Wal Ahkosr

Sie wal ma ahkuhtweyac kacsr nohfohn ke ohiyac fihsrwacsr se emet uh pa wen nuhtin Pahpah Lucng. Wacngihn srihpac lah suc kuht uh kuh meac kuht oruh ke moul uh, kuht enenuh in tiac muhlkuhnlah lah kuht tuhlihk nguhn nuhtin God. Kuht tuhlihk nahtuhl met liki kuht tuhkuh nuh facl se inge, ac kuht fah tuhlihk nahtuhl ne tok ma pahtpaht. Ma pwacye se inge enenuh in ekuhllah ohiyac kuht liye kuht sifacna, tamuhlwel ac tahmtahel wiyacsr kac, ac moul uh sifacna.

Koluk ohiyac, wacngihn kuhtwena sesr moul fal nuh ke ma nuh kwewa ma wal se inge fahk kac, “mwet nuh kwewa orekma koluk, ac elos nuh kwewa tiac sun luhpan wolacna se ma God El ahko nuh selos.”¹

Kuh in mwe suhpwacr ke kuhtuh pacl uh in etuh lah meac kalmac in oruh wen nuhtin God ac finne kuht etuh ke ma se ingacn, kuht srackna suhfallac. Mwet lokoalok el luhngse orekmakihn ma puhlakihnyuck inge. Setuhn el kena tuh kom in ahkuhtweyac lah suc kom an ke ma koluk lom liki na kuhiyac muhtahl lom an. Mwet lili, nimet lohngohl.

Kuht nuh kwewa liye ke sie tuhlihk srihsrihk el etwaclah in fahsr uh. El kahkahsrihk sis falkacl ac tikuclkucl. El ikori. Yac kuht muhlat ke el srihke uh? Moh. Pahpah fuhkah se ac kai sie tuhlihk srihsrihk ke el tikuclkucl uh? Kuht ahkkweye, kuht pahspahskihn, ac kuht kaksakihn ke srihpen ke kahkahsrihk sis falkac nuh kwewa, tuhlihk srihsrihk se apkuhran in oacna ninac pahpah tuhmwacl uh.

Inge, mwet lili, srihkwacacng nuh ke suwohswohs luhn God, kuht mwet uh oacnatuhlihk srihsrihk tikuclkucl uh. Tuhsruhk Pahpah pahkotwen tuhmwacsr Inkuhsrao El kena kuht in apkuhran in oacna El, ac, tamuhlwel sacohk, ma se ingacn enenuh pac in pa ma kuht finsrakkihn ne tok ma pahtpaht uh. God El kahlwem kac lah kuht tiac kuh in sana oacna El, tuhsruhk in kahkahsrihk sis falkacsr.

Nga tiac luhlahlfongi ke sie God suc akiyac mwe kol ac masap in sanwe kuht na in puhtatlac tuh El an kalyei kuht. Nga luhlahlfongi ke Pahpah Lucng suc luhngse ac karihngihn ac suc engan ke srihke lasr nuh kwewa in kapkapwack ac eklac oacna El. Finne kuht tahfonglac, El kwacfe kuht in tiac suhpwacrlac—in tiac fuhlweack kuh kahingkihn ma kunacsr—tuhsruhk in puhlaik, sokwack luhlahlfongi kuh lasr uh, ac srihke na.

Pahpah tuhmwacsr Inkuhsrao El luti tuhlihk nahtuhl ac kwacna suhpwacma kahsruh inkuhsrao ma tiac kuh in liyeyuck nuh selos suc kena fahsr tukun Mwet Lahngo.

Ac ma kol kuht nuh ke sifac se tok ma kuht nuh kwewa oacna sie kac: mwet nuh kwewa suc insacnweacng srihke in fahsr tukun Kraist elos pahngpahng mwet tuhma lutlut Lal. Finne kuht akihlen lah wacngihn sie sesr suwohs, kuht tiacna orekmakihn ma pwacye se ingacn in kihlyac ma kuht finsrakkihn, in srihkkihn ma kuht kuh kac, in kohtwaclah pacl in auliyak lasr, kuh in sruhnga in kapkapwack in wolac, in suwohswohs, in wolacna in fahsr tukun Mwet Kol ac Tohkohsrah lasr.

Esam lah Alu luhn Jisus Kraist luhn Mwet Luhlahlfongi ke Lwen Sahflah uh akwucki, tiac nuh sin mukul ac muhtwacn ma suwohs kuh suc tiac kuh in mokleyuck ke mwe sruhf luhn mahno, tuhsruhktuh akwucki nuh sin mwet ma oacna nga kom uh. Ac Alu uh muhsahiyuckyak fin yot luhn Mwet in Molwelah lasr, Leum Jisus Kraist,² suc Iwaclah la kuht kuh in ahknwacsnwacsye ac oruh “mwet wiyacn mwet … in sucu luhn God.”³

Fin wacngihn Iwaclah luhn Jisus Kraist, wacngihn kalmacn moul uh ac wacngihn finsrak kuh lutu ulelac. Ke oasr Iwaclah, moul uh ahkkweye, mokle fuhfahsryucsr in kapkapwack ac orwaclah ma kol nuh ke moul ma pahtpaht nuh yurin Pahpah tuhmwacsr Inkuhsrao.

Tuhsruhk finne srihpen Iwaclah uh pa in kahsruh mwet nuh kwewa in apkuhran oacna Kraist, srihpac kac an tiac ma in oruh kuht nuh kwewa in oacna sie. Kuhtuh pacl uh kuht tahfonglac nuhnkuh muh ohiyac ma sielacna liki ohiyacsr uh ma koluk se. Kuht kuh in orwaclah tahfonglac se in nuhnkuh ma ingacn ke srihpen sie mwet el sielacna liki kuht, sahp kalmac pa elos tiacna ahkenganye God. Kain in nuhnak inge oruh kuhtuh mwet uh in luhlahlfongi lah Alu uh kena in oruh mwet nuh kwewa in oacna sie—lah kais sie mempucr in oacna sie ke atac, puhla, nuhnak, ac elah oacna mempucr nuh kwewa sahyac. Ma se inge lain lahlmwetmwet luhn God, suc orwaclah mwet nuh kwewa in siena liki tamuhlwel lal, wen nuh kwewa in siena liki pahpah tuhmwacl. Finne fak ma oacna sie luhmah uh tiac oacna sie ke ohiyaclos kuh nguhnalos.

Ma inge oacyacpac lain srihpac luhn Alu luhn Jisus Kraist, ma akihlen ac karuhnguhnwacng sukohsohk in sulaclah wo—weacng mwacta kawihl kac nuh kwewa—ke kais sie nuh kwewa sin tuhlihk nuhtin God. Oacna mwet tuhma lutlut luhn Jisus Kraist, kuht ma sefanna ke kahs in luhlahlfongi ke wosasuc ma fohlohkihnyuckyak ac insacnweacng lasr in liyacacng masap luhn God. Tuhsruhk kuht siena ke facsin, un mwet, ac sulaclah lasr ke kafucrmacn.

Alu uh fokokoi ke kuht eis ma wo ke ma sienalac se inge ac ahkkweye kais sie in muhsahi ac orekmakihn talan lasr in sruhk ac ahkfokokoye mwet tuhma lutlut wiyacsr.

Mwet lili, mwet tuhma lutlut pa sie fuhfahsryucsr ke moul in fahsr tukun Mwet Lahngo. Ke inkacnek lasr Bethlehem nuh Golgotha, ac fah oasr pacl wowo pucspucs lasr in sislah fuhfahsryucsr lasr. Kuhtuh pacl uh oacna in muh moul uh upac liki na ma kuht finsrakkihn. Tuhsruhk oa mwet sruok pristut, kuht enenuh in puhlaik in fahsr tukun Mwet in Molwelah lasr, finne ma upac lasr oacna in muh arulacna toasrlac.

Ke falkac nuh kwewa ma kuht eis in fahsr tukun Wen nuhtin God, kuht kuh in ahkacsmakihnyeyuck lah kuht tiac suwohs. Tuhsruhk kuht enenuh in tu na kuh ac insacnweacng in mwet tuhma lutlut. Kuht enenuh in tiac fuhlweack. Lwelah kuht in pwacye nuh ke olweacng lasr uh. Lwelah kuht in tiac ngwetlah liki Mwet Iwe ac Mwet in Molwelah lasr ke kuht fahsr nuh Yohrohl, kais sie falkac tikuclkucl.

Mwet lili, pwacyena kuht fin fahsr tukun Leum lasr Jisus Kraist, kuht enenuh in insese nuh ke sifac ahktolu: mwet in onwelah mwet uh. Kuht suc akmuhsralah nuh ke pristut luhn God uh pahngonyuck in onwelah mwet sahyac.⁴

Ma kunacsr in muhsaheack, ahknoeyac, ahkfokokoyelah, sruhkwack, ac ahkfohnyelah. Ma kunacsr pa in fahsr tukun mwe srihkasrak luhn Mwet Lahngo ac in saplakyang nuh selos suc kweok. Kuht weluhlos yoksrah suc yoksrah, ac ahkkweyaclos suc enenuh ahkkweye.⁵ Kuht puhlah kihnet lalos suc kweok. Kuht kahsruh mwet muhnahs, kohlwack po ahtlah, ac ahkkweyelah intwe rarrar.⁶

Oa mwet luti luhn sucu uh, kuht mwet in onwelah. Oa mwet kol luhn pristut, kuht mwet in onwelah. Oa pahpah, wen, tamuhlwel, ac mukul tuhma, kuht enenuh in oruh mwet insacnweacng ac oaru in onwelah. Kuht us ke sie po sie mwe nwacnwack oil muhtahl nuh ke ahkinsewowoyeyacn mwet mas; ke po se sahyac an kuht us sie fuhlao in kihte mwet masrinsracl; ac ke insiyacsr kuht us kahs mihslac luhn God, ma onwelah mwet kweok.⁷

Pa inge kunohkohn se emet lasr oa mwet sruok pristut—ac ma inge ma nuh sin kwewana mwet sruok Aaronic ac Melchizedek Pristut. Wosasuc fohlohkihnyuckyak luhn Jisus Kraist uh ahkinsewowoye moul uh tiac ke kuht luhlahlfongi muhkwena—tuhsruhk yohk liki na ke kuht moulkihn uh. Mwet uh sruhkyuckyak ac sucu uh ahkfokokoyeyucklac ke elos moulkihn ip yohk luhn wosasuc. Ma wo lasr ac ma kunacsr in tiac fahk muhkwena ma pwacye, tuhsruhk oacyacpac in oruh ma pwacye.

Mwet Lahngo pa mwet orekma ke ma usrnguck. El pa Mwet in Onwelah kuhlwacna se. El pa mwet in srihkasrak lasr, kahlwem lasr, finne ke pacl lohsrlohsr upac, ac El ahkkahlwemye nuh sesr inkacnek pwacye se.

Lwelah kuht in fahsr Tohkohl. Lwelah kuht in oruh ma kunacsr ac eklac mwet in onwelah ke kuht kuhlwacnsuhpuh God ac mwet wiyacsr.

Sifac se ahkahkosr kuht nuh kwewa akacsruhi kac uh fohlohkihnkuhtlac nuh ke sifac se emet ke tahk soko lasr uh. Oa wen nuhtin Pahpah tuhmwacsr Inkuhsrao, kuht pa mwet usru ke ma nuh kwewa Lal.

“Nguhn luhn God sifacna kuhpahsrme nuh ke nguhnasr, in ahkkahlwemye lah kuht tuhlihk nuhtin God:

“Ac ke kuht ma nahtuhl, … ac fah ma lasr, ac kuht fah oacyacpac ipeis yurin Kraist ke ma God El ahko nuh sel; tuh kuht fin wi Kraist kweok, kuht fah oacyacpac weluhl in wolacna Lal.” ⁸

Nuhnkuh ma se inge, mwet lili luhk. Kuht nuh kwewa mwet usru luhn Kraist!

Yac, oasr kalmac lah puhs sesr sislah pacl na yohk srihpac lasr, nuhnak, inkacnek, ac kuhiyacsr in srihke in eis wal kuh kahsruhp kuh in ahkpwacryeyuck ke mwe ahkpwacr electronic sasuc ac srihsrihk uh?

Leum El fihliyac yohrohsr olweacng muhtahl se lah el suc luhlahlfongi ne ke na el eis pristut luo inge, in ahkyohkye kunohkohn lalos, ac fah eis Leum. Ac el suc Eisacl, eisacl Pahpah; ke ma inge ma nuh kwewa luhn Pahpah ac fah ituckyang nuh sel.⁹

Nga tiac kuh in nuhnkuh ma nuh kwewa ma olwelah se inge fahk kac uh. Tuhsruhk nga etuh lah wo na pwacye, muhtahl, ma pahtpaht, ac fal kuht in oruh kuhiyacsr nohfohn nuh kac ke moul uh.

Ke kuht etuh ma inge, yac fal kuht in insese ac engan in wi kuhlwacnsuhpuh Leum ac mwet wiyacsr uh ac oruh ma kunacsr ke pristut luhn God?

Pa inge sie orekma na suwohswohs ma fah lain lahlmwetmwet lasr ac olwaclihk kuhiyacsr nohfohn. Yac kuht kena puhlakihn mwe insewowo ac kolyuck inkuhsrao ac liye mokleyuck luhn Nguhn Muhtahl ahkkahlwemye nuh sesr inkacnek uh? Na kuht enenuh in muhtwacwacack orekma ac sang kuhiyacsr nuh ke orekma wolacna se inge—srihpac se ma yohk liki kuht!

Kuhlwacnsuhpuh God ac mwet wiyacsr ac fah srihke kuht ac ikihlkuhtlac in wo liki na ma kuht nuhnkuh muh kuht kuh in oacna.

Sahp kom kuh in nuhnkuh lah kom tiacna enenweyuck, lah kom muhlkihnyucklac kuh sruhngwacyuck, lah wacngihn srihpom.

Nga arulacna suhpwacr fin kuhtwena mwet sruok pristut uh puhlakihn ohinge. Pwacyena lah kom tiacna muhlkihnyucklac kuh sruhngwacyuck sin Pahpah tuhmom Inkuhsrao. Ac nga fahk nuh sum na pwacye lah kom enenweyuck sin Alu uh.

Yac kom tiac etuh lah “God El tuh sulaclah ma facluh pahgon muh lahlfon in [ahkmwekihnye] mwet lahlmwetmwet; ac God El sulaclah ma suc facluh pahngon muh muhnahs in [ahkmwekihnye] mwet kuh”?¹⁰

Sahp pwacye lah kuht muhnahs. Sahp kuht tiacna lahlmwetmwet kuh fokoko. Tuhsruhk ke God El orekma kacsr uh, wacngihn kuhtwena mwet ac wacngihn ma kuh in lain kuht.¹¹

Pa inge srihpac se ma oruh kom enenweyuck uh. Oasr ma kom sifacna kuh in sang in oruh, ac God El kuh in ahkyohkye ma kom sang kac an ke ohiyac wo. Kuhiyom tiac wiwi na pahng lom ke Alu uh. Puhslac ma kom kuh in oruh in kuhlwacnsap. Kom fin muhta na sano ac wacngihn ma kom oruh, nga kwacfe kom in sroacng wi oruh ma uh.

Nimet sano in oasr pahng se lom met liki kom sroacng wi orekma in muhsaheack tohkohsrahi luhn God. Oacna sie mwet sruok pristut, kom pahngonyuckyak tari in orekma. Lutlutkihn kahs luhn God lwen nuh kwewa, pruhe nuh sin Pahpah Lucng lwen nuh kwewa, sang nuh ke insiyom ip yohk luhn wosasuc ma sifilpac fohlohkihnyuckyak uh, sang kuloh nuh sin God, ac siyuck ke kolyuck Lal. Na moul ke ma kom lotwelah an, ke sucu lom an emet tuhsruhk oacyacpac ke kain in ma sikyak ke moul lom an kwewa.

Ke kolyuck wolacna luhn Leum, oasr ip kunom sifacna in oruh—not ma kom ac sifacna onkihn. Finne kom tiacna on, pwacyena lah on uh ac fahfahlacna. Tuhsruhk kom fin mukwikwi kac ac weacng chorus ac lwelah kuh luhn God in orekma keim, kom fah liye “winto inkuhsrao” ikacklah, ac El fah “ukwiyac nuh fowos kain in ma wo nuh kwewa, in arulacna yolyak nuh suwos.”¹² Tuyak oruh kuhiyom oacna sie wen nuhtin God, ac kom kuh in mwet mokleyuck wo nuh sin sucu lom, lohm sum, mura lom, facl lom, ac pwacyena nuh fin facluh.

Ac ke ohiyac se inge, ke “[kom] tuhlac” ke kuhlwacnsuhpuh mwet sahyac, ¹³ kom fah kapkapwack ac oruh ne ke na kom sun “fuhlwactwacn woiyacn moul suc oan in Kraist.” ¹⁴ Na kom fah ahkolah in eis usru, weluhl Kraist, ke ma nuh kwewa luhn Pahpah tuhmon.

Mwet lili sacohk luhk, yohk srihpowos. Kowos luhngseyuck. Kowos enenweyuck. Orekma se inge pwacye. Pristut ma kowos insewowo in sruok inge pwacyena lah ma luhn God.

Nga pruhe tuh kowos in motko wal pucspucs luhn mwet fal wo in sruok pristut, kowos fah oasr kahsruh muhtahl yuruwos, in kahsrwekowos pacl nuh kwewa in ahkwot nuh met nuh ke mwe usru wolacna ma Pahpah tomowos Inkuhsrao El ahko nuh suwos. Nga fihliyac yuruwos mwe insewowo se inge ac fahkwack luhlahlfongi luhk ke inen Jisus Kraist, amen.