2010–2019
Sie ma Usrnguck
April 2013


Sie Ma Usrnguck

Kowos fin tiac sie misineri pacl nuh kwewa ke sie badge in misineri fin kot lowos an, ingena pa pacl in sruhlwaclah sie ke heart lowos an—srolwaclah, oacna Paul el fahk ah, “tiac ke sroal, tuh ke Nguhn luhn God moul.”

Moul in mahno luhn Jisus Kraist sesseslah ke ma usrnguck: sie ninac fuhsr, sie itu sasuc, lihpufacn uh sikyang nuh sin mwet liyacacng kosro uh, mwet kun kuh in liye, mwet ul uh fahsr, lihpufacn fin acn Gethsemane ac ke luhf sac, ac ma usrnguck yohk liki nuh kwewa—Moulyak wolacna Lal.

Kowos kuh atac se ke Mwet Sap singucul sie fin finohl sisken Galilee ah ke Leum sifil moulyak El tuhkuh nuh yohrohlos ac fahk, “Kowos som, ac luti muhtuhnfacl nuh kwewa, pacptaiseloslac ke inen Pahpah, ac ke Wen, ac ke Nguhn Muhtahl”?1 “Kowos in som nuh facluh nohfohn, ac fahkwack wosasuc nuh sin mwet nuh kwewa.”2

“Muhtuhnfacl nuh kwewa”? “Facluh nohfohn”? “Mwet nuh kwewa”? Kuh in ohinge? Finne Jisus El ahkkweyaclos, elos nuhnkuh fin ma usrnguck uh ac weluhlos na pwacye in sruhmuhwaclihk wosasuc uh.3

Luhlahlfongi kuh kuhtanglah suhmuhnguh, ac Peter el sruhkwack puhsrwacl, fahk:

“Kowos nuh kwewa suc muhta Jerusalem, … porongo kahs luhk uh: …

“Jisus luhn Nazareth, …  [suc] kowos eis, ac ke paho koluk sruhpuhsrwack ac uniyac: …

“Jisus  … God se inge [tuh] moulyak, [ac] kuht nuh kwewa mwet lohoh kac.”4

Puhs na pwacye ma ahkkahlwemyeyuck luhn nguhn ke lwen sac, ac nguhna 3,000 pacptaislac. Oacna ke Jisus El olwelah ah, akucl ac ma usrnguck uh ukwe luhlahlfongi kuh luhn mwet luhlahlfongi uh.

Ke Alu luhn Jisus Kraist fohlohkihnyuckyak nuh facluh yac 183 somlah ah, Leum El sapkihn un mwet tuhma lutlut srihsrihk se Lal in kalweni ma El fahk ke yac tausin se somlah ah, fahk lah puhsrwen sensenkackihn uh fah som nuh sin mwet nuh kwewa.5 Ke srihpen puhsra uh enenuh in som nuh facluh, ac acn nuh kwewa facluh.6

“Mwet nuh kwewa”? “Facluh nohfohn”? “Lun acn nuh kwewa facluh”? Kuh in ohinge?

Mwet Lahngo El ahkkweye Mwet Luhlahlfongi Lal ke lwen-sahflah uh,7 tuh yac elos kuh in liye sahflahiyac ac fahsr luhn orekma usrnguck se inge? Sahp elos ac nuh nuhnkuh fin ma usrnguck inge kuh in weluhlos in fahkwelihk wosasuc uh.

Sifilpac na, luhlahlfongi kuh kuhtanglah suhmuhnguh, ac tausin sin mwet uh pacptaislac. Fin acn England, Elder Wilford Woodruff el sokwack mura na fohn se tuhpan ai lal ah. Nguhn luhn Leum puhtati nuh faclos, ac el pacptaiselah mwet luti 45 ac mempucr siofok kuhtuh ke mahlwem se emet lal ke imac Benbow ah.8

Oacpacna nuh ke lwen lasr uh. Ke Elder David A. Bednar ac nga misineri ke yac 40 somlah ah (ac nga kuh in fahk nuh suwos lah tiac kuht pa misineri mahtuh emet ke misineri fohlohk muhta ke siyah sruhsrah uh), oasr misineri 16,000. Kuht inge sun 65,000—puhs likina met ah. Oasr stek 562 met. Mihsenge oasr 3,000 puhs liki. Ke pacl sac, ward ac pracns lasr ah oasr ke muhtuhnfacl 59. Mihsenge oasr alu 189 ke muhtuhnfacl ac acn 224 fin facluh nohfohn. Kuht pa srihk ke nacmpuh, oacna Nephi el fahkwack.9 Tuhsruhk ke ma inge, nga kom liye na pwacye ke kahs in pahluh lal Daniel ah: “yot … tahfwelah … ac wacngihn paho … [nwacklah] facluh nohfohn.”10

Pa inge sie pacl na wolacna ke usrnguck. Mahlwem ohnkohsr somlah ah ke Prestuhn Monson el ahkkahlwemye eklac ke matwac luhn mukul ac muhtwacn fuhsr kena in kuhlwacnsapuh misin uh, mokleyuck luhn nguhn arulacna yohk ac kahlwem. Luhlahlfongi kuh kuhtanglah suhmuhngnguh, ac mukul ac muhtwacn fuhsr uh fahsr nuh met. Tuhstuh se tukun toeni sac tuh pakpucki nga in sang pahng ke misin uh nuh sin Prestuhnsi Se Met. Nga lut in liye pwepuh in nwacna luhn mukul fuhsr yac 18 ac muhtwacn yac 19 suc orwaclah tari plwacn lalos, muhtwacta yurin taktuh uh, lohlngweyuck sin pisap ac stek prestuhn lalos an, ac sang pwepuh in misineri lalos an—nohfohn ke lwen na limekohsr. Puhs liki tausin ingena weluhlosyang. Sie ma usrnguck.

Kuht tarilacna ke luhlahlfongi luhn muhtwacn misineri ma ahkfokokoye kuht, pihsen kapwack luhn misineri ke muhtuhnfacl facluh uh, ac yohkwelihk luhn pihsen misineri siyacnyacn ahkolah in kuhlwacnsap uh. Misin sasuc luhmngaul alkosr ahkkahlwemyeyuck, ac in weacngacn in ahkpah luhlahp luhn misineri nwacnwaclah lasr fin acn Provo, ac oasr pac sie acn sasuc fin ac Mexico City.

Prestuhn Thomas S. Monson el fahk: “Kuht eis na pwacye sap luhn Mwet Lahngo … ‘Kowos in som, ac luti muhtuhnfacl nuh kwewa, pacptaiseloslac ke inen Pahpah, ac ke Wen, ac ke Nguhn Muhtahl.’”11 “Srihpac … inge … fah kalweniyuck in fahsr nuh met, ekuhllah ac ahkinsewowoye moul uh. … Wacngihn pahtokyuck ke facluh kuh in tulokihn orekma luhn God.”12

Kuht liye ma usrnguck luhn Leum ke wosasuc Lal fahsrwelihk fin facluh nohfohn uh.

Tamuhlwel ac tahmtahel an, oacna ke Leum El mokle kuhtuh pac misineri uh in kuhlwacnsap, El oacyacpac okasack nuhnak uh ac ikacslah insiyacn kuhtuh pac mwet wo ac suwohs in eis misineri Lal uh. Kowos etwaclos tari kuh e tuhfah etwaclos. Elos oasr ke sucu lowos an ac muhta ke inkucl kowos muhta we an. Elos fahsr ahliki kowos inkacnek uh, muhta siskowos ke lutlut uh, ac sramsram yuruwos ke internet uh. Kowos ip yohk srihpac pac nuh ke ma usrnguck ahkkahlwemyeyuck se inge.

Kowos fin tiac sie misineri pacl nuh kwewa ke sie badge in misineri fin kot lowos an, ingena pa pacl in sruhlwaclah sie ke heart lowos an—srolwaclah, oacna Paul el fahk ah, “tiac ke sroal, tuh ke Nguhn luhn God moul.”13 Ac misineri fohlohk an, sokwack misineri badge mah lowos an. Nimet orekmakihn, tuhsruhk fihliyac acn ma kowos kuh in liye. Leum El enenwekowos inge liki met ah in sie kuhfa nuh in Pahol. Oasr lowos sie mwe kahsruh in orwaclah ma usrnguck se inge.

Mempucr suwohswohs nuh kwewa ke Alu uh nuhnkuh ke ohiyac in akacsruhi wosasuc uh. Kuhtuh akacsruhi wosasuc uh fal, ac kuht kuh in lotwelah yohk selos.14 Kuhtuh upac nuh se ac nuhnkuh ohiyac in oruh wo liki, finsrakkihn tuh puhla koluk se kuht puhla kuhtuh pacl uh kuh in sokwack acn sahyac in som nuh we.

Kena lasr in akacsruhi wosasuc uh pahtok kuht nuh kwewa in pruhe, ac enenuh, ke srihpen kuht enenuh kahsruh luhn Leum.

Prestuhn Monson el siyuck tuh kuht in pruhe ke “acn ma mukwikwi lasr uh tiacna orek ac acn ma tiac lwelah nuh sesr in akacsruhi wosasuc uh sukohsohk.”15 Ke kuht kwacfweacng ac tuhkweni pruhe nuh sin Pahpah tuhmasr Inkuhsrao uh, Leum El fah kalweni in orwaclah ma uh kuh nuh sesr.

Kuht oacyacpac pruhe nuh ke pacl wowo lasr sifacna in akacsruhi wosasuc. Mwet Sap Peter el fahk, “Ahkolah pacl nuh kwewa in sang sie top nuh sin mwet nuh kwewa ma siyuck … sie srihpac [nuh ke] finsrak ma oasr in kom uh.”16

Ke fohsack17 ac mukwikwi18 luhn facluh mihsenge uh, tiac usrnguck lacsuhpuhseni mwet wi ke acn in alu lalos uh. Ne puhs mwet kena fototo nuh yurin God ac in etuh wo srihpac luhn moul uh, oasr kihsen siyuck soenna toplac lalos. Mwet puhs insiyac ah ikacklah nuh ke ma pwacye uh, tuhsruhk oacna ke mwet pahluh Amos el ahkuhtweyac ah, “elos [kahsruhsr] nuh inge ac nuh ngoh [suk] kahs luhn Leum, ac [tiacna] sokwack.” 19 Kowos kuh in kahsruh topuk kihsen siyuck lalos an. Ke sramsram lowos lwen nuh kwewa uh kowos kuh in sang nuh ke luhlahlfongi lalos ke Kraist.20

Mwet Lahngo El fahk lah kuht enenuh kohlwack lahm lasr tuh in kahlwem nuh facluh, ac lah El pa kahlwem kuht sruhlwack uh.”21

Nga olweoht nuh suwos, ke kowos pruhe in etuh lah suc in sramsramkihn, ine ac ngwetngweta e tuhfah tuhkuh nuh in nuhnak lowos an. Kahs in sruhmuhnyuck an fah utuckuh ke pacl se na kowos enenuh an.22 Pacl wowo fah ikacklah nuh suwos. Luhlahlfongi kuh fah kuhtanglah suhmuhngnguh, ac Leum lac ahkinsewowoye kowos ke usrnguck lowos sifacna.

Mwet Lahngo El luti kuht ohiyac in akacsruhi wosasuc uh. Nga luhngse sramsram soko kacl Andrew, suc siyuck, “Mwet Kol, kom ac muhta oyac?”23 Jisus El kuh in topuk acn El muhta we uh. Tuhsruhk El fahk nuh sel Andrew, “Tuhkuh ac liye.”24 Nga luhngse in nuhnkuh lah Mwet Lahngo el fahk, “Tuhkuh ac liye tiac acn nga muhta we uh muhkwena tuh ohiyacn moul luhk. Tuhkuh ac liye lah suc Nga uh. Tuhkuh ac puhla Nguhn uh.” Kuht tiac etuh nohfohn ma ke lwen sac, tuhsruhk kuht etuh lah ke Andrew el sokwack Simon tamuhlwel wiyacl, el fahk, “Kuht sokwack … Kraist.”25

Elos suc ahkkahlwemye kena ke pweng lasr uh, kuht kuh in ukwe srihkasrak luhn Mwet Lahngo ke solwaclos in “tuhkuh ac liye.” Kuhtuh ac lwelah solsol lasr, ac kuhtuh ac tiac. Kuht nohfohn etuh sie mwet suc suliyuck pacl puhs met liki lwelah sie solsol in “tuhkuh ac liye.” Lwelah pac kuht in nuhnkuh ke mwet suc wi kuht tuhsruhk ingena kuht suhkwac liye, solwacltahl in fohlohkoh ac liye pacl se pac.

Kuht ahkfuhlwactye kais sie sulaclah ac pacl luhn mwet. Leum El fahk lah mwet nuh kwewa enenuh in sifacna sulaclah.26 Sruhnga luhn sie mwet tiac enenuh in ahksrihkyelah kawuck ac luhngse lasr nuh sel. Finne solsol sacn ituck kuh tiac ke kom suli mwet sahyac in “tuhkuh ac liye,” kowos fah puhla ahkkweyeyuck sin Leum ac, ke ahkkweyeyucklac sacn, ac weacng luhpan luhlahlfongi kuh in sifil pac akacsruhi ke luhlahlfongi lowos an.

Nuh suwos suc orekmakihn Internet ac sacl fon an, oasr inkacnek sasuc in suli mwet sahyac uh in “tuhkuh ac liye.” Lwelah kuht in oruh akacsruhi luhlahlfongi lasr uh ke internet in yohk ke moul lwen nuh kwewa lasr uh. LDS.org, Mormon.org, Facebook, Twitter—nohfohnna use pacl wowo.

In akacsruhi ke wosasuc uh, mwet fuhsr fin acn Boston muhtwacwacack blog ekahsr. 27 Elos suc welah Alu uh muhtwacwacack ma lutlut lalos uh ke internet, tohkoh mwe sramsram luhn misineri. Oruh se inge kahsruh pac mwet fuhsr in yohkwelihk luhlahlfongi kuh lalos in sifacna sramsramkihn wosasuc uh. Sie selos fahk: “Tiac orekma luhn misineri pa inge. Pa inge ma pwacr luhn misineri uh.”28

Kuht nohfohn tuhkweni oruh orekma se inge. Yurin mempucr ke ward an ac misineri an, kuht plwacni ac pruhe ac kahsruh sie sin sie. Kalweni in nuhnkuh ac pruhe ke misineri pacl nuh kwewa uh. Luhlahlfongwelos yurin sucu ac kawuck lowos an. Leum el luhlahlfongwelos ac pahnglolos in luti ac ahkinsewowoye elos suc Sokuhl uh.

Prestuhn Paulo Kretly ke Mozambique Maputo Misin el akacsruhi puhlakihnyuck inge: “Sikyak pacl nuh kwewa fin acn Mozambique [nuh sin] siyacnyacn in tuhkweni muhta ke moul lalos nohfohn [tiac pahyuck ke srihpen] facsin luhn mwet Africa enenuh sie mwe sang yohk molo in pahyuckyak, sie mwe sang ma inkaiyacn siyacnyacn uh koflah moli.”29

Mempucr ac misineri uh nuhnkuh ac pruhe ke ohiyac in kahsruh.

Top nuh ke pruhe lalos an pa elos in ahkyohkye masap ke tiac kosro ac yohk srihpaciyacn pahyuck ac sucu ma pahtpaht uh. Ac ke kahsrweyacn siyacnyacn an in auliyak ac pahyuckyak suwohs, elos fah luti ke engan ma ac tuhkuh muhkwena ke ukwe Jisus Kraist uh.

Pa inge sie petsac luhn siyacnyacn ke kain in city luo fin acn Mozambique ah. Pahyuckyak ke Friday, elos pacptaislac wi tuhlihk mahtuh nahtuhlos an ke Sactte.30 Kawuck ac sucu uh suliyuck in “tuhkuh ac liye” ac mwet puhs “tuhkuh ac liye.”

Tukun pacptais ah, sie tahmtahel ah fahk: “Kuht enenuh in sulaclah lah in ukwe facsin luhn pahpah tuhmwacsr uh kuh in ukwe Jisus Kraist. Kuht sulaclah in ukwe Kraist.”31

Kowos ac tiac muhta Mozambique, tuhsruhk ke inkacnek lowos sifacna, ke facsin lowos sifacna, kowos kuh in akacsruhi wosasuc fohlohkyak luhn Jisus Kraist uh.

Pruhe nuh sin Pahpah tomowos Inkuhsrao. Pa inge orekma muhtahl Lal. Kowos fah kolyuck ke ma in oruh. El fah usot pacl wowo, eslah ma upac uh, ac kahsrwe kowos in kuhtanglah ma oasr uh. Leum El fahkwack muh puhsrwen sensenkackihn fah oasr yurin mwet nuh kwewa, ke inwaclihn mwet tuhma lutlut luhk uh ac wacngihn mwet kuh in tilokuhnuhlosi.32

Nga fahkwack lah “ puhsrwen Leum [tuhfah] oasr ke sahflahiyacn facluh, lah mwet nuh kwewa ma fah lohng kuh in lohng.” 33 Sie ma usrnguck. Sie ma usrnguck. Ke inen Jisus Kraist, amen.

Mwe kahsruh

  1. Mattu 28:19.

  2. Mark 16:15.

  3. Liye Mattu 28:20Mark 16:17–18.

  4. Orekma 2:14, 22–23, 32.

  5. Liye Doctrine and Covenants 1:4.

  6. Liye Doctrine and Covenants 58:64.

  7. Liye Doctrine and Covenants 1:5.

  8. Liye Teachings of Presidents of the Church: Wilford Woodruff (2004), 89–92.

  9. Liye 1 Nephi 14:12.

  10. Daniel 2:34–35.

  11. Thomas S. Monson, “Welcome to Conference,” Ensign kuh Liahona, Mei 2009, 5.

  12. Thomas S. Monson, “As We Gather Once Again,” Ensign kuh Liahona, Mei 2012, 4.

  13. 2 Mwet Korint 3:3.

  14. Liye Clayton M. Christensen, The Power of Everyday Missionaries: The What and How of Sharing the Gospel (2013).

  15. Thomas S. Monson, “Welcome to Conference,” Ensign kuh Liahona, Nohfohmpuh 2009, 6.

  16. 1 Peter 3:15.

  17. Elos liye ma pwacye sruhuh sifil ahkuhtweyucki kuh sislac; liye Doctrine and Covenants 1:16; liye pac Doctrine and Covenants 132:8.

  18. Liye Doctrine and Covenants 45:26; 88:91.

  19. Emos 8:12.

  20. Mwet pahluh Joseph Smith el fahk: “Yac oasr kuhtwena ma pwacye luhn Presbyterian uh? Ahok. Yac oasr ma pwacye luhn Baptist, Methodists, ac mwet sahyac uh? Ahok. … Kuht enenuh in orwacni nohfohn ip yohk wo ac pwacye fin facluh uh ac motko muh pa mwe kahsruhp uh” (History of the Church, 5:517). “Kuht tiac siyuck kuhtwena mwet in sislah kuhtwena ma wo oasr lalos uh … ; kuht siyuck selos muhkwena in tuhkuh ac eis pac kuhtuh. Fuhkah fin facluh nohfohn enenuh in ukwe Wosasuc se inge? Elos ac kuh lac in liye, ac mwe insewowo luhn God fah utuckuh yohk nuh sin mwet uh, suc pa kena luhn nguhnihk nohfohn” (Teachings of Presidents of the Church: Joseph Smith  [2007], 155). Prestuhn Gordon B. Hinckley el fahk: “Lwelah nga in fahk lah kuht luhngkihn ma pwacye ke alu nuh kwewa uh ac ma wo elos oruh uh. Kuht fahk nuh sin mwet uh, yohkna, kowos use wi kowos ma wo nuh kwewa lowos uh, na lwelah kuht in liye fin kuht kuh in sang nuh kac. Pa inge kuhiyen orekma se inge. Pa ingacn kuhiyen kuhlwacnsap ke orekma luhn misineri uh” (“ Excerpts from Recent Addresses of President Gordon B. Hinckley,” Ensign, Ohkohs 1998, 72; “Words of the Living Prophet,” Liahona, Epril 1999, 19). “Kuht enenuh in oruh mwet kuhlwacng. Kuht enenuh in akihlen ma wo nuh kwewa ke mwet uh. Kuht tiac forfor ac ahkkolukye alu sahyac uh. Kuht fahkwack ac luti ke sie inkacnek wo ac pwacye. Kuht fahk nuh sin mwet ke alu sahyac uh, ‘kowos use ma wo nohfohn lowos an ac lwelah kuht in liye fin kuht kuh in sang nuh kac.’ Pa ingacn yohkna kuhiyen prokracm ke misineri yohk lasr uh ac ma ingacn orwaclah ma sikyak uh” (ke “Message of Inspiration sel Prestuhn Hinckley,” Church News,Nohfuhmpuh 7, 1998; liye ldschurchnews.com).

  21. Liye 3 Nephi 18:24.

  22. Liye Doctrine and Covenants 84:85; 100:6.

  23. Jon 1:38.

  24. Jon 1:39.

  25. Jon 1:41.

  26. Liye Doctrine and Covenants 37:4.

  27. Liye, nuh ke mwe srihkasrak, youngandmormon.com.

  28. Sramsram ke taclofon nuh sel Jackson Haight ke Mahs 22, 2013.

  29. Email sel Prestuhn Paulo V. Kretly, Mahs 6, 2013.

  30. Petsac tohuyak sel Prestuhn Paulo V. Kretly. Un petsac se emet ah ma fin acn Maputo; elos pahyuckyak ke Nohfohmpuh 30, 2012, ac pacptaislac ke Tisacmpuh 1, 2012. Un petsac se ahkluo ah ma fin acn Beira; elos pahyuckyak ke Mas 1, 2013, ac pacptaislac ke Mas 2, 2013.

  31. Email sel Prestuhn Paulo V. Kretly, Mahs 6, 2013.

  32. Liye Doctrine and Covenants 1:4–5.

  33. Liye Doctrine and Covenants 1:11.