« E te Fatu, ua faaroo vau »

I te hoê taime ua farerei mai Iesu i te tahi pŭpŭ taata o te mârô ra ma te riri rahi i Ta’na mau pĭpĭ. A ani ai te Fatu no ni‘a i te tumu no teie mârôraa, ua haere mai te metua tane o te hoê tamaiti ma‘i i mua, ma te parau e, ua haere mai oia e farerei i te mau pĭpĭ a Iesu no te hoê haamaitairaa no ta’na tamaiti, aita râ i ti‘a ia ratou ia horo‘a i te reira. Te aati noa ra te tamaiti i to’na niho, te uha ra te vaha, e te taaviri noa ra i raro i te repo, ua ani atura te metua tane ia Iesu ma te reo taparu :

« E i tia ia oe ia rave ra, aroha mai oe ia matou, e e tauturu mai.

« Ua parau atura Iesu ia’na, I tia ia oe ia faaroo ra, e tia te mau mea atoa nei i te taata i faaroo.

« Ua pii noa maira te metua tane o taua tamaiti ra i reira ra, na o maira ma te roimata, E te Fatu, ua faaroo vau, e turu mai oe i ta’u faaroo paruparu nei ».¹

Na roto i ta’na iho parau, e mea iti te ti‘aturiraa matamua o teie taata. Tera râ, e hinaaro rahi to’na no ta’na hoê noa iho tamaiti. Ua parauhia mai tatou e ua rava‘i te reira no te haamataraa. Ua parau mai Alama e, « noa’tu aita i tia ia outou, maori râ o te hinaaro noa ia ti‘aturi ; a vaiiho i taua hinaaro ra ia tupu i roto ia outou ra e tae noa’tu i te faaroo iti haihai ».² Aita’tu ai e tia‘iraa, ma te faaite i to’na faaroo e vai ra, ua taparu a‘era teie metua tane i te Faaora o te ao nei, « I tia ia oe ia rave ra, aroha mai oe ia matou [e tauturu oe ia matou ».³ Aita roa ta’u e nehenehe e tai‘o i teie mau parau ma te ta‘i ore. Ua faaohipa-maite-hia te parau ra matou ma te hinaarohia. Te na ô ra teie taata e, « Te taparu nei to matou utuafare taatoa. Aita roa to matou pe‘ape‘a e hope nei ; aita roa. Tei te hopea matou i to matou taura. Aita matou i ite o vai atu â ta matou e nehenehe e fariu atu. E nehenehe anei ta oe e tauturu mai ? E mauruuru roa matou i tei tia ia oe ia horoa mai—hoê pae no te haamaitairaa, e hi‘oraa iti no te ti‘aturi, te faaoreraa i te mauiui tei amohia e te metua vahine o teie tamaiti i te mau mahana atoa no to’na oraraa.

« I tia ia oe ia rave ra, » te parau a taua metua tane ra, ua ho‘i faahou mai ia’na ra te parau a te Fatu « I tia ia oe ia faaroo ra, »⁴

Te na ô ra te irava parau e « Ua pii noa maira »—e ere teie i te parau mărû e aore râ i te parau ti‘aturi ore. Ua ta‘i mai te metua ma te mauiui rahi o te hoê metua, « E te Fatu, ua faaroo vau, e turu mai oe i to’u faaroo paruparu nei ». Te parauhia ra i roto i te Mareko e ei pahonoraa i teie faaroo apî e te faaroo papû ore rii, ua faaora mai Iesu i te tamaiti, ma te faati‘araa mai ia’na i ni‘a mai raro mai i te pohe, mai tei faaitehia e Mareko.⁵

Ma te faaohiparaa i teie mau irava parau no te papairaa mo‘a, te hinaaro nei au e parau ti‘a roa’tu i te feia apî no te Ekalesia—feia apî i te pae matahiti paari e aore râ feia apî e riroraa mai ei melo no te Ekalesia e aore râ feia apî i te rahiraa matahiti no te faaroo. O tatou pauroa atoa ïa teie, e ere anei !

Te hi‘oraa matamua o teie aamu, oia ho‘i, a faaruru ai i te tamataraa o te parau no te faaroo, ua faahiti mai te metua tane i to’na puai na mua, e i reira noa iho to’na faahitiraa mai i to’na oti‘a. E mea papû ta’na parau faahiti matamua e aita e măta‘uraa : « E te Fatu, te ti‘aturi nei au ». Te parau atu nei au i te mau taata atoa o te hinaaro nei ia rahi mai te faaroo, a haamana‘o i teie taata ! I te mau taime no te taiâ e aore râ te feaa e aore râ te taime fifi rahi, a tape‘a noa i tei mau ia outou, noa’tu e e mea iti te reira. I roto i te haereraa i mua, e faaruru tatou paatoa i te mau tamataraa o te oraraa tahuti nei, e tae mai i ni‘a ia tatou paatoa, i te pae varua, te tahi mauiui tu‘ati i te mauiui o teie tamaiti e aore râ i te hepohepo o teie metua. Ia tae ana‘e mai taua mau taime ra e te mau uiraa, e aita te rave‘a e vai ra e tae oioi mai, a tape‘a maite noa i te mau mea ta outou i ite a‘ena e a vai puai noa e tae roa’tu ua tae mai te tahi faahou â ite. Teie ta Iesu i parau mai no ni‘a i teie ohipa, teie ihoa ra semeio, « Ahiri e faaroo to outou, e mai te hoê huero sinapi noa iho te rahi, e tia ïa ia outou ia parau noa’tu i teie nei mou‘a, A haere i ǒ atu, e na’na ïa e haere noa, e aita roa e mea e ore e tia ia outou ».⁶ E ere te fifi te rahi o to outou faaroo e aore râ to outou ite i te tumu parau—o te huru parau-ti‘a ra ta outou e faaite mai no te faaroo ta outou e mau nei e te parau mau ta outou i ite a‘ena.

Te piti o te hi‘oraa, e mea taa ê rii i te matamua ra. Ia tupu ana‘e mai te mau fifi e te mau uiraa, eiaha e haamata i ta outou titorotororaa no te faaroo na roto i te parauraa e aita roa ta outou, inaha e riro mai te reira mai to outou huru « ti‘aturi ore » ra. E mea fifi roa te reira. E haapapû atu vau i teie tumu parau : Aita vau e ani atu nei, ia faahua outou i te faaroo o ta outou e ore e mau nei. Te ani atu nei râ vau ia outou ia vai parau mau noa no te faaroo ta outou e mau ra. I te tahi mau taime, te rave nei tatou mai te mea ra e, te faaiteraa i to tatou mana‘o feaa, e faaiteraa rahi a‘e no te itoito morare i te faaiteraa haavare ore o te faaroo. E ere roa ïa ! No reira, a haamana‘o noa na tatou paatoa i te parau papû no teie aamu i roto i te papairaa mo‘a. A haapapû maitai i ta outou mau uiraa ; e mea rahi mau te mau uiraa no ni‘a i tera tumu parau e tera tumu parau. Tera râ, mai te mea e ua hinaaro outou e to outou utuafare ia faaorahia outou, eiaha e vaiiho i taua mau uiraa ra ia haafifi mai i te faaroo e faatupu ra i to te reira semeio.

Taa ê atu i te reira, ua rahi roa’tu â to outou faaroo i ta outou e mana‘o nei no te mea te parau nei te Buka a Moromona i te reira « te rahi o te mau ite i noaa mai ia ratou ra ».⁷ Ua parau mai Iesu e, « E ite outou ia ratou i to ratou hoturaa »,⁸ e te itehia nei te hotu o te oraraa i te evanelia i roto i te oraraa o te Feia Mo‘a i te Mau Mahana Hopea nei na te mau vahi atoa. Mai ta Petero e o Ioane i parau i te mau taata i mutaa ihora, te parau atu nei au ia outou, « E ore ho‘i matou e tia ia ore ia parau i ta matou i hi‘o a‘enei e i faaroo a‘enei, » e te mea ta tatou i ite e i faaroo « ua tupu mau te semeio rahi » i roto i te oraraa o te milioni rahiraa melo no teie Ekalesia.⁹ Aita e pato‘iraa i te reira.

Te mau taeae e te mau tuahine, e ohipa teie na te Atua o te tupu noa nei, e itehia te mau faaiteraa e te mau haamaitairaa no teie ohipa na te mau vahi atoa, no reira eiaha e haape‘ape‘a rahi mai te mea e e tupu mai te fifi i tera taime e tera taime, o te tia ia hi‘opo‘ahia, ia taahia, e ia faaafarohia. E tupu mai ihoa te reira. I roto i teie Ekalesia, e mea faufaa a‘e te mau mea ta tatou i ite i te mau mea tei ore i itehia e tatou. A haamana‘o, i roto i teie ao, e haere te mau taata atoa ma te faaroo.

No reira a faaoroma‘i i te mau hape a te taata nei—to outou iho e to vetahi o te tavini ra i roto i teie Ekalesia e arata‘ihia nei e te mau tane e te mau vahine na roto i te hinaaro mau. Taa ê noa’tu i Ta’na Tamaiti Fanau Tahi maitai roa a‘e, e mau taata hapehape ana‘e ta te Atua e ohipa nei mai te omuaraa mai o te tau. E mea fifi roa paha teie Na’na, tera râ te faaoroma‘i noa nei Oia. A na reira ana‘e tatou. E no reira ia ite ana‘e outou i te mau hapehape, a haamana‘o e ere te oti‘a tei i roto i te hanahana no teie ohipa. Mai ta te hoê taata papa‘i parau aravihi i papa‘i, ia maniihia mai te îraa o te mure ore, e ere na te hinu te hape mai te mea ua manii mai te reira na rapae, no te mea râ e, eita ta te mau vairaa iti e nehenehe e farii pauroa i te reira.¹⁰ O outou e o vau nei teie mau vairaa iti, no reira a faaoroma‘i e a hamani maitai i te taata e a faaore i te mau hape.

Te hi‘oraa hopea : Ia tae ana‘e mai te feaa e aore râ te fifi, eiaha e măta’u i te ani atu i te tauturu. Mai te mea e hinaaro mau tatou ma te haehaa e te parau mau, mai ta teie metua tane i rave, e nehenehe ta tatou e farii i te reira. Te na ô ra te papa‘iraa mo‘a e « ma te hinaaro mau, ma te aau tae mau, ma te faahua ore e te haavare ore i mua i te Atua ».¹¹ Te faaite papû nei au e i roto i teie pahonoraa i teie huru taparuraa, e tono mai te Atua i te tautururaa no na pae e piti o te paruru no te haapuai mai i to tatou ti‘aturiraa.

Te parau nei au e te aparau atu nei au i te feia apî. E mea apî noa â vau. Ua parau iho mai nei te hoê tamaiti e 14 matahiti te paari ia’u ma te otohe rii, « Elder Holland, aita ta’u e nehenehe e parau i teie nei e, ua ite au e parau mau te Ekalesia, tera râ te ti‘aturi nei au e parau mau ihoa ». Ua tauahi atu vau i taua tamaiti ra e tae roa ua oru mai to’na na mata. Ua parau atu vau ia’na ma te puai o to’u varua e, e parau faufaa rahi roa te ti‘aturi, are‘a te parau ra ia rave, ua hau atu ïa i te faufaa, e aita roa e titauhia ia’u ia tatarahapa no te « ti‘aturi-noa-raa ». Ua parau atu vau ia’na e ua parau mai te Mesia iho, « Eiaha e măta’u ; e ti‘aturi noa »,¹² e parau ho‘i teie ta te tamaiti Gordon B. Hinckley i afa‘i atu i te misioni.¹³ Ua parau atu vau i teie nei tamaiti, o te ti‘aturi te taahiraa matamua e tae atu ai i te ite-papû-raa, e haamatahia to tatou faaroo amui i te parau ra « Te ti‘aturi nei matou ».¹⁴ E ua parau atu vau ia’na e ua faahiahia roa vau ia’na no to’na parau-ti‘a i roto i ta’na imiraa.

I teie nei, i te faufaa i roaa mai ia’u fatata e 60 matahiti i tei nei, mai te haamataraa mai to’u 14 matahiti paari i te ti‘aturiraa, te faaite atu nei au i te tahi mau mea ta’u i ite i teie nei. Ua ite au i te mau taime atoa e i te mau huru atoa e o te Atua to tatou Metua here i te Ao ra. Ua ite au e o Iesu ana‘e iho Ta’na Tamaiti Fanau Tahi maitai roa, tei horo‘a ma te here i To’na ora ma te hinaaro o te Metua e te Tamaiti iho no te faaoraraa i te taata atoa e ere ho‘i i te mea maitai roa. Ua ite au e ua Ti‘a mai Oia mai taua pohe mai ra ia ora faahou, e no te mea ho‘i e, ua na reira Oia, e na reira atoa ïa tatou. Ua ite au e o Iosepha Semita iho tei parau mai e e ere oia i te mea maitai roa, noa’tu râ i te reira,¹⁵ o oia te mauihaa ma‘itihia i te rima o te Atua no te faaho‘i mai i te evanelia mure ore i te fenua nei. Ua ite atoa vau e na roto i te reira—na roto ihoa râ i te iritiraa i te Buka a Moromona—ua rahi roa’tu ta’na i haapii mai ia’u no ni‘a i te here o te Atua, te hanahana o te Mesia, e te mana autahu‘araa i ta te tahi atu peropheta ta’u i tai‘o i te parau, ta’u i mâtau, e aore râ i faaroo i roto i te maororaa o te oraraa imiraa. Ua ite au e o te Peresideni Thomas S. Monson, o te fatata nei i te 50 matahiti mai to’na faatoro‘araahia ei Aposetolo, te mono tano no teie ti‘araa peropheta i teie mahana. Ua ite au e e 14 atu â mau taata ta outou e paturu nei e peropheta, e hi‘o, e e heheu parau, o te paturu nei ia’na i to ratou rima, to ratou aau, e ta ratou iho mau taviri aposetolo.

Te faaite papû atu nei au i teie mau mea atoa ia outou ma te ti‘aturiraa mai ta Petero i parau ra e, « te parau a te mau peropheta tia rahi roa’tu ».¹⁶ Te huero iti no te faaroo no’u nei ua tupu mai ïa ei tumu raau no te ora, no reira mai te mea ua tamata-rii-hia to outou faaroo i roto i teie e aore râ te tahi atu tau, te ani atu nei au ia outou ia turu‘i mai i ni‘a i to’u faaroo. Ua ite au e, e parau mau na te Atua teie ohipa. I to tatou noa pau, e faati‘a ai tatou i te feaa e aore râ te mau diabolo ia ruri ê ia tatou i teie ohipa. A ti‘aturi noa. A nuu i mua. A fa‘i i ta outou mau uiraa e mau fifi, tera râ, na mua roa e a muri noa’tu, a tahirihiri arahu i to outou faaroo, no te mea, e tupu ihoa te mau mea atoa ia ratou o te ti‘aturi. Na roto i te i‘oa o Iesu Mesia, amene.