj cai tos txog thaum peb poob nws thiaj yuav rau txim rau peb. Kuv ntseeg ib Leej Txiv Saum Ntuj Ceeb Tsheej uas hlub thiab tshua thiab zoo siab thaum peb sib zog sawv siab thiab mus ko taw los cuag Nws. Thiab thaum peb ntog, Nws yaum peb kom txhob poob siab—txhob tsum los yog khiav ntawm peb txoj hauj lwm mus---tiam sis Nws yaum kom peb ua siab loj, muaj kev ntseeg, thiab sim ua mus ntxiv.

Peb Leej Txiv Saum Ntuj Ceeb Tsheej qhia Nws cov me nyuam thiab xa kev pab rau cov uas xav nrog tus Cawm Seej mus.

Yexus Khetos tus Thwj Tim

Thiab li ntawd peb yuav kawm txog ib lub npe ntxiv uas peb sawv daws muaj: Txhua tus uas rau siab ua raws li Khetos ua hu ua Nws cov thwj tim. Txawm peb paub hais tias tsis muaj leej twg zoo tag nrho, peb tsis siv qhov tseeb no kom peb tsis tas ua zoo npaum li peb ua tau, kom peb tos tsis hloov siab lees txim, los yog kom peb tsis kam ua neeg zoo dua ntxiv, ua cov neeg uas lawv peb tus Xib Hwb qab.

Nco ntsoov tias tau ua Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg rau cov neeg zoo ib yam li kuv thiab nej, tsis yog ua rau cov neeg uas zoo tag nrho thiab tsis raug tej kev ntxias hauv lub ntiaj teb no. Thiab tau tsa lub Koom Txoos no saum lub pob zeb uas yog peb tus Txhiv Dim, tus Tswv Yexus Khetos2 los ntawm Nws txoj Kev Theej Txhoj peb yuav raug ntxuav huv thiab los ua “Vajtswv haiv neeg ... [uas] yog Vajtswv tsev neeg lawm”3

Yog tsis muaj Yexus Khetos txoj Kev Theej Txhoj, peb lub neej yuav zoo li ib txoj kev kawg uas tsis muaj kev cia siab los yog yav tom ntej. Yog muaj Kev Theej Txhoj, peb lub neej yog ib txoj kev loj hlob tuaj uas ua rau peb txais txoj sia nyob mus ib txhis nyob hauv peb Leej Txiv lub xub ntiag.

Tiam sis txawm txoj Kev Theej Txhoj yuav pab peb los ua neeg zoo li Khetos, tsis yog txoj Kev Theej Txhoj ua rau peb ua neeg zoo ib yam. Tej lub sij hawm peb xav ua yuam kev tias qhov uas ib tug xeeb ceem txawv ces nws ua txhaum. Tej lub sij hawm peb ua yuam kev xav hais tias vim ib tug neeg txawv ntawm peb, ces Vajtswv tsis zoo siab rau tus ntawd. Qhov kev xav li no ua rau tej tug neeg ntseeg tias lub Koom Txoos xav kom txhua tus mej zeej ua zoo ib yam---xav hais tias ib leeg yuav tsum xav thiab ua neeg zoo ib yam. Qhov no yog qhov fab ntxeev ntawm Vajtswv txoj kev txawj ntse, uas tsim txhua tus nyias txawv nyias, txhua tus tub txawv nws leej txiv. Me nyuam ntxaib tej cwj pwm thiab tus ntsuj plig kuj tsis zoo ib yam.

Qhov no yog qhov fab ntxeev ntawm Yexus Khetos lub Koom Txoos lub hom phiaj, uas pov hwm hais tias txhua tus ntawm Vajtswv cov me nyuam muaj kev ywj siab coj ncaj ncees---txawm lawv yuav raug dab tsi los yog. Vim peb yog Yexus Khetos cov thwj tim, peb koom siab ua tim khawv txog txoj moo zoo uas tau muab txum tim rov qab los thiab txog peb cov lus cog tseg hais tias peb yuav ua raws li Vajtswv cov lus txib. Tiam sis peb tej kev nyiam kab lig kev cai, tseem fwv thiab sawm fem yeej sib txawv.

Lub Koom Txoos no vam meej thaum peb siv qhov kev sib txawv no thiab ib leeg yaum ib leeg siv peb tej txuj ci kom txhawb nqa peb cov kwv tij.

Cov kwv tij, kev ua thwj tim yog txoj kev ua neej ua raws li peb tus Cawm Seej. Thaum peb taug kev los ntawm Npelehees mus rau Golgotha, yuav muaj ntau zaus uas ua rau peb xav tso txoj kev no tseg. Tej lub sij hawm thaum peb taug txoj kev no ua rau peb xav tias yuav tsum siv zog tshaj qhov peb xav tau. Tiam sis vim peb muaj lub pov thawj hwj, peb yuav tsum ua siab loj nrog peb tus Txhiv Dim mus, txawm yog peb tus ntoo khaub lig hnyav dhau.

Txhua lub sij hawm peb nrog Vajtswv Leej Tub mus, ua rau peb nco qab hais tias peb tseem tsis zoo tag nrho. Tiam sis thov kom peb yuav ua cov thwj tim uas nyob ruaj khov kho. Peb yuav tsum tsis txhob tso tseg. Peb yuav tsum ua raws li peb tej kev khi lus. Peb yuav tsum tsom ntsoov rau tus uas Tuaj Peb Tog thiab tus Txhiv Dim thaum peb mus cuag Nws, ib ruam dhau ib ruam mus tom ntej.

Tus Kho Neeg lub Siab

Cov kwv tij, yog peb nrog peb tus Tswv Yexus Khetos mus tiag, peb yuav tsum ua raws li lub npe thib peb: tus kho neeg lub siab. Vajtswv tau hu peb cov uas tau muab tsa rau lub pov thawj hwj kom peb “kho neeg lub siab.”4

Yog peb txoj hauj lwm kom muab neeg tsa, kho, txhawb nqa, thiab pab. Peb txoj hauj lwm yog ua raws li tus Cawm Seej tus yam ntxwv thiab ncav tes pab cov uas raug txom nyem. Peb “nyuaj siab nrog cov uas nyuaj siab ... thiab nplij cov uas xav tau txoj kev nplij siab.”5 Peb pab nplij cov uas raug kev txom nyem. Peb “pab cov uas qaug zog, tsa tej txhais tes uas tsaug lawm, thiab ua rau lub hauvcaug uas tsis muaj zog kom mus taus kev.”6

Peb cov uas mus qhia tom tsev, peb kho neeg lub siab. Peb cov uas tuav lub pov thawj hwj, peb kho neeg lub siab. Peb cov uas yog cov txiv, cov tub, cov kwv tij, thiab cov txiv tsev, peb yuav tsum rau siab kho neeg lub siab. Ib sab tes tuav ib lub hwj uas ntim cov roj uas muab fij tseg kom foom koob hmoov rau cov neeg mob; ib sab tes tuav mov mog pub rau cov tshaib plab; thiab nyob hauv peb lub siab peb muaj Vajtswv txoj lus uas kaj siab lug, “uas kho neeg lub siab.”7

Nov yog peb cov uas tuav lub pov thawj hwj txoj kev lav ris tseem ceeb tshaj---thiab qhov no muaj tseeb rau cov uas tuav lub Pov Thawj Hwj Aloos thiab lub Pov Thawj Hwj Mekhixedes. Tsis yog Yexus Khetos txoj moo zoo uas tau muab txum tim rov qab los foom koob hmoov rau tib neeg thaum peb ntseeg xwb—tiam sis nws haj yam foom koob hmoov thaum peb ua raws li nws txoj moo zoo. Thaum peb ua raws li txoj moo zoo tej ntsiab cai ces nws txhawb nqa tib neeg thiab muab zog rau tej tsev neeg. Peb txoj kev lav ris tsis yog kom hais lus xwb tiam sis kuj yog kev ua raws li tej ntawd.

Tus Cawm Seej txawj ua txuj ci tseem ceeb. Nws yog tus uas Kho Neeg lub Siab. Nws yog peb tus yam ntxwv, peb txoj kev kaj, thiab txawm thaum lub sij hawm tsaus ntuj tshaj plaws los, Nws qhia txoj kev yog rau peb.

Cia peb raws Nws qab. Cia peb sawv ua peb txoj hauj lwm thiab kho neeg lub siab los ntawm peb tej hauj lwm pab Vajtswv thiab peb cov kwv tij.

Tus Txais Qub Txeeg Qub Teg ntawm txoj Sia Nyob Mus Ib Txhis

Lub npe plaub uas peb sawv daws muaj yog ib qho uas ua rau peb nco txog lub npe thib ib. Vim peb yog Leej Txiv Saum Ntuj Ceeb Tsheej cov tub, peb yuav txais tag nrho Nws qub txeeg qub teg.

“Vajtswv tus Ntsuj Plig qhia rau peb lub siab hais tias peb yog Vajtswv cov me nyuam:

“Thiab yog tias peb yog me nyuam, ces peb yog cov uas txais qub txeeg qub teg; txais Vajtswv qub txeeg qub teg thiab koom nrog Yexus txais; peb cov uas raug kev txom nyem ib yam li Yexus Khetos raug, peb yeej yuav tau Vajtswv lub yeeb koob uas ci ntsa iab ib yam li Yexus Khetos tau thiab.”8

Cia li xav txog qhov no, kuv cov kwv tij. Peb txais Vajtswv qub txeeg qub teg thiab koom nrog Yexus txais!

Yog li ntawd puas tsim nyog uas peb siv peb lub sij hawm, tej kev xav, cov nyiaj, thiab lub dag zog uas muaj nqi heev kom nrhiav tau kev nplua nuj los yog kom muaj kev lom zem los ntawm tej yam khoom siv hluav taws xob tshiab?

Tus Tswv tau cog lus rau peb hais tias “leej twg rau siab kom tau ob lub pov thawj hwj no, ... rau siab ua lawv txoj hauj lwm, ... [yuav] txais yuav kuv, tus Tswv tau hais li; ... thiab tus uas txais yuav kuv ces yog txais yuav kuv Leej Txiv; ... yog li ntawd yuav muab tag nrho tej uas kuv Txiv muaj rau nws.”9

Kuv tsis muaj peev xwm xav txog txhua yam uas kev cog lus qhia tias peb yuav txais. Kuv paub tias txoj kev cog lus no yeej loj, nws los ntawm Vajtswv, nyob mus ib txhis, thiab nws muaj nqi txaus kom peb siv zog tas peb lub neej thiaj tau.

Vim peb paub li no, ces ua li cas peb yuav tsis txaus siab thiab tsis xyiv fab ua hauj lwm pab tus Tswv thiab cov kwv tij cov muam thiab ua raws li peb txoj kev lav ris los ntawm Vajtswv lub pov thawj hwj?

Nov yog ib txoj hauj lwm tseem ceeb uas yuav ua rau peb siv tag nrho peb lub peev xwm. Peb puas xav pom rooj ntug qhib thiab muaj tus Vaj Ntsuj Plig Dawb Huv tshoov peb lub siab kom coj peb kev? Yog li ntawd ces cia peb muab peb rab liag hlais thiab sib zog ua txoj hauj lwm tseem ceeb no—lub hom phiaj uas tseem ceeb tshaj peb tus kheej!

Kev ua hauj lwm pab Vajtswv thiab peb cov kwv tij cov muam yuav ua rau peb hloov ua neeg zoo dua tshaj qhov peb xav.

Tej zaum nej yuav xav hais tias tsis muaj leej twg xav tau nej, tsis muaj leej twg saib nej, los yog xav hais tias nej tsis yog neeg tseem ceeb.

Kuv tu siab heev yog tias ib tug uas tuav lub pov thawj hwj xav li no. Muaj tseeb tiag, nej Leej Txiv Saum Ntuj Ceeb Tsheej yeej saib thiab xav tau nej. Nws hlub nej. Thiab kuv hais tseeb tias nej lub Koom Txoos xav tau nej.

Nej puas paub hais tias “Vajtswv xaiv yam uas neeg xav hais tias ruam kawg nkaus hauv lub ntiaj teb no kom cov neeg txawj ntse txaj muag; thiab Vajtswv xaiv yam uas neeg suav hais tias tsis muaj zog hauv lub ntiaj teb no kom cov neeg muaj zog poob ntsej muag.”10

Tej zaum peb qaug zog tiag tiag. Tej zaum peb tsis txawj ntse los sis tsis muaj zog. Tiam sis thaum Vajtswv ua hauj lwm dhau ntawm peb, tsis muaj leej twg uas sawv tau kov yeej peb.11

Vim li ntawd peb thiaj xav tau nej. Nej nyias muaj nyias tej yam tshwj xeeb nej ua tau, thiab Vajtswv pab tau kom tej yam ntawd loj tuaj. Nej txoj kev muaj peev xwm pab tsis nyob ntawm nej muaj hauj lwm dab tsi hauv lub Koom Txoos. Nej tej lub cib fim pab tsis paub kawg. Yog tias nej tos txog lub sij hawm nej pab tau, kuv yaum nej los ua tam sim no.

Tsis txhob tos kom rau siab plhuav txhim tsa Vajtswv lub nceeg vaj. Vim nej tuav lub pov thawj hwj, Vajtswv twb hu nej los ua hauj lwm lawm. Kawm Vajtswv txoj lus txhua hnub, thov Leej Txiv Saum Ntuj Ceeb Tsheej txhua hnub, ua raws li tej ntsiab cai ntawm txoj moo zoo uas txum tim rov qab los, ua Vajtswv tsaug thiab thov kom nws coj kev. Ces ua raws li nej kawm, nyob hauv nej tsev neeg thiab hauv txhua lub sij hawm hauv nej lub neej.

Nyob hauv Vajtswv txoj hau kev, nej sawv daws nyias muaj nyias tej hauj lwm ua. Yog nej tsis ua tej ntawd, ces yus paub tseeb tias Vajtswv txoj hau kev tseem yuav mus tom ntej. Tiam sis yog tias nej sawv thiab koom nrog lwm tus thiab cia Vajtswv lub hwj chim ua hauj lwm nyob hauv nej, nej yuav pom “rooj ntug qhib plho” thiab Nws yuav “nchuav ib qho koob hmoov xwv kom yuav tsis muaj chaw txaus txais tag nrho.”12 Cia li sawv ua raws li nej muaj peev xwm ua vim nej yog Vajtswv cov tub, thiab nej yuav ua zoo nyob hauv nej tsev neeg, nej lub tsev, nej zej zog, nej lub teb chaws, thiab nyob hauv lub ntiaj teb.

Thiab thaum nej ua li ntawd, thaum nej “tso nej txoj sia tseg” kom pab lwm tus,13 ces nej yuav loj hlob tuaj mus txog thaum nej “sawv siab npaum li tus Khetos.”14 Ces nrog tus Khetos, nej yuav npaj siab txais qub txeeg qub teg txhua yam uas nej Leej Txiv muaj.

Nej Tseem Ceeb Heev Rau Vajtswv

Kuv cov kwv tij, kuv cov phooj ywg, nej tseem ceeb. Peb hlub nej heev. Peb xav tau nej. Txoj hauj lwm no muaj tseeb. Lub pov thawj hwj uas nej muaj cib fim tuav yog los ntawm Vajtswv los.

Thaum nej xav txog tej lub npe ntawm ib tug tsim nyog tuav lub pov thawj hwj, nej yuav muaj kev txhawb nqa, txhawb nej mus siab dua ntxiv, mus txog thaum nej txais tej qub txeeg qub teg uas nej Leej Txiv Saum Ntuj Ceeb Tsheej tau tshwj tseg rau nej lawm. Kuv foom koob hmoov no rau nej thiab ua tim khawv li no los ntawm Yexus Khetos lub npe dawb ceev, amees.