2010–2019
Yog ib Qho Txuj Ci Loj
April 2013


Yog ib Qho Txuj Ci Loj

Yog nej tsis yog cov tub txib puv sij hawm uas muaj daim paib ntawm nej lub tsho ua tub txib, nim no yog lub sij hawm rau nej ua ib daim rau hauv nej lub siab—muab kos li Pov Lauj hais, “tsis yog nws muab kua mem sau, tiam sis yog nws muab Vajtswv tus uas muaj sia nyob tus Ntsuj Plig sau.”

Yexus Khetos lub neej muaj ntau yam txuj ci loj: ib leej niam uas yog nkauj xwb, ib lub hnub qub tshiab, cov tim tswv tshwm los xyuas cov neeg yug yaj, pab cov neeg dig muag pom kev, kho cov neeg uas ceg tawv mus tau kev, cov tim tswv hauv lub vaj Khexemanes thiab hauv lub ntxa, thiab qhov txuj ci loj tshaj plaws uas yog—Nws txoj Kev Sawv Rov Los.

Nej xav puas tau txog kaum ib tug Thwj Tim uas nyob saum roob ze lub zos Kalilais, thaum tus Tswv uas sawv rov qab los lawm ntuas lawv tias: “Yog li ntawd, nej cia li tawm mus qhia txhua haiv neeg, tuav Leej Txiv, Leej Tub thiab Vaj Ntsuj Plig Dawb Huv lub npe muab lawv ua kev cai raus dej”?1 “Nej yuav tsum mus qhia txoj moo zoo thoob plaws hauv ntiaj teb no kom sawv daws hnov.”2

“Txhua lub teb chaws los”? “Tag nrho lub ntiaj teb los”? “Txhua tus neeg los”? Puas yuav ua tau li ntawd? Txawm tias Yexus tau qhia lawv ntau ntau los, tej zaum lawv xav paub seb puas yuav muaj tej txuj ci loj loj li ntawd thaum lawv mus tshaj tawm txoj moo zoo.3

Kev ntseeg tau kov yeej kev poob siab, thiab Petus tau tsa nws lub suab, hais tias:

“Nej txhua tus uas nyob hauv lub nroog Yeluxalees no, … nej ua tib zoo mloog tej uas kuv yuav qhia rau nej: …

“… Yexus tus uas yog neeg Naxales los, … nej muab nws rau cov neeg txhaum coj mus ntsia rau saum ntoo khaub lig, thiab nej kom lawv muab nws tua pov tseg: …

“Tus Yexus no … tus uas Vajtswv tsa sawv hauv qhov tuag rov qab los, peb ua tau tim khawv.”4

Hnub ntawd sawv daws tau hnov tus ntsuj plig, thiab 3,000 txhiab leej neeg tau ua kev cai raus dej. Li Yexus tau cog lus tseg lawm, tau muaj tej cim thiab tej txuj ci loj vim yog cov neeg ntawd muaj kev ntseeg heev.

Thaum muab Yexus Khetos lub Koom Txoos txum tim rov qab los rau hauv ntiaj teb no 183 xyoo tas los lawm, tus Tswv txib nws cov thwj tim ib yam li Nws hais ntau pua xyoo tas los lawm hais tias: “Lub suab uas ceeb toom yuav yog rau txhua tus neeg.”5 “Vim saib seb, lub suab yuav tawm mus … rau tag nrho lub ntiaj teb, thiab rau hauv txhua txhia qhov chaw hauv ntiaj teb no.”6

“Txhua tus neeg los”? “Tag nrho lub ntiaj teb los”? “Txhua qhov chaw hauv lub ntiaj teb los”? Puas yuav ua tau li ntawd?

Tus Cawm Seej qhia Nws ib Tsoom Haiv Neeg Ntseeg hauv Hnub Nyoog Kawg,7 tiam sis lawv puas yuav to taub tias txoj hauj lwm no yuav loj npaum li cas? Tej zaum lawv xav paub seb puas yuav muaj tej txuj ci loj loj li ntawd thaum lawv mus tshaj tawm txoj moo zoo.

Thiab ib zaug ntxiv, kev ntseeg tau kov yeej kev poob siab, thiab txawm muaj ntau txhiab leej neeg uas tau ua kev cai raus dej. Hauv As Kiv teb, Txwj Laug Wilford Woodruff nrhiav pom tag nrho ib koog zej zog uas tos nws tuaj. Lawv tau hnov tus Tswv tus Ntsuj Plig, thiab nws muab 45 tus xib hwb thiab ntau pua tus mej zeej ua kev cai raus dej hauv nws thawj thawj lub hlis uas nws nyob tom Benbow thaj teb.8

Niaj hnub nim no los tsis txawv li cas. Thaum Txwj Laug David A. Bednar thiab kuv ua tub txib ze li 40 xyoo tas los lawm (thiab kuv qhia tau tseeb tseeb tias wb tsis yog ob tug tub txib laus tshaj uas zaum ntawm cov rooj zaum liab liab no), thaum ntawd mas muaj 16,000 tus tub txib. Xws li Thawj Tswj Hwm Thomas S. Monson qhia nag hmo, nim no peb muaj 65,000 tus—coob tshaj txhua lub sij hawm tas los lawm. Thaum ntawd muaj 562 ceg txheem ntseeg. Niaj hnub no muaj coob tshaj 3,000 ceg txheem ntseeg. Lub sij hawm ntawd, peb muaj tej pawg ntseeg hauv 59 lub teb chaws. Niaj hnub no peb muaj tej pawg ntseeg hauv 189 ntawm 224 lub chaws hauv ntiaj teb no. Peb yeej tsawg tsawg, ib yam li Nifais qhia tseg.9 Txawm li ntawd los, peb nyob hauv ib lub caij uas peb pom muaj ib yam li Danias qhia tseg hais tias: yog “ib lub pob zeb … uas txiav tawm … tsis muaj tes txiav … [uas tab tom puv] tag nrho lub ntiaj teb.”10

Peb lub caij nyoog no muaj ntau yam txuj ci loj. Rau lub hlis tas los lawm Thawj Tswj Hwm Monson qhia tias yuav pauv hnub nyoog rau cov tub hluas thiab ntxhais hluas uas xav mus ua tub txib, yeej hnov tau tus ntsuj plig. Kev ntseeg tau kov yeej kev poob siab, cov tub hluas thiab ntxhais hluas muaj kev ntseeg mus lawm tom ntej. Hnub Thursday tom qab lub rooj sab laj, kuv raug txib kom ua ntawv seb cov tub txib yuav mus qhov twg es qhia rau Thawj Pawg Thawj Tswj Hwm paub. Kuv xav tsis thoob vim pom cov tub hluas uas muaj 18 xyoo thiab cov ntxhais uas muaj 19 xyoo tau ua ntawv mus ua tub txib, lawv tau hloov lawv lub neej, tau mus ntsib kws kho mob, tau mus xam phaj nrog lawv tus npis sov thiab ceg txheem ntseeg tus thawj tswj hwm, thiab tau ua ntaub ntawv lawm—tau ua txhua yam no hauv tsib hnub nkaus xwb. Ntau txhiab leej twb ua tib yam li lawv ua thiab. Nws yog ib qho txuj ci loj.

Peb zoo siab vim peb cov muam muaj kev ntseeg heev, haj yam muaj tub txib coob heev los ntawm tej teb chaws thoob ntiaj teb no, thiab haj yam muaj tej khub niam txiv uas npaj siab mus ua tub txib. Twb qhia tias yuav ua tsib caug yim qhov chaw tshaj tawm txoj moo zoo tshiab, thiab peb qhov chaw qhia cov tub txib hauv Provo uas puv nkaus twb muaj ib qho chaw qhia tub txib tshiab hauv Mev teb.

Thawj Tswj Hwm Thomas S. Monson tau hais tias: “Peb yeej mob siab ua raws li tus Cawm Seej lo lus txib uas hais tias … ‘Yog li ntawd, nej cia li tawm mus qhia txhua haiv neeg, tuav Leej Txiv, Leej Tub thiab Vaj Ntsuj Plig Dawb Huv lub npe muab lawv ua kev cai raus dej.’”11 “Txoj hauj lwm … no … pheej yuav tawm mus, pauv thiab foom koob hmoov rau tib neeg. … Tsis muaj ib yam dab tsi hauv ntiaj teb no uas thaiv tau Vajtswv txoj hauj lwm.”12

Peb tab tom pom tus Tswv ib qho txuj ci loj thaum peb pom Nws txoj moo zoo tawm mus rau tag nrho lub ntiaj teb.

Cov kwv tij thiab cov muam, ib yam li tus Tswv tau txhib kom haj yam muaj coob tug tub txib, Nws tab tom qhib tib neeg zoo thiab ncaj ncees lub siab kom lawv yuav zoo siab tos txais Nws cov tub txib. Nej yeej paub lawv los sis yuav paub lawv. Lawv nyob hauv nej tsev neeg thiab nyob hauv nej koog zej zog. Lawv taug kev ib ncig nej tom kev, zaum ze nej tom tsev kawm ntawv, thiab nrog nej sib txuas lus online. Nej yog ib qho tseem ceeb heev ntawm qhov txuj ci loj no.

Yog nej tsis yog cov tub txib puv sij hawm uas muaj daim paib ntawm nej lub tsho ua tub txib, nim no yog lub sij hawm rau nej ua ib daim rau hauv nej lub siab—muab kos li Pov Lauj hais, “tsis yog nws muab kua mem sau, tiam sis yog nws muab Vajtswv tus uas muaj sia nyob tus Ntsuj Plig sau.”13 Thiab cov tub txib uas twb los tsev, nrhiav nej daim paib ua tub txib qub. Tsis txhob muab coj, tiam sis tso hauv ib qho chaw uas nej pom tau. Tus Tswv xav tau nej txoj kev pab ntau tshaj yav tas los lawm los ua ib yam cuab yeej hauv Nws txhais tes. Peb sawv daws tseem yuav pab ua qhov txuj ci no.

Txhua tus mej zeej ncaj ncees hauv lub Koom Txoos uas tau xav seb yuav ua li cas faib txoj moo zoo. Ib txhia lam faib txoj moo zoo, peb kawm tau ntau yam los ntawm lawv.14 Ib txhia tsis paub ua thiab xav paub seb yuav ua li cas thiaj qhia tau zoo dua, peb xav kom qhov uas peb paub tias peb ua tsis tshua zoo lawm yuav cia li ploj mus.

Peb txoj kev xav faib txoj moo zoo ua rau peb txhos caug, thiab peb yuav tsum ua li ntawd, rau qhov peb xav tau tus Tswv txoj kev pab.

Thawj Tswj Hwm Monson tau hais kom peb thov Vajtswv pab rau “tej chaw uas peb tsis tshua muaj txoj moo zoo thiab peb tsis muaj cai faib txoj moo zoo.”15 Thaum peb rau siab taij thov peb Leej Txiv Saum Ntuj Ceeb Tsheej, tus Tswv yuav pheej qhib tej qhov rooj tseem ceeb rau peb.

Peb kuj thov kom peb yuav muaj cib fim faib txoj moo zoo. Tus Thwj Tim Pov Lauj hais tias: “Nej yuav tsum npaj tos txhua lub sij hawm, yog thaum twg muaj neeg nug nej ... vim li cas nej muaj chaw cia siab, thaum ntawd nej thiaj paub teb lawv.”16

Vim muaj kev kub ntxhov17 thiab teeb meem18 ntau hauv lub ntiaj teb no, ces peb yeej paub yog vim li cas haj yam muaj neeg tsawg tsawg uas mus koom tej kev teev ntuj. Txawm tias neeg coob xav nyob ze Vajtswv thiab xav to taub lub ntsiab zoo dua rau lawv lub neej los, lawv tseem tsis paub teb ib co lus nug. Coob tug neeg muaj lub siab uas xav tau qhov tseeb, tiam sis li tus Yaj Saub Amaus hais, “Lawv yuav nrhiav tus Tswv txoj lus rau [txhua qhov chaw], tiam sis lawv yuav nrhiav [tsis tau] li.”19 Nej muaj cuab kav teb lawv cov lus nug. Thaum nej niaj hnub sib tham nej mam li ntxiv rau lawv txoj kev ntseeg Khetos.20

Tus Cawm Seej hais tias: “Tsa nej lub teeb kom nws yuav ci rau lub ntiaj teb. Saib seb kuv yog lub teeb uas nej yuav tsum tsa.”21

Kuv cog lus rau nej hais tias, thaum uas nej thov Vajtswv kom paub seb yuav tsum nrog leej twg tham, nej yuav pom tej tus neeg npe thiab ntsej muag. Nej yuav paub cov lus uas nej yuav tsum hais lub sij hawm ntawd.22 Nej yuav muaj tej cib fim los qhia lawv. Kev ntseeg yuav kov yeej kev poob siab, tus Tswv yuav foom koob hmoov rau nej kom nej yuav pom muaj tej txuj ci loj thiab.

Tus Cawm Seej qhia peb tias peb yuav ua li cas faib txoj moo zoo. Kuv nyiam zaj dab neeg txog Adales, uas nug hais tias, Xib Hwb, koj so qhov twg?”23 Yexus teb tau hais tias nws los nyob qhov twg lawm. Tiam sis Nws teb Adales hais tias, “Neb cia li los saib.”24 Kuv xav tias tus Cawm Seej tab tom hais tias, “Los saib thiab tsis yog saib seb kuv nyob qhov twg xwb tiam sis seb kuv ua neej nyob li cas. Los thiab saib kuv yog leej twg. Los thiab hnov tus Ntsuj Plig.” Peb tsis to taub txhua yam tsav txog lub caij nyoog ntawd, tiam sis peb yeej paub thaum uas Adales nrhiav pom nws tus tij laug Ximoos, nws hais tias, “Peb twb nrhiav tau … tus Khetos lawm.”25

Rau cov uas nyiam peb tej lus, peb mam li ua raws li tus Cawm Seej tus yam ntxwv es caw kom lawv yuav “los thiab saib.” Ib txhia yuav ua li peb caw, thiab lwm cov yuav tsis kam. Peb sawv daws yeej paub ib tug neeg uas coob tug tau caw ua ntej lawv kam “los thiab saib.” Cia peb xav txog cov neeg uas thaum i nrog peb nyob tiam sis tas sim no peb tsis tshua pom, ces mam li caw kom lawv rov qab los saib dua.

Hais txog tib neeg txoj kev ywj siab thiab sij hawm xaiv. Tus Tswv hais tias, “Cia txhua tus neeg xaiv rau nws tus kheej.”26 Yog tias ib tug neeg tsis muaj lub siab xav kawm peb tsis tas muab txoj kev phooj ywg los sis kev hlub ntawd pov tseg. Tab txawm lawv kam los sis tsis kam ua li nej caw kom “los thiab saib,” los nej tseem yuav paub tias tus Tswv pom zoo rau tej uas nej ua, thiab vim nej tau kev pom zoo ntawd, nej haj yam yuav muaj kev ntseeg uas yuav pab nej qhia nej tej kev ntseeg dua.

Rau nej cov uas siv Internet thiab xov tooj uas nqa ntawm tes, muaj tej kev tshiab rau nej caw lwm tus “los thiab saib.“ Cia peb niaj hnub faib peb txoj kev ntseeg thaum twg peb nyob online. LDS.org, Mormon.org, Facebook, Twitter—txhua yam no muab cib fim rau peb.

Kom faib tau txoj moo zoo, cov mej zeej hluas hauv Boston tau pib sau ntau zaj lus blog.27 Cov uas tuaj koom lub Koom Txoos tau pib kawm online, ces tau nrog cov tub txib sib sab laj. Qhov no kuj pab cov tub thiab ntxhais hluas haj yam muaj kev ntseeg nrog lwm tus neeg qhia txoj moo zoo. Ib tug ntawd hais tias: “Nov tsis yog cov tub txib tej hauj lwm. Nov yog kev lom zem vim ua tub txib.”28

Peb sawv daws tau yuav tau sib koom siab. Nrog rau cov neeg uas nyob hauv peb pawg ntseeg thiab cov tub txib, peb ntaus tswv yim thiab thov Vajtswv thiab ib leeg pab ib leeg. Thov kom nej yuav xav txog thiab thov Vajtswv rau cov tub txib. Tso siab rau lawv los qhia nej tsev neeg thiab cov phooj ywg. Tus Tswv yeej tso siab rau lawv thiab tau hu lawv los qhia thiab foom koob hmoov rau lawv cov uas nrhiav Nws.

Thawj Tswj Hwm Paulo Kretly hauv Mozambique Maputo Qhov Chaw Tshaj Tawm Txoj Moo Zoo tau piav li no: “Tib neeg coob heev hauv Mozambique cia li nyob ua ke ua ib khub niam txiv tiam sis tsis sib yuav vim hais tias cov neeg Africa tej kab lig kev cai hais tias yuav tau them ib tug nqi taub hau kim heev, feem ntau cov khub niam txiv them tsis tau tus nqi taub hau no.”29

Cov mej zeej thiab cov tub txib tau muab xav mus xav los thiab tau thov Vajtswv seb yuav ua li cas thiaj pab tau.

Lawv tau lus teb rau lawv tej kev thov Vajtswv uas hais kom lawv rau siab ntso qhia txog txoj kev cai coj dawb huv thiab qhia seb kev sib yuav thiab tsev neeg uas nyob mus ib txhis tseem ceeb npaum li cas. Ces thaum pab tej khub niam txiv hloov siab lees txim thiab sib yuav raws kev raws cai, lawv mam qhia tias tib neeg yuav tau kev zoo siab li cas thaum uas lawv ua raws nraim li Yexus Khetos qhia.

Nov yog ib daim duab txog tej khub niam txiv los ntawm ob lub nroog hauv Mozambique teb. Lawv tau sib yuav hnub Friday, ces lawv tau ua kev cai raus dej nrog lawv cov me nyuam hlob zog hnub Saturday.30 Ces tau caw lawv cov phooj ywg thiab tsev neeg kom “los thiab saib,” thiab ntau pua leej yeej tau “los thiab saib.”

Tom qab muab lawv ua kev cai raus dej, ib tug muam hais tias, “Peb yuav tsum xaiv seb peb puas yuav ua raws li peb pog koob yawm txwv tej kab lig kev cai los sis puas yuav ua raws li Yexus Khetos qhia. Peb tau xaiv los ua raws li Khetos qhia.”31

Tej zaum nej tsis nyob hauv Mozambique teb, tiam sis hauv nej lub neej, hauv nej tej kab lig kev cai, nej yeej muaj cuab kav faib Yexus Khetos txoj moo zoo uas raug txum tim rov qab los rau lwm tus neeg.

Thov rau nej Leej Txiv Saum Ntuj Ceeb Tsheej. Nov yog Nws txoj hauj lwm dawb ceev. Nws yuav coj qhia seb nej yuav tsum ua li cas. Nws yuav qhib tej qhov rooj, yuav tshem txhua yam uas thaiv kev, thiab pab nej kov yeej nej tej teeb meem. Tus Tswv tshaj tawm hais tias, “Lub suab uas ceeb toom rau rau txhua haiv nee, los ntawm kuv cov thwj tim lub qhov ncauj, … thiab tsis muaj leej twg uas txwv tau lawv.”32

Kuv hais lus tim khawv tias “tus Tswv lub suab yuav hu mus rau tag nrho lub ntiaj teb, kom sawv daws yuav hnov.”33 Nws yog ib qho txuj ci loj. Nws yog ib qho txuj ci loj. Los ntawm Yexus Khetos lub npe, amees.

Lus Cim

  1. Mathais 28:19.

  2. Malakaus 16:15.

  3. Saib Mathais 28:20Malakaus 16:17–18.

  4. Cov Tub Txib 2:14, 22–23, 32.

  5. Lus Qhuab Qhia thiab Kev Khi Lus 1:4.

  6. Lus Qhuab Qhia thiab Kev Khi Lus 58:64.

  7. Saib Lus Qhuab Qhia thiab Kev Khi Lus 1:5.

  8. Saib Teachings of Presidents of the Church: Wilford Woodruff (2004), 89–92.

  9. Saib 1 Nifais 14:12.

  10. Daniyees 2:34–35.

  11. Thomas S. Monson, “Welcome to Conference,” Ensign los sis Liahona, Tsib Hlis Ntuj 2009, 5.

  12. Thomas S. Monson, “As We Gather Once Again,” Ensign los sis Liahona, Tsib Hlis Ntuj 2012, 4.

  13. 2 Kauleethaus 3:3.

  14. Saib Clayton M. Christensen, The Power of Everyday Missionaries: The What and How of Sharing the Gospel (2013).

  15. Thomas S. Monson, “Welcome to Conference,” Ensign los sis Liahona, Kaum Ib Hlis Ntuj 2009, 6.

  16. 1 Petus 3:15.

  17. Lawv tau tuav raws tej kev tseeb uas tab tom muab kho los sis tsis quav ntsej li; saib Lus Qhuab Qhia thiab Kev Khi Lus 1:16; thiab saib Lus Qhuab Qhia thiab Kev Khi Lus 132:8.

  18. Saib Lus Qhuab Qhia thiab Kev Khi Lus 45:26; 88:91.

  19. Amaus 8:12.

  20. Tus Yaj Saub Yauxej Xamiv hais tias: “Cov neeg Ntseeg Presbyterian puas muaj ib qho tseeb? Muaj. Cov neeg Ntseeg Baptist, Methodist, thiab ntxiv, puas muaj ib qho tseeb? Muaj. … Peb yuav tsum muab txhua yam zoo thiab tej ntsiab cai tseeb hauv lub ntiaj teb sau los ua ke thiab saib tej ntawd rau nqi” (History of the Church, 5:517). “Peb tsis thov kom tib neeg muab tej yam zoo pov tseg … ; peb tsuas thov kom lawv los thiab txais ntxiv. Yuav muaj xwm dab tsis yog tias txhua tus neeg hauv ntiaj teb no tau txais Txoj Moo Zoo no? Lawv ib leeg yuav saib ib leeg rau nqi, thiab Vajtswv yuav nchuav koob hmoov nplua mias rau sawv daws, kuv yeej xav kom muaj li ntawd” (Teachings of Presidents of the Church: Joseph Smith [2007], 155). Thawj Tswj Hwm Gordon B. Hinckley hais tias: “Cia kuv hais tias peb zoo siab rau txhua yam tseeb hauv tag nrho txhua lub koom txoos thiab tej yam zoo uas lawv ua. Tiag tiag mas, peb hais rau cov neeg ntawd tias, nej cia li coj txhua yam zoo uas nej muaj, thiab cia saib seb peb ntxiv puas tau dab tsi rau thiab. Txoj hauj lwm no yeej zoo li ntawd. Qhov ntawd yog lub hauv paus ntawm peb cov tub txib tej hauj lwm” (“Excerpts from Recent Addresses of President Gordon B. Hinckley,” Ensign, Yim Hli Ntuj 1998, 72; “Words of the Living Prophet,” Liahona, Plaub Hlis Ntuj 1999, 19). “Peb yuav tsum ua neeg siab zoo. Peb yuav tsum pom tej yam zoo hauv txhua tus neeg. Peb tsis yog xav rhuav lwm lub koom txoos. Peb qhuab qhia thiab hais tej yam zoo thiab qhia qhov tseeb. Tiag tiag mas, peb hais rau cov neeg ntawd tias, nej cia li coj txhua yam zoo uas nej muaj, thiab cia saib seb peb ntxiv puas tau dab tsi rau thiab.’ Qhov ntawd yog lub hauv paus ntawm cov tub txib tej hauj lwm thiab qhov ntawd yeej pab” (“Messages of Inspiration from President Hinckley,” Church News, Kaum Ib Hlis Ntuj. 7, 1998, 2; saib ldschurchnews.com).

  21. 3 Nifais 18:24.

  22. Saib Lus Qhuab Qhia thiab Kev Khi Lus 84:85; 100:6.

  23. Yauhas 1:38.

  24. Yauhas 1:39.

  25. Yauhas 1:41.

  26. Lus Qhuab Qhia thiab Kev Khi Lus 37:4.

  27. Saib, kom tau ib qho piv txwv, youngandmormon.com.

  28. Tham xov tooj nrog Jackson Haight thaum lub Peb Hlis Ntuj hnub tim 22, 2013.

  29. Tau ib tsab ntawv los ntawm Thawj Tswj Hwm Paulo V. Kretly, Peb Hlis Ntuj hnub tim 6, 2013.

  30. Tau cov duab los ntawm Thawj Tswj Hwm Paulo V. Kretly. Thawj pawg neeg tuaj tim Maputo; lawv sib yuav thaum lub Kaum Ib Hlis Ntuj hnub tim 30, 2012, thiab tau ua kev cai raus dej thaum lub Kaum Ob Hlis Ntuj hnub tim 1, 2012. Pawg neeg thib ob tuaj tim Beira; lawv sib yuav thaum lub Peb Hlis Ntuj hnub tim 1, 2013, thiab tau ua kev cai raus dej thaum lub Peb Hlis Ntuj hnub tim 2, 2013.

  31. Tau ib tsab ntawv los sis ntawm Thawj Tswj Hwm Paulo V. Kretly, Peb Hlis Ntuj hnub tim 6, 2013.

  32. Lus Qhuab Qhia thiab Kev Khi Lus 1:4–5.

  33. Lus Qhuab Qhia thiab Kev Khi Lus 1:11.