Kev Ua Txij Ua Nkawm: Saib thiab Kawm

Muaj ib hmo ob peb xyoos tas los, kuv tus poj niam thiab kuv wb mus xyuas wb ib tug tub thiab nws tus poj niam thiab cov me nyuam nrog lawv noj hmo. Yeej muaj suab nrov thiab kev lom zem raws li ib txwm muaj thaum yus nrog ib tsev neeg uas mauj me nyuam yaus. Tsis ntev tom qab peb noj hmo, wb tus xeeb ntxwv uas muaj plaub xyoos, Anna, thiab kuv wb tseem zaum ntawm lub rooj noj mov. Nws paub tias kuv tsis ua dab tsi, ces nws sawv ncaj saum lub rooj zaum thiab ntsia ntsoov kuv. Thaum nws paub tias kuv saib nws, nws txib kuv “saib thiab kawm.” Ces nws seev cev thiab hu ib zaj nkauj rau kuv.

Anna tej lus qhia kom kuv “saib thiab kawm” yog lub tswv yim los ntawm ib tug me nyuam yaus. Peb kawm tau ntau thaum peb saib thiab xav txog tej yam uas peb tau saib lawm. Zoo li tau hais no lawm, cia kuv qhia nej txog ob peb lub ntsiab cai uas kuv tau saib thiab kawm los ntawm kev ua txij nkawm zoo kawg uas rau siab ntseeg. Tej ntsiab cai no ua rau tib neeg txoj kev ua txij ua nkawm muaj zog uas ua raws li tej ntsiab cai los saum ntuj ceeb tsheej los. Kuv caw nej nrog kuv saib thiab kawm nrog kuv.

Qhov ib, kuv tau saib hais tias kev ua txij ua nkawm uas zoo siab tshaj yog thaum tus txiv thiab tus poj niam xav tias nkawd txoj kev sib raug zoo yog ib lub hlaws uas muaj nqi tshaj plaws, ib qho uas muaj nqi tshaj txhua yam. Nkawd ob leeg ncaim nkawd leej txiv thiab leej niam thiab nkawd ob leeg tsa kev ua txij nkawm uas yuav vam meej nyob mus ib txhis. Nkawd to taub hais tias nkawd taug ib txoj kev uas Vajtswv tsa rau nkawd. Nkawd paub tias tsis muaj kev sib raug zoo ntxiv uas yuav ua rau nkawd muaj kev xyiv fab, kev zoo, los yog pab nkawd loj hlob npaum li qhov no. Cia li saib thiab kawm: tus khub zoo tshaj plaws saib nws txoj kev ua txij ua nkawm rau nqi tshaj txhua yam.

Qhov ob yog kev ntseeg. Kev ua txij ua nkawm nyob mus ib txhis uas zoo lub hauv paus yog kev ntseeg tus Tswv Yexus Khetos thiab kev ua raws li Nws tej lus qhia.¹ Kuv twb pom tej khub niam txiv uas muaj kev ua txij ua nkawm zoo lawv xyaum ua raws li lawv txoj kev ntseeg: lawv mus rau kev sib ntsib txais lub cim nco txog, muaj tsev neeg hmo ua ke, thov Vajtswv thiab kawm vaj lug kub ua ke thiab them ib feem kaum. Lawv xav mloog Vajtswv lus thiab ua zoo. Lawv tsis xav tias lawv yuav xaiv ua raws li tej lus txib uas lawv nyiam xwb.

Kev ntseeg yog lub hauv paus ntawm txhua qhov zoo uas txhawb nqa kev ua txij ua nkawm. Kev txhawb nqa kev ntseeg yeej txhawb nqa kev ua txij nkawm. Kev ntseeg loj tuaj thaum peb ua raws li cov lus txib, thiab kev sib haum xeeb thiab kev xyiv fab ntawm txoj kev ua txij nkawm kuj loj tuaj. Yog li ntawd, yuav tsum ua raws li cov lus txib kom muaj tej kev ua txij ua nkawm nyob mus ib txhis uas ruaj khov kho Cia li saib thiab kawm: kev ntseeg tus Tswv Yexus Khetos yog lub hauv paus ntawm kev ua txij nkawm nyob mus ib txhis uas zoo siab.

Qhov peb, kev hloov siab lees txim. Kuv tau kawm tias kev ua txij nkawm zoo siab siv lub txiaj ntsim kev hloov siab lees txim. Kev hloov siab lees txim yog ib qho tseem ceeb ntawm txhua txoj kev ua txij ua nkawm zoo. Tej khub niam txiv uas ua siab ncaj ntsuam xyuas lawv tus kheej tsis tu ncua thiab tsis tos kom hloov siab lees txim thiab ua zoo dua, tej ntawd muaj kev nplij siab hauv lawv txoj kev ua txij ua nkawm. Kev hloov siab lees txim pab lawv muaj kev sib haum xeeb thiab kev kaj siab lug.

Kev txo hwj chim yog lub ntsiab ntawm kev hloov siab lees txim. Kev txo hwj chim tsis yog kev ua qia dub. Thaum yus txo hwj chim yus tsis yuam kom muaj raws li yus xav los yog hais lus zoo li yus coj ncaj ncees dua lwm tus. Tiam sis kev txo hwj chim yog kev hais lus mos muag² thiab kev mloog kom thiaj to taub, tsis ua kev pauj. Kev txo hwj chim yog thaum yus paub tias yus hloov tsis tau lwm tus, tiam sis yog yus muaj kev ntseeg, yus sib zog thiab muaj Vajtswv txoj kev pab, peb yuav muaj ib txoj kev hloov siab loj heev.³ Kev muaj kev hloov siab loj heev ua rau peb ua zoo rau lwm tus, qhov tseem ceeb yog peb cov khub.⁴ Kev txo hwj chim txhais hais tias cov niam tsev txiv tsev ib leeg foom koob hmoov, pab thiab txhawb nqa ib leeg; txhua lub sij hawm lawv xav txog tus khub ua ntej. Cia li saib thiab kawm: kev hloov siab lees txim thiab kev txo hwj chim ua rau yus txoj kev ua txij ua nkawm muaj kev zoo siab.

Qhov plaub, kev saib taus. Kuv twb pom hais tias thaum muaj kev ua txij ua nkawm zoo siab, tus txiv neej thiab tus poj niam ib leeg saib taus ib leeg. Tej kab lig kev cai los ntawm ib qhov chaw los sis ib lub sij hawm twg uas qhia tias cov txiv neej yuav tsum tswj kav lawv cov poj niam los sis saib cov poj niam zoo li lawv tsis tseem ceeb npaum li txiv neej tej ntawd yeej tsis yog raws li Vajtswv txoj kev cai thiab yuav tsum muab tej ntsiab cai thiab tej kev cai uas yog pauv tej uas tsis yog ntawd.

Tej khub niam txiv uas ua txij ua nkawm zoo txiav txim txog tej yam ua ke, nkawd ob leeg koom tes pab thiab muaj lub suab sib npaug thiab pom zoo ib yam.⁵ Nkawd tsom ntsoov rau nkawd lub tsev ua ntej thiab ib leeg pab ib leeg nrog nkawd tej kev lav ris.⁶ Nkawd txoj kev ua txij ua nkawm yog los ntawm kev koom tes, tsis muaj kev sib ceg. Lub sij hawm noj hmo thiab sij hawm tom qab ntawd yog lub sij hawm tseem ceeb txhua hnub thiab nkawd ua zoo npaum li nkawd ua tau thaum lub sij hawm ntawd. Nkawd tua cov tshuab siv hluav taws xob thiab tso kev lom zem tseg kom sib pab ua tej dej num hauv tsev. Yog muaj sij hawm, nkawd nyeem nrog nkawd cov me nyuam txhua hmo thiab koom tes muab cov me nyuam pw. Txhua hmo nkawd mus pw tib lub sij hawm. Yog muaj sij hawm, cov txiv tsev thiab niam tsev ua hauj lwm ua ke ua txoj hauj lwm tseem ceeb tshaj plaws---yog txoj hauj lwm uas peb ua hauv peb tsev.

Thaum yus saib taus lwm tus, yus kuj tsis zais siab, uas kuj yog ib qho tseem ceeb ntawm txoj kev ua txij nkawm uas zoo siab. Tsis muaj tej yam tseem ceeb uas neeg muab zais tsis pub tus khub paub thaum muaj kev saib taus lwm tus thiab kev tsis zais siab. Cov txiv tsev thiab cov poj niam txiav txim siab txog nyiaj txiag ua ke, thiab nkawd ob leeg saib tau txhua qhov kev xov xwm.

Kev tso siab rau yog ib qho kev saib taus lwm tus. Cov yaj saub qhia hais tias ib khub niam txiv zoo yeej “ib leeg tso siab plhuav rau ib leeg”.⁷ Nkawd sib tham hauv Internet raws li kev tsim nyog xwb. Nkawd tsis muab tej yam nkawd ua hauv Internet zais tsis pub tus khub paub. Nkawd ib leeg qhia ib leeg txog nkawd tej lus password rau kev sib tham hauv Internet. Nkawd tsis saib lwm tus neeg nyob hauv Internet uas yuav ua rau nkawd tus khub txoj kev cia siab ploj mus. Nkawd tsis ua los yog hais ib yam dab tsi uas muaj ntsis tsis tsim nyog, txawm nyob hauv Internet los yog ntawm sab nqaij daim tawv. Cia li saib thiab kawm: tej kev ua txij ua nkawm zoo yeej muaj ib khub niam txiv uas ib leeg saib taus thiab tso siab plhuav rau ib leeg, thiab tsis zais siab.

Qhov tsib, kev hlub. Kev ua txij ua nkawm zoo siab tshaj muaj cov neeg uas rau siab ua raws li ib lo lus txib zoo kawg---kom peb “nyob ua ke nrog txoj kev sib hlub.”⁸ Hais txog cov txiv tsev, tus Tswv txib hais tias, “Koj yuav tsum hlub koj tus poj niam nrog tag nrho koj lub siab, thiab yuav tsum npuab nws thiab txhob npuab lwm tus hlo li.”⁹ Ib phau ntawv coj lub Koom Txoos qhia hais tias: “Lo lus npuab txhais hais tias yus tso siab plhuav thiab mob siab rau ib tug.” Ib khub niam txiv muab siab npuab Vajtswv thiab ib leeg pab thiab hlub ib leeg thiab ua raws nraim li tej kev khi lus uas nkawd khi lus ua ke thiab khi lus rau Vajtswv.” Tus txiv thiab tus poj niam “tso nkawd lub qub neej tseg thiab tsa nkawd txoj kev ua txij ua nkawm ua qhov tseem ceeb tshaj plaws. ... Nkawd tsis cia lwm tus neeg los yog lwm yam yuav tseem ceeb dua kev ua raws li tej kev khi lus uas nkawd khi nrog Vajtswv.¹⁰ Cia li saib thiab kawm: tej khub niam txiv zoo yeej ib leeg tso siab plhuav rau ib leeg.

Muaj tej tug neeg uas lawv txoj kev ua txij ua nkawm tsis zoo siab npaum li lawv xav muaj, cov uas tsis tseem tsis tau yuav poj niam los yuav txiv, twb sib nrauj, muaj me nyuam tiam sis tsis muaj tus khub, los yog muaj tej xwm txheej uas ua rau lawv yuav tsis tau poj niam los yog txiv. Tej xwm txheej no ua rau yus muaj kev nyuaj siab thiab sim yus lub siab, tiam sis tej yam no yuav tsis nyob mus ib txhis. Rau nej cov uas raug tej yam zoo li no tiam sis tseem “zoo siab ua txhua yam [nej] ua tau”¹¹ kom nyiaj tau, thov Vajtswv foom koob hmoov rau nej. Cia li nrhiav kom muaj txoj kev ua txij ua nkawm nyob mus ib txhis, tsis hais los ntawm kev npaj ua ib tug khub tsim nyog los yog. Ua raws li cov lus txib, thiab tso siab rau tus Tswv thiab Nws txoj kev hlub zoo tag nrho rau nej. Muaj ib hnub nej yuav txais txhua txoj koob hmoov ntawm kev sib yuav.¹²

Ib nqe vaj lub kub zoo kawg nyob hauv Phau Ntawv Maumoos hais tias, “Thiab lawv tau sib yuav, thiab muab lawv rau lwm tus sib yuav, thiab tau koob hmoov raws li tej kev cog lus ntau uas tus Tswv tau cog rau lawv lawm.”¹³ Tus Tswv cog lus rau cov uas ua raws li tus txheej txheem ntawm lub neej uas ua rau peb muaj tej kev ua txij ua nkawm zoo siab thiab dawb huv. Peb yuav txais cov koob hmoov no thaum peb rau siab ua raws li Yexus Khetos txoj moo zoo.

Kuv ris Vajtswv txiaj rau kuv tus poj niam zoo kawg, Kathy, uas yog kuv tus hlub.

Kev ua txij ua nkawm yog ib lub txiaj ntsim los ntawm Vajtswv rau peb; qhov uas peb muaj tej kev ua txij nkawm zoo yog ib lub txiaj ntsim peb pub rau Nws. Kuv ua tim khawv txog peb Leej Txiv Saum Ntuj Ceeb Tsheej txoj hau kev zoo kawg nkaus, uas qhib kev rau peb muaj kev ua txij ua nkawm nyob mus ib txhis. Los ntawm Yexus Khetos lub npe, amees.