« ខ្ញុំជឿហើយ លោកម្ចាស់អើយ »
ដោយ អែលឌើរ ជែហ្វ្រី អ័រ ហូឡិន
នៃកូរ៉ុមនៃពួកសាវកដប់ពីរនាក់
ចូរទទួលស្គាល់សំណួរ និង កង្វល់របស់អ្នកដោយស្មោះត្រង់ តែដំបូង ត្រូវពង្រឹងជំនឿតិចតួចដែលអ្នកមានសិន ព្រោះការណ៍ទាំងអស់អាចកើតឡើងបានដល់ពួកអ្នកដែលជឿ ។
មានគ្រាមួយ ព្រះយេស៊ូវបានយាងមកជួបនឹងមនុស្សមួយក្រុម កំពុងដេញដោលដោយកំហឹងជាមួយពួកសិស្សទ្រង់ ។ ពេលព្រះអង្គសង្គ្រោះសួរពីហេតុនៃជម្លោះ មានឪពុកកុមារប្រកាច់ម្នាក់ បានឈានទៅមុខ ដោយនិយាយថា គាត់បានមកជួបសិស្សរបស់ព្រះយេស៊ូវ ដើម្បីបានការប្រសិទ្ធពរមួយសម្រាប់កូនគាត់ តែពួកគេពុំអាចប្រសិទ្ធពរបានទេ ។ ទាំងកូនប្រុសនៅសង្កៀតធ្មេញ បែកពពុះមាត់ និង ប្រកាច់នៅលើដីពីមុខពួកគេនៅឡើយ នោះឪពុកបានអំពាវនាវដល់ព្រះយេស៊ូវ ដោយបន្លឺសម្លេងដ៏អស់សង្ឃឹមចុងក្រោយរបស់គាត់ថា ៖
« បើលោកអាចនឹងជួយបាន [ឪពុកបាននិយាយ] នោះសូមអាណិតមេត្តាជួយយើងខ្ញុំផង ។
« ព្រះយេស៊ូវមានបន្ទូលទៅគាត់ថា បើអាចនឹងជឿបាន នោះការទាំងអស់នឹងសម្រេចបានដល់អ្នកណាដែលជឿ ។
« ស្រាប់តែឪពុករបស់កូននោះក៏បន្លឺវាចាឡើងទាំងទឹកភ្នែកថា ខ្ញុំជឿហើយ លោកម្ចាស់អើយ សូមជួយចំពោះសេចក្ដីណាដែលខ្ញុំមិនជឿផង » ។ 1
ដោយការព្រមទទួលរបស់គាត់ ការជឿជាក់ដំបូងរបស់បុរសនេះ គឺនៅមានកម្រិត ។ តែគាត់មានអាសន្ន ដើម្បីជួយកូនគាត់ឲ្យតែបាន ។ យើងត្រូវបានប្រាប់ថា វាល្អគ្រប់គ្រាន់ហើយសម្រាប់ការចាប់ផ្ដើម ។ អាលម៉ា ប្រកាសថា « បើសិនជាអ្នករាល់គ្នាពុំអាចធ្វើអ្វីក៏ដោយក្រៅពីការចង់ជឿ នោះសូមឲ្យចំណង់នេះមាននៅក្នុងខ្លួនអ្នក គឺរហូតដល់អ្នកជឿ » ។2 ដោយគ្មានសង្ឃឹមណាផ្សេងទៀត នោះឪពុករូបនេះអះអាងពីជំនឿដែលគាត់មាន ហើយអង្វរដល់ព្រះអង្គសង្គ្រោះនៃពិភពលោកថា « បើលោកអាចនឹងជួយបាន នោះសូមអាណិតមេត្តាជួយយើងខ្ញុំផង » ។ 3 ខ្ញុំពិបាកនឹងអានពាក្យនោះដោយមិនយំណាស់ ។ សព្វនាមពហុវចនៈ យើងខ្ញុំត្រូវបានប្រើដោយចេតនាយ៉ាងជាក់ស្ដែង ។ បុរសនេះកំពុងនិយាយការពិតថា « គ្រួសារយើងទាំងមូលកំពុងអង្វរ ។ ការពិបាករបស់យើងមិនដែលចប់ឡើយ ។ យើងនឿយហត់ណាស់ ។ កូនប្រុសរបស់យើងធ្លាក់ក្នុងទឹក ។ គាត់ធ្លាក់ក្នុងភ្លើង ។ គាត់បន្ដធ្លាក់ក្នុងគ្រោះថ្នាក់ ហើយយើងបន្ដភ័យខ្លាច ។ យើងគ្មានសង្ឃឹមទេ ។ យើងពុំដឹងនឹងទៅរកអ្នកណាទេ ។ តើលោកអាចជួយយើងទេ ? យើងនឹងមានអំណរគុណសម្រាប់អ្វីក៏ដោយ—ជាពរជ័យមួយផ្នែក ជាសង្ឃឹមបន្ដិចបន្ដួច ជាការលើកបន្ដិចនូវបន្ទុកដែលម្ដាយកូននេះរែករាល់ថ្ងៃក្នុងជីវិតគាត់ » ។
ឪពុកនោះនិយាយថា « បើលោកអាចនឹងជួយបាន » នោះលោកម្ចាស់មានបន្ទូលតបវិញថា « បើអាចនឹងជឿបាន » ។ 4
« ស្រាប់តែ » ដែលក្នុងគម្ពីរបានថា—គឺមិនយឺតយ៉ាវ មិនសង្ស័យ មិនអៀនខ្មាស់ទេ តែ « ភ្លាមៗ »—ឪពុកស្រែកយំបង្ហាញពីការឈឺចាប់របស់គាត់ថា « ខ្ញុំជឿហើយ លោកម្ចាស់អើយ សូមជួយចំពោះសេចក្ដីណាដែលខ្ញុំមិនជឿផង » ។ ក្នុងការឆ្លើយតបដល់ជំនឿថ្មី និង នៅខ្វះចន្លោះនោះ ព្រះយេស៊ូវ ព្យាបាលកូនប្រុសនោះ ដោយលើកពីស្លាប់ឲ្យរស់ឡើងវិញដូច ម៉ាកុស ពណ៌នាអំពីហេតុការណ៍នោះ ។5
ដោយពិចារណាពីកំណត់ត្រាដ៏ទន់ភ្លន់ក្នុងគម្ពីរនេះ ខ្ញុំចង់និយាយដោយផ្ទាល់ទៅមនុស្សវ័យក្មេងក្នុងសាសនាចក្រ—ក្មេងដោយអាយុ ឬ ក្មេងក្នុងភាពជាសមាជិក ឬ ក្មេងក្នុងជំនឿ ។ តាមរបៀបណាមួយនោះ ការណ៍នេះគួរតែត្រូវចំពោះយើងទាំងអស់គ្នា ។
ការកត់សម្គាល់ទីមួយ ទាក់ទងនឹងដំណើររឿងនេះ គឺថា ពេលប្រឈមនឹងឧបសគ្គនៃជំនឿ ឪពុកនោះពង្រឹងកម្លាំងគាត់មុន ហើយបន្ទាប់មក ទទួលស្គាល់ភាពខ្វះចន្លោះរបស់គាត់ ។ ការប្រកាសផ្ដើមដំបូងរបស់គាត់ គឺវិជ្ជមាន ហើយគ្មានការស្ទាក់ស្ទើរ ៖ « ខ្ញុំជឿហើយ លោកម្ចាស់អើយ » ។ ខ្ញុំចង់និយាយទៅអ្នកទាំងអស់ ដែលចង់បានជំនឿបន្ថែមទៀត ថាចូរចងចាំពីបុរសនេះ ! ក្នុងគ្រានៃការភ័យខ្លាច ឬ សង្ស័យ ឬ មានបញ្ហា ចូរតោងជាប់នូវជំនឿដែលអ្នកមានរួចហើយ សូម្បីតែជំនឿនោះនៅមានកម្រិតក្ដី ។ ក្នុងការលូតលាស់ ដែលយើងទាំងអស់គ្នាត្រូវទទួលបទពិសោធន៍ក្នុងជីវិតរមែងស្លាប់នេះ ភាពស្រដៀងគ្នាខាងវិញ្ញាណអំពីការវេទនារបស់កូនប្រុសនេះ ឬ ការអស់សង្ឃឹមរបស់ឪពុកម្ដាយគេ នឹងកើតឡើងចំពោះយើង ។ ពេលគ្រាទាំងនោះមកដល់ ហើយបញ្ហាកើតឡើង តែដំណោះស្រាយមិនកើតមានភ្លាមៗ នោះចូរតោងឲ្យជាប់ទៅនឹងអ្វីដែលអ្នកដឹងរួចហើយ ហើយឈររឹងមាំរហូតដល់បានចំណេះដឹងបន្ថែម ។ ដោយឧប្បទ្ទវហេតុនេះ អព្ភូតហេតុជាក់លាក់នេះ ដែល ព្រះយេស៊ូវ មានបន្ទូលថា « បើមានសេចក្ដីជំនឿដូចគ្រាប់ពូជមួយយ៉ាងល្អិត នោះអ្នករាល់គ្នាអាចនឹងនិយាយទៅភ្នំនេះថា ចូររើចេញពីទីនេះ ទៅនៅទីនោះចុះ នោះនឹងបានដូច្នោះហើយ ក៏គ្មានការអ្វីដែលអ្នករាល់គ្នាធ្វើមិនកើតនោះទេ » ។6 ទំហំនៃជំនឿអ្នក ឬ កម្រិតនៃចំណេះដឹងអ្នក មិនជាបញ្ហាអ្វីទេ—វាគឺជាសេចក្ដីសុចរិតដែលអ្នកបង្ហាញ ទាក់ទងនឹងជំនឿដែលអ្នកមាន និង សេចក្ដីពិតដែលអ្នកដឹងរួចទៅហើយនោះទេតើ ។
ការកត់សម្គាល់ទីពីរ គឺខុសពីទីមួយ ។ ពេលបញ្ហាកើតឡើង ហើយសំនួរលេចឡើង ចូរកុំចាប់ផ្ដើមស្វែងរកជំនឿរបស់អ្នក ដោយនិយាយថា តើប៉ុណ្ណាទៅដែលអ្នកពុំមាននោះ ដូចជាវាចាប់ផ្ដើមពី « ការមិនជឿ » របស់អ្នកនោះ ។ វាដូចជាការអូសឫស្សីបញ្ច្រាសចុងអញ្ចឹង ! សូមឲ្យខ្ញុំបកស្រាយពីចំនុចនេះ ៖ ខ្ញុំមិនបានសុំឲ្យអ្នកធ្វើជាមានជំនឿ ដែលអ្នកមិនមាននោះទេ ។ ខ្ញុំកំពុងសុំអ្នក ឲ្យពិតត្រង់ចំពោះជំនឿ ដែលអ្នកពិតជាមាន ។ ជួនកាលយើងធ្វើដូចជា ការប្រកាសដ៏ស្មោះត្រង់ពីការសង្ស័យ គឺជាការបង្ហាញពីក្ដីក្លាហានខាងសីលធម៌ដែលខ្ពង់ខ្ពស់ជាងការប្រកាសដ៏ស្មោះត្រង់ពីជំនឿអញ្ចឹង ។ វាមិនដូច្នោះទេ ! ដូច្នេះ ចូរយើងទាំងអស់គ្នាចាំពីសារលិខិតដ៏ច្បាស់លាស់នៃដំណើររឿងក្នុងគម្ពីរនេះថា ៖ ចូរស្មោះត្រង់អំពីការសង្ស័យរបស់អ្នក ដូចដែលអ្នកត្រូវស្មោះត្រង់ ជីវិតគឺពេញដោយការសង្ស័យ រឿងនេះ ឬ រឿងនោះ ។ តែបើអ្នក និង គ្រួសារអ្នកចង់បានការព្យាបាល ចូរកុំឲ្យការសង្ស័យទាំងនោះរារាំងជំនឿពីការធ្វើនូវអព្ភូហេតុរបស់វាឡើយ ។
ជាងនោះទៀត អ្នកមានជំនឿច្រើនជាងការគិតរបស់អ្នក ដោយសារអ្វីដែលព្រះគម្ពីរមរមនហៅថា « ភាពមហិមានៃភស្តុតាងទាំងឡាយ » ។7 ព្រះយេស៊ូវ មានបន្ទូលថា« អ្នករាល់គ្នានឹងស្គាល់គេបាន ដោយសារផលគេបង្កើត » ។8 ហើយផលនៃដំណឹងល្អកើតមានយ៉ាងពិតប្រាកដ ក្នុងជីវិតពួកបរិសុទ្ធថ្ងៃចុងក្រោយគ្រប់ទីកន្លែង ។ ដូចជាពេត្រុស និង យ៉ូហាន ម្តងនោះបាននិយាយទៅពួកបណ្តាជនចាស់ទុំ ខ្ញុំក៏និយាយទៅអ្នកថ្ងៃនេះដែរថា « យើងខ្ញុំនឹងលែងនិយាយពីការដែលយើងខ្ញុំបានឃើញ ហើយឮពុំបានទេ » ហើយអ្វីដែលខ្ញុំបានឃើញ និងឮ គឺថា « ទីសម្គាល់យ៉ាងអស្ចារ្យនោះក៏ច្បាស់ » នៅក្នុងជីវិតសមាជិកសាសនាចក្រនេះរាប់លាននាក់ ។ ការណ៍នោះមិនអាចបដិសេធបានទេ ។9
បងប្អូនប្រុសស្រី នេះជាកិច្ចការដ៏ទេវភាពដែលកំពុងបន្ត ជាមួយនឹងការបង្ហាញ និង ពរជ័យដែលមាននៅគ្រប់ទិសទី ដូច្នេះសូមកុំបារម្ភហួសពេក បើពេលខ្លះ មានបញ្ហាកើតឡើង ដែលត្រូវពិនិត្យ ត្រូវយល់ និង ត្រូវដោះស្រាយនោះ ។ ពិតជាមានបញ្ហា ហើយនឹងត្រូវដោះស្រាយ ។ ក្នុងសាសនាចក្រនេះ អ្វីដែលយើងដឹង គឺតែងតែសំខាន់ជាងអ្វីដែលយើងមិនដឹង ។ ហើយចូរចងចាំថា គ្រប់គ្នាត្រូវតែដើរដោយជំនឿក្នុងពិភពលោកនេះ ។
ដូច្នេះ ចូរចិត្តល្អចំពោះភាពទន់ខ្សោយនៃមនុស្សលោក—ទាំងភាពទន់ខ្សោយរបស់អ្នក ក៏ដូចជាភាពទន់ខ្សោយរបស់ពួកអ្នកដែលបម្រើជាមួយអ្នកក្នុងសាសនាចក្រ ដែលដឹកនាំដោយបុរសស្ដ្រីខាងសាច់ឈាមស្ម័គ្រចិត្តទាំងឡាយ ។ លើកលែងតែក្នុងករណីនៃព្រះរាជបុត្រាទ្រង់តែមួយប៉ុណ្ណោះ នោះមនុស្សដែលមិនឥតខ្ចោះ គឺជាអ្វីទាំងអស់ដែលព្រះតែងតែត្រូវធ្វើកិច្ចការជាមួយ ។ នោះច្បាស់ជាគួរឲ្យធុញថប់ណាស់ចំពោះទ្រង់ តែទ្រង់ដោះស្រាយវា ។ ដូច្នេះយើងត្រូវធ្វើដែរ ។ ហើយពេលអ្នកឃើញភាពមិនឥតខ្ចោះ ចូរចាំថា ការដាក់កម្រិតគឺមិនមែនជាទេវភាពនៃកិច្ចការនោះទេ ។ ដូចអ្នកនិពន្ធដ៏អស្ចារ្យម្នាក់បានផ្ដល់យោបល់ថា ពេលភាពពេញលេញដ៏គ្មានទីបញ្ចប់ត្រូវបានហូរចេញមក វាមិនមែនជាកំហុសរបស់ប្រេងនោះទេ បើមានការបាត់បង់នោះ គឺព្រោះតែភាជន៍ដែលមានកំណត់នោះ ពុំអាចទប់វាបានទាំងអស់វិញទេ ។10 ភាជន៍ដែលមានកំណត់ទាំងនោះរួមបញ្ចូលទាំងអ្នក និង ខ្ញុំ ដូច្នេះ ចូរមានភាពអត់ធ្មត់ ចិត្តល្អ និង ការអភ័យទោស ។
ការកត់សម្គាល់ចុងក្រោយ ៖ ពេលការសង្ស័យ ឬ ការលំបាកមកដល់ ចូរកុំខ្លាចនឹងសុំជំនួយ ។ បើយើងចង់បានដោយបន្ទាបខ្លួន និង ស្មោះត្រង់ ដូចជាឪពុកនេះ នោះយើងអាចបានជំនួយ ។ ព្រះគម្ពីររៀបរាប់ពីបំណងដ៏ស្មោះត្រង់បែបនេះថា « ដោយស្មោះអស់ពីចិត្ត » ដោយ « ពេញចិត្តប្រាថ្នា គឺពុំមានលាក់ពុត ឬ ការបោកបញ្ឆោតនៅចំពោះព្រះឡើយ » ។11ខ្ញុំសូមថ្លែងបន្ទាល់ថា ក្នុងការឆ្លើយតបចំពោះការអង្វរដដែលៗបែបនោះ ព្រះនឹងបញ្ជូនជំនួយទៅទាំងសង្ខាងនៃវាំងនន ដើម្បីពង្រឹងជំនឿយើងជានិច្ច ។
ខ្ញុំបាននិយាយថា ខ្ញុំកំពុងនិយាយទៅមនុស្សវ័យក្មេង ។ ខ្ញុំនៅតែនិយាយទៅកាន់ពួកគេ ។ ថ្មីៗនេះ ក្មេងប្រុសអាយុ 14 ឆ្នាំម្នាក់បាននិយាយមកខ្ញុំដោយស្ទាក់ស្ទើរបន្តិចថា « បងប្រុស ហូឡិន ខ្ញុំមិនអាចទាន់និយាយបានទេថា ខ្ញុំដឹងថាសាសនាចក្រនេះពិត តែខ្ញុំជឿថាវាពិត » ។ ខ្ញុំឱបក្មេងប្រុសនោះយ៉ាងណែន ។ ខ្ញុំប្រាប់គេដោយអស់ពីព្រលឹងខ្ញុំថា ការជឿគឺជាពាក្យដ៏មានតម្លៃ ថែមទាំងជាទង្វើដ៏មានតម្លៃផង ហើយគេមិនត្រូវការសុំអត់ទោសដោយ « គ្រាន់តែជឿ » នោះឡើយ ។ ខ្ញុំប្រាប់គេថា ព្រះគ្រីស្ទទ្រង់ផ្ទាល់មានបន្ទូលថា « កុំខ្លាចអី ឲ្យគ្រាន់តែជឿប៉ុណ្ណោះ » 12ជាឃ្លា ម្យ៉ាងវិញទៀត ដែលបាននាំ ហ្គរដុន ប៊ី ហ៊ិងគ្លី ដ៏ក្មេងទៅបម្រើបេសកកម្មរបស់លោក ។ 13ខ្ញុំប្រាប់ក្មេងប្រុសនេះថា ការជឿតែងតែជាជំហានទីមួយឆ្ពោះទៅកាន់ការជឿជាក់ ហើយថា មាត្រានៃសេចក្ដីជំនឿនីមួយៗរបស់យើង ដែលកំណត់ន័យឲ្យជំនឿរបស់យើង ដែលនិយាយដដែលៗដ៏ក្លៀវក្លា ដោយឃ្លាថា « យើងខ្ញុំជឿថា » ។ 14ហើយខ្ញុំប្រាប់គេ ថាខ្ញុំមានមោទនភាពយ៉ាងណាចំពោះគេ សម្រាប់ភាពស្មោះត្រង់នៃការស្វែងរករបស់គេ ។
ឥឡូវនេះ បន្ទាប់ពីបានរស់នៅ និង រៀនអស់ជិត 60 ឆ្នាំ តាំងពីខ្ញុំអាយុ 14 ឆ្នាំ ជាក្មេងប្រុសដែលមិនសូវជឿម្នាក់មក ខ្ញុំសូមប្រកាសនូវការណ៍មួយចំនួនដែលខ្ញុំដឹងឥឡូវនេះ ។ ខ្ញុំដឹងថា ព្រះជាព្រះវរបិតាសួគ៌របស់យើងពេញដោយក្ដីស្រឡាញ់ ការអភ័យទោស នៅគ្រប់ពេល និង គ្រប់ផ្លូវ និង គ្រប់កាលៈទេសៈទាំងអស់ ។ ខ្ញុំដឹងថា ព្រះយេស៊ូវជាបុត្រាដ៏ឥតខ្ចោះតែមួយរបស់ទ្រង់ ដែលបានប្រទានព្រះជន្មទ្រង់ដោយក្ដីស្រឡាញ់ ដោយតាមព្រះទ័យព្រះបិតាផង និង ព្រះបុត្រាផង សម្រាប់ការប្រោសលោះដល់យើងទាំងអស់គ្នា ដែលមិនល្អឥតខ្ចោះ ។ ខ្ញុំដឹងថា ទ្រង់បានរស់ឡើងវិញដើម្បីឲ្យមនុស្សស្លាប់បានរស់ឡើងវិញម្ដងទៀត ហើយដោយសារទ្រង់បានធ្វើដូច្នោះ នោះអ្នក និង ខ្ញុំ ក៏នឹងរស់ឡើងវិញដែរ ។ ខ្ញុំដឹងថា យ៉ូសែប ស៊្មីធ ដែលបានទទួលស្គាល់ថា លោកមិនឥតខ្ចោះដែរនោះ 15ជាឧបករណ៍ដ៏ជម្រើសនៅក្នុងព្រះហស្ដព្រះ ដើម្បីស្ដារឡើងវិញនូវដំណឹងល្អដ៏អស់កល្បដល់ផែនដី ។ ខ្ញុំក៏ដឹងថា ការណ៍ដូច្នោះ—មួយផ្នែកគឺតាមរយៈការបកប្រែព្រះគម្ពីរមរមន—លោកបានបង្រៀនខ្ញុំថែមទៀតពីក្ដីស្រឡាញ់របស់ព្រះ ទេវភាពរបស់ព្រះគ្រីស្ទ សេចក្ដីពិតដ៏អស់កល្ប និង អំណាចបព្វជិតភាព ច្រើនជាងព្យាការីផ្សេងទៀតដែលខ្ញុំធ្លាប់បានអាន ស្គាល់ និង ឮ ពេញមួយជីវិតនៃការស្វែងរករបស់ខ្ញុំ ។ ខ្ញុំដឹងថា ប្រធាន ថូម៉ាស អេស ម៉នសុន ដែលពេញដោយការលះបង់ និង រីករាយ អស់រយៈពេលជិត 50 ឆ្នាំ នៃការតែងតាំងរបស់លោកជាសាវកម្នាក់ គឺជាអ្នកស្នងដ៏ពេញសិទ្ធិចំពោះការបម្រើជាព្យាការីនៅសព្វថ្ងៃនេះ ។ យើងបានឃើញថាការបម្រើនេះ ធ្លាក់មកលើលោកម្ដងទៀតនៅក្នុងសន្និសីទនេះ ។ ខ្ញុំដឹងថា បុរស 14 នាក់ទៀតដែលអ្នកគាំទ្រ ជាព្យាការី អ្នកមើលឆុត និង អ្នកទទួលវិវរណៈ គាំទ្រលោកដោយដៃ ដួងចិត្ត និង កូនសោជាសាវករបស់ពួកគាត់ ។
ការណ៍ទាំងនេះ ខ្ញុំសូមប្រកាសដល់អ្នក ជាមួយនឹងការជឿជាក់ដែលពេត្រុសបានហៅថា « ពាក្យទំនាយដ៏ពិតជាង » ។ 16អ្វីដែលធ្លាប់ជាគ្រាប់ពូជដ៏តូចមួយនៃការជឿសម្រាប់ខ្ញុំ បានលូតលាស់ទៅជាដើមជីវិត ដូច្នេះ បើជំនឿអ្នកត្រូវបានសាកល្បងបន្តិចនៅពេលនេះ ឬ ពេលផ្សេងទៀត ខ្ញុំសូមអញ្ជើញអ្នកឲ្យរៀនពីខ្ញុំ ។ ខ្ញុំដឹងថា កិច្ចការនេះ គឺជាសេចក្ដីពិតរបស់ព្រះ ហើយខ្ញុំដឹងថា មានតែគ្រោះថ្នាក់ដល់យើងប៉ុណ្ណោះ ដែលអនុញ្ញាតឲ្យការសង្ស័យ និង ការអាក្រក់ទាញយើងចេញពីផ្លូវនេះ ។ ចូរមានសង្ឃឹម ។ ចូរបន្ដធ្វើដំណើរទៅមុខ ។ ចូរទទួលស្គាល់សំណួរ និង កង្វល់របស់អ្នកដោយស្មោះត្រង់ តែដំបូង និង ជានិច្ចតទៅ ត្រូវពង្រឹងជំនឿតិចតួចដែលអ្នកមានជាមុនសិន ព្រោះការណ៍ទាំងអស់អាចកើតឡើងបានដល់ពួកអ្នកដែលជឿ ។ ក្នុងព្រះនាមនៃ ព្រះយេស៊ូវគ្រីស្ទ អាម៉ែន ។