វាជាអព្ភូតហេតុមួយ
ដោយ នែល អិល អាន់ឌើរសិន
នៃកូរ៉ុមនៃពួកសាវកដប់ពីរនាក់
យើងកំពុងថ្លែងទីបន្ទាល់ពីអព្ភូតហេតុនៃព្រះអម្ចាស់ ពេលដែលដំណឹងល្អទ្រង់កំពុងផ្សាយទៅទូទាំងពិភពលោក ។
ជីវិតរមែងស្លាប់របស់ព្រះយេស៊ូវគ្រីស្ទពោរពេញដោយអព្ភូតហេតុ ៖ ម្ដាយព្រហ្មចារី ផ្កាយថ្មីមួយ ទេវតាលេចមកឯពួកអ្នកគង្វាល អ្នកខ្វាក់បានមើលឃើញ អ្នកពិការដើរបាន ទេវតានៅសួនច្បារគែតសេម៉ានី និង នៅផ្នូរ ហើយអព្ភូតហេតុអស្ចារ្យជាងគេបំផុត—គឺការរស់ឡើងវិញដ៏មានសិរីរុងរឿងរបស់ទ្រង់ ។
តើអ្នកអាចស្រម៉ៃពីរូបភាពនៃពួកសាវកដប់មួយនាក់នៅលើភ្នំ ជិតស្រុកកាលីឡេបានទេ ពេលព្រះអម្ចាស់ដ៏រស់ឡើងវិញបានយាងមកជួបពួកលោក ហើយមានបន្ទូលថា ៖ « ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធចុះ » 1 « ចូរអ្នករាល់គ្នាទៅពេញសព្វក្នុងលោកិយ ហើយផ្សាយដំណឹងល្អទូទៅដល់គ្រប់មនុស្សទាំងអស់ចុះ » ។ 2
« គ្រប់ទាំងសាសន៍ ? » « ពេញសព្វក្នុងលោកិយ ? » « គ្រប់មនុស្សទាំងអស់ ? » តើអាចទៅរួចទេ ? ទោះព្រះយេស៊ូវគ្រីស្ទបានអះអាងចំពោះពួកលោកក្ដី ក៏ពួកលោកប្រាកដជាឆ្ងល់ ថាបើអព្ភូតហេតុពិតជាកើតឡើងចំពោះពួកលោក ក្នុងការផ្សព្វផ្សាយដំណឹងល្អឬទេ ។ 3
ជំនឿឈ្នះលើការសង្ស័យ ហើយពេត្រុសបានបន្លឺសំឡេងឡើងថា ៖
« ពួកអ្នកនៅក្រុងយេរូសាឡិមទាំងអស់អើយ … ប្រុងស្ដាប់ពាក្យខ្ញុំចុះ ៖ …
« ព្រះយេស៊ូវ ជាអ្នកស្រុកណាសារ៉ែត, … [ ដែល ] អ្នករាល់គ្នាបានចាប់ទ្រង់ ដោយសារដៃមនុស្សទទឹងច្បាប់ ព្រមទាំងឆ្កាងសម្លាប់ទ្រង់ផង ៖ …
« ព្រះយេស៊ូវនេះហើយដែលព្រះ [ បាន ] ប្រោសឲ្យទ្រង់មានព្រះជន្មរស់ឡើងវិញ ហើយពួកយើងនេះជាទីបន្ទាល់ពីទ្រង់ទាំងអស់គ្នា » ។4
ថ្ងៃនោះ មានឥទ្ធិពលនៃព្រះវិញ្ញាណដែលមិនអាចបដិសេធបាន ហើយមានមនុស្ស 3,000 នាក់ បានជ្រមុជទឹក ។ ដូចព្រះយេស៊ូវបានសន្យា ទីសម្គាល់ និង អព្ភូតហេតុបានកើតឡើងតាមជំនឿនៃអ្នកជឿ ។
កាលដែលសាសនាចក្រនៃព្រះយេស៊ូវគ្រីស្ទត្រូវបានស្ដារដល់ផែនដីរយៈពេល 183 ឆ្នាំ កន្លងទៅនេះ ព្រះអម្ចាស់បានបញ្ជាដល់ក្រុមសិស្សដ៏តូចរបស់ទ្រង់ ដូចដែលទ្រង់បានមានបន្ទូលជាច្រើនសតវត្សមកហើយដែរថា ៖ « សម្លេងនៃការព្រមាន នឹងត្រូវបានដល់មនុស្សទាំងអស់ » ។ 5« ត្បិតប្រាកដមែន សម្លេងត្រូវតែចេញ … ដល់ពិភពលោកទាំងអស់ និង ទៅដល់ចុងផែនដីបំផុត » ។ 6
« មនុស្សទាំងអស់ ? » « ពិភពលោកទាំងអស់ ? » « ចុងផែនដីបំផុត ? » តើអាចទៅរួចទេ ?
ព្រះអង្គសង្គ្រោះបានអះអាងដល់ពួកបរិសុទ្ធថ្ងៃចុងក្រោយរបស់ទ្រង់ 7ប៉ុន្តែតើពួកគេអាចមើលឃើញជាមុនពីទីផ្ដាច់ព្រ័ត្រ និង ជោគវាសនានៃកិច្ចការដ៏អស្ចារ្យនេះទេ? ពួកគេប្រាកដជាឆ្ងល់ថា តើអព្ភូតហេតុពិតជាកើតឡើងចំពោះពួកគេក្នុងការផ្សព្វផ្សាយដំណឹងល្អឬទេ ។
ជាថ្មីទៀត ជំនឿឈ្នះលើការសង្ស័យ ហើយមានមនុស្សរាប់ពាន់នាក់បានជ្រមុជទឹក ។ នៅប្រទេសអង់គ្លេស អែលឌើរ វិលហ្វូឌ វូឌដ្រុព្វ បានរកឃើញសហគមន៍មួយទាំងមូល ដែលរង់ចាំការមកដល់របស់លោក ។ ព្រះវិញ្ញាណនៃព្រះសណ្ឋិតលើពួកគេ ហើយលោកបានជ្រមុជទឹកដល់គ្រូប្រដៅសាសនា 45 នាក់ និង សមាជិករាប់រយនាក់ទៀត អំឡុងមួយខែដំបូងនៅកសិដ្ឋាន បិនបូ ។8
មិនមានអ្វីខុសគ្នាទេនៅជំនាន់យើងនេះ ។ ប្រហែលជា 40 ឆ្នាំ កន្លងមកហើយ ពេលដែល អ៊ែលឌើរ ដេវិឌ អេ បែដណា និង ខ្ញុំ ជាអ្នកផ្សព្វផ្សាយ នោះមានអ្នកផ្សព្វផ្សាយ 16,000 នាក់ ។ ( ហើយខ្ញុំអាចអះអាងដល់អ្នកថា យើងមិនមែនជាអ្នកត្រឡប់ពីផ្សព្វផ្សាយដែលចាស់ជាងគេ ដែលអង្គុយនៅកៅអីពណ៌ក្រហមនោះទេ ) ។ ដូចប្រធាន ថូម៉ាស អេស ម៉នសុន បានរាយការណ៍កាលពីម្សិលមិញ ឥឡូវយើងមាន 65,000 នាក់—ច្រើនជាងពេលណាៗពីមុនមក ។ កាលគ្រានោះ មានស្តេកចំនួន 562 ស្ដេក ។ សព្វថ្ងៃនេះមានស្តេកច្រើនជាង 3000 ស្ដេក ។ ពេលនោះ វួដ និង សាខាយើងមាននៅក្នុងប្រទេសចំនួន 59 ប្រទេស ។ សព្វថ្ងៃនេះ យើងមានក្រុមជំនុំ 189 ក្នុងចំណោមជាតិសាសន៍ចំនួន 224 ជាតិសាសន៍ និង ដែនដីនៃពិភពលោកនេះ ។ យើងមានចំនួនតិចក្នុងតួលេខ ដូចជានីហ្វៃបានប្រាប់ទុកជាមុនមកហើយ ។9 តែក្នុងពេលដដែលនេះដែរ អ្នក ហើយនិង ខ្ញុំ ជាសាក្សីផ្ទាល់ភ្នែកពីពាក្យទំនាយរបស់ដានីយ៉ែល ដែលថា ៖ « ថ្ម … ដាប់ផ្ដាច់ចេញ ឥតដៃអ្នកណាធ្វើ … [ កំពុងបំពេញ ] ពេញផែនដី » ។10
សព្វថ្ងៃនេះជាជំនាន់នៃអព្ភូហេតុដ៏អស្ចារ្យ ។ ប្រាំមួយខែកន្លងទៅ ពេល ប្រធាន ម៉នសុន បានប្រកាសពីការផ្លាស់ប្ដូរអាយុនៃយុវជន យុវនារី ដែលមានបំណងបម្រើបេសកកម្ម នោះមានឥទ្ធិពលនៃព្រះវិញ្ញាណដែលមិនអាចបដិសេធបាន ។ ជំនឿឈ្នះលើការសង្ស័យ ហើយយុវជន យុវនារីឈានឆ្ពោះទៅមុខ ។ ថ្ងៃព្រហស្បតិ៍ បន្ទាប់ពីសន្និសីទនោះ ខ្ញុំត្រូវបានចាត់តាំងឲ្យផ្ដល់យោបល់ពីការហៅរបស់អ្នកផ្សព្វផ្សាយទៅកាន់គណៈប្រធានទីមួយ ។ ខ្ញុំមានការអស្ចារ្យណាស់ ដែលឃើញពាក្យស្នើរបស់បុរសអាយុ 18 ឆ្នាំ និង ស្ដ្រីអាយុ 19 ឆ្នាំ ដែលបានកែសម្រួលផែនការរបស់ខ្លួនរួចជាស្រេច បានជួបវេជ្ជបណ្ឌិតរួចហើយ បានសម្ភាសជាមួយប៊ីស្សព និង ប្រធានស្តេករួចហើយ ហើយបានដាក់ពាក្យស្នើរបស់គេរួចទៅហើយ—ពួកគេធ្វើកិច្ចការទាំងអស់នេះក្នុងពេលតែប្រាំថ្ងៃប៉ុណ្ណោះ ។ ឥឡូវនេះ មានចំនួនរាប់ពាន់នាក់ថែមទៀតបានចូលរួមនឹងពួកគេដែរ ។ វាជាអព្ភូតហេតុមួយ ។
យើងមានអំណរគុណចំពោះជំនឿរបស់អ្នកផ្សព្វផ្សាយសាសនាស្រីដែលផ្ដល់កម្លាំងដល់យើង ចំពោះចំនួនដែលកើនឡើងនៃអ្នកផ្សព្វផ្សាយសាសនាពីប្រទេសទាំងឡាយទូទាំងពិភពលោក និង ចំនួនកើនឡើងនៃអ្នកផ្សព្វផ្សាយជាប្ដីប្រពន្ធដែលត្រៀមរួចស្រេចដើម្បីបម្រើ ។ បេសកកម្មថ្មីចំនួនហាសិបប្រាំបី ត្រូវបានប្រកាស ហើយជាការបន្ថែមដល់មជ្ឈមណ្ឌលហ្វឹកហ្វឺនអ្នកផ្សព្វផ្សាយនៅ ប្រូវ៉ូ ដែលពេញណែននោះ យើងមានមជ្ឈមណ្ឌលមួយទៀតនៅទីក្រុង មិកស៊ីកូ ។
ប្រធាន ថូម៉ាស អេស ម៉នសុន បានមានប្រសាសន៍ថា ៖ « យើងទទួលបញ្ជារបស់ព្រះអង្គសង្គ្រោះយ៉ាងហ្មត់ចត់បំផុត … ‹ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យដោយនូវព្រះនាមព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធចុះ › » ។ 11 « កិច្ចការ … នេះ … នឹងបន្តទៅមុខ ផ្លាស់ប្ដូរ និង ផ្ដល់ពរដល់ជីវិត ។ … គ្មានកម្លាំងណានៅក្នុងផែនដីទាំងមូល ដែលអាចបញ្ឈប់កិច្ចការនៃព្រះបានឡើយ » ។12
យើងកំពុងថ្លែងទីបន្ទាល់ពីអព្ភូតហេតុនៃព្រះអម្ចាស់ ពេលដែលដំណឹងល្អទ្រង់កំពុងផ្សាយទៅទូទាំងពិភពលោក ។
បងប្អូនប្រុសស្រី ប្រាកដដូចជាព្រះអម្ចាស់បានបំផុសឲ្យមានអ្នកផ្សព្វផ្សាយសាសនាបន្ថែមទៀត ដើម្បីបម្រើ នោះទ្រង់ក៏កំពុងដាស់ដល់គំនិត និង បើកដួងចិត្តនៃមនុស្សល្អ និង ស្មោះត្រង់ថែមទៀតផងដែរ ដើម្បីទទួលអ្នកផ្សព្វផ្សាយសាសនារបស់ទ្រង់ ។ អ្នកស្គាល់ពួកគេរួចហើយ ឬ នឹងស្គាល់ពួកគេ ។ ពួកគេគឺនៅក្នុងគ្រួសារអ្នក និង រស់នៅក្នុងភូមិផងអ្នក ។ ពួកគេដើរកាត់អ្នក អង្គុយជិតអ្នកនៅសាលា និង ស្គាល់អ្នកតាមអ៊ិនធើរណិតនោះឯង ។ អ្នកក៏ជាផ្នែកដ៏សំខាន់ផងដែរ ក្នុងអព្ភូហេតុដែលកំពុងកើតឡើងនេះ ។
បើអ្នកមិនមែនជាអ្នកផ្សព្វផ្សាយសាសនាពេញម៉ោង ជាមួយនឹងស្លាកឈ្មោះជាប់នឹងអាវទេនោះ ឥឡូវនេះ ជាពេលវេលាដើម្បីគូសស្លាកមួយក្នុងដួងចិត្តអ្នក—គូសដូចជាប៉ុលនិយាយថា « មិនមែនសរសេរនឹងទឹកខ្មៅទេ គឺនឹងព្រះវិញ្ញាណនៃព្រះដ៏មានព្រះជន្មរស់វិញ » ។13ហើយអ្នកដែលត្រឡប់ពីផ្សព្វផ្សាយសាសនាវិញ សូមរកមើលស្លាកអ្នកផ្សព្វផ្សាយចាស់របស់អ្នក ។ កុំពាក់វា តែដាក់វានៅកន្លែងដែលអ្នកអាចមើលឃើញ ។ ព្រះអម្ចាស់ត្រូវការអ្នកឥឡូវនេះ ជាងពេលណាៗទាំងអស់ ដើម្បីជាឧបករណ៍នៅក្នុងព្រះហស្ដទ្រង់ ។ យើងទាំងអស់គ្នា អាចចូលរួមធ្វើឲ្យអព្ភូតហេតុនេះកើតឡើងបាន ។
សមាជិកសុចរិតគ្រប់រូបនៃសាសនាចក្រ បានគិតពីរបៀបចែកចាយដំណឹងល្អ ។ អ្នកខ្លះចែកចាយដំណឹងល្អដោយងាយ ហើយយើងអាចរៀនបានច្រើនពីពួកគេ ។ 14 អ្នកខ្លះពិបាក ហើយឆ្ងល់ថា ត្រូវធ្វើយ៉ាងណាឲ្យល្អជាងមុន ដោយសង្ឃឹមថា អារម្មណ៍ដែលយើងមានថាខុសនៅពេលខ្លះនោះ អាចចេញពីយើងទៅ ។
បំណងយើងដើម្បីចែកចាយដំណឹងល្អ នាំឲ្យយើងទាំងអស់គ្នាឲ្យអធិស្ឋាន ហើយដោយសារយើងត្រូវការជំនួយពីព្រះអម្ចាស់ នោះយើងត្រូវអធិស្ឋាន ។
ប្រធាន ម៉នសុន បានស្នើឲ្យយើងអធិស្ឋានសម្រាប់ « កន្លែងដែលឥទ្ធិពលយើងនៅមានកម្រិត និង កន្លែងដែលគេមិនអនុញ្ញាតឲ្យយើងផ្សព្វផ្សាយដំណឹងល្អដោយសេរី » ។ 15ពេលយើងសុំព្រះបិតាសួគ៌ដោយស្មោះអស់ពីចិត្ត នោះព្រះអម្ចាស់នឹងបន្តបើកទ្វារសំខាន់ៗដល់យើង ។
យើងក៏អធិស្ឋានសម្រាប់ឱកាសផ្ទាល់ខ្លួនដើម្បីចែកចាយដំណឹងល្អផងដែរ ។ សាវក ពេត្រុស បាននិយាយថា ៖ « ឲ្យប្រុងប្រៀបជានិច្ច … ដើម្បីនឹងតបឆ្លើយដល់អ្នកណាដែលសួរពីហេតុ [ នៃ ] សេចក្ដីសង្ឃឹមរបស់អ្នក » ។16
ជាមួយនឹងការភាន់ច្រឡំ17និង ចលាចល18នៃពិភពលោកសព្វថ្ងៃនេះ វាមិនមែនជាការភ្ញាក់ផ្អើលទេ ដែលមានមនុស្សកាន់តែតិចទៅៗ ចូលរួមក្នុងកន្លែងថ្វាយបង្គំរបស់គេនោះ ។ ថ្វីបើមានមនុស្សជាច្រើនចង់ខិតជិតព្រះ និង ចង់យល់ឲ្យកាន់តែច្បាស់ពីគោលបំណងនៃជីវិតក៏ដោយ ក៏ពួកគេមានសំនួរទាំងឡាយដែលគ្មានចម្លើយ ។ មនុស្សជាច្រើនមានចិត្តស្វែងរកសេចក្ដីពិត តែដូចព្យាការី អេម៉ុសបានពណ៌នាថា « គេ [ កំពុងរត់ ] ច្រវាត់ [ ខំស្វែងរក ] ព្រះបន្ទូលនៃព្រះយេហូវ៉ា តែ [ មិនអាច ] ប្រទះឡើយ » ។19អ្នកអាចជួយឆ្លើយសំនួរគេបាន ។ ក្នុងការសន្ទនារបស់អ្នករាល់ថ្ងៃ អ្នកអាចបន្ថែមជំនឿក្នុងព្រះគ្រីស្ទដល់ជំនឿគេ ។20
ព្រះអង្គសង្គ្រោះមានបន្ទូលថា ៖ « ចូរលើកពន្លឺអ្នករាល់គ្នាឡើង ប្រយោជន៍ឲ្យបានភ្លឺដល់មនុស្សលោក ។ មើលចុះ យើងជាពន្លឺដែលអ្នករាល់គ្នានឹងលើកឡើង » ។ 21
ខ្ញុំសន្យានឹងអ្នកថា កាលដែលអ្នកអធិស្ឋាន ដើម្បីដឹងថាត្រូវនិយាយជាមួយនរណា នោះឈ្មោះ និង មុខមាត់គេនឹងចូលក្នុងគំនិតអ្នក ។ ពាក្យដែលត្រូវនិយាយនឹងផ្ដល់ឲ្យនៅគ្រាដែលអ្នកត្រូវការនោះឯង ។ 22ឱកាសនឹងមានដល់អ្នក ។ ជំនឿនឹងឈ្នះលើការសង្ស័យ ហើយព្រះអម្ចាស់នឹងប្រទានពរអ្នកនូវអព្ភូតហេតុផ្ទាល់ខ្លួនអ្នក ។
ព្រះអង្គសង្គ្រោះបង្រៀនយើងពីរបៀបចែកចាយដំណឹងល្អ ។ ខ្ញុំចូលចិត្តរឿងអំពី អនទ្រេ ដែលបានសួរថា « លោកគ្រូ តើលោកនៅឯណា ? » 23ព្រះយេស៊ូវអាចឆ្លើយតបពីកន្លែងដែលទ្រង់គង់ ។ តែទ្រង់បែរជាមានបន្ទូលទៅ អនទ្រេ ថា « ចូរតាមខ្ញុំទៅមើល » ។24ខ្ញុំចូលចិត្តគិតថា ព្រះអង្គសង្គ្រោះមានបន្ទូលថា « ចូរតាមខ្ញុំទៅមើល មិនត្រឹមតែកន្លែងដែលខ្ញុំនៅទេ តែរបៀបដែលខ្ញុំនៅផង ។ ចូរតាមខ្ញុំមកមើល ថាខ្ញុំជានរណា ។ ចូរមកទទួលព្រះវិញ្ញាណ » ។ យើងមិនដឹងអ្វីគ្រប់យ៉ាងអំពីថ្ងៃនោះទេ តែយើងពិតជាដឹងថា ពេល អនទ្រេ រកឃើញបងប្រុសគាត់គឺ ស៊ីម៉ូន ហើយ គាត់ប្រកាសថា « យើងបានឃើញ … ព្រះគ្រីស្ទ » ។25
ចំពោះអ្នកដែលចាប់អារម្មណ៍ក្នុងការសន្ទនារបស់យើង នោះយើងអាចធ្វើតាមគំរូព្រះអង្គសង្គ្រោះ ដោយការអញ្ជើញគេឲ្យ « ចូរតាមខ្ញុំទៅមើល » ។ អ្នកខ្លះនឹងទទួលការអញ្ជើញ អ្នកខ្លះនឹងមិនទទួល ។ យើងទាំងអស់គ្នាស្គាល់ពីម្នាក់ដែលត្រូវបានអញ្ជើញច្រើនដង មុននឹងទទួលការអញ្ជើញឲ្យ « ចូរតាមខ្ញុំទៅមើល » ។ ចូរយើងគិតផងដែរអំពីអ្នកដែលធ្លាប់នៅជាមួយយើង តែឥឡូវមិនសូវបានឃើញ សូមអញ្ជើញគេឲ្យត្រឡប់ទៅមើលម្ដងទៀត ។
យើងគោរពដល់ជម្រើស និង ពេលវេលារបស់មនុស្សម្នាក់ៗ ។ ព្រះអម្ចាស់មានបន្ទូលថា « ចូរបណ្ដោយឲ្យមនុស្សរាល់គ្នារើសសម្រាប់ខ្លួនចុះ » ។26មិនត្រូវឲ្យការមិនចាប់អារម្មណ៍របស់មនុស្សម្នាក់ បន្ថយចំណងមិត្តភាព និង ក្ដីស្រឡាញ់របស់យើងឡើយ ។ ពេលអ្នកអញ្ជើញអ្នកផ្សេង « ចូរតាមខ្ញុំទៅមើល » ទោះគេទទួលការអញ្ជើញ ឬ អត់ក្ដី នោះអ្នកនឹងទទួលការយល់ស្របពីព្រះអម្ចាស់ ហើយជាមួយនឹងការយល់ស្របនោះ នឹងមាននូវរង្វាស់បន្ថែមនៃជំនឿ ដើម្បីចែកចាយការជឿរបស់អ្នកម្ដងហើយម្តងទៀត ។
ចំពោះអ្នកប្រើអ៊ិនធើរណិត និង ទូរស័ព្ទ មានរបៀបថ្មីក្នុងការអញ្ជើញអ្នកផ្សេង « ចូរតាមខ្ញុំទៅមើល » ។ ចូរធ្វើឲ្យការចែកចាយសេចក្ដីជំនឿយើងលើអ៊ិនធើរណិត កាន់តែជាផ្នែកមួយនៃជីវិតប្រចាំថ្ងៃរបស់យើង ។ LDS.org, Mormon.org, Facebook, Twitter ទាំងអស់នេះសុទ្ធតែផ្ដល់នូវឱកាស ។
ដើម្បីចែកចាយដំណឹងល្អ សមាជិកវ័យក្មេងមួយក្រុមនៅ បូស្តុន បានចាប់ផ្ដើមបណ្ដាញអ៊ិនធើរណិតមួយចំនួន ។27ពួកអ្នកដែលបានចូលរួមសាសនាចក្រ បានចាប់ផ្ដើមការរៀនរបស់គេតាមអ៊ិនធើរណិត ហើយក្រោយមកមានការពិភាក្សាជាមួយអ្នកផ្សព្វផ្សាយសាសនា ។ បទពិសោធន៍នេះក៏បានជួយឲ្យយុវវ័យមានជំនឿកាន់តែខ្លាំង ក្នុងការនិយាយពីដំណឹងល្អជាមួយមនុស្សដោយផ្ទាល់ ។ មានយុវជនម្នាក់ក្នុងចំណោមពួកគេបាននិយាយថា « នេះមិនមែនជាកិច្ចការខាងផ្សព្វផ្សាយសាសនាទេ ។ នេះជាក្ដីសប្បាយខាងផ្សព្វផ្សាយសាសនា » ។28
យើងធ្វើកិច្ចការនេះរួមគ្នា ។ ជាមួយសមាជិក និង អ្នកផ្សព្វផ្សាយសាសនាក្នុងវួដ យើងដាក់ផែនការ និង អធិស្ឋាន និង ជួយគ្នាទៅវិញទៅមក ។ សូមបន្តគិត និង អធិស្ឋានសម្រាប់អ្នកផ្សព្វផ្សាយសាសនាពេញម៉ោង ។ ចូរផ្ទុកផ្ដាក់ពួកគេជាមួយនឹងគ្រួសារ និង មិត្តភក្ដិអ្នក ។ ព្រះអម្ចាស់ទុកចិត្តពួកគេ ហើយបានហៅគេឲ្យបង្រៀន និង ផ្ដល់ពរដល់ពួកអ្នកដែលស្វែងរកទ្រង់ ។
ប្រធាន ប៉ូឡូ ក្រេតលី នៃបេសកកម្ម ម៉ូហ្សមបិក ម៉ាពូតូ បានចែកចាយបទពិសោធន៍ថា ៖ « វាសាមញ្ញនៅ ម៉ូហ្សមបិក [សម្រាប់] ដៃគូដែលរស់នៅជាមួយគ្នាអស់មួយជីវិត [ ដោយមិនរៀបការ ដោយសារ ] ប្រពៃណីអាហ្វ្រិក តម្រូវបណ្ដាការយ៉ាងថ្លៃដើម្បីរៀបការ ជាបណ្ដាការដែលដៃគូភាគច្រើនពុំអាចបង់បាន » ។29
សមាជិក និង អ្នកផ្សព្វផ្សាយសាសនា បានគិត និង អធិស្ឋានពីរបៀបដើម្បីជួយ ។
ចម្លើយដល់ការអធិស្ឋានរបស់គេ គឺថាពួកគេនឹងសង្កត់ធ្ងន់លើច្បាប់ព្រហ្មចារីភាព និង សារសំខាន់នៃអាពាហ៍ពិពាហ៍ និង គ្រួសារអស់កល្ប ។ ទន្ទឹមនឹងជួយដល់ដៃគូទាំងនោះឲ្យប្រែចិត្ត និង រៀបការស្របច្បាប់ នោះពួកគេបង្រៀនពីសុភមង្គលដែលបានមកតាមតែការធ្វើតាមព្រះយេស៊ូវគ្រីស្ទប៉ុណ្ណោះ ។
នេះជារូបថតនៃគ្រួសារពីរ មកពីទីក្រុងផ្សេងគ្នានៅ ម៉ូហ្សមបិក ។ បានរៀបការនៅ ថ្ងៃសុក្រ ពួកគេបានជ្រមុជទឹកជាមួយកូនៗច្បងនៅថ្ងៃសោរ៍ ។ 30 មិត្តភក្ដិ និង គ្រួសារត្រូវបានអញ្ជើញឲ្យមក « ចូរតាមខ្ញុំទៅមើល » ហើយមានមនុស្សរាប់រយនាក់ពិតជាបាន « តាមទៅមើល » ។
ក្រោយពីជ្រមុជទឹក ប្អូនស្រីម្នាក់និយាយថា « យើងត្រូវជ្រើសរើស ថាតើត្រូវធ្វើតាមប្រពៃណីនៃដូនតាយើង ឬ ត្រូវធ្វើតាមព្រះយេស៊ូវគ្រីស្ទ ។ យើងបានជ្រើសធ្វើតាមព្រះគ្រីស្ទ » ។31
អ្នកអាចមិនរស់នៅក្នុង ម៉ូហ្សមបិក តែតាមរបៀបអ្នកផ្ទាល់ក្នុងវប្បធម៌អ្នកផ្ទាល់នោះទេ អ្នកអាចចែកចាយពីដំណឹងល្អ ដែលស្ដារឡើងវិញរបស់ព្រះយេស៊ូវគ្រីស្ទ ។
ចូរអធិស្ឋានទៅព្រះបិតាសួគ៌អ្នក ។ នេះជាកិច្ចការពិសិដ្ឋរបស់ទ្រង់ ។ ទ្រង់នឹងដឹកនាំអ្នកចំពោះអ្វីដែលត្រូវធ្វើ ។ ទ្រង់នឹងបើកទ្វារ យករបាំងផ្លូវចេញ ហើយជួយអ្នកយកឈ្នះឧបសគ្គ ។ ព្រះអម្ចាស់បានប្រកាសថា « សម្លេងនៃការព្រមាន នឹងត្រូវប្រាប់ដល់មនុស្សទាំងអស់ ដោយមាត់នៃពួកសិស្សទាំងឡាយរបស់យើង … ហើយគ្មាននរណានឹងបញ្ឈប់ពួកគេបានឡើយ » ។32
ខ្ញុំសូមថ្លែងទីបន្ទាល់ថា សម្លេងនៃព្រះអម្ចាស់ [ នឹងទៅដល់ ] ចុងផែនដី ដើម្បីឲ្យមនុស្សទាំងអស់ណាដែលស្ដាប់នឹងឮ » ។33វាជាអព្ភូតហេតុមួយ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។