Ng Ongasireng

Mlara Elder Neil L. Andersen

Er a Chelechad er a Teruich me a Terung el Apostol


Kid a sioning er a ongasireng er a Rubak el ebangkelio er Ngii a omerk er a beluulechad el rokir.

A klengar er a Jesus er a beluulechad a mle mui er a ongesireng lomeruul: kedung el chedil, beches el btuch er a eanged, reanghel mo duum er a remengkar a charm, a cheuiko el mlo omes, a sechudel el mlo merael, reanghel er a Gethsemane me a debull, e sel kot el ongasireng er ngii el rokui a—Sel klebokel el Okiis er a Kodall.

Ko mla melatk er sel teletael er a reteruich me a ta el Apostol er a ked el kmeed er a Galilee er a mla mekiis el Rubak longedecheduch er tir: “Morael mong, e molisechakl a rokui el beluu, el melecholb er tir loba ngklel a Chedam, me a Ngalek, me a Chedaol Reng”?1 “Morael mora beluulechad el rokir, e momerk er a ebangkelio el mora rebek el chad.”2

“Rokui el beluu”? “Rokir el beluulechad”? “Rokui el chad”? Tiang mle sebechel? Ng uaisei el Jesus a millisiich er tir, eng di tir a locha mlo melatk el kmo a ongasireng ng locha mo obengterir sel lomerk er a ebangkelio.3

Eng di kedeb el taem ruriul, ea Petrus a millekoi, el kmo:

“Kemiu el kiei er a Jerusalem, … mrenges a tekingek: …

“A Jesus er a Nazareth, … [el ngii] a kemiu a mla nguu, me a remekngit el chad a mla mengerus e mekodir: …

“Ng kaikid el Jesus el Dios [a mla] mekiis, [e] kid el rokui a sioning erngii.”4

Ng mle klou a chedaol teletael el dilubech er tial sils, el edei el teletael el chad a miltecholb. Ea Jesus a mle yaksok, olangch me a ongasireng lomeruul a oeak kuriul lultuil er a klaumera er a roumerang.

A Ikelesia er a Jesus Kristo er a le moluut el mei er a beluulechad er a 183 el rak er a memong, ea Rubak a dilu er a tirkel mekesai el loderchelel a tekoi el Ngii a dilu er a ngaramong el taem” “El kmo a ngor er a uleklatk a mora rokui el chad.”5 “Le ebangkelio a kirel mora beluulechad, me a dirrek el ikel bek el merkelel a beluu rokui.”6

“Rokui el chad”? “Rokir el beluu”? “Bek el beluu er a beluulechad”? Tiang mle sebechel tekoi?

A Osobel a ulemeklatk er a Ruriul-klebesei el Santo er Ngii,7 eng di te locha mle sebechir el mesa omerollel tial meang lureor? Te locha mlo melbedebek el kmo a ongasireng ng meral lobengterir el kirel omerk er a ebangkelio.

Meng, di uaia uchelel, ea ngeso er a babelaudes a ulebengterir, me a retelael a miltecholb. A Elder Wilford Woodruff, lulmerk er a ebangkelio er a England, e miltik er a rechad er a chimo el beluu el mlengiil er a dmiel. A Reng er a Rubak a mlor tir, me te miltecholb a rokeua me a teim lolisechakl a tekoi er a klechelid el chad me a redart el chedal a ikelesia er a chelsel sel kot el buil le ngara sers er a Benbow.8

Ng osisiu me chelechal taem. A Elder David A. Bednar me ngak er a ki misionari er a kmeed el okeua el rake er a memong (eak subedemiu el kmo kemam a diak ki mkot el meklou el chad er tirkal mla misionari el dengchokl a ilei el bekerkard el kingall), eng mlarngii a 16,000 el misionari. Chelecha ete 65,000— kmal lemuut el betok er a ngara mong. A President Thomas S. Monson a ulechais er chelii, el kmo chelecha ete 65,000 a remisionari—ng kmal muut el betook er a memong.Ng mlarngii a 562 el stakes. Chelecha el sils e ngarngii a 3,000. Sel taem, ea ward me a branch er kid a mlara 59 el beluu. Chelechal sils e ngarngii a cheldebechel er a 189 el beluu er a chelsel aikel 224 el meklou me a mekekerei el beluu er a beluulechad. Kede mekesai a iidised, el uaia tekingel a Nephi.9 Eng di osisiu el taem, e kede mla otutii sel ulochel a Daniel el “bad … el melitai… el diak a chim lorkedii … [el mekekii] a beluulechad el rokir.”10

Chelechal sils eng klebokel el sils er kid er a ongasireng lomeruul. Elolem el buil er a memong ea President Monson a ulechais el kirel a rekil a ngeasek el sechal me a redil el sorir el mora mission, eng mlarngii a mesisiich el klou el deureng el mlora rechad. A rengeasek el redil me a rsechal a ulemakes el mo ruchei loba klaumerang. Sel Ongeua lureor ruriul er a ongdibel eng mlo ngerchelek louchais okedong er a re mo misionari el mora First Presidency. Ng mlo mechas a renguk el mes a babilengir a 18 a rekrir el sechal me a re 19 a rekrir el redil el mla sumechokl a moktek er tir, mo omes er a retoktang er tir, e mla chadecheduch tir me a rebisop er tir me a remerreder er a stake, e locha babilengir el mora mission— er a di chelsel a eim el klebesei. Ea retelael a mla mo teloi er tir. Ng ongasireng.

Ng dmeu a rengud er a mesisiich el klaumera er a rodos er kid, a iidisir a remisionari er a bek el beluu er a beluulechad, me a dirrek el iidisir a robek el kldmokl el mo mesiou. Okeim me a kleai el beches el mission a mla mengai a chesmerel, ea ongingil a training center er a Provo a mla morngii er a Mexico City.

A President Thomas S. Monson a mla kmu el kmo: “Ng kmal blak a rengud er a tekingel Osobel el kmo … “Morael mong, e molisechakl a rokui el beluu, e molecholb er tir el ngara ngklel a Chedam, me a Ngalek, me a Chedaol Reng. ’”11 “Tia … el tekoi … a melemolem el merael bedu luchei, el melodech e omekngeltengat a klengar, …Ng diak a ngii di lorrimel er a beluulechad el torbengii a urerel a Dios.”12

Kid a sioning er a ongasireng er a Rubak el ebangkelio er Ngii a omerk er a beluulechad el rokir.

Rodam me a rodos, ng uaisei el Rubak a mla omekrael er a rebetok el misionari el mora omesiou, e Ngii a dirrek el lolekar a uledsuir e omok a rengrir a rebebtok lungil e klikiid el chad el mo orrenges er a remisionari er Ngii. A rebebil er tirkal ungil sechal me a redil a rechad el modengelterir malechub e ko mo medenglterir. Te ngara chelsel a telungalek er kemiu me a tonari er kemiu. Ko mo kaiuchib er a rael, kiei er bitar kau er skuul, kaiuedingel er a online. Kau me ke dirrek el klou a belkum er tial mengasireng lureor.

Alsekum eng diak kom cherrungel el misionari el diak el llechukl el ngklem el bereked er a bilem, e chelecha eng taem el mlia er a rengum— el uaia tekingel a Paulus el kmo, “ng diak el llechukl er a ink, ng llehcukl er a Reng er a ngar el Dios.”13 E tirkel mla mo merek el misionari, msikii sel ngakl el mulbang. Lak mchitii, e bai mlia er a basio el sebechem lomes er ngii. A Rubak a kmal lousbech er kau er chelechang el mo dongu er a Chimal. Ngarngii omrellii er tial ongasireng lureor.

A bek el melemalt el chedal a Ikelesia a mla omdasu a kmo ng mekera omerk er a ebangkelio. A rebebil a beot er tir lomerk er a ebangkelio, e sebeched el suub a betok er tir.14 Ea rebebil er kid a meringel e oureng el kmo kede mekera e mo sebeched, e oureng me a dakt el dolchesuar bol sebechel remiid el mora kmo ng ker.

Sel blakelreng er kid lomerk er a ebangkelio a rullid el mo ngara nglunguuch, e kirel, ele kede ousbech a ngesou er a Rubak.

A President Monson a mla olengit me doluluuch el kirel aikel “basio el diak a osisechakl er ngii me a dirkak bol sebeched el mong e mimokl lomerk er a ebangkelio.”15Sel blak a rengud e de dak el ngara nglunguuch el mora Chedam er a Babeluades, ea Rubak a mo melemolem el lomok a chesimer el kirel a ureor er a misionari.

Kede dirrek el meluluuch el kirel a techelled lomerk er a ebangkelio. A Apostol Petrus a millekoi, “Bom kldmokl longer el mora bek el chad loker … er kau el kirel a uchul [a] urungulem.”16

Meng rraureng17 me a uldikel18 el ngara beluulechad e chelechal sils, ete kesai el kesai el chad a ngara ikelesia. Meng betok a soriri el mo kmeed er a Dios e mo er bab a moktek er a klengar tir, eng di ngarngii a rraureng er tir. Betok a mla obok a rengrir el kirel a klemerang, eng uai kel tekingel a Amos el kmo, “re [remurt] el mong e mei [losiik] er a tekingel a Rubak, e [diak] el betik er ngii.”19 Kau a sebechem longer a ker tir. Aikel cheldecheduch er a delongeliu er a bek el sils eng sebechem el “dochelii” a klaumerang er tire er a Kristo.20

A Osobel a mla kmo: “Modersii olbdelem me bo lomekellomes el mora beluulechad. Kamosang ngak a llomes el kirir loldars er ngii aikel bla mosekak el meruul.”21

Ak yaksok er kemiu el kmo sel moluluuch el kirir tirkel bo mongedecheduch er tir, ea ngakl me a mad a me chemolt er a uldesuiu. E kau a mo medengei a tekoi el molekoi er sel taem el mousbech.22 Ea techall e ko er kau. Ngokiu a klaumerang me a blakelreng, ea Rubak a mo omekngeltengat er kau lokiu ongasireng lomeruul.

A Osobel a ulisechakl el kmo ng mekera domerk er a ebangkelio elmora dersta el chad. Ng soak sel cheldechedechal a Andrew, el uleker, “Mastang, kau ke kiei er ker?”23 A Jesus a mle sebechel longer er sel basio el Ngii a kiei er ngii. Eng di Ngii a dilu er a Andrew el kmo, “Mei e mesang.”24 Ng soak lomdasu el kmo a Osobel a millekoi el kmo, “Mei e mesang sel kiei er ngii me a dirrek el teletael el kiei er ngii. Mei e mesekak el kmo ak techang. Mei e momelchesiu er a Chedaol Reng.” Ng diak dodengei rokui el tekoi er tiaikid el sils, eng di kede medengei el kmo a Andrew er a le betik er a odam er ngii er a Simon, eng dilu el kmo, “Aki mla metik er a… Kristo.”25

Tirkel semeriar lorrenges er kid, e kid a otireklii okesiul Osobel el mo siotai er tir el “mei e mesang.” A rebebil a kongei a siotai er kid, ea rebebil a diak. Kede rokui el medengelii a chad el betok el taem el bla de siotai er ngii el “mei e mesang.” Mei e dolatk er tirkel mle tal lobengked e chelecha eng dikea desterir, e de siotai er tir el muut el mei me luut el mesang.

Kede mengull a uldesuir me a temir a rebebil. A Rubak a mla kmu el kmo a dertsa el chad a mimokl el melilt er sel soal.26A chad el diak el semeriar a diak el kired el choridii a klausechelei me a beltikelreng er kid. A le kengei me a lak el kengei sel msiotai er tir el “mei e mesang,” e kau a mo melchesuar a kengei er a Rubak, e mo mesisiich a klaumera er kau el melemolem louchais el kirel a klechelid er kau.

Tirkel lousbech er a Internet me a mobile phones, eng beches el teletael er a siotai er a rebebil el “mei e mesang.” Mei e dochotii a klechelid er kid lokiu a online el mo telengtengil a kelgnar kid. A LDS.org, Mormon.org, Facebook, Twitters—a rokui el meskid a techall.

A chelechad er a rengeasek, er a Boston a ulemuchel er a teletael.27Tirkel mlo chedal a Ikelesia a ulemuchel er a online, ea uriul eng omesuub lobengterir a remisionari. Tial teletael a ngilsuterir a rengeasek el mo mesisiich a klaumea er tir el kirel ebangkelio. A chimo er tir a millekoi el kmo, “Tia diak el ureor er a misionari. Tia omilil er a misionari.”28

Kid a dmak e meruul er tial ureor. Me kede teloi er a rechedal a ikelesia me a remisionari, e kede kudmokl a moktek e meluluuch el kaingeseu. Moluluuch el kirir a recherrungel el misionari. Moumerang er tir kemiu me a telungalek er kemiu me a resechelimiu. A Rubak oumera er tir e mla omekedong er tir el mo olisechakl e omekngeltengat er tirkel losiik er Ngii.

A President Paulo Kretly er a Mozambique Maputo Mision a ulechais er tial teletael: “Ng teletael er a Mozambique [el] obekel a dmak el kiei [el diak el bechiil ele] siukang er a Africa a kmal meringel a ngederel a chebechiil, el oumesingd el obekel a diak el sebechir tial char.”29

A rechedal a ikelesia me a remisionari a mlara omelbedebek me a nglunguuch el kmo ng mekera lolngeseu.

A mle nger er a nglunguchir a kmo ng kirir loltirakl er a llach er a tekoi er a deleboes me a ultutelel a chebechiil me a telungalek el mora ulebongel. Me lolngeseu er a robek el elmo ouchel a rengrir e bol bechiil lokiu a llach, ete ulisechakl el kirel a deureng el mei lokiu otireklir er a Jesus Kristo.

Tiakid a siasing er a robekel er a eru el kakerous el beluu er a Mozambique. Te mlo bechiil er a sera Ongeim lureor, e miltecholb tir me a remeklou el ngelekir er a Sabadong.30 A resechelei me a telungalek a blel siotai er tir el “mei e omes,” e betok a “mlei e omes.”

Uriul er a techolbechelid, ea tal odos a dilu el kmo, “Ng kired el melilt el kmo kede oltirakl a siukang er a redemad malechub e kede oltirakl er a Jesus Kristo. Aki melilt el oltirakl er a Kristo.”31

Ng locha diak kom kiei er a Mozambique, kom kiei er a kuk teletael el mngarngii, siukang er kemiu, eng di sebechiu louchais el kirel a mla moluut el ebangkelio er a Jesus Kristo.

Moluluuch el mora Chedam er a Babelaudes. Tia chedaol el Urerel. Ngii a mo omekrael er kau er a ikel moruul. Ngii a mo mok a chesimer, e choroid a olibesongel, e ngosukau er a ikel melibas er a rolem. A Rubak a mla kmo a ngor Ngii a mora rokui el chad, a ngor el, …omeklatk a mora rokui el chad.”32

A kuchais el kmo a ngor er a Rubak a [mora] beluulechad el rokir, me tirkel rokiu el sebechir rongesii a mo rongesii.33Ng ongasireng. Ng ongasireng. El ngara ngklel a Jesus Kristo, amen.

Mostrar referencias

  1.  

    1. Mateus 28:19.

  2.  

    2. Markus 16:15.

  3.  

    3. MesaMateus 28:20Markus 16:17–18.

  4.  

    4. Rrellir 2:14, 22–23, 32.

  5.  

    5. Mesa Doctrine and Covenants 1:4.

  6.  

    6. Mesa Doctrine and Covenants 58:64.

  7.  

    7. MesaDoctrine and Covenants 1:5.

  8.  

    8. MesaTeachings of Presidents of the Church: Wilford Woodruff  (2004), 89–92.

  9.  

    9. Mesa1 Nephi 14:12.

  10.  

    10. Daniel 2:34–35.

  11.  

    11. Thomas S. Monson, “Mengemedaol er kemiu el mei er a Ongdibel,” Ensign malechubLiahona, May 2009, 5.

  12.  

    12. Thomas S. Monson, “Chelechal Deluut el mo Kebetech,”Ensign malechubLiahona,May 2012, 4.

  13.  

    13. 2 Korinth 3:3.

  14.  

    14. Mesa Clayton M. Christensen, The Power of Everyday Missionaries: The What and How of Sharing the Gospel (2013).

  15.  

    15. Thomas S. Monson, “Welcome to Conference,” Ensign malechub Liahona, Nov. 2009, 6.

  16.  

    16. 1 Petrus 3:15.

  17.  

    17. Te urrekodel a klemerang er a ngara mong el mla mengodech; mesa Doctrine and Covenants 1:16; dirrek el mesa Doctrine and Covenants 132:8.

  18.  

    18. MesaDoctrine and Covenants 45:26; 88:91.

  19.  

    19. Amos 8:12.

  20.  

    20. A Profet Joseph Smith a dilu el kmo: “A re Presbyterians te olab a klemerang? Oi. Ea re Baptists, Methodists, me a lmuut el bebil., te olab a klemerang? Oi. … Ng kired el lodak aikel rokui lungil me a mera el oisechakl e olab” (History of the Church, 5:517). “Ng diak dolekoi er a rechad me longoit aikel lungil lolab …; ng di soad a lemei e luut el ngmai a betok. Omko tial beluulechad el rokir a mo oba tial Ebangkelio? Ete kmal mo unguil mes er a mederir a klengeltengat er a Dios el mochubel el kirir a rechad, el ngii a kmal urungulel a renguk” (Teachings of Presidents of the Church: Joseph Smith  [2007], 155). A President Gordon B. Hinckley a dilu el kmo: “Kede oureng a saul el kirel a klemerang er a rokui el ikelesia me a ungil loruul. Kede kmu er a rechad el kmo, kom ngmai, aikel rokui el ungil molab, e kemam a dochel er a ikel kuk ki molab. Tiaikid a reng er tial ureor. Tiaikid a moktek er a omesiou er a misionari” (“Excerpts er a Recent Addresses of President Gordon B.Hinckley,” Ensign, Aug. 1998, 72; “Words of the Living Prophet,” Liahona, Apr. 1999, 19). “Ng kired el mo ungil sechelei. Ng kired el mes a ungil er a rebebil er a rechad. Ng diak doltuub a bebil er a klechelid. Kede olisechakl e omerk el nga er sel ungil teletael. Kede melekoi er a rechedal a bebil er a klechelid, mngai aikel rokui lungil el molab e ki mdechel er a ikel kuk ki molab.’ Tiaikid a kmal ngii a moktek er tial prokuram er a misionari el klou a klungiolel” (“Messages of Inspiration from President Hinckley,” Church News,Nov. 7, 1998, 2; mesa ldschurchnews.com).

  21.  

    21. 3 Nephi 18:24.

  22.  

    22. MesaDoctrine and Covenants 84:85; 100:6.

  23.  

    23. Johanes 1:38.

  24.  

    24. Johanes 1:39.

  25.  

    25. Johanes 1:41.

  26.  

    26. Mesa Doctrine and Covenants 37:4.

  27.  

    27. Mesa, okesiu, youngandmormon.com.

  28.  

    28. Cheldecheduch er a dengua lobengkel a Jackson Haight on March 22, 2013.

  29.  

    29. Email el mlara President Paulo V. Kretly, March 6, 2013.

  30.  

    30. Siasing el mlengai er a President Paulo V. Kretly. Tirkel kot el chad a mlara Maputo; tem lo bechiil er a November 30, 2012, e metecholb er a December 1, 2012. A ongerung a mlara Beira; tem lo bechiil er a March 1, 2013, e miltecholb er a March 2, 2013.

  31.  

    31. Email el mlara President Paulo V. Kretly, March 6, 2013.

  32.  

    32. Mesa Doctrine and Covenants 1:4–5.

  33.  

    33. Mesa Doctrine and Covenants 1:11.