2010–2019
“Maing, I Patohwan Pwoson”
April 2013


“Maing, I Patohwan Pwoson”

Pohnese ni mehlel amwail peidek kan oh iren kapwunod kan, ahpw tepida mahs irip mpwul en amwail pwoson, pwehki mehkoaros kak pweida ong irail akan me kamehlele.

Ansou ieu Sises ketin kohdohng pwihn ieu wie akahkamaiong Sapwellime tohnpadahk ko. Ni ansou me Sounkomouro idekda kahrepen akamaio, pahpahn emen seri soumwahu kohla ih nda me e kolahng sapwellimen Sises tohnpadahk ko pwe irail en kapaiada nah pwutako, ahpw irail sohte kak. Ni ansou me ngihn pwutako wie tehtehrek te, ewe wie pwudopwudidahte, oh paliwere kin pitpitirekselihte nan pwehl, pahpao pekipek rehn Sises ni eh mweinte tihwohla:

E patohwan“Eri, komw ketin kupwure oh sewesei kiht, ma e kak pahmwi.

“Sises ketin mahsanihong, Ma e pahn kak pahi? Mehkoaros kak pweida rehn me kin pwoson.

“Ni ahnsowohte semen pwutako ahpw patohwanohng Sises, “Maing, I patohwan pwoson. Ahpw sohte itar. Komw ketin sewese kalaudehla ei pwoson.”1

Ahn ohl menet kamehlele, ni eh pein ndahda, sohte laud. Ahpw e ahniki anahn karuwaru, ni eh poakehla nah seri iehroso. Kitail esehier me met itarete. “Iei ma sohte palilahsang amwail anahn en kamehlele,”Alma pakairiki, “mweidohng anahn wet en doadoahk loalamwail lao en lel ni irair ehu me kumwail pahn kamehl[el]ehla.”2 Ni eh sohte koapwoaroapwoar luhwehdi, pahpa menet kihda uwen pwoson me e ahniki oh peki rehn Sounkomour en sampah, “Komw ketin kupwure, oh sewese, kiht, ma e kak pahmwi.3 I sohte kak wadek lepin lokaia pwukat ngehi sohte sengiseng. E sansal me lepin lokaia kihtwie doadoahk ni koasoandi. Dahme ohlo ndinda, “Aht peneinei pwon wie pekipek. Aht kahpwal sohte kin uhdi. Se solahr kakehng met. Se sehsehlahr dahme se pahn wia.Komw kak sawas? Se pahn kalahnganiki sohte lipilipil— me pahn kak kohdohng kiht—lepin kapai, ekis koapwoaroapwoar, kisin kamaiaudahn katoutou me ahn pwutake nohnohu kin weuwa rahn koaros en ah mour. Poakeikitala. Sewese kiht.”

“Ma e kak pahmwi,” me kohda sang pahpa menet pwurodohng ih, “Ma komw kak kamehlele,” Mwohnsapwo mahsanih. Powehdi kasongosongo, Krais doula, oh “mehkoaros kak pweida rehn me kin pwoson.4

“Ni ahnsowohte,” pwuhk sarawi mahsanih—kaidehn ni wawai de ni peikasal de ni repen me sapwung ahpw “ahnsowohte”—pahpao kasalehda ni mehlel ah medek nda, “Maing, I patohwan pwoson. Ahpw sohte itar. Komw ketin sewese kalaudehla ei pwoson.” Ni pasapengpen pwoson kapw oh tikitiko, Sises ketin kamwahuiala pwutako, oh kerenieng mwomwen kapwourada sang mehla ni duwen Mark eh kawehwe irairo.5

Ni medemedewe soai kempoake wet, I men patohieng me pwulopwul kan en Mwomwohdiso—pwulopwul ni sounpar en mour de sounpar en wia towe de ni sounpar en pwoson. Ni ehu wiepe de ni ehu tohrohr met iei kitail koaros.

Keieu me I kilang me pid ire wet iei me ni eh sohpai anahnepen pwoson, pahpao doadoahngki mahs ah kehl oh ihte mwurin met me e pohnese ah souitar. Me e tepin nda ni ngoang oh ni sohte pweipweiek: “Maing, I patohwan pwoson.” I pahn ndahieng kumwail koaros me men kalaude ah pwoson, taman ohl menet! Nan ansou kan en masepwehk oh peikasal, koledi dahme ke ahnikihier, mendahte ma e tikitik. Nan keirda me kitail koaros anahne lelohng nan mour wet, me pid pali ngehn me pahrekohng ahn pwutak menet kahpwal de ahn eh pahpao tihwo pahn kodohng kitail koaros. Ni ansou me irair pwukat pahn kohdo oh kahpwal kin pwarada, oh duwen eh pahn epwella sohte mwadangete sansal, koledi teng dahme ke esehier oh uh kehlail lao eripit kapatapat kohdo. Duwen soangen irair wette, mamanaman wette, me Sises mahsanih, “Ma mie pwoson rehmwail, mehnda ma e pahn uwehte kisin weren kadiring kis, kumwail pahn kak ndahng nahna wet, ‘Tohrekweisang met, tohrekla mwo,’ a e pahn wiawi. Kumwail pahn kakohng mehkoaros.”6Uwen amwail pwoson de pil uwen eripit me kumwail ahniki kaidehn ih me kesempwal—ahpw mehlel me kumwail kasalehda ong pwoson me kumwail ahniki oh mehlel me kumwail esehier.

Keriau me I kilang ekis te wiksang keieuo. Ni ansou me kahpwal kan kin kohdo oh peidek kin pwarada, kedehr tapiada ahmw ropirop en pwoson sang ni ndinda ia uwen me kesohte ahniki, pwehn tepisang ahmw “soupwoson.” Met duwehte aude teki en uhmw ni ewe! Na, mweidehng ie en sansal nan ire wet: I sohte pekipeki kumwail en mwomwehda ahniki pwoson me kumwail sohte ahniki. Iwie pekipeki kumwail en mehlelohng pwosonme kumwail ahniki. Ekei pak kitail kin wiahki me kasalehda peikasal ni mehlel wia kasalada en soupeikasaliki me pwung me dene ilehsang kasalahda mehlel en pwoson. Kaidehn! Eri kitail koaros tamataman kaweid sansal en pwuhk sarawi: Kin mehleliki amwail peidek kan ni uwen me kumwail anahne; mour direki peidek me pid ire ieu de ehu tohrohr. Ahpw ma kowe oh ahmw peneinei men kamwahula, kedehr mweidehng peidek pwuko en irehdihsang pwoson en elehieng manaman kapwuriamwei.

Pil patehng, ke ahniki pwoson laudsang me ke leme pwehki dahme Pwuken Mormon kahdaniki uwen laud en lipwe kan. 7 Kumwail pahn esehkin irail arail wiewia,” Sises mahsanih,8 oh wahn momourki tepin padahk kan en rongamwahuo sansal nan mour en Souleng en Imwin Rahn Akan wasa koaros. Ni duwen me Piter oh Sohn mahsanihong Parisi ko, I ndahiong kumwail, “Se sohte kak tokedihsang koasoakoasoia dahme pein kiht kilangehr oh rongehr,” oh dahme kitail kilangehr oh rongehr iei “manaman kapwuriamwei” nan mour en towe rar kei en Mwomwohdiso wet. Met sohte me kak kahmahmiki.9

Riei ohl oh lih akan, met iei doadoahk sarawi ehu me doudoula, me iangahki kapai kan me sansal wasa koaros, eri dehr pwunodiki ma kahpwal kin oh pwarada me anahne kitail en kasawih, wehwehki, oh kapwungala. Re kin oh re pahn. Nan Mwomwohdiso wet, dahme kitail ese kin ansou koaros kesempwalsang dahme kitail sohte ese. Oh taman, nan sampah wet, koaros en kin mouriki pwoson.

Eri me pid luwet en aramas—pein ahmw oh pil ahn irail akan me papah nan Mwomwohdiso wet me wia ohl oh lih me kin doadoahk ni tohnmetei. Likin Sapwellime Iehros unseko, Koht kin ketin sewsewese aramas me sohte unsek sangete ni tepin ansou. Met mwein inenen kapwunod ong Ih, ahpw e kin ketin apwaliala. Eri kitail pil konehng wia duwehte. Eri ni ansou me kumwail kin kilangada souitar akan, taman me esohte wia kisehn doadoahk sarawi wet. Ni duwen me emen sounnting mai men nda, ni ansou me unsekla sohte idi pahn pwilido, e sohte wia ahn leho sapwung ma mie me widekiei pwehki dahme kol leho eh sohte kak koledi pwehki mie idi.10 Wahr pwuko iangahki kowe oh ngehi, eri kin kanengamah oh mahk.

Keimwseklahn me I kilang: ni ansou me peikasal de kahpwal kin kohdo, kedehr masak peki sawas. Ma kitail kupwuriki ni karakarahk oh mehlel duwe pahpa menet, kitail kak alehdi. Pwuhk Sarawi kan kawehwe me “ineng” mehlel wet, iangahki “mohngiong unsek, dehr wiahda duwehte mwalaun akan oh dehr mwomwehda mwohn Koht.”11 Pwehn sapeng soangen pekipek wo Koht pahn ansou koaros kadarodo sawas sang pali koaros en irepen sampah oh lahng mehn kakehlailih atail pwoson.

I ndahier me I patpatohieng me pwulopwul kan. I wiewiahte met. Pwutak emen me sounpar 14 ndahieng ie me keren ni pweipweiek, “Brother Holland, I saikinte kak nda me Mwomwohdiso wet mehlel, ahpw I kamehlele me e mehlel.”I pwoalehdi pwutako lao pwoarin mese kan kerenieng pitiei. I ndahieng ih ni kehl en ngenie unsek mekamehleleiei lepin lokaia kesempwal, oh mwekidpe ahpwete kesempwalsang, oh e sohte anahne pekimahngki “kamehlelehte.”I ndahiong ih me Pein Krais mahsanih, “Komw dehr masak mehkot, komw pwosonte,”12 ire ieu me sewesehla Gordon B. Hinckley pwulopwulo ong nan misin.13 I ndahiong pwukat menet me kamehlele ansou koaros wia tepin sokosok ong esehla mehlel oh me ehuehu atail iren pwoson akan me kitail koaros kamehlele tepikihda, “Se kamehlele.”14 Oh I ndahiong ia uwen ahi pohliki pwehki ah mehlel nan ah ropirop.

Met sang sounpar 60 me I ahnikihier en mour oh esehla mwurin ei sounpar 14 oh kin kamehlelehte, I ndahiong kumwail soahng kei me I esehier met. I ese me Koht ni ansou koaros oh nan wiepe koaros oh irair koaros iei Samatail Nanleng limpoak. I ese me Sises iei ihte Sapwellime me unsek, me sapwellime mour meiroangla ni limpoak sang ni kupwur en koaros Sahmo oh Iehros ong komourpen kitail koaros me sohte unsek. I ese me e ketin iasadahsang mehla pwurehng mour, oh pwehki Eh wia met, kowe oh ngehi pil pahn. I ese me Joseph Smith, me pohnese me e sohte unsek,15 ahpw mendahte wia soun doadoahk pilipilda nin limen Koht pwehn kapwurehdo rongamwahu poatoapoato ong sampah oh I ese me ni eh wia met—ni mehlel sang ni kawehwehdi Pwuken Mormon—padahkihieng ie ahpwete laudla duwen Sapwellimen Koht limpoak, duwen Krais eh sarawi, oh ahpwete laudla duwen manaman en priesthood, laudsang sohte soukohp liki me I wadekehr, esehier, de rongehr nan mour ehu en ropirop. I ese me President Thomas S. Monson, me mwekmwekidlahng ni loaloapwoat oh peren sounpar 50 en eh kasarawi ni duwen Wahnpoaron, iei me kolokol pwukoa en malipilip en soukohp ni pwung rahn wet. I ese me ohl 14 teikan me kumwail utung ni duwen soukohp, ohl sarawi, oh soun kihla kaudiahl kin utung ih ni pehrail, mohngiongirail, oh kih en wahnpoaron me re pein kol.

Soahng pwukat I ndahiong kumwail sang ni kamehlel me Piter mahsanih me iei mahsen ahpwete mehlel en “kokohp.”16 Dahme mahs kisin werentuhke en pwoson ong ie keirdahr ong tuhkehn mour, eri ma omw pwoson kin ekis kasongosong ansou wet de ansou tohrohr, I lukeikumwail en ale kisehn ahi e. I ese me doadoahk wet Sapwellimen Koht mehlel. Ihte ni eh pahn keper ong kitail me kitail pahn mweidehng peikasal de tepel kan en keseikitailsang pohn ahlo. Koapwoaroapwoar. Seiloakwei. Pohnese ni mehlel amwail peidek kan oh iren kapwunod kan, ahpw tepida mahs irip mpwul en amwail pwoson, pwehki mehkoaros kak pweida ong irail akan me kamehlele. Ni mwaren Sises Krais, ahmen.