2010–2019
Kleua el Dui
April 2013


Kleua el Dui

Eng soak el mo dmung a kleua el dui… el sebechel ngosukid el mtebengar sel deruchellel a dertsa er kid er a chelsel a diak a ulebengelel moktek er a Dios me sel ngii a ultekelled kid el urrekodel er a priesthood .

Rodam me a rebetik er a renguk el sechelik, a renguk a mui er a omereng el saul el teloi er kemiu. Ak chemat er kemiu a rechedam me a rechedam el rubak lulbeteterir a rengelekiu el sechal me a rengelekir a rengelekiu el sechal mei. Ak mereng a suliu a rengeasek el sechal el millilt el mei er tia er chelecha sils. Tiaikid a basio el kiriru el ngarngii. A kuureng el kmo ko melchesuar sel klodam el ngii oldak er kid, e nglunguchek me chelechang, e kemiu el rodam, me ko metik er a kltalreng, omelisiich, me a klausecheli.

Bebil er a taem e kid a rsechal olecholt er kid lokiu a diad. Betok er kid olab a betok el dui, ea dersta er ngii a ngarngii a lochotii el kired. El uaia, bebil er a dui ochotii sel deruchelled er a telungalek, el uaia ngalek el sechal, odam, buch, malechub a chedam. Ea bebil er a dui a smodii a urered er a beluulechad, el uaia toktang, soldau, malechub a kldachelbai. Ea bebil a mesaod a deruchelled er a Ikelesia.

Chelecha el sils eng soak el mo dmung a kleua el dui el kuumera el kmo ng mora rokui loba priesthood el chad el meliuekl er a beluulechad el dui el sebechel ngosukid el mtebengar sel deruchellel a dertsa er kid er a chelsel a diak a ulebengelel moktek er a Dios me sel ngii a ultekelled kid el urrekodel er a priesthood er a Ikelesia er a Jesus Kristo er a Uriul-klebesei el Santo.

Sechal Ngelekel a Chedam er a Babeluades

A tara dui el smodid el rokui, el ngii a kot el klou a ultutelel a sechal ngelekel a Chedam er a Babeluades. El diak el iior er a kmo kede ngerang er tial klengar, eng di diak el kired lobes el kmo kid a kmal ngelekel a Dios er a reng. Kid a mle ngelekel ruchei er a demechell el mei er tial beluulechad, e melemolem el Ngelekel el mora ulebongel. Tiaikid el beot el klemerang a ngodechii osenged er kid, rodam me a rodos er kid, me a osenged er a klengar.

Eng di, ng diak a ta er kid el kmal loltirakl a rokui el teletelel tial dui, “ele rokui el chad a mlora klengit me te mlo cheroid er a klebkellel a Dios.” 1

Ng sebechel bebil er a taem eng uaia bol mesaul a rengud el dodengei el kmo kede sechal ngelekel a Dios eng di diak el sebeched el mo er sel ngii a ultekelled. A cherraou a soal sel bo domelchesiu el uaisei. A Diablong a bai soal sel mesekau er a kngtim e diak momes er kau er sel ngii a chedaol teletael el sebechem el mo er ngii. Lak morrenges er ngii.

Kid el rokui el mla mesa tolechoi sel losuub el merael. Nguu a telbakes e metiteriter. Ng mo biou. Kede oungeroel er tial teletael? Ng diak. Ngera el chedam a kulebsengii a tolechoi el mo obiou? Kede melisiich, kede omrotech, kede chemat, ele ikel bek el bakes, e ngika el ngalek a merael mo uaia rechad er a blil.

Chelecha, e rodam, e mongaisisiu er ngii el mora klikiid el Dios, kid a rechad a kmeed el di uaia metitur, e mesesibas el tolechoi. Eng di a Demad er a Babeluades a soal a bo de uai Ngii, e, rodam, tiang a dirrek el kirel diak a ulebengelel moktek er kid. A Dios a medengei el kmo ng diak el sebeched el mo uai Ngii er a mereched el taem kede mekekokid el melisiich er kid el telbakes er a tal taem.

Ng diak kuumerang er a Dios el kudmokl a llach el moktek er ngii a mengiil er kid el tomall me luchul e Ngii le kelebsengid. A kuumerang er a Chedam er a Babeluades el mui er a beltikelreng e omekerreu e dmeu a rengul er a ikel bek el blakelreng er kid el melasm el mo uai Ngii. Me a kede mesibas e de ruebet, e Ngii a mengelechel er kid me lak bol mesaul a rengud e lak de kimer e dechiis er a ikel ngii a ngercheled—ng bai kired el mo mesisiich a rengud, mo mui er a klaumerang, e melemolem el melasm.

A Demad er a Babeluades a omekrael er a Rengelekel e blechoel e lodurokl a diak el meues el ngeso er a babelaudes el mo er tirkel blak a rengrir loltirakl er a Osobel.

Oltirakl er a Jesus Kristo

E tia ngoikid el mora ongeru el dui el kid el rokui osisiu er ngii el tekoi: a rokui el blak a rengrir loltirakl er a Kristo a okedongall el chedal. Meng uaisei el dodengei el kmo ng diak a ta er kid el klikiid, ng di diak dousbech er tial luldasu el mengesadel a kired el meruul, e diak de metom er a techall el mei er kid, e domekioud er a sils er kid er a ouchel el reng, malechub e lak el soad el merael mo ungil, e mesisiich el chedal a Mastang.

Molatk el kmo tial Ikelesia er a Jesus Kristo er a Uriul-klebesei el Santo a dimlak el mokedechor, el mora rsechal me a reddil el tir a diak el rebet er a ongetikaik ng bai mlokedechor el mora rechad el kmal di uai kau me ngak. Ng mlokedechor er a bedul Osobel, el Rubak el Jesus Kristo, 2 el Tngakireng er Ngii a uchul eng sebeched el mo beches e mo “chedal chimo el beluu … er a kebliil er a Dios.” 3

A lak a Tngakireng er a Jesus Kristo ea klengar a diak a belkul el diak ongilled el kirel a ngarmedad. Ngokiu a Tngakireng, ea klengar a meleketek, chedaol lomerael er a ulekeruled me a kedmekled el mekrolid el mora diak a ulebengelel klengar er a rengedel a Chedam.

Ng uaisei el Tngakireng a kirel ngosukid el rokui el mo uaia Kristo, eng di diak el belkul a kmo ng rullid el rokui el mo osisiu. Bebil er a taem e kede omdasu el kmo a blekeradel el kuk kora ngodech a olchotel a klengit. Kede dirrek el mo omdasu el kmo a chad el kuk kora ngodech a blekerdelel er kid, a diak el loltirakl er Dios. A uldasu el uaisei a rulterir a rebebil er a rechad el mo oumerang el kmo a Ikelesia a meruul er a rechad el di mo osisiu—el dersta er tir a kirir lomes, omelchesiu, omdasu, me a osisiu el blekeradel tir me a rebebil. Tia omtok er a llemesel a Dios, el ulemeob er a dersta el chad el kakerous er a odam er ngii, el bek el ngalek el sechal meng ngodech er a demal. Luldimukl er a rekebtot meng diak losisiu a blekerdelir me a sel chedaol blebelir.

Ng dirrek el omtok er sel kmal moktek er a Ikelesia er a Jesus Kristo, el ngii a kongei e oldubech er sel mimokl lomelilt er a chad—lobengkel aikel rokui el mo teletelel ruriul—er a bek el ngelekel a Dios. Me kid el oltirakl er a Kristo, e kede kaukledem er a klaumera er kid er a mla moluut el ebangkelio me a blakelreng er kid loltirakl a llechul a Dios. Eng di kede kakerous, a siukang, klechad, me a soal a rengud.

A Ikelesia meleketek sel dousbech aikaikid el klekakerous er kid el melisiich er a ta me a tang lomekeroul e ousbech a duch er kid lolngeseu e melisiich er a rebebil er kid.

Rodam, a mo oltirakl er a Osobel a teletael er tial kemanget lomerael er a klengar kid. Meng uaia omerollel a Kristo er a Bethlehem el mora Kolkata, eng betok a techelled el mo cheroid er tial omerael loltirakl er Ngii. Bebil er a taem e tial omerael a uaia le sal meringel er sel dulemdasu er ngii. Eng di kid loba priesthood, a kirel mesisiich a rengud loltirakl er a Osobel, luldimukl a le sal mo meringel ongarm el mei er kid.

Me a ikel bek el bakes el dengai loltirakl er a Ngelekel a Dios, e kede mo muklatk el kmo kid a diak de klikiid. Eng di ng kired el mo dechor el mesisiich e melemolem loltirakl. Lak de kimer. Ng kirel mo blak a rengud loltirakl a telbieled. Ng kired el blechoel lomes el bedul a Mesebechakl e Osobeled sel dorael bedul Ngii, el diak de klikiid er a bek el bekesed.

Omekungil a Reng

Rodam, alsekum e kede meral mo oltirakl er a Rubak el Jesus Kristo, eng kired el nguu sel ongedei el dui el: omekungil a reng.Kid el mla moterekokl loba priesthood er a Dios a mla “mokedong el mo omekungil er a rebebil.” 4

Ngercheled el omekedechor, omekbeches, melisiich, mesebechakl, e mengerungel. A ngercheled a oltirakl okesiul Osobel e olngeseu er a re ngara ringel. Kede “lmangel lobengterir a re ngara klengitelreng … e mengelaod er a rousbech oneglaod.”5 Kede omekungil er a retelemall a bedengir me a rengrir. Kede “olngeseu er a rengesonges, mesebechakl a chim el mesikang, e melisiich a uach el mechitechetong.” 6

Kid loldingel e olisechakl a blai, a kired lomekungil. Kid loungerachel er a re priesthood, a kired lomekungil. Kid el chedam, ngalek el sechal, rodam, buch, a kirel blak a rengud e mesisiich lomekungil. Kede oba blil a cheluch el ngarngii a bliich el cheluch lomekngeltengat er a rsmecher; tia belkul a kmo kede oba blauang lomeka er a resongerenger; ea chelsel a rengud e kede oba budech el tekingel a Dios, el omekungil a telemall el reng. ”7

Tiaikid a kot el ngarbab el ngercheled a roba priesthood—e osisiu el mora roba priesthood er a Aaron me a Melchizedek. A mla moluut el ebangkelio er a Jesus Kristo a omekngeltengat a klengar el diak di lultuil er a kmo kede oumera er ngii—ng bai ultuil er a otirekled er ngii. Ngokiu otireklel osisechakl er a ebangkelio ea dersta el chad a mosebechakl me a telungalek a mo mesisiich. Ng techelled e ngercheled el diak di dolekoi a ungil tekoi kede dirrek el meruul a ungil lomeruul.

A Osobel oureor ongasireng lomeruul. Ngii a Ngarbab el Omekungil. Ngii okesiu el mei er kid, llomes el mei er kid, luldimukl aikel kmal meringel el taem, e Ngii ochotii er kid a melemalt el rael.

Mei e doltirakl er Ngii. Mei e dekeldmokl a ngercheled me bo domekungil lokiu omesiunged el mora Dios me a rebebil er kid.

A Diak a Ulebengelel Klengar a Dikesed

A ongeua el dui el doba el rokui a melutk el kirel sel kot el dui el dulsaod er ngii el kid el sechal ngelekel a Chedam er a Babeluades, a mo ngmai aikel rokui Lolab.

“A Reng er a Dios me a rengud a dmak e kmu el kmo kede ngelekel a Dios:

“Me chelecha, el de ngelekel a Dios; e kede mo ngma rokui el klengeltengat er ngii; e dirrek el mo ngma dikesed lobengkel a Kristus; alsekum e kede obengkel chuarm, e kede dirrek el mo obengkel er a klebkellel.” 8

Ka momdasu er tiang, e rodam er ngak. Kid a mo ngmai a dikesed lobengkel a Kristo!

A leuaiseu e ngarngii a ultutelel a dechoit a mekreos el temed, uldesued, ududed, me a klisiched losiik a iilteet malechub aikel kot el beches el klekedall?

A Rubak a mla meskid a chedaol yaksok el kmo ngike el blak a rengul el mo ngmai aika el eru el priesthood, e meruul a ngerchelir a mo nguu a Rubak. Ea chad el nguu Ngii a nguu a Chedam; ea ikel rokui el lolab a Chedam a bo lengai. 9

Ng diak el sebechek el mtebengar aikel rokui el ngara chelsel tia el telbiil. Eng di ak medengei el kmo ng klebokel, e chedaol, e diak a ulebengelel, e uchul a rokui el blakelreng er a klengar.

Me sel dodengelii tiang, e ngera meng diak el blak a rengud e de ngara deureng el mesiou er a Rubak me a rebebil er kid e doltirakl a ngercheled er a priesthood er a Dios?

Tia kot el ngarbab el ureor er a bek el klisiched me a sebeched. Kede soad el mesa babeluades lobok e de sioning er a odbechel Chedaol Reng lolecholt er kid er a rael? Me a da domuchel el oureor el blak a rengud er tial ureor, el remuu a ngercheled er a priesthood!

A omesiou el mora Dios me a rebebil er kid a smisichid e ngodechid el mora telkib el ngarbab el teletael el ngii a dimlak dodesuar el kmo ng sebeched.

Kom locha mo omdasu el kmo ng diak a usbechelliu el diak a mesekemiu malechub el sorir kemiu, el diak mngerang.

Ng kmal mekngit a renguk alsekum e ngarngii oba priesthood lomelchesiu el uaisei. Ng klemerang, el kau a diak lak a mesekau e diak lak a soal kau er a Chedam er a Babeluades. E ngak a kmal subedau el kmo kau a usbechall er a chelsel a Ikelesia.

Ko medengei el kmo a “Dios a ngiltii aikel kora klebelung el tekoi er tial beluulechad [e olab el] omekrur er tirkel oleko te mellomes; ea Dios a dirrek el ngiltii aikel mechitechut el tekoi er tial beluulechad [e olab el] meruul a mo mesisiich el tekoi”?10

Meng uaisei el kid a locha mechitechut. E uaisei el locha diak de mellomes me diak de mesisiich. Eng di a Dios sel loureor lokiu kid, eng diak a chad me a ngii di el ngera el tomer kid.11

Tiaikid a uchul e ko musbechall. Ngarngii a ngera el modersii, ea Dios a sebechel choisois a modars er a chelsel a mesisiich el teletael. A techellem lodars a ngera a diak lultuil er a okedongem er a chelsel a Ikelesia. A techall er a omesiou le ko er kau a diak el ngemed. Me a lsekum eng diak mngara chelsel tial ureor, ea kulengit er kemiu me be msiseb e moruul a urerel a Dios.

Lak mongiil er a tokubets lokedong le ko er kau e bochu moureor el meleketek er a rengedel a Dios. Kemiu loba priesthood, a mla mokedong el mo oureor. Mosuub a tekingel a Dios er a bek el sils, moluluuch el mora Chedam er a Babeluades er a bek el sils, a osisechakl er a ebangkelio bol delalm er a chelsel a rengmiu, moureng a sulel a Dios, e molengit a ulekrael er Ngii. E bom kiei loltirakl a bla msuub, el kot er a chelsel a telungalek er kau e dirrek el ngii di el basio er a klengar kau.

Chelsel ngkel kot el meduch el Melibech a chelitakl, e kemiu a ngarngii a dersta el ngercheliu— el kiriu el remuul. Me a lak mruul ea chelitakl a di melemolem. Eng di a bo moruul e bom teloi er a rebek el chad e bechere klisichel a Dios me loureor er kau, e ko mo mes a “chesimer er a babeluades” lobok, e Ngii a mo “ochubel a klengeltengat, el mo diak a basio el ngmai.” 12 Bekiis el mo er sel ngii a ultekellem el ngelekel a Dios el sechal, e kau a mo okesiul a klungiaol er a chelsel a telungalek er kau, rekeblimiu, buai, beluu, me a beluulechad.

Chelsel tiaikid el teletael, e sel “modersii a klengar [kau]” el mesiou er a rebebil, 13 e ko mo mukeroul e merael mo mesisiich el mo er sel “telkelel a ultekellel a Kristo.” 14 Seikid e ko mo kldmokl el ngmai, lobengkel a Kristo, aikel lolab a Chedam.

Kemiu a Klou a Belkmiu el mora Dios

Rodam er ngak, ng klou a belkmiu. Ngarngii a re betik a rengrir er kemiu. Kemiu a usbechall. Tial ureor a klemerang. A priesthood el kemiu obang a meral kloklel a Dios.

Nglunguchek me sel molbedebek a betok el dui er a klikiid loba priesthood, e ko mo metik el kmo ngarngii sel chedaol ngeso, el blechoel lolngeseu er kau sel morael bedul bab el mo melai chedaol dikesem el Demam er a Babeluades a mla oreked el kirem. Ak meskemiu tial klengeltengat me a olchotel a klaumera er ngak el ngara ngklel a Jesus Kristo, amen.